(وما كان ربُّك نسيًّا)

ومن أولى من الله بحديث نفسي؟

إني لأجد أثر معصيتي في رؤية ما أكره ممَّن أحبِّهم وهم يعلمون

بشوف إن فيديوهات خفِّة اليد والساحر وما شابه، بتبني عند الجيل الجديد مع الوقت تقليل من قيمة (المعجزة) وخاصَّة معجزات الأنبياء!
ومش عارف ده مقصود ولا لأ
بس الصراحة معظم اللي قائمين على الأعمال دول كُفَّار وملاحدة، فمش بعيدة عليهم إن يكون ده هدف من أهدافهم، وخصوصًا مع تأكديهم الدائم في نهاية الخدعة إن (ده مش سحر ده خِفِّة يد)
وخصوصًا لما الأعمال بتزيد قوِّتها زي الدخول من حيطة، وإخفاء عربية، وإنه يصحِّي حشرة ميِّتة، وغيرها

مع الوقت لما الطفل يتعرض عليه المعجزة، هيبقى قدامه حل من الاتنين إن النبي لإما بيعرف يعمل خِدع، لإما لو كانت معجزة جامدة يبقى ساحر حقيقي
تعالى الله عن ذلك
اللهم صلِ وسلم وبارك على جميع الأنبياء والمرسلين

(وَإِذَا نَادَيْتُمْ إِلَى الصَّلَاةِ اتَّخَذُوهَا هُزُوًا وَلَعِبًا ۚ
ذَٰلِكَ بِأَنَّهُمْ قَوْمٌ لَّا يَعْقِلُونَ)

الصراحة هي عندنا حق، وناس كتير بتقلع عشان تشتغل
اللي بتقلع اللبس الشرعي
اللي بتقلع الخمار
اللي بتقلع حيائها
اللي بتقلع حدودها ومبادئها
اللي بتقلع أمانتها
اللي بتقلع حِفظها للغيب في نفسها وفي زوجها

وعشان كدا كان التكرار من ربِّنا إن الرزق بيد الرَّزَّاق، وتم اقتران الرزق بالتقوى
{اسْتَغْفِرُوا رَبَّكُمْ إِنَّهُ كَانَ غَفَّارًا
يُرْسِلِ السَّمَاء عَلَيْكُم مِّدْرَارًا
وَيُمْدِدْكُمْ بأَمْوَالٍ وَبَنِينَ وَيَجْعَل لَّكُمْ جَنَّاتٍ وَيَجْعَل لَّكُمْ أَنْهَارًا}.

{وَأْمُرْ أَهْلَكَ بالصَّلاةِ وَاصْطَبرْ عَلَيْهَا لا نَسْأَلُكَ رِزْقًا نَّحْنُ نَرْزُقُكَ وَالْعَاقِبَةُ لِلتَّقْوَى}.

{وَمَن يَتَّقِ اللَّهَ يَجْعَل لَّهُ مَخْرَجًا
وَيَرْزُقْهُ مِنْ حَيْثُ لا يَحْتَسِبُ}.

{وَمَا خَلَقْتُ الْجِنَّ وَالإِنسَ إِلا لِيَعْبُدُونِ
مَا أُرِيدُ مِنْهُم مِّن رِّزْقٍ وَمَا أُرِيدُ أَن يُطْعِمُونِ
إِنَّ اللَّهَ هُوَ الرَّزَّاقُ ذُو الْقُوَّةِ الْمَتِينُ}.

كل ما أشوف كلمات زي:
(أنا نصحته كذا مرة، وخلاص زهقت براحته بقى)
(هعتزل الفيس بوك عشان كلامي مش هيغير حاجة)
أو أي حد مش بينصح، عشان "مفيش فايدة" أو عشان "محدش هيستجيب"
بقول سبحان الله! ربنا يرحم سيدنا نوح كرَّر أكثر من ذلك وصبر
وبفتكر حديث النبي صلى الله عليه وسلم: (إن قامت الساعة وفي يد أحدكم فسيلة ، فإن استطاع أن لا تقوم حتى يغرسها فليغرسها)
حث على العمل الصالح، مع التأكيد إنه لن تحصل منه إستفادة مطلقًا
وقول الله تعالى:
وَإِذْ قَالَتْ أُمَّةٌ مِّنْهُمْ لِمَ تَعِظُونَ قَوْمًا ۙ اللَّهُ مُهْلِكُهُمْ أَوْ مُعَذِّبُهُمْ عَذَابًا شَدِيدًا ۖ قَالُوا مَعْذِرَةً إِلَىٰ رَبِّكُمْ وَلَعَلَّهُمْ يَتَّقُونَ

الله الواسِع، والإسلام جامِع

سبحانه وتعالى يرزق العصفور مع النسور

لو أنكم تتوكَّلون على الله حقَّ توكله

إنه هو الغنيُّ الكريم

الرَّزق؛ عافية- راحة بال- نجاح- شهادة- وظيفة- زواج- مال- بِر- طاعة- إلخ

وعليكم بالصبر، حتى يتحقق النصر

عن زيد بن وهب قال:
قال لي ابن مسعود:

لا تَدَعْ إذا كان يوم الجمعةِ أن تُصَلِّيَ على النبيِّ صلى الله عليه وسلم ألف مرة، تقول: اللهمَّ صلِّ على محمَّد صلى الله عليه وسلم.

بتعجب من التريقة على المرتبات القليلة نسبيًا، وبشوف التريقة ناتجة في حالات كتير بسبب مَدّ العين وإطلاق البصر

"وَلَا تَمُدَّنَّ عَيْنَيْكَ إِلَىٰ مَا مَتَّعْنَا بِهِ أَزْوَاجًا مِّنْهُمْ زَهْرَةَ الْحَيَاةِ الدُّنْيَا لِنَفْتِنَهُمْ فِيهِ ۚ وَرِزْقُ رَبِّكَ خَيْرٌ وَأَبْقَىٰ"

ولا تمدن عينيك ~ ورزق ربك خير وأبقى

أنت شخص محتاج ١٠٠٠ جنيه كل شهر عشان عايز تدخل جميعة وتجيب موبايل، ليه لما تجيلك شغلانة بألف، تتريق على المرتب؟ مع إنه على قد احتياجاتك!

واحدة متجوزة، أو لسه صغيرة، مش ملزمة بأي مصاريف، بتشتغل لملئ الفراغ، أو عشان تجيب لنفسها حاجات، جتلها شغلانة بألف أو بألفين، ليه تتريق على المرتب؟ ما ده على قد احتياجاتك!

أنت مش بتقيس مجهودك بالمقابل، لو كنت فاكر كدا تبقى أنت واهم
أنت بتقيس المرتب على حسب مرتبات الناس، وإلا مرتب بيقضي متطلباتك الشهرية؛ فين مجال التريقة في الموضوع؟

متجوز ومرتبك مكفِّيك الشهر، إيه المشكلة؟ ده تمنِّي معظم الناس!

حاول تبص على احتياجاتك الشخصية، بعيدًا عن الصورة اللي تكوّنت عندك بسبب تعدّيك في النظر

والصورة دي بالنسبة ليا من زِينة الحياة الدُنيا

نوع جديد من التخلُّف تحت مسمَّى الذوق والأدب!
تلاقي واحد منزِّل حاجة حرام، فواحد معلَّق له عليها في كومنت، فبدل ما يِحس على دمه ويشيلها، تلاقيه بيعمل للكومنت لاف، ويسكت

لو أكثر الشيوخ بيعملوا حرام معين
ومعظم البنات بيعملوا فِعل معين حرام
وفيه حرام منتشر في كل مكان، غصب عنك هيصيبك

هيفضل الفِعل مُحرَّم، ولا يغرَّنَّك إتيانُه من الدعاء والمشايخ والبنات الملتزمة!
لأن القرآن محفوظ والسنَّة محفوظة وكُتب السلف محفوظة، فإن الفتنة تكون في إتيان الحرام من قِبل بعض الدعاة والمتصدِّرين ادعى للوقوع، فعادي
مش مصدر فتنة ولا حاجة، لأنك معاك الأصل في كل عِلم وفرع
والسلام على من اتَّبع الهُدى من ربِّه

نصيحة للكوميكات المنتشرة وفيها مَس للصلاة أو الدعاء من قريب أو من بعيد
قول الإمام أحمد رحمه الله:
(فإن قدر الإسلام في قلبك كقدر الصلاة في قلبك)

الشخص الشكَّاي، حياته كلها شكوى، مش مجرَّد مسمَّى: صياح الدراسة وفقط
لكن ده أسلوب حياته

وهو في ثانوي هيفضل يشكو للناس الظلم اللي بيتعرض له، ومؤامرات الناس عليه، ومواقف صعبة استثنائية حصلت له هو فقط، ونجى ونجح فيها بفضل منه فقط -لا بفضل الله- وإزاي إن كل حاجة كانت ضده حتى وزارة الكهربا كانت بتقطع الكهربا في وقت مذاكرته، ووزارة المية كانت بتقطع المية وهو بيستحمى، وقدر ينجح في النهاية
وأي حد في مرحلة أقل منه هيقوله: ههه أنت لسه شوفت حاجة! التقيل جاي، أنت مشوفتش تعب ولا سهر ولا أي مشاعر سلبية

هيدخل الجامعة، هيقول لأصحاب تالتة ثانوي، نفس البوء
وهيتخرج وهيقول لأصحاب الجامعة نفس الكلام
هيدخل الجيش، هيقول للناس أصحاب الإعفا نفس الكلام
هيخرج للحياة العملية، هيقول لأصحاب الجيش نفس الكلام

هو عايش حياته عشان يحسّس الناس بقيمته وبمجهوده اللي بيبذله

لدرجة إن اتقالي: ياعم احمد ربنا أنت اتسجنت، السجن أرحم م الجيش
واتقالي: احمد ربنا الدراسة أرحم من الجيش
مع إن نفس الشخص قالي في الدراسة: الجيش أرحم، المهم منكونش عايشين في توتر وضغط فترة الامتحانات
وإلخ إلى آخره

المهم نصيحة من رجل مُسن:

قراءتُك صفحةً من المصحف؛ خيرٌ لك من كتابتك مئة صفحةٍ في النِّياحة على حالك!
الله أخبر بدائك ودوائك.

يا رب احفظ أعمالنا من الرياء

سبحااااااانه/ سبهان الله/ سوووبحاااان الله ...
لما تشوف واحد بيعمل كدا أنصحه، خليه يبطَّل قلة أدب
ده ذِكر شرعه اللي خلقك!
أنت بتعمل ايه؟
وأنت كمشاهد بتسكت ليه؟
راضي بالتريقة على الذِكر؟
ولا خايف من ردة فعله؟
ولا مكسِّل تقوله؟
لو مكنتش من مرتبة: (قاتلوا في سبيل الله)
أو مرتبة: (أو ادفعوا)
فمش متبقي غير: (ولكن كره الله انبعاثهم فثبطهم وقيل اقعدوا مع القاعدين)!!

(قُلْ هُوَ اللَّهُ أَحَدٌ)
وكان أمية بن خلف يخرجه إذا حميت الظهيرة بمكة المكرمة، واشتد حرها، وعظم لهبها، فيطرحه على ظهره، ثم يأمر بصخرة عظيمة، فتوضع على صدره ثم يقول له : "لا تزال هكذا حتى تموت ، أو تكفر بمحمد وتعبد اللات والعزى"،
وبلال في ذلك البلاء والكرب الشديد يقول: "أحد، أحد".

ويجي كلب لا يعرف من الإسلام سوى اسمه وشرائعه الظاهرة، ولا يعرف تعظيم الدين في نفسه شيء
يتريق ويقول: أحدٌ أحدٌ !!
للضحك والكوميك!!
ربنا يهديهم، أو ياخدهم، يا رب استجب

الحمد لله وحده.

تألمت من خبر موت الشيخ أسامة عبد العظيم!
اللهم ارحم عبدك أسامة، وتجاوز عنه، وارفع درجته، واغسله من الخطايا بالثلج والماء والبرد.
اللهم ارفع درجته، واقبله في الصالحين!

وإني لأعد موت ذاك العبد مصابًا وقع، ونقصا حلَّ بأهل الأرض، وقد كان فريد هذا العصر علمًا وحالا.

إنا لله وإنا إليه راجعون، اللهم ائجرني في مصيبتي، وأخلف لي خيرا منها.

مُكرَه أخوك في ترك بعض الحرام؛ لا بطل في مجاهدتها
مُكرَه أخوك على ترك بعض الحرام؛ بسبب نظرات أحبابه أو بسبب أعراف المجتمع، أو بسبب لوم البيئة المحيطة عليه، أو بسبب تضييق أهله وأولياء أموره عليه إلخ، لا بطل في تركها

مُجبَر أخوك على ترك بعض الحرام؛ لا بطل في البُعد عنه
مُجبر أخوك على ترك الزنا والقمار والقتل والسرقة إلخ؛ بسبب عدم توافر أسبابها حواليه، لا بطل في مجاهدتها وتركها

مُكرَه أخوك في فِعل بعض الطاعات؛ لا بطل في إتيانها
مُكرَه أخوك على فِعل بعض الطاعات؛ بسبب انتظاره لأصحابه وهم يصلون السُّنن، أو بسبب حضوره مجلس عِلم لمقابلة أصحابه، أو بسبب صيامه بسبب صيام كل اللي معاه إلخ؛ لا بطل في إتيانها

البطولة في ترك الحرام مع القدرة على فعلها بدون أي مؤثر خارجي
والبطولة في فِعل الطاعة مع القدرة على الترك

البطولة في ترك محرَّمات مجتمعك، لا مُحرَّمات مجتمعات الآخرين

البطولة في ترك الكذب والغش والغيبة والشتيمة ومشاهدة الأفلام والمسلسلات والتبرج والتزين المحرَّمينِ والمجاهرة بأي حرام.. إلخ
والبطولة في فِعل الطاعات الواجبة من الصلاة والحجاب الشرعي وصلة الأرحام وبِر الوالدين والأكل من حلال.. إلخ