الشخص اللي تلاقيه بيتكلم بمثالية عن واقع بدون تجربة، أعرف إنه هيعاني مستقبلًا لما يجرَّب + أنت شخصيًا هتعاني منه في التعامل
فحاول تفهِّمه التوازن والسنن الحياتية، قبل الدخول معاه في أي علاقة، سواء شغل أو صحوبية أو جواز
مثال:
واحد ماشي في الشارع، لقى أب بيزعَّق لابنه على فِعل بسيط، رد فِعل الشخص المثالي: هو فيه حد بيزعق لأولاده! إزاي كدا! ده مهما عمل ابني إن شاء الله لما أخلِّف مستحيل أزعق له أو أحطه في موقف محرج قدام حد غريب أو حتى قدام نفسه، الحاجات اللي بتحصل للطفل وهو صغير دي بتفضل ثابتة مدى الحياة وهي اللي بتكوِّن شخصيته إلخ إلخ إلخ
لكن الصورة دي مثالية بعيدة عن الواقع تمامًا
المفروض يتم التعامل مع الموقف ده بُطرق العِلاج؛ مستقبلًا إن شاء الله لو غصب عني زعقت لابني أو حطيته في موقف وحش، إزاي أقدر أخليه يتعافى من الموضوع بسرعة، أو أقدر أصالحه بأحسن طريقة وفي أسرع وقت؟
ده السؤال
لأن الطبيعي إن هيحصلك أوقات في الحياة ضغوطات وتعب وإرهاق ومساعر وظروف خارج الحسبان، وطبيعي هتحصلك، وهزعق لابنك بشكل عفوي، وطبيعي هيحصل، مستحيل تمشي العلاقة ورد خالص طول طفولة الإبن، طبيعي يحصل بعض المشاكل البسيطة
فالطبيعي برده إنك تكون مرتب نفسك على طُرق الحل، لأن ببساطة مفيش طُرق منع

وزيها زي واحدة مثلاً تفضل تكلمك طول فترة الخطوبة على الأساليب اللي هنتبعها عشان ميحصلش بيننا مشاكل خالص في الجواز، وطريقة النقاش وطريقة العرض والطلب وطريقة الرفض وطريقة التسلية والحياة هتمشي إزاي، عشان ميحصلش مشاكل بينك وبينها خالص
وده مستحيل يتحقق
المفروض في الكلام ما بينكم يتقال طُرق العلاج؛ بصي ياحبيبتي طبيعي هيحصل بيننا مشاكل، وطبيعي أنا هزعلك وأنتي هتزعليني، ده شيء مفروغ منه وهيتحقق، فلما يتحقق هنعالجه إزاي؟ وقت الزعل، هنتصرف إزاي؟ هنكلم مين؟ هناخد برأي مين؟ هنمشي على فتاوى مين؟ هيكون وضعنا إزاي في البيت؟ ولو حد ساب البيت هنعمل ايه؟ ممكن من عيلتي أبقى أقول لبابا بس عشان هو عاقل وهيعرف يتصرف لكن مش هقول لعمي عشان تصرفاته صعبة، ومش هعرف ماما عشان هتعرف الناس وأصحابي وهكذا، الكلام يكون فيه طُرق الحل

لأن ببساطة أشياء كتير في الحياة ممنوعة الحل، ملهاش حل، لكن تقدر ترجع منها أفضل وأحسن وأسرع، وده المهم اللي محتاج توصله

فالشخص اللي عايش حياة مثالية في الدين وفي الدنيا، حتى المستقبل شايفه بصورة مثالية! مواقف هو لسه معشهاش وبرده شايفها بطريقة مثالية، وهيقدر هو لواحده إنه يحطط خطط وحواجِز تمنع حدوث أي شيء يبوِّظ المثالية دي، فده شخصية فارغة هيسبب متاعب جامدة، وغالبًا هيقع بعد أول مطب ديني أو دنيوي، فلازم تفهِّمه اللي هيحصل، أو حتى يكون عنده توقُّع للأسوأ وكيفية التعامل في ظِل التوقع السيء

آية:
قال الله: ﴿وإذا سألك عبادي عَني فإني قريب أجيب دَعوة الداع إذا دَعان فليستجيبوا لي وَليؤمنوا بي لعلهم يَرشدون ﴾
(أجيب دَعوة الداع إذا دَعان) بشرطي الإستجابة والإيمان؛ الاستجابة لأوامر ونواهي الله، الاستجابة بطاعة الله، والإيمان الغيبي بأن الله يُجيب دعوة الداع (فليستجيبوا لي وَليؤمنوا بي)

حديث:
قال أبو هريرة: "ثم ذكر -أي النبي صلى الله عليه وسلم- الرجل يطيل السفر أشعث أغبر، يمد يديه إلى السماء، يا رب، يا رب، ومطعمه حرام، ومشربه حرام، وملبسه حرام، وغذي بالحرام، فأنَّى يستجاب لذلك؟!"
شرط الاستجابة: الرزق الحلال

حديث:
قال النبي صلى الله عليه وسلم: "والذي نفسي بيدِه لتَأمرُنَّ بالمعروفِ ولتَنهوُنَّ عن المنكرِ أوليُوشِكَنَّ اللهُ أن يَبعثَ عليكمْ عقابًا منهُ فتدعونهُ فلا يَستجيبُ لكمْ"
شرط الاستجابة: الأمر بالمعروف والنهي عن المنكر

يجي واحد لا يأتمر بأمر الله، ويُجاهر بالعصيان، ويقصِّر في الأوامر، ولا يتحرَّى الحلال في رزقه ودرجاته وشُغله وعمله، ولا يأمر بالمعروف ولا ينهى عن المنكر، ويقول لماذا لا يستجيب الله لي؟
أنَّى يستجيب الله لذلك!

استجابة الدعاء جزء من الرزق رزق الإنسان
ومن ضمن أسباب الرزق
عدم المجاهرة
تحرِّي الحلال في المأكل والمشرب والملبس وفي الكلام وفي الأفعال
الأمر بالمعروف
النهي عن المنكر
.

- (من قال لا إله إلا الله وحده لا شريك له له الملك وله الحمد يحيي ويميت وهو على كل شيء قدير (١٠ مرات) بعد صلاة الفجر وبعد صلاة المغرب ... وهو دانٍ برجليه قبل أنا يُكلِّم أحداً، أرسل الله له مسلحة تحميه)
مسلحة مسلحين من الملائكة يحمونه.
- بعد صلاة الفجر وبعد صلاة المغرب يقول الإنسان وهو دانٍ برجليه قبل أنا يُكلِّم أحداً: (اللهم أجرني من النار سبعاً) كُتب له جوار من النار.

معدتش بتنزّل بوستات على الفيس ليه؟
بقيت بكسّل، زهقت من الخناقات مع العيال وأقعد أبلكهم، ويزعلوا وحوارات
ومهما كتبت أي حاجة لازم حد يعارض من باب المعارضة وخلاص وفي الآخر هما اللي بيزعلوا
وكمان زهقان من الفيس عمومًا

‏ابعد عن أماكن المعاصي الجماعية مهما كان السبب ومهما كانت التكلفة!
‏فضلًا عن إشهار حضورك الكريم في المكان وتثبيته على الميديا
‏الله أختص عقوبات بالمعاصي الجماعية لم يختصها لأي عقوبة فردية
‏السخط وقلة البركة ومحق الرزق والاكتئاب والتيه وأمراض كتير
‏ممكن تتنزّل على الجمع الكريم

‏إنّي لك ناصحٌ أمين

(بسم الله الذي لا يضر مع اسمه شيء في الأرض ولا في السماء وهو السميع العليم)

مساكين بنات المسلمين

الراجل مننا في أي وقت في اليوم بتكون حالته النفسية أو الدينية مش تمام، يجي عليه صلاة المغرب أو صلاة العشاء يسمع عشرات الآيات كفيلة أنها ترجَّع الأمور الدنيوية لوضعها الطبيعي، وبعضها كفيل لرفع الحالة الإيمانية للإنسان
وفي عِز سهره بليل عشان يخلّص الشغل أو المذاكرة يسيب كل ده وينزل يصلّي الفجر ويسمع ما شاء الله له أن يسمع من الإمام
وفي عِز شغله وتعبه بالنهار، يسيب الشغل فجأة ويروح يصلي الظهر جماعة في المسجد

بخلاف البنت اللي غالبًا لو هي شخصياً محاولتش تسمع من نفسها أو تقرأ من نفسها، مش هيوصل لها قراءة أو سماع غالبًا بالأيام! ودي حالة صعبة الصراحة
وبرده في عز انشغالها بأعمال البيت أو الشغل أو أيًّا كان سبب الانشغال، في أغلب الأحيان هتأجل الصلاة لوقت الراحة، بعد ما تخلص أعمالها، وساعتها هتحس الصلاة تقيلة عليها كمان، فبدل ما المفروض تكون الصلاة سبب للراحة، أصبحت سبب شغل إضافي بعد انتهاء الشغل اليومي لها

الآية أو الآيتين اللي بنسمعهم في الصلوات الجهرية ليهم تأثير؟ ليهم تأثير كبير جدًا، ومش هيحس بالتأثير إلا اللي جرَّب

ممكن يكون للبنات عبادات يوميَّة أو أذكار أو خلافه، تُغنيها عن سماع القرآن وحضور العبادات الجماعية اليومية؟
أكيد، ولازم تدوَّر وتشوف الموضوع ده

وأي راجل مسلم مش بيصلي الخمس صلوات في المسجد، فهو مسلم محروم الصراحة
.

عن زيد بن وهب قال:
قال لي ابن مسعود:

لا تَدَعْ إذا كان يوم الجمعةِ أن تُصَلِّيَ على النبيِّ صلى الله عليه وسلم ألف مرة، تقول: اللهمَّ صلِّ على محمَّد صلى الله عليه وسلم.

أي شخص بيجاهر بحرام، وهو عالم إنه حرام، وأنت عارف إن هو عالم؛ اديله على دماغه ولا تُبالي

وابقى فكَّرة إن أوَّل من تُسعَّر بهم النار، مكنتش مشاكلهم متعدية شخصهم وكانوا عارفين إنهم على غلط ومصمِّمين، فما بالك بشخص بسبب مجاهرته بيسبب صد عن الدين؟
أنا الصراحة مش لاقي توصيف أفضل من توصيف المجاهر بأنه بيصد عن سبيل الله؛ لأن والله صورة واحدة أو شتيمة واحدة أو غيبة واحدة أو موقف واحد -على الميديا حتى- كفيل يضيَّع ساعات متواصلة من الدروس والخُطب ويضيَّع حالة إيمانية للشخص
وصدق النبي محمد صلى الله عليه وسلم:
( إنَّ الرجلَ لَيتكلَّمُ بالكلمةِ لا يرى بها بأسًا يهوي بها سبعين خريفًا)

أنك تحرج وتكتم وتسكِّت الشخص المجاهر ده فيه حماية منك للمسلم الضعيف أخوك
متستناش حد يتصرَّف، لو أنت تعرف تتصرَّف
.

(بسم الله الذي لا يضر مع اسمه شيء في الأرض ولا في السماء وهو السميع العليم)

يا رب نسألك الجنّة والإيمان الخالص

كلام كتير تسمعه من مُحبِّي المسلسلات والأفلام التاريخية اللي بتتكلم عن شخصيات دينية، إنه المسلسل مفيش فيه مخالفات ولا حُب فعادي نتفرج وأهو أحسن من غيره

لو كان المسلسل مفيهوش موسيقى مقصوده لذاتها، ونساؤه كلهم لابسين حجاب شرعي، فهو المشكلة في المسلسل هو الاختلاط المُحرَّم ده
الاختلاط ذات نفسه مشكلة معدش حد بيبص ليها بسبب المخالفات التانية، لكن ده أصل المشكلة، وتطبيعك معاه، لدرجة إنك معدتش شايفه مشكلة أساسًا

ومشكلة التطبيع ده برده تلاقيه لما بيتكلموا عن النجس أحمد مكّي ويقولك ممثل محترم!
سابوه كل الحاجات الحرام اللي بيعملها في أعماله، بسبب إنها حاجة عادية طبيعي بتحصل ومش بيحصل لها إنكار
ومع الوقت أساسًا معدش فيه حاجة في المسلسلات عليها إنكار أساسًا، إلا القليل النادر، والقليل النادر ده عشان في عمل عربي، لو في عمل أجنبي، خلاص تمام معدش فيه إنكار أو استغراب

فلو حد جه يقولك أنا بتفرج على مسلسل كذا ده مفيهوش مخالفات، قوله معلش، واتكتم شوية متجاهرش بالحرام، لأنه ميفرقش حاجة عن أي مسلسل مصري

+ كل الأعمال الفنية الدينية دي فيها محرّمات غير الاختلاط طبعاً

وَهُوَ الَّذِي يُنَزِّلُ الْغَيْثَ مِنْ بَعْدِ مَا قَنَطُوا

وَعَصَيْتُم مِّن بَعْدِ مَا أَرَاكُم مَّا تُحِبُّونَ

من الكلمات الجميلة اللي بشوفها من سمير صاحبي إنه دايما لو حصلت حاجة كويسة بيكتب: حصل كذا كذا "بفضل الله وحده"
جميلة جدًا إفراد الله بالحمد، وهي دي الحقيقة وده الأصل وده اللي إحنا مؤمنين بيه، وبصراحة تكرار الكلمة قدامي علطول بيثبّت المعنى
وشكلها بالنسبة ليا جديد، عشان معظم الناس اللي بتكتب بتكتب: بفضل الله ثم بفضل كذا وكذا ثم بفضل كذا وكذا

معرفش ليها دليل شرعي إن الصيغة الأولى أفضل من التانية ولا لأ، بس من ناحية الإحساس ومن ناحية تأثيرها فأنا حاسس الصيغة الأولى أجمل وأصدق
وياسيدي أبقى نزّل بوست تاني اكتب فيه بفضل أصحابي وبفضل أبويا وأمي عادي

الحمد لله وحده
والشكر لله وحده
لا إله غيره
ِ

يا رب ارزقنا اتباع الحق مهما كانت مرارتُه
وارزقنا موالاة عبادك المصلحين الناصحين مهما كانت شدة نصيحتهم
يا رب استجب
َ

(بسم الله الذي لا يضر مع اسمه شيء في الأرض ولا في السماء وهو السميع العليم)

مجالس الشيخ سعيد الكملي في شرح موطأ الإمام مالك، تُزيد من التعلُّق بالإمام الأكبر الإمام مالك، وتُزيد تعظيمًا له، وتُزيد حُبًّا وشوقًا لرؤيته، وانبهار وافتخار واعتزاز بعِلمه، وبباقي أئمة المسلمين الأوائل رضي الله عنهم أجمعين

يا رب اجمعنا بهم في جنَّاتك جنَّات النعيم
يا رب استجب

عن زيد بن وهب قال:
قال لي ابن مسعود:

لا تَدَعْ إذا كان يوم الجمعةِ أن تُصَلِّيَ على النبيِّ صلى الله عليه وسلم ألف مرة، تقول: اللهمَّ صلِّ على محمَّد صلى الله عليه وسلم.

البنات مفكَّرة عشان هي بنت فلها الحق إنها تشوف الممثلات والرقاصات والبنات بالمايوهات والكلام ده
والحقيقة إن الكلام ده برده النظر عليه من البنات غلط، لأن الممثلة أو الرقاصة بتجاهر بمعصية واسمها في الشرع فاسقة، والإنكار القلبي للمشاهد دي واجب، وده مش أضعف الإيمان، أضعف الإيمان أنك متبصيِّش ليهم من الأساس، لأنك أنتي اللي بتختاري تشوفيهم أو لأ

التشهير بيهم وبأسماؤهم والفُرجة عليهم ودعمهم وتشجيعهم والضحك على فيديوهاتهم، كل ده غلط، لأن ببساطة هما في حرام من الكبائر، النفور منهم ومن أفعالهم ومتابعتهم واجب