والله معادلة بسيطة:
مش لازم تبقى قطب من أقطاب الإسلام، أو تترك أثر
الأهم من دا:
إنك متبقاش فتنة لغيرك !
متجاهرش بذنبك !
متخليش الإسلام يُؤتى من ناحيتك !
مش لازم تَعمَل للإسلام
بس على الأقل خلاص سيبه زي ماهو !
عيش وموت من غير أي إضافات للدين، بس في نفس الوقت ميجيش أذى للدين من ناحيتك أو بسببك !
أي تصرف عندك فيه شبهه حلال أو حرام، متجاهرش بيه على الأقل !
الموضوع مش مستحمل، والناس ما بتصدق تلاقي حد بيعمل، عشان تعمل
أي تصرُّف قيسه بميزان الحسنات والسيئات، مفيش كفَّة تالتة، لو مش موجود في ميزات الحسنات، بلاش تجاهر بيه على الأقل خالص
فعلًا والله:
هو دينٌ غالٍ، أتاكَ على أشْلاءِ ناسٍ؛ فلا تكنْ محطةَ نَحْسٍ، فتُفَرِّطَ فيه
سيبه زي ما هو
وهتدخل الجنة بإذن الله، بدون أي أثر في الحياة، مش مهم
المهم تعبد ربنا زي ما قال

إن من تترك نصيحتهم خوفًا على زعلهم، وتحضر معهم لأماكن الحرام خوفًا على حزنهم؛ لا ينفعونك كثيرًا في مصائب الحياة الدنيا على ظهر الأرض؛ فأنَّى ينفعونك شيئًا في دواهي الآخرة تحت الأرض ثم يوم العرض!

الدعاء أول الأسباب وأهم الأسباب

الله يشفي بالدواء وبغير الدواء، ويرزق بالسبب وبدون السبب وبضد السبب
لكن الأخذ بالأسباب من السنن الكونية؛ والدعاء أولها وأعظمها

قال سهل بن سعد: (أن النبي صلى الله عليه وسلم أُتي بشراب، فشرب وعن يمينه غلام وعن يساره الأشياخ، فقال للغلام: إن أذنت لي أعطيت هؤلاء، فقال: ما كنت لأوثر بنصيبي منك يا رسول الله أحدا، فتله في يده)
يعني النبي صلى الله عليه وسلم أعطى الغلام ليشرب

يبقى لما يتم تقديم شراب لضيوف أو في مجلس، يُبدأ بأجل القوم وأكبرهم منزلة، ثم الأيمن فالأيمن
لكن مش هنقعد نختار الأجل فالأجل فالأجل، لحد ما نيجي لآخر واحد ولسان حالنا بيقوله: أنت أحقر من في القاعدة!

وفي الحديث اللي فوق، بيَّن الصبي إن هو لم يأذن للنبي صلى الله عليه وسلم ليس للشراب، وإنما لبركة الشُرب خلف النبي صلى الله عليه وسلم ووضع فِيه في موضع فِي النبي صلى الله عليه وسلم
وأظن إن الصبي كان ابن عباس، والله أعلم

اختبر صدقك في سرعة تنفيذك

عن زيد بن وهب قال:
قال لي ابن مسعود:

لا تَدَعْ إذا كان يوم الجمعةِ أن تُصَلِّيَ على النبيِّ صلى الله عليه وسلم ألف مرة، تقول: اللهمَّ صلِّ على محمَّد صلى الله عليه وسلم.

الهزار في التعدد دمه تقيل أوي، بعيدًا عن نيّة الشخص وبيهزر ليه بتشريع، وسواء نيته كويسة أو لأ، بس فعلًا مفيش بوست يكون فيه هزار باستخدام التعدد إلا ودمه تقيل، معتقدش شوفت بوست واحد هزار وضحكت عليه، ده فضلًا عن بوستات المكايدة وبوستات التريقة في نفس الموضوع

أمرنا الله بأمرٍ بدأ فيه بنفسه سبحانه ثم بملائكته فقال:

"إن الله وملائكته يصلون على النبي يا أيها الذين آمنوا صلوا عليه وسلموا تسليمًا"

كل واحد بينصح نصيحة أو بيلَّغ عن الدين، ويلاقي كلمات (كبر دماغك، محدش هيسمع، محدش هيعمل حاجة، ما كلهم عارفين إلخ)

أحب أقولك إن الصنف ده كان موجود مع أتباع الأنبياء، وكانوا بيثبَّطوا أتباع الأنبياء بعد موت نبيهم، بالكلمات دي

ولو كانوا سمعوا كلامهم، كان زمانك حاليًا مش مسلم، ونيتك في الأعمال الدنيوية معلوم، ومصيرك الأخروي معلوم

لكن أتباع الأنبياء لم يلتفتوا للكلمات دي، وكان عندهم نوع من التفكير في الكل مش التفكير بشكل شخصي أو أناني!

والناس اللي كانوا بيثبطوهم بقى اسمهم المنافقين والقاعدين

والدين مكمِّل بتبليغك أو بغيره، والصد عن دين الله مكمل سواء بتثبيطك أو بتثبيط حد تاني غيرك

فحاول يكون اسمك في الخانة الطيِّبة خانة المفلحين

النصيحة في العلن فضيحة ده لما تكون قاعد مع صحابك وفجأة تنصح واحد بحاجة غلط هو بيعملها وأنت شوفته، أو هو قالك عليها، بدون ما يطلع عليها الناس

لكن أما يكون واحد منزِّل الغلط على الميديا، هو فاضح نفسه أساسًا، وبالنسبة ليك لو منصحتهوش على العلن (في كومنت) هو والناس اللي هتشوف البوست، هتفتكر إن الموضوع ده عادي مش غلط، وبالتبعية مفيش فضيحة في الموضوع

تخاذلك عن نصيحته في العلن، بينشئ جو عام من استحلال الأفعال دي، وبيخلِّي المؤمن الضعيف اللي كانت متردد في فعل أو قول معين، خد جرعة شجاعة وهيعمل زي فلان اللي سبقه ونشر الحرام

متترددش تنكر أي حرام تشوفه على الميديا في بوست أو تويتة على نفس البوست ونفس التويتة، حتى لو صاحب الأكونت شخص محترم أو متدين أو شيخ أو استاذ
كل الاختلاف هيبقى في طريقة نصيحته، ومدى قُربك من الشخص اللي أنت بتنصحه

لكن النصيحة على العلن لشخص مجاهر بحرام؛ ده الواجب الشرعي أساسًا لتأمرون بالمعروف وتنهون عن المنكر، مفيش رفاهية اختيار لأن نصيحتك هتفيد المسلمين الباقيين، متبقاش أناني وتقول: أنا مش هعمل كدا، ولو نصحته هو مش هيستجيب، فمش مشكلة فكك، أنا مالي

طبيعي يكون فيه تضاد بين اللبس الفاشون واللبس الاستايل واللبس الزينة وبين الحجاب اللي شُرِع لحجب زينة المرأة وحجب زينة الملابس

لما تكون واحدة لابسة فستان أو لابسة هدوم خروج، وراحة مناسبة لصاحبتها في بيتها، بتلبس فوق الفستان أو هدوم الخروج، لبس تاني اسمه حجاب، بخبِّي لبس الزينة ده عقبال ما اروح مكان بنات بس واكشفه

مشاهدة الحرام بنظره رضا وإقرار= حرام

لما كانت مباحة الزينة للبنت قدام البنات والمحارم، وكانت حرام قدام الأجانب، فلما بنت تطلع بزينة قدام الأجانب وبنت تشوفها، ده موضع معصية مش موضع حب وفرحة وجمال

وكذلك لما كان كلام البنت بترقيق الصوت وخلافه مع البنات والضحك مباح، وقدام الأجانب حرام
كان الاستماع من بنت لبنت بتعمل الحاجات دي قدام الأجانب، ده موضع حرام، مش موضع تثقيف أو جمال صوت أو موهبة أو نباهه

واحدة كاتبه بوست: بطَّلت أتفرج على مسلسلات، عايزه حاجة مفيدة أتفرج عليها؟
واحدة كاتبه كومنت وعليه تفاعل كبير: اتفرجي على مسلسل كذا وكذا وكذا !

نفس أسباب حُرمة الأفلام والمسلسلات هي نفس الأسباب اللي موجودة في المسلسلات المقترحة!

لكن الفرق، إن نظرتهم للأعمال دي حلال، وللأعمال دي حرام !
بيعبدوا مع الجمهور، أو بيعبدوا مع العُرف

متقلقش اللي بتحاول ترضيهم على حساب دينك أو على حساب نفسك، مش هيفيدوك دنيا أو دين

استمتع بكل يوم بشكل منفصل بأهدافه الدينية والدنيوية، وفكك من العيال الكئيبة والحزينة والمنطفية

متخططش لأي حرام مستقبلي، سيبه لوقته، ممكن تموت قبل ما يجي، أو تلاقي حرام مستقبلي تاني يلهيك وتسيبه لوقته برضه

متعملش أي حرام بشكل جماعي، إلا لو هيضيع منك حاجة من الضروريات الخمسة: النفس والعرض والدين والمال والعقل، غير كدا اعتبره خط أحمر وجدار أمان ليك وللمسلمين وللدين

استحمل ضريبة الأمر بالمعروف والنهي عن المنكر واللي في الغالب بتكون تعرييك بحرام ماضي، واعتبره تكفير عن الحرام الماضي, واستحمله

متحاولش تنصح وأنت مستني نتيجة، لأن غالبًا مش هتلاقي نتيجة، لكن أنت نصيحتك قايمة على:

- ولتكن منكم أمة يدعون إلى الخير ويأمرون بالمعروف وينهون عن المنكر وأولئك هم المفلحون

- وإذ قالت أمة منهم لم تعظون قوما الله مهلكهم أو معذبهم عذابًا شديدًا قالوا معذرة إلى ربكم ولعلهم يتقون

قبل النصيحة ادعي للشخص المنصوح بالهداية، وبعد النصيحة ادعيله بالهداية، خليك كريم مع حبايبك بالغيب

الله الواسع، والإسلام جامعنا، اوعى تفكر بأنانية وبُخل

قال النبي ﷺ : «أيعجز أحدكم أن يقرأ في ليلة ثلث القرآن؟»
قالوا: وكيف يقرأ ثلث القرآن؟
قال: «قل هو الله أحد: تَعدِل ثلث القرآن».
رواه مسلم.

من أشد موانع الإنسان عن المعاصي أخلاق المجتمع، إنه بيخاف يُنبذ من أفراد المجتمع، يشاوروا عليه بالسوء،
فلما المجتمع بينتشر فيه السوء، خلاص خسر هذا المانع

فحاول تحافظ على المانع بالأمر بالمعروف والنهي عن المنكر

اللهم أتم نعمتك علينا وأمتنا على الإسلام والسنة

مش محتاج تكون بتعرف تكتب، ولا بتعرف تجيب مسائل مغمورة وتعرضها، ولا يكون عندك متابعين ولا كاريزما، عشان تبلَّغ عن دين الله، وعشان تحقق أكبر استفادة من نِعمة المنابر الالكترونية، النعمة اللي هتتسأل عنها يوم القيامة، منبر صوته أكبر وأوسع وأكثر تأثير من منبر المسجد

يكفي تكتب آية من آيات الله، أو حديث من أحاديث النبي صلى الله عليه وسلم

أحسن من ملايين التويتات والبوستات اللي ممكن تشوفها في أي موقع من مواقع التواصل، وكلام كتير لا يُغني عن كلام الله شيء

وقال النبي صلى الله عليه وسلم: أفضل الكلام بعد القرآن أربع وهي من القرآن لا يضرك بأيهن بدأت: سبحان الله، والحمد لله، ولا إله إلا الله، والله أكبر

متنساش وأنت في وسط أدعيتك الدينية والدنيوية أنك تدعي بالجنة بشكل مباشر ليك ولأهلك وأصحابك وأصحاب الفضل عليك
يا رب ارزقني الجنّة
لأن مهما كانت أدعيتك الدينية والدنيوية مش بالضرورة استجابتها توصّلك للجنّة
ودخولك الجنّة المفروض ده الهدف الأساسي من أي عمل أو دعاء ديني أو دنيوي

وَهُوَ الَّذِي يُنَزِّلُ الْغَيْثَ مِنْ بَعْدِ مَا قَنَطُوا