ملحوظة على الهامش:
(أحمد دا كان بيتخانق مع واحد في امتحان شفوي 2 مدني، والواد ضربه وكان بيعيط، وأنا اللي دافعت عنه ومشيت الولا التاني)
تقريبًا عشان أنا بقوله احترم الدين، فبيحسب إن بتوع الدين دول هفأت
ربنا يسامح اللي نشر الصورة دي عن "المسلمين"

الحمد لله رمضان بيخلص وأنا معرفش أسماء مسلسلات رمضان، غير أربع مسلسلات اللي معمول عليهم كلام،
والمعظم بيشتم فيهم ودي حاجة كويسة

وهفضل كل شوية أي حد هينزل عن المسلسلات أو الأفلام هشيله، حتى لو أقرب واحد ليا، عشان مظنش إنك عنده شك إن المشاهدة دي حرام، فأنا مش هفضل وجوده عندي عشان هو صاحبي، على حساب إني استسيغ أشوف صور الممثلات أو مقاطع أو إن الناس عادي بتتفرج لأنها: مما عمَّ به البلوى!
ماشي عمَّ به البلوى، بس مفيش اختلاف على حُرمته!
يبقى نحاول نرجعه حرام وبيتم تناوله في الخفاء، مش للدرجادي

لو كل بوست نازل، عشرة بس من أصحاب الشخص نصحوه في الكومنتات، هو هيمسح البوست على الأقل من باب: ياعم بلاش صداع، أهو مسحته

ودي أولى المراحل في ترك العادات المعفة دي

أنا مبطلتش أنزل بوستات عن الكورة غير لما الشيخ/ عم الناس، ربنا يفك أسره يارب
كان كل شوية يعملي رياكت غضب على البوست، وينصحني في البوست

فمكنتش بنزِّل عشان: الشيخ هيعلق على البوست، أو هيزعل، فخلاص مش هنزِّل

وبعد كدا بقيت مبنزلش عشان حسيت إنه حاجة غلط، أو مش حاجة كويسة إنها تتكتب يعني
وهكذا
فأي حاجة حرام بدايتها بتكون بتركها بأي سبب تاني عشان حكمها الديني، دا شيء عادي جدًا، وبعد كدا الترك هيكون لله
زي الصلاة أو العبادات بتكون لازم تصلي، لأي سبب، حتى لو بأقل الحضور بأداء الحركات والألفاظ وبس، بس لازم التأدية، حتى لو جاي تصلي عشان باباك هيزعق لك، أو صاحبك هيصدعك
وبعدين مرة ومرة هيجي الحضور القلبي، وهتصلي عشان هي فرض وخلافه

ففي العبادات لازم الإتيان، وبعد كدا نشوف الباقي
وفي المحرمات لازم الترك، وبعد كدا نشوف الأسباب
.

موضوع الكتابة على الفيس أو الميديا عمومًا، ده أشبه بتأكيد المعصية، وعدم التوبة منها !
شخص بيتفرج على فيلم أو بيسمع أغنية، أو غيبة، أو بيجي على باله حاجة غلط
فيروح على الفيس يكتب الكلام أو الأغنية أو يشيَّر المقطع!
أو بعد ما يتصور مع أخته أو خطيبته أو هي تتصور، بحجاب غير شرعي أو مكياج أو بوضع لا يجوز أو بضحك وخلافه من الأمور التي لا تجوز، ينزلوا صورهم على الفيس!
بدل ما يتوب منها، أو يخليها في دماغه وخلاص
لأ، دا رايح يأكدها على الفيس، ويكتبها في صحيفته قبل ما تتكتب على الفيس بوك أو الميديا!
(أيوة أنا بتفرج على كذا)
(أيوة أنا بسمع كذا ومتابع التريند وفاهم في كل حاجة)
(أيوة أنا معنديش حياء، وهدومي هدوم شياكة وعشان شكلي حلو مش لحجب الزينة)

ومثلاً مش بعد ما بيحقق الضحك والهزار والناس بتضحك، تاني يوم يشيلها بقى؟
ما خلاص الموضوع خلص؟ ما أكيد مكنش فيه نية لله في البوست؟ دي شهوة وأنت رجعتها في البوست وخلاص
لأ، بتفضل موجودة برده!
أسلوب غريب جدًا لتثيت الخطئية في ذهنك وفي ذهن الناس وفتنتهم !
تثبيت للخطيئة في الصحيفة، زي تثبيت المعلومة الدراسية: بيستعمل حواس التفكير والبصر والكتابة والسمع!
شيء عجيب
ومجاهرة بمعصية
وفتنة للناس
وللمؤمنين
.

هكتب كلام رايق عن موضوع التدخين دا في رفض العريس
هو وجهة نظر شخصية، زي ما أي حد بيتكلم في الموضوع بيتكلم بوجهة نظره الشخصية وبنصيحته
عشان بتضايق من طريقة تناول الموضوع

على الفطار كدا إن شاء الله

أهوى هوى الدين واللذاااات تعجـبني
فـكـيـف لي بهـوى اللذات والديييين؟!

لو كانت الصلاة شهر واحد في السنة
أو كان الحجاب شهر واحد في السنة
أو كانت صلاة الجماعة شهر واحد في السنة
كانت هتُؤتَى بأفضل هيئة، وأفضل صورة
وهيتم السؤال عن كل تفصيلة صغيرة في أحكام الصلاة وشروط الحجاب وأحكام صلاة الجماعة

لكن اللي فرض الصيام شهر واحد في السنة هو اللي فرض الصلاة يوميًا
وصلاة الجماعة يوميًا
والحجاب أمام الأجانب يوميًا
وبأدق شروطهم وأركانهم وفروضهم وسننهم
1

لا إله إلا الله
حديث كل لفظ فيه قوي أوي
بدايته قسم رسول الله بالله! صلى الله عليه وسلم

الخروج من رمضان ولو بالمعنى ده بس، مكسب عظيم جدًا
تعظيم الأمر بالمعروف والنهي عن المنكر، تعظيم خيرية أمة الإسلام عن باقي الأمم
تعظيم خاصية من أعظم الخواصّ لبقاء نعمة هي أكبر النِّعم في حياتك وهي الإسلام
ورمضان فُرصة، واستجابة الناس فيه قويّة، وأمرك بالمعروف ونهيك عن المنكر فيه له دلالة، فرمضان هيشعّجك تأمر وتنهى، والبدأ دائمًا وأبدًا بالعشيرة القريبة؛ عليهم المعوَّل والحاجز الأكبر عن الخير لك، فلو اتكسر، وعظَّمت أمر الله على زعل صاحبك وأخوك، الموضوع هيفرق معك ومع إسلامك وفي تعاملك بعد كدا
وده فرض عليك، مش تفضُّل منك يعني!
(واللَّهِ، لَأَنْتَ أحَبُّ إلَيَّ مِن نَفْسِي، فَقالَ النَّبيُّ صَلَّى اللهُ عليه وسلَّمَ: الآنَ يا عُمَرُ)
ونفسك أعظم من أي حد في الدنيا بالنسبة لك، وما دونها فهو دون
(وما عليكَ إلا البلاغ)

(وَيُؤْثِرُونَ عَلَىٰ أَنفُسِهِمْ وَلَوْ كَانَ بِهِمْ خَصَاصَةٌ ۚ)
يؤثرون على أنفسهم من أجل إخوانهم
ومن قبلها الإيثار على النفس من أجل الدين!
(واللَّهِ، لَأَنْتَ أحَبُّ إلَيَّ مِن نَفْسِي، فَقالَ النَّبيُّ صَلَّى اللهُ عليه وسلَّمَ: الآنَ يا عُمَرُ)
ومن باب أولى إيثار الدين على الصاحب فضلا عن النفس
خلِّي بالك لو بتؤثر صاحبك عليك، ومش بتؤثر الدين عليك! لأحسن تكون بتؤثر صاحبك عليك، عشان كلامه أو كلام الناس عليك
لكن في الدين مفيش أي استفادة هتشوفها أو هتسمعها
(يَا أَيُّهَا النَّبِيُّ قُل لِّأَزْوَاجِكَ إِن كُنتُنَّ تُرِدْنَ الْحَيَاةَ الدُّنْيَا وَزِينَتَهَا فَتَعَالَيْنَ أُمَتِّعْكُنَّ وَأُسَرِّحْكُنَّ سَرَاحًا جَمِيلًا)
(وَإن كُنتُنَّ تُرِدْنَ اللَّهَ وَرَسُولَهُ وَالدَّارَ الْآخِرَةَ فَإِنَّ اللَّهَ أَعَدَّ لِلْمُحْسِنَاتِ مِنكُنَّ أَجْرًا عَظِيمًا)

أكتر كلام كان أثَّر فيا،
كنت قاعد على اللاب بعد التراويح في ليلة تقريباً في بداية العشر، وكنت كسلان، فلقيت البوست دا قدامي
لا إله إلا الله
اللهم إنك عفو تحب العفو فاعفو عنّا

بمناسبة دخول العيد:
مفيش مصطلح شرعي اسمه (المرأة الشيك)
الحجاب لإخفاء الزينة؛ زينة الجسد الخَلقية، أو الدخيلة
والحجاب ذات نفسه ميكونش زينة برده!
الأمرين لازم يتحققوا في أي حجاب شرعي
نقطة زينة الجسد الخَلقية، من مفاتن المرأة الأنثوية وتغطيتها تغطية الحجم واللون
مهما كان اسم الحجاب اللي هيتلبس، المهم إنه ميبنش منه لا حجم ولا لون العضو اللي الحجاب مغطيه وبس، وبالأخص أماكن تميُّز الست عن الراجل
يعني حاجات زي حجم الإيد من الكوع لحد المعصم غالبًا حجم ثابت ومحدد في كل الناس، وهكذا، الأهم الأعضاء المميزة للمرأة، والأفضل كامل الجسم
نقطة إن الحجاب ميكونش زينة في نفسه، دي نقطة متعلِّقة بالنيِّة، عمل قلبي، وده أخطر، عشان مش باين للناس، وهو تعامل بينك وبين الله وبس
والله يعلم نيتك:
(ألا يعلم من خلق وهو اللطيف الخبير)!
(إنه عليم بذات الصدور)
(فإنه يعلم السر وأخفى)
(يعلم خائنة الأعين وما تخفي الصدور)!
مفيش هزار وتلاعب مع الله، انتبهوا للنقطة دي الله يكرمكوا، وخصوصًا في الأعمال اللي خاصة بالنوايا
لأن ممكن اللبس يكون بالنسبة للناس مش ملفت، أو مش على الموضة، أو مش زينة
لكن البنت شارياه بسبب إنه شيك وحلو وهيخلي شكلها حلو!
والله يعلم
مش مطالب من المرأة (الشياكة) وهو جزء من التبرج أكيد
الحجاب يكون نظيف ومش مبهدل، وبس
لكن إخفاء مفاتن الجسم، ونعمل نفسنا مانيكان لعرض الملابس!
ده مش حجاب شرعي
ومسألة الحجاب أصلًا وبروز المرأة الكتير في الشارع دي مشكلة تانية
لكن بتكلم في النقطة دي، عشان الناس بتنزل تشتري لبس العيد على أساس جمال اللبس وشياكته! وإنه ليس حلو وجميل عليها!
الأسوأ في الموضوع بقى،
واحدة لابسة حجاب واسع جدًا (في الغالب الفستان) من عند الرجل، وضيق من عند الصدر!!
وكمان حجاب زينة
جمّّعت الاتنين في بعض!
وكله تحت مسمى اللبس الشرعي مش عارف إزاي الصراحة
بعض البحث القليل جدًا، هتوصل للبس الشرعي
وأبسط حاجة مستحيل حد يقول إن الهدوم دي كانت بتلبسها نساء النبي صلى الله عليه وسلم ولا الصحابة ولا التابعين، ولا حتى أهل العلم والاحترام في أي زمن
حتى مع تطور الملابس، هيواكبوا التطور عادي، بس بشروط الحجاب، وبدون شياكة وزينة، اللي هي مطالبة تغطيه في نفسها

أنا كإسلام للأسف بسيء الظن بأي شخص بيجاهر بالمعصية خصوصًا لو كانت مش بسيطة، وخصوصًا لو ثبِّت المعصية على الميديا ومنها الفيس بوك؛ إنه شخص غير مُعظِّم للدين !
والله عشرات الشباب معانا عاديين خالص، بيعملوا حاجات غلط كتير ومعروفين، لكن بالنسبة لتثبيت معصية أو تقرير ذنب وكتابته على الفيس بوك علني كدا، مش بيعمله نهائي
وسألت كذا حد فيهم، قالي عشان مخدش ذنب حد
وإنه نشر لسنَّة سيئة
وإن الفيس بوك في حكم من يخطب في قوم، إزاي ينشر أو يحدث منه تصرف حرام! أو تصرف فيها خلاف بين الحرمة والكراهة!
وإنه فتنة للناس
والأسوأ لما بيحصل من ناس غالب عليها الطابع الإسلامي، بيرسِّخ في نفوس (المؤمن الضعيف) الإقرار بحلال الذنب ده
سواء أنا غلط أو صح، ده اللي أنا بظنُّه في الناس غصب عنِّي، لما بشوف موقف زي دا، إنه غير معظِّم لأكبر نعمة في حياته، وبيسعى بشتى الطرق لإظهار كُفرانه بها، وفتنة الناس
مش لسان حاله، لكن لسان أعماله

سورة العَلَق سورة عظيمة جدًا
اقرأ باسم ربك الذي خلق (1) خلق الإنسان من علق (2)
اقرأ وربك الأكرم (3) الذي علم بالقلم (4) علم الإنسان ما لم يعلم (5)

كلا إن الإنسان ليطغى (6) أن رآه استغنى (7) إن إلى ربك الرجعى (8)
أرأيت الذي ينهى (9) عبدا إذا صلى (10) أرأيت إن كان على الهدى (11) أو أمر بالتقوى (12)
أرأيت إن كذب وتولى (13)
ألم يعلم بأن الله يرى (14)

كلا لئن لم ينته لنسفعا بالناصية (15) ناصية كاذبة خاطئة (16)
فليدع ناديه (17) سندع الزبانية (18)
كلا لا تطعه واسجد واقترب

سبحان الله، بعد الآيات دي، حُقَّ للإنسان السجود لثِقل الوحي عليه

في نهاية رمضان، لما بتكون آخر عبادة صيام- صلاة تراويح- صلاة تهجد، وحتى آخر صلاة فجر في رمضان وهكذا
بتحس قد إيه إنك عايز تحسِّنها وتجملها، عشان آخر عبادة، ولو لفترة مؤقتة لحد ما يجي رمضان الجاي، وأظن ده برده بيحصل في الحج أو العُمرة، بتكون فيها نفس الشهوة واللذة في آخر يوم وآخر طواف

وبتحس فيها حديث النبي صلى الله عليه وسلم: "إذا قُمْتَ في صلاتِكَ، فصَلِّ صلاةَ مُودِّعٍ"
لو أي عبادة استشعرت إنها آخر عبادة، هتلاقي من تحسينها وحُسن أدائها والتأني فيها ولذتها، شيء جميل

سبحان الله
بستغرب أوي لما حد بياخد بنصيحتي
مش عارف إيه سبب الاستغراب، بس دا فعلاً الإحساس اللي بيجيلي لما حد ينفذ اللي باعتهوله، وخصوصًا إن أنا ببعت: من غير إيموشن يطرِّي الجو، وبيكون بصيغة الأمر، ومش بيكون فيه ألفاظ أدبية، إلا لو واحد أكبر منّي يعني، بيبقى بأسلوب أدب، مش عشان دي نصيحة، ولكن عشان احترام فرق السن
كنت أتمنى انزل اسكرينات لناس عملت بالنصيحة علطول، بس مش هينفع
من غير جِدال
من غير استدراك عليَّ
من غير تعليق على أسلوبي
وحتى كمان غير إسلاميين "اللي هو أصلًا محدش بينصحهم عشان في الغالب مش هيعملوا حاجة!"
ودي نقطة مهمة:
لأن أنت مش مطالب إنك تدعو اللي عندك شك إنه هيقبل نصيحتك وهيعمل بيها!
المعنى دا مش موجود نهائي
بل بالعكس ممكن يكون معاني مخالف لكذا نص شرعي
أنت بتنصح عشان واجب عليك الأمر بالمعروف والنهي عن المنكر
واجب عليك تنصح أخوك
بس
نتيجة الموضوع دا مش عليك!
وكمان حاجة: النصيحة مش سعي، والنتيجة مش هو اللي هينفذه
لأ، خالص، النتيجة هو النصيحة، بدال نصحت، أنت كدا حققت النتيجة والغاية من الموضوع

سبحان الله
مهمة الأنبياء!
والناس بتتكسف تعملها، أو بتحاول تحددها على حسب القبول ولا لأ، بمعايير من دماغه!

مهمة الأنبياء:
(وما على الرسول إلا البلاغ المبين)
(فإنما عليك البلاغ وعلينا الحساب)
(إن أنت إلا نذير)
والآية الجميلة:
(قل: أطيعوا الله وأطيعوا الرسول
فإن تولوا
فإنما عليه ما حمل وعليكم ما حملتم)!

ومعيار القبول:
(ليس عليك هداهم ولكن الله يهدي من يشاء)

بقى فيه تقصير في أداء مهمة الأنبياء وتقليدهم، بسبب: إن الناس دي مش هتتقبل كلامي!!
هو واجبك ومهمتك: النصيحة والأمر والنهي وبس
مش مهمتك: أنهم يقبلوا كلامك، أو أنهم يعملوا بكلامك!

الأنبياء اللي مأمنش من قومهم ولا واحد، هيدخلوا الجنة
والصالحين المصلحين اللي محدش من قومهم سمع كلامهم في الأمر والنهي، هيدخلوا الجنة
لأنهم عملوا الواجب اللي عليهم وبس، وهو دي النتيجة، النتيجة= النصحية والإبلاغ

رأيي
سماع المحاضرات العلمية، والدروس الإيمانية في المواصلات، أغلب الأوقات بتكون لتريح الضمير وتقضية واجب
وفي الأغلب برده في النهاية عشان: أنا سمعت 543 درس في المواصلات، حسن استغلال الأوقات البينية!
طب وبعدين؟ إيه المحصلة؟
أوقات المواصلات تستغلها في مواقع التواصل وفي الألعاب على الموبايل
ولما تروح البيت وتهدى وتقعد فاضي، متلعبش ولا تفتح الفيس وتويتر وتقضي الساعات المتواصلة عليهم، وأقعد اسمع واتفرج بقى على المحاضرات والدروس
لكن إنك تختار الوقت الهادي والذهن الصافي في الميديا واللعب، ووقت الصداع والمشغوليات في سماع مادة دينية أو تعليمية!
حاجة غريبة جدًا

كنت بشوف فيديوهات لفاضل سليمان وأحمد عبد المنعم وأنا باكل، مكملتش خمس دقايق في الدرس، وقفلته
طلع محتاج كل كلمة تتكتب، أو تركز فيها، ما شاء الله