لو الستات تتصرّف برجولة واحترام وتاخد موقف لو اللي حصل ضد اللي عايزاه وحرام، طبيعي هتلاقي متنفّس واسع جداً لكل طاقتها المكبوتة وتحرير فطرتها
بدل ما تطرشه في وش الشباب
لكن هنقول ايه؟ انعدام شخصية قبل ما ندخل في موضوع الحلال والحرام من أصله

تكون الناس قاعدة في بيوتها في أغلب الأحيان قاعدين في عمل مباح في أمور الدنيا، وجزء قاعد في عمل مأجور عليه، وجزء بسيط بيعمل حاجات حرام
يقوم اتنين قرَّروا يعملوا فرح ويعزموا كل الناس دي ويجمعوهم في مكان واحد عشان يعمل كذا حاجة حرام مع بعض وبشكل جماعي
ولما تيجي للعريس أو للعروسة تقولهم: ليه مش بتنصح الناس قبل ما تيجي أنهم يلبسوا حجاب شرعي، أو يطلعوا من الباب التاني عشان الستات، أو يغضوا بصرهم عن الستات وخلافه من النصائح
تلاقي الرد بكل برود وأنانية: أنا مالي هو أنا مسؤول عنهم أو هتحاسب عنهم!

(بسم الله الذي لا يضر مع اسمه شيء في الأرض ولا في السماء وهو السميع العليم)

تقريبًا لو مكنش فيه ميديا وواتس وفيس وانستجرام ومواقع بينزل عليها صور، كان فيه بنات كتير من الجيل الحالي انتقبت، وبنات تانية معدتش بتحط مكياچ، لأن بقيت بحِس إن دي عقبة كبيرة بالنسبة لفئة من البنات ضد النقاب أو ضد عدم التزيُن المُحرَّم
سواء كان ده سبب تافه أو سبب قوي؛ سيُسأَلون

ولو كانت فتنة صعبة، فده طبيعي وسُنِّة الدين والدنيا؛ الصبر
مش هتاخد حاجة في الدين أو في الدنيا إلا بصبرك، وحتى الجزاء الأخروي بيكون جائزة للصابرين (إني جزيتهم اليوم بما صبروا أنهم هم الفائزون)

تبقى نايم في عِز نومك، أو منهمِك في عِز شغلك، أو بتلعب مع أصحابك، وبالك مستريَّح ومرتاح إن مهما حصل حاجة في البيت أو ع الميديا أو في العيلة أو أي موقف مع مراتك من بعيد أو من قريب أنت عارف ومتأكد إنها مش هتخونك وهتعمل الصح والواجب عليها؛ مش عشان خايفة منك ولا عشان أنت حاكِم البيت، لكن عشان هي مؤمنة حافظة للغيب
قال الله:
(فالصالحات قانتات حافظات للغيب بما حفظ الله) !
قانتات: مطيعات، وحافظات للغيب: حافظات لأنفسهن عند غيبة أزواجهن عنهن في فروجهن وأموالهم، وللواجب عليهن من حق الله في ذلك وغيره، حافظات لما استودعهن الله من حقه، وحافظات لغيب أزواجهن
وقال النبي صلى الله عليه وسلم:
(خير النساء امرأة إذا نظرت إليها سرتك، وإذا أمرتها أطاعتك، وإذا غبت عنها حفظتك في نفسها ومالك)

لكن لما تبقى كل ما تتأخَّر في مشوار أو في شغل أو تبات بره البيت، تبقى مقلق هي تعمل حاجة غلط، يبقى الموضوع مش تمام

الحفظ في النفس نفسها ونفس زوجها، ومال زوجها، وفرجها، وغيبة أزواجها، باختلاف المعاني المذكورة، أعلى مراتب الحِفظ، ومعنى ذلك إن ما كان أدنى فهو من باب أولى يكون محفوظ
المنتشر حاليًا جروبات النساء اللي البنت تقعد تتكلم فيه عن عيوب الرجالة بما سمعت من جوزها وعرفت منه ومن حديثه عنه، أو تقع تشتم أو تغتاب أو تتفرج معاهم على فيلم أو أغنية أو أي شيء محَّرم بسبب إن جوزها مش هيعرف! دي بلوى كبيرة
ودي من عدم حفظ غيبة الزوج، ودي من أسوأ صفات المرأة إن لم تكن أسوأها، إنها تخاف تعمل فعل معيَّن قدام جوزها، لكن لو جوزها مش موجود تعمله عادي! مهما كان الفعل ده كبير أو صغير، اللي مش بيتعمل قدام الزوج ممنوع يتعمل في غيابه

- (من قال لا إله إلا الله وحده لا شريك له له الملك وله الحمد يحيي ويميت وهو على كل شيء قدير
(١٠ مرات) بعد صلاة الفجر وبعد صلاة المغرب ...
وهو ثانٍ برجليه قبل أنا يُكلِّم أحداً، أرسل الله له مسلحة تحميه)
مسلحة مسلحين من الملائكة يحمونه.

- بعد صلاة الفجر وبعد صلاة المغرب يقول الإنسان وهو دانٍ برجليه قبل أنا يُكلِّم أحداً: (اللهم أجرني من النار سبعاً) كُتب له جوار من النار.

بطريقة بسيطة
الحرام يبقى حلال
والعيب يبقى مستحب
والحياء يبقى عيب شخصي وقلة احتكاك بالواقع
لما يبقى الطرف التاني مسموش شخص غريب، يبقى اسمه (زميل مهنة)!
بمجرَّد ما يبقى اسمه زميل مهنة، كل المبادئ بتتعكس مش بس بتتغيَّر، وأولها المبادئ الدينية

بتلاقي فيه مشكلة بتقابلك تلقائيًا لما تكون مراتك بتشتغل، وهي معضلة البيست فريند، اللي بتتسمَّى في الشغل "زميل عمل"
لأ، مستحيل تخرجي مع صحابك وفيه معاهم راجل أخوه واحدة فيهم أو جوزها
في الشغل: متاح عادي الخروج في نفس المجموعة بحجة: خروجة عمل
ممنوع تردي على رجالة
في الشغل: كلام بالساعات مع الرجالة، بحجة رئيس العمل
متاح في الشغل: تخرجي معاهم، تقعدي في اجتماعات معاهم بالساعات، بتخرَّج منك من الصفات الشخصية والطبيعة الشخصية حاجات مينفعش حد يعرفها غير أقرب الناس ليكي، لكن عادي تخرج لجروب العمل، لأنه "عمل" محدش بيبص للناس نظرة تانية في الجروب
متاح زملاء العمل يكونوا عندك على كل مواقع التواصل ويشوفوا مذكرات اليومية المنشورة على الميديا، وضحك وهزارك مع صحابك، وعادات الشخصية واليومية، ويكإنه عايش معاكي تفاصيل اليوم، والحاجات اللي بتفرحك واللي بتزعلك وبتعملي إيه في أوقات فراغك وكل تفاصيل الحياة بحجة إنه زميل عمل

لو بصيت لها من منظور خارجي، وهو منظور الناس اللي عندها فعلًا بيست فريند وكدا، ففعليًا لما الست تكلم الراجل، وهو يمنعها من صاحبها وميمنعهاش من زميلها في الشغل، فهي تلقائيًا بتحس بتخلف عقلي من الراجل، وطبيعي النهاية بتكون إن التعامل مع الرجالة كلهم زي بعض، عشان المبدأ متخلِّف
هو أنا ممكن أسافر في رحلة شباب وبنات؟
لا مش ممكن طبعا غير لو كنت موجود معاكي
طب ممكن أسافر مع جروب الشغل برده شباب وبنات عشان عندنا شغل ومعسكر؟
آه عادي، ما دام "شغل"
هو مفيش مبدأ عنده، هو فيه غِيرة فِطرية عند الراجل ده، بتتلاشى بسبب عادات المجتمع الحرام في إن التجمعات دي عادية وكل الناس بتعملها

وبتلاقي مع الوقت الموضوع بدأ يزيد ويوسع وملوش نهاية
تلاقي كل الفوتوجرافر ضايفين بعض وكل المهندسين ضايفين بعض وكل الدكاترة ضايفين بعض، "زميل مهنة بقى" وكلام وتعليقات وإعجابات بالشغل ومنشنات وتعليقات على جزئيات في الشغل، وسؤال عن كيفية تعلم جزئية معينة، وكل مهنة عاملة مجتمع خاص بيها جواه: يجوز كل الحرام؛ لأجل التعلم والخِبرة!
وناسيين إن التعلُّم والخِبرة من عند الله، والتوكُّل على المُحرَّمات دي نهايته وحشة

عن زيد بن وهب قال:
قال لي ابن مسعود:

لا تَدَعْ إذا كان يوم الجمعةِ أن تُصَلِّيَ على النبيِّ صلى الله عليه وسلم ألف مرة، تقول: اللهمَّ صلِّ على محمَّد صلى الله عليه وسلم.

بشوف إن كلمات زي:
تعالى صلِّي دول خمس دقايق
تعالى صلِّي معانا المسجد ده بيخلص بسرعة
صلِّي السنة ده دقيقتين
استناني بس لما ادخل أصلي، اعتبر إني اتأخرت في اللبس
إحنا مستعجلين! طب هصلي بسرعة مش هاخد وقت
اعتبر نفسك صيحت متأخر وقول أذكار الصباح
خمس دقايق بس أكنك اتأخرت في المشوار واقرأ ربع جزء
إلخ إلخ
فيها تقليل من قيمة العبادة، لو مكنش ده وقتها الحقيقي اللي بتاخده، وبتُستخدم لرِضا الشخص اللي قدامي

حياتك كلها، لو خدت كل يوم كوحدة واحدة لواحدها، فالمطلوب منك هو ذِكر الله بالفروض المفروضة أو بالمُستحبَّات، أي شيء بتعمله فأنت بتعمله عشان يساعدك تعيش عشان تعرف تذُكر ربنا
فلما يجي وقت الذكر، مينفعش تفضَّل عليه الوسيلة، لأنك وصلت للغاية المطلوبة، اعملها الأول

وتاني حاجة تكون مؤمن بأحاديث النبي صلى الله عليه وسلم وبمكافأتها الدنيوية والأخروية اللي النبي صلى الله عليه وسلم أقرَّها
قال النبي صلى الله عليه وسلم:
- (من قال لا إله إلا الله وحده لا شريك له له الملك وله الحمد يحيي ويميت وهو على كل شيء قدير
(١٠ مرات) بعد صلاة الفجر وبعد صلاة المغرب ...
وهو ثانٍ برجليه قبل أنا يُكلِّم أحداً، أرسل الله له مسلحة تحميه)

مؤمنين إيمان تام بنزول مسلحة مسلحين من الملائكة يحمونه

هتقضِّي سنين حياتك عايش في صِياح
من صياح الثانوية العامة لصياح مذاكرة الكلية لصياح ظُلم الدكاترة لصياح صعوبة الأمتحانات لصياح التقديم للجيش لصياح التقديم لشغل لصياح مرتب الشغل لصياح مشاكل الشغل لصياح رفضك لما تتقدم لعروسة لصياح مشاكل الخطوبة مع أهل لصياح صعوبة الحياة وتوفير لقمة حلال لصياح الأطفال لصياح مشاكل الجيران.................... لحد ما تموت

هتعيش حياتك في كُفران لنِعم الله اليومية، لحد ما تنتهي حياتك بالموت
وهتقابل ربنا في النهاية

وأنت في الحياة مصدَّر للناس كُفران حياتك يوميًا يوم بيوم، ويكأن يومك مفيش فيه ولا نِعمة واحدة تستحق الشكر، أو تستحق الجَهر بيها
أو إكرامًا لها؛ تكُف عن السوء اللي حلَّ بك في اليوم

في النهاية هتفضل زانق نفسك في دائرة الظُلم والاضطهاد والمعافرة وبذل الجهد بدون استشعار أي خير في تفاصيل حياتك اليومية والأسبوعية والسنوية
هتفضل عايش مضايق وشايف إن الدنيا هتتحسن قدام
لحد ما يجي قدام وتلاقي نفسك ميِّت
لا استمتعت بوقتك الحالي، ولا جهزت خطة لحياتك، قاعد تولول يوميًا زي الناس اللي بتولول مستني الفَرج، والفَرج مش بيجي بالولولة

استمتع بحياتك يوم بيوم
وقضٍّي واجبك اليومي من العبادة والتعلُّم
مفيش نهاية للتعب إلا الموت
ومفيش نهاية للجهاد والمجاهدة إلا الموت
ومفيش نهاية للصبر إلا الموت
حياتك كلها الوحدة البسيطة (الساعة) أو الوحدة الكبيرة (السنة) أنت عايش فيها بالصبر والمجاهدة والتعلُّم والعبادة في تعب، مفيش نهاية، مفيش ليفل هتوصله ويبق ى كدا تم اسقاط التكليف من عليك

"أيها الكادحون إلى الله يجاهدون أنفسهم والشيطان والدنيا؛ آخرُ الكَدْح لقاءُ الله".

("يَآ أَيُّهَا الْإِنسَانُ إِنَّكَ كَادِحٌ إِلَىٰ رَبِّكَ كَدْحًا فَمُلَاقِيهِ"؛ يُصارحُك القرآن بحقيقة الطريق إلى ربك إنه كَدْحٌ، وكَدْحٌ شديدٌ، والكَدْح: جُهد النفس جُهدًا يؤثر فيها، وكيف لا يكون كذلك وكله مجاهدةٌ للنفس وهواها وللشيطان وفتنته وللدنيا وزينتها)

(ربَّاه مرحى بالكَدْح ومرحبًا ما كنتَ الملاقَى من بعده؛
لكن ثبِّتنا وثبِّتنا وثبِّتنا)

مُكرَه أخوك لا بطل

اللي يقولك أنا هزعل لو مجتش الفرح،
قوله:
(واتقوا يوماً لا تجزي نفس عن نفس شيئاً) [البقرة:48]
(ولا تزر وازرة وزر أخرى ) [الأنعام : 164]
(لكل امرئ منهم يومئذ شأن يغنيه ) [عبس : 37]
( يا أيها الناس اتقوا ربكم واخشوا يوما لا يجزي والد عن ولده ولا مولود هو جاز عن والده شيئا ) [لقمان : 33]
.

أنا بطَّلت أنزِّل كلام عن الكورة نهائي على أي أكونت، بسبب إن كان فيه شخص بحبُّه على الميديا، معرفش أي معلومة عنه غير الأكونت بتاعه، كان كل ما أنزل بوست عن الكورة (البوست مش بيبقى فيه أي مخالفات صورة لاعيب وفوقها ايموشن) كان يدخل يكلمني عن البوست، وأنا أمسحه
وبعد كذا يوم، أنا بدأت أقلل من بوستات الكورة، وهو بقى بيكتفي بريأكت (😡) على البوست، أنا أوِّل ما أشوف الريأكت منه، كنت بمسح البوست
لحد ما وصلت بعد فترة بسيطة، لإن أنا معدتش بنزِّل بوستات عن الكورة خالص، مش بسبب أي شيء إلا لأني بحبه، وهحب أعمل اللي هو بيحبه ومعملش حاجة تضايقه، لأنه كانت نصيحته ليا من باب (الأولى) ومن جوانب ممكن كنت أنا شايفها أمور جانبية ساعتها
وحتى في تويتر أو الواتس، المواقع اللي هو مكنش له أكونت عليها أو مش عندي، مكنتش بنزل إلا احترامًا وحُبًّا فيه بس
فما بال لو الشخص ده كان حد قريبي؟
أو شخصية مشهورة على الميديا؟
أو شخص أعرفه؟
أو أمي أو أبي؟
أو أخواتي؟
أو مراتي؟
أو ابني؟

وهنا اكتشفت حاجتين:
1- النصيحة لما بتتقدم من شخص لشخص بيحبُّه، لإما هيمتنع عنها لأنه فعلًا عِرف إن الموضوع ده حرام وهيبطل يعمله، لإما هو ما زال شايف إن الموضوع مش حرام أوي وفيه خلاف في الموضوع، بس هيمتنع برده عن الموضوع لحُبُّه في شخص الناصح
أما إن شخص يعدِّي الأمر الاجتماعي من حُبُّه للشخص، ويعدِّي الأمر الدين من حُكم الفِعل، ويستمر في أفعاله عادي، فالموضوع بيبقى صعب تَقبُّله
ومع ذلك لسه هتفضل مأمور بنصيحته كل ما تشوفه بيعمل نفس الأفعال

2- إن ممكن يكون صُحبتك الصالحة أكونت مجهول على أي ابلكيشن، بتستفاد مِنُّه، بيحسِّسك إن أنت مش لواحدك، وبيحسِّسك إنك ماشي على الطريق الصح
أي دليل تلاقيه متسيبوش، ومتقللش من قيمته
متعرفش، ممكن يكون سببك الدنيوي في النجاة فيه

عدل الإسلام هو عدل الله

لا ظُلم تحت عدل الله

ولعل اليوم يكون آخر الأيام، أو هذه الليلة آخر الليالي

قال النبي ﷺ : «أيعجز أحدكم أن يقرأ في ليلة ثلث القرآن؟»
قالوا: وكيف يقرأ ثلث القرآن؟
قال: «قل هو الله أحد: تَعدِل ثلث القرآن».
رواه مسلم.

متنساش وأنت في وسط أدعيتك الدينية والدنيوية أنك تدعي بالجنة بشكل مباشر ليك ولأهلك وأصحابك وأصحاب الفضل عليك
يا رب ارزقني الجنّة
لأن مهما كانت أدعيتك الدينية والدنيوية مش بالضرورة استجابتها توصّلك للجنّة
ودخولك الجنّة المفروض ده الهدف الأساسي من أي عمل أو دعاء ديني أو دنيوي

(بسم الله الذي لا يضر مع اسمه شيء في الأرض ولا في السماء وهو السميع العليم)

لا أُشفَى حتى تُشفَى