سبحان الله
مع إن الدكتور بيكتب وبيقول: مرَّة أحد المرضى ….
والجار بيقول: مرَّة واحد جاري….
وأي صاحب مهنة بيقول: مرَّة كان عندي زبون…
وكُل الشعب بيستعملها، يمكن أقل ناس بتستعملها الخُطباء
الخطيب مش كاشف الأسرار وفاضح بيوت الناس
لكن إزاي نغلط في طبيب أو مهندس أو تاجر!
لازم نميّل على الجانب اللي ملوش دراويش

(فإني رأيت الصبرَ عن مَحَارِم الله، أيسرُ من الصّبر علىٰ عَذابِ الله)

الرجالة تتكلم عن مشاكل الرجالة، وسيبوا مشاكل البنات للبنات!

سبحان الله
ما هو الراجل عنده أم وأخت وخالات وعمَّات وقرايب، زي ما عنده أب وأخ وقرايب وصحاب
فعادي مش مقياس لشيء

سبحان الله
الخروج بس لصلاة الفجر، بحسُّه بيجدد الإسلام ومعاني الإسلام، وبيعيد ترتيب أمور الحياة، حتّى قبل دخول المسجد

الراجل مهما عمل في يومه أو أسبوعه أو حتَّى سَنَتُه، بيلاقي أسباب دينيَّة بترجعله حساباته ودينه وبتحسسه بقيمته وبتهِّن عليه السعي والكد والتعب اللي بيلاقيه، وبتخليه يراجع نفسه ويتوب
لكن البنت ليها إيه؟
الصراحة مش عارف
بس البنت اللي يومها وأسبوعها متحاصر باستوريهات واتس صور لأصحابها بلبس حرام، وبوستات فيس معظمها شتيمة وإيحاءات جنسية وغزل في الرجالة، واستوريهات فيس بأغاني، وبشاتات فيها من الغيبة ما فيها
ثُمَّ خروجها من البيت يكون لفرح مُحرَّم أو تجمع عائلي أو صحاب مليئ بالغيبة
ثُمَّ ماذا؟
إيه هيخليها تراجع أفعالها وتفاصيل حياتها؟
بشوف إن البنت في حياتها قبل الجواز الصحبة الطيّبة، وبعد الجواز الراجل التّمام
الاتنين بيسلّموا بعض في مرحلتي الحياة للبنت
لكن أسباب تانية تقدر تنتشلها من مشاكل الحياة اليومية؟ أنا معرفش الصراحة، همَّا أدرى
لكن الانغماس في التفاصيل الحرام دي على المستوى البعيد؛ هتكوّن شخصية سيئة
ربنا قال:

كَانُوا لَا يَتَنَاهَوْنَ عَن مُّنكَرٍ فَعَلُوهُ ۚ لَبِئْسَ مَا كَانُوا يَفْعَلُونَ

يعني مُجرَّد السكوت عن الحرام؛ ربنا سمَّاه فِعل
فلو البنت هتقضِّي يومها بين الأبلكيشنات المختلفة نصايح لأصحابها، الموضوع هيفرق معاها شخصيًا بنسبة كبيرة، وده واجب عليها، ومع الوقت شخصيتها هتبقى قوية

بحب الاهتمام بالوقت "الحالي" والاستمتاع بيه، واستغلاله في صُنع فرحة وسعادة خاصَّة ليَّا

الشخص اللي دايمًا حاسس إن وقته الحالي مش كويس، ومنتظر أحداث محورية تحصل عشان حياته تتحسّن ويعيش حياته ويقدر يستمتع؛ بيضيَّع من حياته وقت كبير أوي في التفكير الزائد وإنه يشيل هموم المستقبل ويضيَّع لذة عيشته في الوقت الحاضر

وحتى لو حياته بقت مثالية ووصل للوضع اللي كان بيحلم بيه، بعد فترة هيحس بممل طبيعي، وهتحصل المشاكل والتعب والأمراض والعقبات كالعادة وسُنّة الحياة
مستفدش غير إنه يضيَّع حاضره وخلاص

استمتاعك بأوقات الفراغ الحالية في الأجازة، وشُربك الشاي، وتفتح الموبايل تلعب أو تفتح أي أكونت تتفرج
وخروجك للصلوات ومقابلتك لأصحابك
أنت السبب في فُقدانك لمتعتها الحالية، لأن بعد كدا أنت هتتمنى تعمل نفس الحاجات دي، ما هي الخيارات محدودة في الحياة، مفيش أنشطة كتير ويدوب اليوم ٢٤ ساعة تلتهم بيروح نوم، فمتحسس نفسك إن التفاصيل اليومية الحاليّة دي: حياة اكتئاب وملل والمشاعر السلبية دي، لأن دي أنشطة الحياة

سواء هتموت انهاردة، أو هتموت بعد ٥٠ سنة، هتفضل واجبات اليوم بتاعك معروفة، وهتفضل الأنشطة المتاحة لك في اليوم معروفة ومحدودة
فاستمتع بيومك، وأي حاجة أت تتمناها تحصل في يومك ادعِ ربنا بيها يوميًا، مع أنشطة حياتك، لحد ما ربنا يرزقك بالخير ليك وباللي يراضيك

(بسم الله الذي لا يضر مع اسمه شيء في الأرض ولا في السماء وهو السميع العليم)

عن زيد بن وهب قال:
قال لي ابن مسعود:

لا تَدَعْ إذا كان يوم الجمعةِ أن تُصَلِّيَ على النبيِّ صلى الله عليه وسلم ألف مرة، تقول: اللهمَّ صلِّ على محمَّد صلى الله عليه وسلم.

دائمًا بستغرب من البنات "المسيحيين" في صلواتهم داخل الكنائس، ومن مجرَّد دخولهم الكنيسة
المفروض دي أكتر مكان تكون فيه الحالة الروحانية عالية، يكون ده لبسهم كدا عادي؟
وعادي يكون الرجالة معاهم في نفس المكان ويشوفوهم كدا؟
يعني فيه الحالة الروحانية المُكتسبة؟ فين الزهد في الدنيا في اللحظات دي؟ وأنت جمبك حاجة من أفضل الزينة في الدنيا وفي أجمل شكل لها؟
واستغربت أكتر لما سمعت رجل دين من عندهم وهو بيقول عادي الصلاة في اللبس ده مباح ومباح أي لبس، لو شخص عايز يستزيد في الحسنات ممكن يحتشم، لكن لو صليت بالمايوة وفي قلب أعظم مكان عبادة عندهم وأمام إلههم، عادي تقف كدا !

مش عارف بصراحة أي روحانيات الراجل داخل الكنيسة والبنت هيكتسبوها في وضع زي ده!
بالعقل والمنطق فين الدين في الموضوع؟ فين الجزء الديني؟
ده أعظم فِعل في الدين بيكون حواليك زينة الدنيا من كل ناحية

ومن هنا من مميزات السلام، إن الأمور ليها حدود مُحددة، في الأوقات وفي الأماكن وفي العدد وفي المقدار وفي النِصاب وفي كل شيء، وفيه قدر بسيط معفو عنه، وفيه تعدِّي على الحدود بدون قصد معفو عنه
لكن اللي مش معفو عنه هو تعدِّي الحد بقصد، ولو بقدر بسيط فهو وقوع في الحرام
وده موجود في الصلاة وفي الصيام وفي الحج وفي الزكاة
وكمثال في الحجاب: المباح الوجه والكفَّين، فأي جزء زيادة يظهر بقصد أو حتى بإهمال وعدم اعتناء بالحُكم الشرعي؛ فهو وُقوع في الحرام
عشان كدا مهما انتشر موضوع ظهور الجزء اللي فوق الكوتش من الرجل بسبب شراب قُصير أو لبس قصير فهو حرام، وكذلك في الإيد أي جزء يظهر زيادة عن الكف عن قصد حرام
وعن عدم اهتمام، برده غلط
والاستهزاء بالعناية بالحُكم أشد حُرمة
لما تكون واحدة بتتحرى تلبس حاجة تحت الهدوم عشان الكُم قصير شوية، أو عشان لما ترفع إيدها، إيديها متبنش، ده من الدين، وده الحجاب وده فرض مش رفاهية، والتريقة عليه حرام، وكذلك في الرجل وفي الرقبة وفي أي جزء ممكن يظهر بالحركة، واجب تحرِّي "حَجبُه"

- (من قال لا إله إلا الله وحده لا شريك له له الملك وله الحمد يحيي ويميت وهو على كل شيء قدير
(١٠ مرات) بعد صلاة الفجر وبعد صلاة المغرب ...
وهو ثانٍ برجليه قبل أنا يُكلِّم أحداً، أرسل الله له مسلحة تحميه)
مسلحة مسلحين من الملائكة يحمونه.

- بعد صلاة الفجر وبعد صلاة المغرب يقول الإنسان وهو دانٍ برجليه قبل أنا يُكلِّم أحداً: (اللهم أجرني من النار سبعاً) كُتب له جوار من النار.

سبحان الله
موجود مساحة واسعة في مسألة ألوان الحجاب
والبنت بتبقى عارفه ومتأكدة هي لابسة الحجاب ده باللون ده بالشكل ده للزينة والشكل الحلو ولا لأ
ومع ذلك بتسأل!
المساحة موجودة للتوسعة على الناس، مش لاستغلالها في الحرام!
البنات بتحاول تستغل أكبر قدر ممكن من كلمة (اللبس الملفت والزينة هو بس اللي لا يجوز) وتلبس ما تشاء أن تلبس تحت ذريعة مش مُلفت ولا مُزيّن!
هل دي معاملة تَليق بمسلمة؟
هل دي معاملة تَليق بالتعامل مع الله ومع حدوده ورُخصه؟
استغلال النصوص الدينية في الحرام
ما هو مفيش حد عاقل هيقول لبس الفستان السوارية قدام راجل واحد اجنبي حلال!
(مقصدش السائلة)
لكن عمومًا أي مسألة دينية بيبقى فيها سِعة من الشارع، بلاقي استغلال غريب ليها لتمرير الحرام والشهوات في جميع مناحي الدين
والله سبحانه وتعالى عليم، مهما سألت ومهما خدت فتاوى ربنا عالم بنيتك في اللبس وبنيتك في التحايُل

بِئست الصُحبة؛ نُزعت منها الأمر بالمعروف والنهي عن المنكر

لو كان في عُمرك كله محضرتش ولا فرح مختلط، ولا شوفت فيديوهات لأفراح من دي؛ كان مستحيل يوم فرحك توافق صحابك يطلّوا تليفوناتهم ويصوروك مع مرات وهي بترقص، واللي كان هيعمل كدا وأنت تشوفه، كنت هتروح تضربه وتبوّظ الفرح
السبب الوحيد اللي خلّاك موافق: إنك شوفت الناس بتعمل كدا وعادي
لكن مهما كلّمت صحابي في الموضوع ده، طبعًا بلاقي الإجابة: مستحيل طبعًا حد يتفرج على مراتي وهي بترقص، ومستحيل حد يصورها
يجي فرحه، يلاقي كل ده اتعمل بكل سهولة، من غير حتى زعل داخلي أو تأنيب ضمير!
والسبب معروف

عايز تتصور مع مرات صاحبك؟
الموضوع سهل، روحله في الفرح واتصور معاها بس هيبقى بينكم فيه مِحرم -جوزها- بس

عايز تتفرج على مجموعة بنات وهي بترقص وبتهز جسمها؟
سهلة، روح فرح صاحبك واتفرج براحتك، بس مجموعة البنات اللي بيرقصوا دول هيبقوا محارم صاحبك ومحارم مراته

لما يكون صاحبك خاطب ومنزل صورته مع خطيبته
وخطيبته في كامل زينتها
أو لابسة فستان غير شرعي
أو فيديو وهو بيلبسها الدبلة
أو أي شيء في البوست حرام
متعملش لايك للبوست، ومتعملش كومنت
الأفضل تروح تبارك له خاص على الخطوبة (مش على الأفعال المحرّمة اللي عملها مع الخطوبة) وبعدين تنصحه إن اللي عمله ده غلط وحرام
ولو عايز تنصحه في كومنت على البوست بتاعه؛ فده شيء كويس ليك وله وللمتابعين وللمسلم الضعيف المتابع

لكن لو بوست الخطوبة فيه حاجة حرام، وواحد أو واحدة عمل له لايك أو كومنت فهو غلطان، وأناني
ولو منصحوش يبقى غشّاش

حاول تكون نيّتك الأولى والسبب الوحيد لتحرُّكك لنصيحة شخص أو كتابة بوست أو كتابة اقتباس أو نشر فيديو ديني أو آيات من القرآن؛ أن يُعبد الله في الأرض

نيتك أهم شيء في أعمالك، هي السبب في بناء شخصيتك بعيدًا عن الناس والبيئة من حولك
وهي السبب في ثباتك
وهي السبب في مدى قبول كلامك للطرف المُتلقِّي
وهي السبب في البركة في حياتك ورزقك
وهي سبب قبولك عملك

دوَّر على عَمل البنت اللي هتختارها، متبصِّش على لبسها وعِلمها وبس
ما هي لو اللي اتعلمته ده اتعلمته عشان تحسِّن عَملها، هيظهر عليها
يا فرحتي حارسة حِمى الإسلام ومنتقبة، وكل يومين تلاقيها في فرح شَكل، أو بتنزل صور ليها مع بنات مش لابسة لبس شرعي!
النوع ده مسموش بنت ملتزمة بالدين الإسلامي، دي بتعمل حاجة حرام وبتجاهر بيها
عشان بس المصطلحات اللي بقت مضروبة

عندك عشرات المنابر المجانية مفتوحة 24 ساعة (مواقع التواصل الاجتماعي) ومتستغلهاش في التبليغ عن دين الله؟
ليه؟
أنت مسؤول أمام الله سبحانه وتعالى عنها وعن فِعلك فيها
ليه متستغلهاش في إظهار نجوم الصحابة والسلف الصالح؟
ليه متستغلهاش في الصلاة على النبي محمد صلى الله عليه وسلم؟
ليه متستغلهاش للتبليغ عن النبي صلى الله عليه وسلم؟
ليه متستغلهاش في أفعال وأقوال، بسببها يُعبَد الله ويُشكر ويُحمد؟

ستُسأل عنها يوم القيامة، استخدام في الدين وتوصيل لدين الله، وتذكره بآياته، ومجانية وبدون أي بذل ولا تعب، وتتركها؟

ثم الأسوأ والأغبى إن حد يستغلها في كُفران نِعم الله
أو في جحود نِعمه
أو في عيصان الله
أو في نشر الحرام
أو في تذكير الناس بأغاني المغنيين
أو في نشر ألشات الفاسقين والدَّاعرين
سبحان الله!

ممكن متستخدمهاش خالص، هيبقى حسابك أقل من إستخدامها في الحرام وفي الصدِّ عن سبيل الله وعن دينه!

متعرفش تعيش تاكل وتشرب وتجلل وتتكاثر، من غير ما تَمس الدين بسوء؟ ولا دين الناس بسوء؟ ولا تُذكِّر الناس بما حرَّمه الله؟
لا إله إلا الله

(بسم الله الذي لا يضر مع اسمه شيء في الأرض ولا في السماء وهو السميع العليم)

فَعَلِمَ مَافِي قُلُوبِهِمْ فَأَنزَلَ السَّكِينَةَ عَلَيْهِمْ