مساكين بنات المسلمين

الراجل مننا في أي وقت في اليوم بتكون حالته النفسية أو الدينية مش تمام، يجي عليه صلاة المغرب أو صلاة العشاء يسمع عشرات الآيات كفيلة أنها ترجَّع الأمور الدنيوية لوضعها الطبيعي، وبعضها كفيل لرفع الحالة الإيمانية للإنسان
وفي عِز سهره بليل عشان يخلّص الشغل أو المذاكرة يسيب كل ده وينزل يصلّي الفجر ويسمع ما شاء الله له أن يسمع من الإمام
وفي عِز شغله وتعبه بالنهار، يسيب الشغل فجأة ويروح يصلي الظهر جماعة في المسجد

بخلاف البنت اللي غالبًا لو هي شخصياً محاولتش تسمع من نفسها أو تقرأ من نفسها، مش هيوصل لها قراءة أو سماع غالبًا بالأيام! ودي حالة صعبة الصراحة
وبرده في عز انشغالها بأعمال البيت أو الشغل أو أيًّا كان سبب الانشغال، في أغلب الأحيان هتأجل الصلاة لوقت الراحة، بعد ما تخلص أعمالها، وساعتها هتحس الصلاة تقيلة عليها كمان، فبدل ما المفروض تكون الصلاة سبب للراحة، أصبحت سبب شغل إضافي بعد انتهاء الشغل اليومي لها

الآية أو الآيتين اللي بنسمعهم في الصلوات الجهرية ليهم تأثير؟ ليهم تأثير كبير جدًا، ومش هيحس بالتأثير إلا اللي جرَّب

ممكن يكون للبنات عبادات يوميَّة أو أذكار أو خلافه، تُغنيها عن سماع القرآن وحضور العبادات الجماعية اليومية؟
أكيد، ولازم تدوَّر وتشوف الموضوع ده

وأي راجل مسلم مش بيصلي الخمس صلوات في المسجد، فهو مسلم محروم الصراحة
.

عن زيد بن وهب قال:
قال لي ابن مسعود:

لا تَدَعْ إذا كان يوم الجمعةِ أن تُصَلِّيَ على النبيِّ صلى الله عليه وسلم ألف مرة، تقول: اللهمَّ صلِّ على محمَّد صلى الله عليه وسلم.

أي شخص بيجاهر بحرام، وهو عالم إنه حرام، وأنت عارف إن هو عالم؛ اديله على دماغه ولا تُبالي

وابقى فكَّرة إن أوَّل من تُسعَّر بهم النار، مكنتش مشاكلهم متعدية شخصهم وكانوا عارفين إنهم على غلط ومصمِّمين، فما بالك بشخص بسبب مجاهرته بيسبب صد عن الدين؟
أنا الصراحة مش لاقي توصيف أفضل من توصيف المجاهر بأنه بيصد عن سبيل الله؛ لأن والله صورة واحدة أو شتيمة واحدة أو غيبة واحدة أو موقف واحد -على الميديا حتى- كفيل يضيَّع ساعات متواصلة من الدروس والخُطب ويضيَّع حالة إيمانية للشخص
وصدق النبي محمد صلى الله عليه وسلم:
( إنَّ الرجلَ لَيتكلَّمُ بالكلمةِ لا يرى بها بأسًا يهوي بها سبعين خريفًا)

أنك تحرج وتكتم وتسكِّت الشخص المجاهر ده فيه حماية منك للمسلم الضعيف أخوك
متستناش حد يتصرَّف، لو أنت تعرف تتصرَّف
.

(بسم الله الذي لا يضر مع اسمه شيء في الأرض ولا في السماء وهو السميع العليم)

يا رب نسألك الجنّة والإيمان الخالص

كلام كتير تسمعه من مُحبِّي المسلسلات والأفلام التاريخية اللي بتتكلم عن شخصيات دينية، إنه المسلسل مفيش فيه مخالفات ولا حُب فعادي نتفرج وأهو أحسن من غيره

لو كان المسلسل مفيهوش موسيقى مقصوده لذاتها، ونساؤه كلهم لابسين حجاب شرعي، فهو المشكلة في المسلسل هو الاختلاط المُحرَّم ده
الاختلاط ذات نفسه مشكلة معدش حد بيبص ليها بسبب المخالفات التانية، لكن ده أصل المشكلة، وتطبيعك معاه، لدرجة إنك معدتش شايفه مشكلة أساسًا

ومشكلة التطبيع ده برده تلاقيه لما بيتكلموا عن النجس أحمد مكّي ويقولك ممثل محترم!
سابوه كل الحاجات الحرام اللي بيعملها في أعماله، بسبب إنها حاجة عادية طبيعي بتحصل ومش بيحصل لها إنكار
ومع الوقت أساسًا معدش فيه حاجة في المسلسلات عليها إنكار أساسًا، إلا القليل النادر، والقليل النادر ده عشان في عمل عربي، لو في عمل أجنبي، خلاص تمام معدش فيه إنكار أو استغراب

فلو حد جه يقولك أنا بتفرج على مسلسل كذا ده مفيهوش مخالفات، قوله معلش، واتكتم شوية متجاهرش بالحرام، لأنه ميفرقش حاجة عن أي مسلسل مصري

+ كل الأعمال الفنية الدينية دي فيها محرّمات غير الاختلاط طبعاً

وَهُوَ الَّذِي يُنَزِّلُ الْغَيْثَ مِنْ بَعْدِ مَا قَنَطُوا

وَعَصَيْتُم مِّن بَعْدِ مَا أَرَاكُم مَّا تُحِبُّونَ

من الكلمات الجميلة اللي بشوفها من سمير صاحبي إنه دايما لو حصلت حاجة كويسة بيكتب: حصل كذا كذا "بفضل الله وحده"
جميلة جدًا إفراد الله بالحمد، وهي دي الحقيقة وده الأصل وده اللي إحنا مؤمنين بيه، وبصراحة تكرار الكلمة قدامي علطول بيثبّت المعنى
وشكلها بالنسبة ليا جديد، عشان معظم الناس اللي بتكتب بتكتب: بفضل الله ثم بفضل كذا وكذا ثم بفضل كذا وكذا

معرفش ليها دليل شرعي إن الصيغة الأولى أفضل من التانية ولا لأ، بس من ناحية الإحساس ومن ناحية تأثيرها فأنا حاسس الصيغة الأولى أجمل وأصدق
وياسيدي أبقى نزّل بوست تاني اكتب فيه بفضل أصحابي وبفضل أبويا وأمي عادي

الحمد لله وحده
والشكر لله وحده
لا إله غيره
ِ

يا رب ارزقنا اتباع الحق مهما كانت مرارتُه
وارزقنا موالاة عبادك المصلحين الناصحين مهما كانت شدة نصيحتهم
يا رب استجب
َ

(بسم الله الذي لا يضر مع اسمه شيء في الأرض ولا في السماء وهو السميع العليم)

مجالس الشيخ سعيد الكملي في شرح موطأ الإمام مالك، تُزيد من التعلُّق بالإمام الأكبر الإمام مالك، وتُزيد تعظيمًا له، وتُزيد حُبًّا وشوقًا لرؤيته، وانبهار وافتخار واعتزاز بعِلمه، وبباقي أئمة المسلمين الأوائل رضي الله عنهم أجمعين

يا رب اجمعنا بهم في جنَّاتك جنَّات النعيم
يا رب استجب

عن زيد بن وهب قال:
قال لي ابن مسعود:

لا تَدَعْ إذا كان يوم الجمعةِ أن تُصَلِّيَ على النبيِّ صلى الله عليه وسلم ألف مرة، تقول: اللهمَّ صلِّ على محمَّد صلى الله عليه وسلم.

البنات مفكَّرة عشان هي بنت فلها الحق إنها تشوف الممثلات والرقاصات والبنات بالمايوهات والكلام ده
والحقيقة إن الكلام ده برده النظر عليه من البنات غلط، لأن الممثلة أو الرقاصة بتجاهر بمعصية واسمها في الشرع فاسقة، والإنكار القلبي للمشاهد دي واجب، وده مش أضعف الإيمان، أضعف الإيمان أنك متبصيِّش ليهم من الأساس، لأنك أنتي اللي بتختاري تشوفيهم أو لأ

التشهير بيهم وبأسماؤهم والفُرجة عليهم ودعمهم وتشجيعهم والضحك على فيديوهاتهم، كل ده غلط، لأن ببساطة هما في حرام من الكبائر، النفور منهم ومن أفعالهم ومتابعتهم واجب

الكلام ده حلال، لو البنت بتعمل الكلام ده وسط بنات بس، ولبسها ساتر للعورة، ماشي تتفرج وتُبدي رأيها زي ما تحب
لكن إن بنت تطلع باللبس ده قدام الرجالة، فهي في معصية ومشاهدتها بدون الإنكار عليها غلط، فضلًا عن مشاهدتها باستمتاع أو بفرحة

من الحاجات اللي بالنسبة ليا بتحددلي إذا كنت بحب الشخص ده فعلًا ولا بالنسبة ليا هو شخص عادي، إن أنا أخصص له جزء في الدعاء لو هو واقع في مشكلة معيَّنة أو هو طالب منِّي الدعاء بالتيسير في أمر معيَّن، وقت في الصلاة، أو وقت قبل المغرب، أو وقت يوم الجمعة، المهم يكون وِرد صافي ولو دقيقة واحدة وفي تحرِّي وقت إجابة، وادعيله

بصراحة لما جيت استرجع الأحداث لقيت فعلًا الموضوع ده أساسي، وفيه ناس وقعت في مشاكل، وكان الوضع العام أنا والناس مفكرة إن أنا واقف جمبه، وأنا ولا كنت واقف جمبه ولا حاجة، وجيت أفتكرت لقيت فعلًا إني مدعتش له بولا دعاء، وهو فعلاً مكنش بالنسبة ليا شخصيات محبوبة

عشان كدا لو حد جه سألني عن السؤال ده، أنت عارف أني بحبك؟ أو هو أنت بتحبني؟
بيكون ده دليل واضح وصافي على الحُب

أظن لو أهل القبور رجعوا تاني هيعملوا حاجات حرام عادي، بس اللي هيمتنعوا عنه:
المجاهرة بالحرام
تشجيع الناس على الحرام
هيتوبوا بعد أي حرام

ودي حاجات طبيعية المفروض أي "مسلم" يعملها بدون معايشة عقاب سواء جسدي أو رزقي

إن يعلم الله في قلوبكم خيرًا يؤتكم خيرًا مما أخذ منكم ويغفر لكم

قاعات الأفراح والكباريهات، الأماكن الوحيدة اللي الأغاني فيها مقصودة لذاتها، فطبيعي الجلوس فيها ولو كان فيها أغاني بس؛ حرام
ومفيش أي وجه تشابه بين المكانين دول، وأي مكان تاني بيشغَّل أغاني
عشان محدش يتفلسف ويقول: ما أنت قاعد في القاعة بتسمع أغاني، وقاعد ف المكروباص بتسمع أغاني
.

بوستات المشايخ والصالحين والآمرين بالمعروف والناهين عن المنكر وأصدقاءك الناصحين؛ صُحبتك الصالحة على الميديا وفي أرض الواقع