(بسم الله الذي لا يضر مع اسمه شيء في الأرض ولا في السماء وهو السميع العليم)

هذا المنكر الذي كان يتوجّب عليك إنكاره، وهذا الأمر البيّن الذي كان عليك أن توضّح حلاله من حرامه؛ قد يكون نجاتك في الآخرة، وقد يكون سببًا في هداية مئات بل ملايين مِمّن يتّبعونك.

أمر بغرس الفسيلة (بالعمل) حتى بعد قيام الساعة
هل بعد قيام الساعة فيه ثواب ديني؟
لأ
هل بعد قيام الساعة فيه استفادة دنيوية مُحصّلة من غرس الفسيلة؟
لأ
عمل لله وفقط، دون انتظار استفادة دنيوية أو أخروية، عمل إسلامي للامتثال لأمر النبي صلى الله عليه وسلم

ولسّه فيه ناس هتقولك عن أمرك بالمعروف ونهيك عن المنكر: كلامك مش هيقدّم ولا هيأخّر!
بيعارضوا كلام النبي صلى الله عليه وسلم!
ويُقدمون بين يدي الله ورسوله
والله سبحانه قال:
(يا أيها الذين آمنوا لا تقدموا بين يدي الله ورسوله واتقوا الله)
وقال:
(يا أيها الذين آمنوا لا ترفعوا أصواتكم فوق صوت النبي ولا تجهروا له بالقول)

اللهم اجعل سعينا كُلَّه في مرضاتك يا رب، وتقبله

عن زيد بن وهب قال:
قال لي ابن مسعود:

لا تَدَعْ إذا كان يوم الجمعةِ أن تُصَلِّيَ على النبيِّ صلى الله عليه وسلم ألف مرة، تقول: اللهمَّ صلِّ على محمَّد صلى الله عليه وسلم.

كومنت للساخر الهادف بعد تحريمه الصريح للاحتفالات بعيد الميلاد في البوست، بيقول: لو أنت تنوي بالاحتفال بهدف التقرّب إلى الله، فده فعل لم يفعله النبي صلى الله عليه وسلم وأنت أعلم من النبي!!
ولو تنوي باحتفالك ابتغاء فرحة الشخص (غرض دنيوي) فده شرك ومحبط لعملك!!
ده نص كلام العلَّامة بعد تحريمه للاحتفال!
ويجي واحد بعد فترة يقولي: أنت بتبغض فلان في الله ليه؟

فِكرة الشخصية المشهورة اللي بتلعب على وَتر وضع مواجهة بين كلام العلماء وبين كلام رُسل الله، وبتلعب على وَتر العاطفة في الدين، واستجلاب تعاطف الجماهير لعدم اصطدامهم بمُحرَّم في الدين؛ فكرة فاشلة وتُسيء للإسلام وللعلماء، وهيجي مغالطات وشبهات كتير هيفشل قدامها المبدأ ده، وساعتها هيظهر الهَوى أو الجهل أو تحريم الحلال وإباحة الحرام بدون عِلم للناس

المرء قليلٌ بنفسه، أقل وأحقر وأذل بإخوانه الذين لا يأمرونه بمعروف ولا ينهونه عن مُنكر، ويُسارعون في الحرام وفي التشجيع على الحفلات المُحرَّمة الجماعية، سواء فعليَّة زي حضور الأفراح، أو قولية زي الغيبة

للتكرار
أي حد بينصح بمثالية في موضوع مستقبلي غيبي معندوش فيه أي خِبرة سابقة؛ اهرب منه

فئة من الناس بتنزل صورتها مع أخته أو مراته أو خطيبته ويحط أيموشن على وشها، وسايب صدرها والبنطلون اللي محدد جسمها عادي
بس أهم حاجة إنه مغطِّي وشَّها!
أخجلتنا رجولتك يا عم الرَّاجل 😎

لما حد يعمل حاجة حرام، لا يجوز التصوير معاه وهو بيعمل الحرام، صح؟
مينفعش تتصور مع واحد وهو بيشرب سجاير أو خمرة، ولا حتى وهو ماسكها في أيده
ومينفعش تتصور فيديو مع واحد وهو بيشتم
ومينفعش تتصور مع واحد وهو بيسرق أو بيغش، أو ماسك في إيده حاجة سارقها وفرحان
إلخ إلخ
كذلك الطبيعي والبديهي إن حرام البنت تتصور مع بنت مش لابسة حجاب شرعي! بديهيات!
واحدة لابسة لبس ضيَّق على جسمها، أو حاطه مكياج، حتى أقل القليل، لو لابسة فستان واسع من تحت، بس من فوق الفستان محدِّد صدرها، أو حاطة في وشها روج بس أو أي زينة مُحرَّم تظهر بيها قدام الأجانب
حرام تتصور البنت معاها، ده شيء بديهي، كُونه مُنتشر أو ناس نحسبها صالحين، بيتصوروا، ده مش هيخلي حُكم الصورة الإباحة، مستحيل نستحل التصوير مع شيء حرام، بسبب فِعله من جانب اللي لابسين حجاب شرعي
البنت طول ما هي لابسة لبس غير شرعي في مكان فيه رجال، زي الفرح أو الكلية أو الشارع أو الكورس أو خلافه، فهي في حرام دائم، ولا يجوز التصوير معاها
لو هي لابسة كدا في مكان فيه ستات بس؟ أو في البيت؟ أو ما شابه؟ ده حلال عادي لأن لبسها بالنسبة للمكان، لبس حلال عادي، هيبقى التصوير معاها حرام لو الهدوم كاشفة لعورة البنت أمام البنت بس، المقياس هنا هيبقى مقياس العورة، مش مقياس الحجاب اللي بيتلبس أمام الرجال

اللي بيتصوروا مع العروسة في الفرح، لو لابسة الفستان من غير ما تلبس طرحة تغطي صدرها ووسطها، حرام يتصوروها معاها، أو لو حاطة مكياج ومش بتغطيه لما بتظهر قدام الرجالة، حرام التصوير معاها

وطبعًا فيما يتضمن التصوير ده من عدم إنكار المنكر حتى لو بالقلب، وعدم النصيحة حتى ولو باللتي هي أحسن، وعدم إظهار الحُزن لوجود معصية لله، وخلافه من المترتب ع الصورة
لكن حتى لو مش مترتب عليها حاجة، والصورة مش هتنزل في حتة، والصورة مش هتتبعت للعروسة، فهو مجرَّد التصوير هو تصوير لحرام
ومفيش حاجة اسمها صورة للذكرى، وآخر يوم في الكورس وآخر يوم في الجامعة وخلافه، لما تبقى لابسة لبس شرعي يبقى الناس تتصور معاها عادي، أو تتصوروا في البيت من غير حجاب خالص عادي

لو الستات تتصرّف برجولة واحترام وتاخد موقف لو اللي حصل ضد اللي عايزاه وحرام، طبيعي هتلاقي متنفّس واسع جداً لكل طاقتها المكبوتة وتحرير فطرتها
بدل ما تطرشه في وش الشباب
لكن هنقول ايه؟ انعدام شخصية قبل ما ندخل في موضوع الحلال والحرام من أصله

تكون الناس قاعدة في بيوتها في أغلب الأحيان قاعدين في عمل مباح في أمور الدنيا، وجزء قاعد في عمل مأجور عليه، وجزء بسيط بيعمل حاجات حرام
يقوم اتنين قرَّروا يعملوا فرح ويعزموا كل الناس دي ويجمعوهم في مكان واحد عشان يعمل كذا حاجة حرام مع بعض وبشكل جماعي
ولما تيجي للعريس أو للعروسة تقولهم: ليه مش بتنصح الناس قبل ما تيجي أنهم يلبسوا حجاب شرعي، أو يطلعوا من الباب التاني عشان الستات، أو يغضوا بصرهم عن الستات وخلافه من النصائح
تلاقي الرد بكل برود وأنانية: أنا مالي هو أنا مسؤول عنهم أو هتحاسب عنهم!

(بسم الله الذي لا يضر مع اسمه شيء في الأرض ولا في السماء وهو السميع العليم)

تقريبًا لو مكنش فيه ميديا وواتس وفيس وانستجرام ومواقع بينزل عليها صور، كان فيه بنات كتير من الجيل الحالي انتقبت، وبنات تانية معدتش بتحط مكياچ، لأن بقيت بحِس إن دي عقبة كبيرة بالنسبة لفئة من البنات ضد النقاب أو ضد عدم التزيُن المُحرَّم
سواء كان ده سبب تافه أو سبب قوي؛ سيُسأَلون

ولو كانت فتنة صعبة، فده طبيعي وسُنِّة الدين والدنيا؛ الصبر
مش هتاخد حاجة في الدين أو في الدنيا إلا بصبرك، وحتى الجزاء الأخروي بيكون جائزة للصابرين (إني جزيتهم اليوم بما صبروا أنهم هم الفائزون)

تبقى نايم في عِز نومك، أو منهمِك في عِز شغلك، أو بتلعب مع أصحابك، وبالك مستريَّح ومرتاح إن مهما حصل حاجة في البيت أو ع الميديا أو في العيلة أو أي موقف مع مراتك من بعيد أو من قريب أنت عارف ومتأكد إنها مش هتخونك وهتعمل الصح والواجب عليها؛ مش عشان خايفة منك ولا عشان أنت حاكِم البيت، لكن عشان هي مؤمنة حافظة للغيب
قال الله:
(فالصالحات قانتات حافظات للغيب بما حفظ الله) !
قانتات: مطيعات، وحافظات للغيب: حافظات لأنفسهن عند غيبة أزواجهن عنهن في فروجهن وأموالهم، وللواجب عليهن من حق الله في ذلك وغيره، حافظات لما استودعهن الله من حقه، وحافظات لغيب أزواجهن
وقال النبي صلى الله عليه وسلم:
(خير النساء امرأة إذا نظرت إليها سرتك، وإذا أمرتها أطاعتك، وإذا غبت عنها حفظتك في نفسها ومالك)

لكن لما تبقى كل ما تتأخَّر في مشوار أو في شغل أو تبات بره البيت، تبقى مقلق هي تعمل حاجة غلط، يبقى الموضوع مش تمام

الحفظ في النفس نفسها ونفس زوجها، ومال زوجها، وفرجها، وغيبة أزواجها، باختلاف المعاني المذكورة، أعلى مراتب الحِفظ، ومعنى ذلك إن ما كان أدنى فهو من باب أولى يكون محفوظ
المنتشر حاليًا جروبات النساء اللي البنت تقعد تتكلم فيه عن عيوب الرجالة بما سمعت من جوزها وعرفت منه ومن حديثه عنه، أو تقع تشتم أو تغتاب أو تتفرج معاهم على فيلم أو أغنية أو أي شيء محَّرم بسبب إن جوزها مش هيعرف! دي بلوى كبيرة
ودي من عدم حفظ غيبة الزوج، ودي من أسوأ صفات المرأة إن لم تكن أسوأها، إنها تخاف تعمل فعل معيَّن قدام جوزها، لكن لو جوزها مش موجود تعمله عادي! مهما كان الفعل ده كبير أو صغير، اللي مش بيتعمل قدام الزوج ممنوع يتعمل في غيابه

- (من قال لا إله إلا الله وحده لا شريك له له الملك وله الحمد يحيي ويميت وهو على كل شيء قدير
(١٠ مرات) بعد صلاة الفجر وبعد صلاة المغرب ...
وهو ثانٍ برجليه قبل أنا يُكلِّم أحداً، أرسل الله له مسلحة تحميه)
مسلحة مسلحين من الملائكة يحمونه.

- بعد صلاة الفجر وبعد صلاة المغرب يقول الإنسان وهو دانٍ برجليه قبل أنا يُكلِّم أحداً: (اللهم أجرني من النار سبعاً) كُتب له جوار من النار.

بطريقة بسيطة
الحرام يبقى حلال
والعيب يبقى مستحب
والحياء يبقى عيب شخصي وقلة احتكاك بالواقع
لما يبقى الطرف التاني مسموش شخص غريب، يبقى اسمه (زميل مهنة)!
بمجرَّد ما يبقى اسمه زميل مهنة، كل المبادئ بتتعكس مش بس بتتغيَّر، وأولها المبادئ الدينية

بتلاقي فيه مشكلة بتقابلك تلقائيًا لما تكون مراتك بتشتغل، وهي معضلة البيست فريند، اللي بتتسمَّى في الشغل "زميل عمل"
لأ، مستحيل تخرجي مع صحابك وفيه معاهم راجل أخوه واحدة فيهم أو جوزها
في الشغل: متاح عادي الخروج في نفس المجموعة بحجة: خروجة عمل
ممنوع تردي على رجالة
في الشغل: كلام بالساعات مع الرجالة، بحجة رئيس العمل
متاح في الشغل: تخرجي معاهم، تقعدي في اجتماعات معاهم بالساعات، بتخرَّج منك من الصفات الشخصية والطبيعة الشخصية حاجات مينفعش حد يعرفها غير أقرب الناس ليكي، لكن عادي تخرج لجروب العمل، لأنه "عمل" محدش بيبص للناس نظرة تانية في الجروب
متاح زملاء العمل يكونوا عندك على كل مواقع التواصل ويشوفوا مذكرات اليومية المنشورة على الميديا، وضحك وهزارك مع صحابك، وعادات الشخصية واليومية، ويكإنه عايش معاكي تفاصيل اليوم، والحاجات اللي بتفرحك واللي بتزعلك وبتعملي إيه في أوقات فراغك وكل تفاصيل الحياة بحجة إنه زميل عمل

لو بصيت لها من منظور خارجي، وهو منظور الناس اللي عندها فعلًا بيست فريند وكدا، ففعليًا لما الست تكلم الراجل، وهو يمنعها من صاحبها وميمنعهاش من زميلها في الشغل، فهي تلقائيًا بتحس بتخلف عقلي من الراجل، وطبيعي النهاية بتكون إن التعامل مع الرجالة كلهم زي بعض، عشان المبدأ متخلِّف
هو أنا ممكن أسافر في رحلة شباب وبنات؟
لا مش ممكن طبعا غير لو كنت موجود معاكي
طب ممكن أسافر مع جروب الشغل برده شباب وبنات عشان عندنا شغل ومعسكر؟
آه عادي، ما دام "شغل"
هو مفيش مبدأ عنده، هو فيه غِيرة فِطرية عند الراجل ده، بتتلاشى بسبب عادات المجتمع الحرام في إن التجمعات دي عادية وكل الناس بتعملها

وبتلاقي مع الوقت الموضوع بدأ يزيد ويوسع وملوش نهاية
تلاقي كل الفوتوجرافر ضايفين بعض وكل المهندسين ضايفين بعض وكل الدكاترة ضايفين بعض، "زميل مهنة بقى" وكلام وتعليقات وإعجابات بالشغل ومنشنات وتعليقات على جزئيات في الشغل، وسؤال عن كيفية تعلم جزئية معينة، وكل مهنة عاملة مجتمع خاص بيها جواه: يجوز كل الحرام؛ لأجل التعلم والخِبرة!
وناسيين إن التعلُّم والخِبرة من عند الله، والتوكُّل على المُحرَّمات دي نهايته وحشة

عن زيد بن وهب قال:
قال لي ابن مسعود:

لا تَدَعْ إذا كان يوم الجمعةِ أن تُصَلِّيَ على النبيِّ صلى الله عليه وسلم ألف مرة، تقول: اللهمَّ صلِّ على محمَّد صلى الله عليه وسلم.

بشوف إن كلمات زي:
تعالى صلِّي دول خمس دقايق
تعالى صلِّي معانا المسجد ده بيخلص بسرعة
صلِّي السنة ده دقيقتين
استناني بس لما ادخل أصلي، اعتبر إني اتأخرت في اللبس
إحنا مستعجلين! طب هصلي بسرعة مش هاخد وقت
اعتبر نفسك صيحت متأخر وقول أذكار الصباح
خمس دقايق بس أكنك اتأخرت في المشوار واقرأ ربع جزء
إلخ إلخ
فيها تقليل من قيمة العبادة، لو مكنش ده وقتها الحقيقي اللي بتاخده، وبتُستخدم لرِضا الشخص اللي قدامي

حياتك كلها، لو خدت كل يوم كوحدة واحدة لواحدها، فالمطلوب منك هو ذِكر الله بالفروض المفروضة أو بالمُستحبَّات، أي شيء بتعمله فأنت بتعمله عشان يساعدك تعيش عشان تعرف تذُكر ربنا
فلما يجي وقت الذكر، مينفعش تفضَّل عليه الوسيلة، لأنك وصلت للغاية المطلوبة، اعملها الأول

وتاني حاجة تكون مؤمن بأحاديث النبي صلى الله عليه وسلم وبمكافأتها الدنيوية والأخروية اللي النبي صلى الله عليه وسلم أقرَّها
قال النبي صلى الله عليه وسلم:
- (من قال لا إله إلا الله وحده لا شريك له له الملك وله الحمد يحيي ويميت وهو على كل شيء قدير
(١٠ مرات) بعد صلاة الفجر وبعد صلاة المغرب ...
وهو ثانٍ برجليه قبل أنا يُكلِّم أحداً، أرسل الله له مسلحة تحميه)

مؤمنين إيمان تام بنزول مسلحة مسلحين من الملائكة يحمونه