وفي الأفراح، ياريت ياريت تتفق مع صاحب القاعة إنه ميشغلش أغنية أسماء الله الحسنى، بأي شكل من الأشكال
مينفعش والله مهما كانت درجة فُجر الفرح، احتفظ بتعظيمك للتوحيد، وإنه ميبقاش عبارة عن أغنية معزوفة + تبقى لازمة ومتلازمة مع دخول عريس وعروسة للعرض على المشاهدين، مشهد مقرف، تنزيهًا وتعظيمًا للتوحيد، ومهما كان الفرح شكله عامل ازاي، ارفض واتفق مع الدي جي وصاحب القاعة إنها متشتغلش خالص

كان فيه فيديو ليوتيوبر مشهور جدًا كان بيعمل بلور على أي بنت يجيب صورتها أو فيديو ليها في الفيديو بتاعه
بعد فترة للأسف تنازل عن الموضوع ده، وبقى بيجيب شكلها عادي
ولما الناس عاتبت عليه، قال أكتر سبب زبالة ممكن يتقال، أولًا كدب وقال أنا مكنتش بعمل بلور على أي بنت، وقال: أنا بعمل بلور بس لما تكون الست لابسة لبس مكشوف أوي، لكن ست لابسة لبس محترم مش بعمل
اللبس المحترم: اللي هو مش حجاب، يقصد مش مبيِّنة جزء كبير من منطقة الصدر لحد الركبة، لكن غير كدا عادي اسمه: لبس محترم، ولازم تبان عشان المحتوى يعرف يوصل للمشاهدين
عشان لفّة سمانتها مهمة في شرح المشكلة، وطريقة كوي شعرها مهمة، وهكذا بقيت الجسم

وبصراحة مش عارف هو استخدم مقياس إيه للبس المحترم واللبس اللي مش محترم، جاب المقياس ده منين؟
والله ما أعرف فعلًا، لأن اللي قاله ده مش موجود في حتة نهائي
هو مش منزل الفيديو في منطقة متدينة، أو في منطقة شعبية أو منقطة يعني غالب لبس ستاتها الغير محجبات بالشكل ده، عشان يكون محترم: يعني مستساغ في عيون الناس
لأ
هو منزله على اليوتيوب، وعلى مستوى العالم، اللي بنسبة أكتر مستخدمينه بالنسبة ليهم أي لبس للست غير الحجاب مش محترم دي طائفة، وطائفة تانية أي لبس للست محترم عشان هي حُرَّة، لكن مقياس اللبس المكشوف واللبس المكشوف أوي، دي مقياس واطي

فكذلك مفيش حاجة اسمها بنت مبيِّنة رجلها عادي، وبنت مبيِّنة رقبتها مش عادي، الاتنين حرام، والاتنين مش من الحجاب
الحتة اللي بتتشمر في الكُم حرام زي ما لو شمَّرت حتة من البطن

توصيل للناس إن العُرف واستساغة الناس للبس، ده بقى مقياس ودين للناس في قبول ورفض اللبس، ده غلط وحرام، وتقديم لمقياس مخروم فوق مقياس الشرع المقدَّس
مقياس المسلم بلا خلاف: ظهور الوجه والكفين قدام الرجل الأجنبي وبس، لون جِلد الوجه ولون جِلد الكف، غير كدا حرام، مهما كان اسم العضو
والتساهل فيه من البنت اللي عارفه الموضوع، مع حجِّة: أحسن من غير، أو: بقى شيء طبيعي، أو: محدش هياخد باله، أو: محدش هيركز، أو: محدش شايفني
كلها أسباب حرام، وإثمها أكبر من إثم اللي معندهاش المعلومة، وكمان فيه نوع من الاستهانة بنظر الله لها
.

أنا كنت كاتب جزء من الكلام ده، مع اسم اليوتيوبر، بس للأسف دلوقتي مش هعرف أكتبه بقى، فعادي، كدا أحسن، لأن الهدف مش الشخص، الهدف الفكرة وتفكيره اللي فيه ناس بتفكر بيه

هذا المنكر الذي كان يتوجّب عليك إنكاره، وهذا الأمر البيّن الذي كان عليك أن توضّح حلاله من حرامه؛ قد يكون نجاتك في الآخرة، وقد يكون سببًا في هداية مئات بل ملايين مِمّن يتّبعونك.

يا رب اقدر لنا الخير

شروق يوم مناقشة المشروع

كنت بصلي، (وأنا بصلي وأنا حاطت إيدي تحت بطني) وقدامي واحد ساند على الحيطة، فلما بدأت أصلي، لقيته جه شد إيدي طلعها لفوق عند صدري، وقالي: إيدك على صدرك فوق يا كابتن مينفعش تنزلها كدا، ومشى، وأنا كملت الصلاة

تعلُّم الوضوء والصلاة والحجاب... إلخ، عبادات يومية، تعلُّمها فرض عين،؛ القراءة فيها والسماع فيها، مينفعش يكون سنَّك فوق العشرين ولسه معتمد في عباداتك المفروضة على تقليد باباك ومامتك

وبعدين، أنا كابتن؟ ياجدع ياجدددع

هنزل مناقشة المشروع بتاعي هنا، لمدة 24 ساعة وغالبًا همسحها

- بشمهندس إسلام إبراهيم
= أنا يا دكتور
- (سؤال من الدكتور)
= معرفش للأسف
- (سؤال تاني من الدكتور)
= مش عارف يا دكتور
- هو كل حاجة مش عارف يا إسلام؟ أنت مش مذاكر؟
= لا يا دكتور للأسف مذاكرتش
- مذاكرتش حاجة خالص؟
= آه، وكمان اللوح والرسومات اللي قدام حضرتك دي أنا محطتش فيها قلم، والكتاب أنا مفتحتوش ولا أعرف اللي مكتوب جواه، واسمي مكتوب عليه وبس، لكن أنا مشتغلش في حاجة فيهم
= الله الله الله (بيضحكوا) إيه الكلام ده، وليه كدا؟
- الصراحة يا دكتور حصلي كذا كذا كذا وملحقتش
= تمام يا بشمهندس ولا يهمك، ربنا يحفظك، بالتوفيق إن شاء الله

والحمد لله نجحت في المشروع
ولسه فيه ملحدين في البلد!
غريبة
(هذا من فضل ربي ليبلوني أأشكر أم أكفر ومن شكر فإنما يشكر لنفسه ومن كفر فإن ربي غني كريم)
الحمد لله رب العالمين الغني الكريم
.

- (من قال لا إله إلا الله وحده لا شريك له له الملك وله الحمد يحيي ويميت وهو على كل شيء قدير (١٠ مرات) بعد صلاة الفجر وبعد صلاة المغرب ... وهو دانٍ برجليه قبل أنا يُكلِّم أحداً، أرسل الله له مسلحة تحميه)
مسلحة مسلحين من الملائكة يحمونه.
- بعد صلاة الفجر وبعد صلاة المغرب يقول الإنسان وهو دانٍ برجليه قبل أنا يُكلِّم أحداً: (اللهم أجرني من النار سبعاً) كُتب له جوار من النار.

الحمد لله جبت جيد جدًا في المشروع

وشيلت السنة

(بسم الله الذي لا يضر مع اسمه شيء في الأرض ولا في السماء وهو السميع العليم)

من الرجولة الخفيَّة بينك وبين نفسك إنك متسمعش أغاني أو تشوف أفلام لأشخاص اعتزلت وتابت إلى الله
مواقف بسيطة بعيدة عن أعين الناس، لكن بتبني شخصيتك اللي هتظهر في المواقف الصعبة أو المواقف التلقائية، أو المواقف اللي مفيش فيها وقت للتفكير واستحضار الرجولة المزيَّفة
يا رب تُب علينا وعليهم؛ لنتوب

حلم مزعج لا نستطيع الاستيقاظ منه إلا عند الموت، لكنها سنة الله في خلقه
الحياة عبارة عن اختبارات وقتيَّة، وجهاد على مدار الساعة
لا تتوقف ولا تنتهي إلا عند الموت
وفي أوقات الكسل وقلَّة الهمَّة والفتور، بيساعدك أصحابك والبيئة المحيطة في تخطِّي المرحلة الوقتيَّة وتخطَِّي الاختبار بأقل الخسائر، أو من غير خسائر

بيئتك المحيطة: اللي أنت مكوِّنها من خلال تصرفاتك وأفعالك وعلاقاتك، حتى لو كُنت في اسوأ المناطق، هتقدر تطلَّع منها أفضل الشخصيات والصفات المتاحة
بيئتك المحيطة: أول عُنصر فيها هي نفسك
نفسك: أوّل مؤثِّر عليها وعلى صفاتها هي تصرفاتك الغير مشروطة والغير مراقبة، تصرفاتك وكلامك اللي محدش هيقدر يطلع عليه من البشر إلا نفسك، مواقف محدش هيقدر يعرف تصرفك فيها إلا نفسك، عملت فيها إيه؟
استخدمت صفة الكدب ولا الصدق؟
استخدمت صفة الأمانة ولا الغش؟
استخدمت صفة الشجاعة ولا الجُبن؟
آثرت دينك ولا آراء أصحابك؟
ضحيِّت بمنفعتك البسيطة مقابل إبعاد الأذى والحرام عن صاحبك ولا فضَّلت الأنانيَّة؟
وفي الأوقات الصعبة نفسك هتقف معاك ومش هتخذلك وهتلاقي القرارات السريعة والتلقائية، قرارات محترمة

حلم مزعج لا نستطيع الاستيقاظ منه إلا عند الموت، لكنها سنة الله في خلقه، لا تستطيع العيش إلا بالمقاومة والجهاد على طول الحياة، وفي أي وقت، وفي أي وضع، وتحت أي ظرف، مُطالب بالجهاد لفعل الطاعات، ومُطالب بالجهاد للكفّ عن المحرَّمات
وفي داخله؛ عبادة لله سبحانه وتعالى

ودي حقيقة أي عمل في الدنيا، سواء رياضة أو شغل أو دراسة، مُطالب بجهاد نفسك عشان تحقق المرغوب
.

(بسم الله الذي لا يضر مع اسمه شيء في الأرض ولا في السماء وهو السميع العليم)

اللهم إنا نسألك لذَّة النظر إلى وجهك الأكرم في فردوسك الأعلى خالدين في رضوانك الأكبر أبدًا