كان الصحابة رضي الله عنهم في زمن النبي صلى الله عليه وسلم إذا حدثت الحادثة أخذوا حكمها من الوحي، سواء كان مباشرًا وهو القرآن، أو غير مباشر وهو السنة
(ودي فرصتهم، وقوة الوحي متناسبة مع قوة الابتلاء)

ومع ذلك في عهد النبي صلى الله عليه وسلم كان فيه كفَّار ومنافقين وأصحاب كبائر، ممَّن صاحبوا النبي صلى الله عليه وسلم ورأوا معجزاته وسمعوا آيات الله غضَّة طريَّة تُنبئّهم بأفعالهم بشكل غيبي!

الله تعالى عدل، لا يظلم أحدًا
(إن الله لا يظلم الناس شيئا ولكن الناس أنفسهم يظلمون)
(ولا يظلم ربك أحدًا)
(إن الله لا يظلم مثقال ذرة)

فمتتخليش لو أنت مش مؤمن بالأدلة وبكلام العلماء الحالي في المسائل الدينية، أنك كنت هتكون أحسن حال أيام النبي صلى الله عليه وسلم وكنت هتقول سمعنا وأطعنا!
كنت هتبقى بنفس الوضع، مجادلتك الحالية ومراوغتك للأحكام ولي النصوص، وتتبع الثغرات، كنت هتتبع نفس الأساليب في الهروب من الجهاد ومن الزكاة ومن اللبس الشرعي لبس أمهات المؤمنين وخلافه
ربنا يهدينا لما فيه خير ديننا ودنيانا

أنك تشوف صاحبك بيغش في امتحان، أو بيسرق في تسجيل غياب، أو لبسها لبس حرام مش شرعي، أو صاحب بيشتغل شغل حرام، أو بينزل بوستات أفلام، أو استوريهات أغاني
وأنت مش بتنصح!
فأنت بحالك ده لو شوفته وهو بيزني وبيشرب خمر، مش هتنصح، ولو ارتد عن الدين
النصيحة هي النصيحة
والحرام هو الحرام
والمجاهرة هي المجاهرة
وأنت هو أنت بنفس تخاذلك وأنانيتك

عشان لو كنت بتقلل من حرام حرَّمه الله! بالنسبة لحرام تاني أكبر منه، ومستني الحرام الأكبر عشان تنصح فيه، فأنت مستحيل تنصح فيه
ومفيش أكبر من حرام بيتم المجاهرة به، عشان تنصح صاحبك وهو بيعمله

أسهل حاجة في الزمن ده إنك تحلق دقنك وتحط صور متبرجات ومقاطع أفلام وتسب وتشتم وتريح ضميرك بالجملة السخيفة (أنا ماقلتش إني شيخ).

ده على أساس إنك فاكر لما هاتقف قدام ربنا هايدخلك الجنة بغير حساب لمجرد إنك ماقلتش إنك شيخ؟

لا يا حبيبي هاتتحاسب زي الشيخ ويمكن أكتر لأن الشيخ ممكن يكون مقر بذنبه لكن أنت بجح مُصِرّ.

بديهيات من عمو حسام

إن أهنا عيشة قضَّيتها
ذهبت لذاتها والإثم حلّ

كل ما أسمعها، أفتكر الحرام الجماعي اللي لا يَقوم إلا بحضوري وحضور أصحابي، ولو مجيناش، كان الحرام الجماعي ده هيُهدم
لكن للأسف فضَّلنا المتعة واللذَّة على حُكم الله، وحاليًا يوميًا قاعدين بنجني تبعات الحرام الجماعي ده، من فتنة لشخص، أو سبب في استمرار العمل الحرام ده، أو إن وجودي سبب اطمئنان لحد بإن الفعل ده حلال وخلافه

زي الأفراح وحفلات التخرج والتيمات الطلابية وأي تجمع لا يجوز

ربنا يغفر لنا ويهدي عباده المؤمنين لما فيه الخير لهم

تحلَّى بشجاعة سيد الخلق صلى الله عليه وسلم في نصيحتك وفي فعلك وقولك

لو مش هتعرف تمتنع عن حرام معيَّن تمامًا، حاول تأجِّله وتأخَّره

فيس بوك، تويتر، استوري واتس، إلخ

بتلاقي الناس بتشتكي ربنا -تعالى الله عن ذلك- بشكل غير مباشر، وهي إنها بتشتكي أقدار الله، بتشتكي لمين؟
مش لحد، هي شكوى لمجرَّد الشكوى، شكوى لإن الوضع العام في سباق في نشر الشكاوي والصعوبات اللي الشخص بيمر بيها وإزاي بيقدر يعدي منها بقدارته الشخصية وبس

طب مفيش أي نِعمة أو فضل من ربنا حصلك في يومك؟ تشكره عليها علني، زي ما بتضجر علني على قدرك السيء من وجهة نظرك؟
مفيش حاجة خالص؟

لو واحد بص من برّا على كلامك مجملًا، هيلاقي معنى ضمني واضح بيدل عليه كلامك، وهو إن أنت شخص مظلوم من … الأقدار !

والله هو العدل المطلق
وستُكتب شهاداتك المنتشرة على الميديا عن حياتك وشكواك، وعن كُفرانك للنَعم وتضجرك، وستُسأل عنها يوم القيامة أمام الله

‏مش مهم كنت بتعمل أيه في الماضي
‏المهم دلوقتي بتعمل أيه؟
‏وهتعمل أيه؟

من المفارقات الرخمة اللي بلاحظها كتير
لو واحد عامل فرح محترم بدون حاجات حرام، بتلاقي الناس بتعتذر لأسباب عادية ولكسل
لكن لو فرح حرام، هتلاقي كلام زي: عشان ميزعلش مننا، هنسلم بس وهنمشي، أنا رايح غصب عني بس عشان أفرحه.. إلخ بشكل رخم

لما يبقى فيه حرام، بتلاقي الحجج والمبررات عشان تروح وعشان الموضوع يزيد بجاحة بتلاقي إنه بيزوّق الحجج دي بإطار ديني
والعكس لو فرح ديني، بيلاقي كل الحجج والاعذار إنه مش هيقدر يحضر

وللأسف مش واخد باله إن الأولى عبادة والتانية حرام ومعصية
الموضوع مش مجرّد عمل مباح
وإن الحجج في الحالتين من تزيين الشيطان
وأن من أعطى واتّقى سيسره الله لليُسرى
وأن من بخل واستغى سيُسره الله للعُسرى

مش عشان اسمه الشيخ فلان
أو معروف عنه إنه شخص متدين
أو إنه شخصية محترمة
أو هي لابسة حجاب كويس أو خمار أو نقاب
أو هي بنت محترمة آوي

إنه يحصل تمرير للحرام اللي بيعملوه! ونقول إن ليهم أعذار خاصّة بيهم منعرفهاش، عشان بس مش عايزينهم يطلعوا بيعملوا حاجة غلط، وهما معروف عنهم عكس ده

لو أي حد عمل شير أو اتفاعل مع بوست فيه حاجة حرام؛ فهو فِعل حرام ويجب نصيحته
وأشهر البوستات اللي بتتمرَّر، هي اللي فيها صور بنات وسواء كانت متبرجة بمكياج أو بلس غير شرعي أو مش محجبة، التفاعل مع الصور دي هيفضل حرام، ومش هيفيدك إقرارك بفعله عشان هو بالنسبالك "شخصية محترمة اوي"!

تيجي تتفرج على ما يُسمى "بودكاست ديني" عشان تبعد عن الأفلام والمسلسلات، تلاقيهم بيقولوا ألشات أفلام ومسلسلات!

وتيجي تتابع على الميديا أكونت لشخص "محترم" و"متدين" تلاقيه قاعد ينزِّل كوميكس عن الممثلين والأفلام!

وفي الحالتين دي قلة أدب، ملهاش تبرير

وصورة ممثل من فيلم عارفه أو ألشة من فيلم كنت بتحبه؛ كفيلة تضيَّع منك الحالة الإيمانية اللي أنت قاعد تسمع ساعات عشانها

والله معادلة بسيطة:
مش لازم تبقى قطب من أقطاب الإسلام، أو تترك أثر
الأهم من دا:
إنك متبقاش فتنة لغيرك !
متجاهرش بذنبك !
متخليش الإسلام يُؤتى من ناحيتك !
مش لازم تَعمَل للإسلام
بس على الأقل خلاص سيبه زي ماهو !
عيش وموت من غير أي إضافات للدين، بس في نفس الوقت ميجيش أذى للدين من ناحيتك أو بسببك !
أي تصرف عندك فيه شبهه حلال أو حرام، متجاهرش بيه على الأقل !
الموضوع مش مستحمل، والناس ما بتصدق تلاقي حد بيعمل، عشان تعمل
أي تصرُّف قيسه بميزان الحسنات والسيئات، مفيش كفَّة تالتة، لو مش موجود في ميزات الحسنات، بلاش تجاهر بيه على الأقل خالص
فعلًا والله:
هو دينٌ غالٍ، أتاكَ على أشْلاءِ ناسٍ؛ فلا تكنْ محطةَ نَحْسٍ، فتُفَرِّطَ فيه
سيبه زي ما هو
وهتدخل الجنة بإذن الله، بدون أي أثر في الحياة، مش مهم
المهم تعبد ربنا زي ما قال

إن من تترك نصيحتهم خوفًا على زعلهم، وتحضر معهم لأماكن الحرام خوفًا على حزنهم؛ لا ينفعونك كثيرًا في مصائب الحياة الدنيا على ظهر الأرض؛ فأنَّى ينفعونك شيئًا في دواهي الآخرة تحت الأرض ثم يوم العرض!

الدعاء أول الأسباب وأهم الأسباب

الله يشفي بالدواء وبغير الدواء، ويرزق بالسبب وبدون السبب وبضد السبب
لكن الأخذ بالأسباب من السنن الكونية؛ والدعاء أولها وأعظمها

قال سهل بن سعد: (أن النبي صلى الله عليه وسلم أُتي بشراب، فشرب وعن يمينه غلام وعن يساره الأشياخ، فقال للغلام: إن أذنت لي أعطيت هؤلاء، فقال: ما كنت لأوثر بنصيبي منك يا رسول الله أحدا، فتله في يده)
يعني النبي صلى الله عليه وسلم أعطى الغلام ليشرب

يبقى لما يتم تقديم شراب لضيوف أو في مجلس، يُبدأ بأجل القوم وأكبرهم منزلة، ثم الأيمن فالأيمن
لكن مش هنقعد نختار الأجل فالأجل فالأجل، لحد ما نيجي لآخر واحد ولسان حالنا بيقوله: أنت أحقر من في القاعدة!

وفي الحديث اللي فوق، بيَّن الصبي إن هو لم يأذن للنبي صلى الله عليه وسلم ليس للشراب، وإنما لبركة الشُرب خلف النبي صلى الله عليه وسلم ووضع فِيه في موضع فِي النبي صلى الله عليه وسلم
وأظن إن الصبي كان ابن عباس، والله أعلم

اختبر صدقك في سرعة تنفيذك

عن زيد بن وهب قال:
قال لي ابن مسعود:

لا تَدَعْ إذا كان يوم الجمعةِ أن تُصَلِّيَ على النبيِّ صلى الله عليه وسلم ألف مرة، تقول: اللهمَّ صلِّ على محمَّد صلى الله عليه وسلم.

الهزار في التعدد دمه تقيل أوي، بعيدًا عن نيّة الشخص وبيهزر ليه بتشريع، وسواء نيته كويسة أو لأ، بس فعلًا مفيش بوست يكون فيه هزار باستخدام التعدد إلا ودمه تقيل، معتقدش شوفت بوست واحد هزار وضحكت عليه، ده فضلًا عن بوستات المكايدة وبوستات التريقة في نفس الموضوع

أمرنا الله بأمرٍ بدأ فيه بنفسه سبحانه ثم بملائكته فقال:

"إن الله وملائكته يصلون على النبي يا أيها الذين آمنوا صلوا عليه وسلموا تسليمًا"

كل واحد بينصح نصيحة أو بيلَّغ عن الدين، ويلاقي كلمات (كبر دماغك، محدش هيسمع، محدش هيعمل حاجة، ما كلهم عارفين إلخ)

أحب أقولك إن الصنف ده كان موجود مع أتباع الأنبياء، وكانوا بيثبَّطوا أتباع الأنبياء بعد موت نبيهم، بالكلمات دي

ولو كانوا سمعوا كلامهم، كان زمانك حاليًا مش مسلم، ونيتك في الأعمال الدنيوية معلوم، ومصيرك الأخروي معلوم

لكن أتباع الأنبياء لم يلتفتوا للكلمات دي، وكان عندهم نوع من التفكير في الكل مش التفكير بشكل شخصي أو أناني!

والناس اللي كانوا بيثبطوهم بقى اسمهم المنافقين والقاعدين

والدين مكمِّل بتبليغك أو بغيره، والصد عن دين الله مكمل سواء بتثبيطك أو بتثبيط حد تاني غيرك

فحاول يكون اسمك في الخانة الطيِّبة خانة المفلحين