يا قُدس*

بعتذر للمتابعين، بس الصراحة عنده حق

(بسم الله الذي لا يضر مع اسمه شيء في الأرض ولا في السماء وهو السميع العليم)

تريند التريقة على المدرسين الطلبة اللي لسه متخرجين دول، تريند سنوي وسخيف وأنا شايف فيه نوع من قلة الأدب
لأنه أغلب الطلبة دي ومنهم صحابي خاطبين، وده مصدر رزق ليهم، مش فاهم إيه المشكلة؟ ليه التريقة عليهم؟
تريقة بتخلي بقيت الطلبة أصحابهم يتكسفوا ياخدوا خطوة زي دي
وتريقة بسبب شغل حلال!
وإيه الإستفادة؟
التريقة والضحك على الناس اللي أغلبهم صحابك

ربنا يوفقهم ويرزقهم، ويبارك لهم في رزقهم
ويرزق شباب المسلمين الرزق الحلال الطيّب
.

اللهم إني أسألك خير الدعاء وخير النجاح

الصراحة، لو كان حلال للست التزيُّن والظهور أمام الرجال، وبطبيعة الحال كانت هتتغير معاها فِطرة الرجالة
ساعتها كنت هملى صفحتي صور مراتي، وكنت هلبسها فساتين السهرة عادي لحد الركبة وخلافه
وكنت هخليها تحط مكياج روج وحاجات خفيفة، بس الفاونديشن ده مستحيل، معرفش العروسة بتقبل تحطه ازاي الصراحة، ده شيء ضد الجمال

لكن الحاجة اللي كنت مستحيل أعملها إني أضيَّق الهدوم على صدرها أو رجلها، أو أسيبها تعمل كدا
دي حاجة مهما اختلفت الفِطرة، مش قادر اتخيَّل إني ممكن أعملها
فمبالك بالك بالوضع الحالي، والحاجات دي أساسًا حرام، والناس بتعملها!
وفيه حجَّة جديدة بتقول: للأسف تصميم جميع الفساتين إنها تكون مجسِّمة منطقة الصدر والوسط، فغصب عننا بقى، فستان الفرح أو فستان الخروج بيبقى مجسم، وده مبدأ ماشي وشغَّال
وتلاقي الراجل طالع من الصلاة رايح البيت جايب مراته وجسمها من فوق شادد الهدوم، لكن المهم إنه محافظ على جسمها من تحت بطبيعة الحال عشان الفستان واسع من تحت وده تفصيلته، لكن كبُشرى لو طِلعت موضة فستان بيجسم الجزء اللي تحت، هتلبسه عادي؛ لأن مفيش فرق بين الجزء اللي فوق والجزء اللي تحت، تجسيم أي جزء فيهم حرام
فالصراحة مهما حصل في يوم الفرح أو مهما حصل في مواقف الخروج، لبس هدوم ممكن تبيِّن شكل أو حجم أي عضو في الجسم، متعملهاش وأثبت على موقفك، ومتقلقش عندك بُشرى من ربنا، عشان لو بتحب خطيبتك أو مراتك جدًا: (وإن تتولوا يستبدل قومًا غيركم ثم لا يكونوا أمثالكم) ربنا هيراضيك

أمال لو كانت الصور الجماعية بين الشباب والبنات في السنين الدراسية وفي مشاريع التخرج، بتاخدوا عليها درجات، كنتوا عملتوا ايه؟ ربنا يهدينا للنافع لنا

واحد على جروب مشروع التخرج بيسألني: أنت معانا في المشروع أكتب اسمك؟
قولتله: آه معاكم، اكتب
قالي: امال مش بتشتغل معانا ليه؟ داخل باسمك بس؟
قولتله: أنا آسف غصب عني، كنت مسجون ولسه بشوف أموري
قالي: تمام
هو مكنش محتاج أسباب، لأن معظم الجروب محدش فيهم شغال، لكن هو سؤال من باب المعرفة وهو مستني رد: معلش يسطا كنت مشغول وعندي حالة وفاة وإن شاء الله هشارك معاكم ف الشغل اللي جاي، وكلام من ده

قبل الموقف ده، كنت باخد كورس، وحصل سوء تفاهم من واحد معانا في الكورس بسبب كلمة من واحد صاحبي بالغلط، وداخلي خاص يغلطني على موقف مش أنا السبب فيه نهائي، قولتله: أنا آسف، أنا غلطان، أعمل ايه دلوقتي؟
قالي: كلّم المعيد وقوله اللي حصل
قولتله: أنا كلمت المعيد أساسًا من زمان، اعمل ايه تاني عشان الموضوع يتحل؟
قالي: أنا مليش دعوة أنا هروح للمعيد وأقوله أنك عملت كذا وكذا وكدبت على المعيد، وعشان أنا المسؤول هقوله الحقيقة
قولته: تمام مفيش مشكلة

وكذا موقف مشابه للمواقف دي
عشان بقيت بحِس إن الطالب لما ياخد دور مسؤولية ولو دور بسيط جدًا، كلامه وأفعاله وطريقة إدارته للمواقف مش بتبقى أحسن حاجة، فبعيدًا عن النقاشات والجدالات اللي مش هتفيدني ولا هتفيده بشيء، عشان هو داخل أشبه بالتوجيه أو بالخناق، عشان يِحس إنه بيؤدي دوره كمسؤول، أو عشان ميبانش إنه "مش قد المسؤولية" فتصرفاته بتبقى مش صح ومن غير تفكير
وأنا مش هستفاد شيء لما أوتَّره زيادة عمّا هو فيه، ومعنديش مشكلة أبقى أنا المساحة الآمنة بالنسبة له، حتى لو الموضوع ده هيجي على حساب شكلي قدام باقي المجموعة أو على حساب حقّي
مش شايف في الاعتذار عن شيء أنا معملتوش حاجة غلط، ولو حتى فبه حاجة غلط، فالمقابل اللي هيحصل لزميلي لما يخرج من الموقف بسبب اعتذاري أهم بكتير من الضرر اللي هيحصلي بسبب إني قلت كلمة أو كلمتين
وعمومًا مش بهتم بوجهات نظر الناس فيَّا، إلا لو حد جِه سألني بشكل مباشر، فساعتها بوضح له الموضوع
فملهاش لزمة تزنق مساحة صاحبك، بسبب تزمتك في موضوع ممكن يعدي ومش هيحصلك أزمة بسببه
.

الحمد لله
جبت موبايل جديد آيفون
.

أول كتابة من الموبايل الجديد

معرفش لما اكتب حاجة على القناة اسمها ايه، بوست ولا كتابة ولا ايه

الموبايل كان ميّت

صور مشاريع التخرج حلوة، بس حتى لو هتتصوروا صور جماعية شباب وبنات، خليك راجل ومتنزلش صورة باين فيها جزء من جسم زميلتك مش متغطِّي، تقريبًا كل الصور باين فيها رجل الست، وظهور الرجل حرام، مفيش فرق بين الرجل والرقبة والقفا والصدر والدراع، كله حُكم واحد وكُله ظهوره قدام الرجال الأجانب حرام
وغالبًا البنات عارفه
وغالبًا الشباب عارفه
بس عشان الموضوع بقى مُشاهد، وأصبح يبقى مستساغ الرؤية في الشوارع، فبقى "عادي" لكن هو حرام
فحافظ على ما تبقى من رجولتك، وشخبط على الأجزاء الباينة من جسم البنت، أو قصها،

وفي الأفراح، ياريت ياريت تتفق مع صاحب القاعة إنه ميشغلش أغنية أسماء الله الحسنى، بأي شكل من الأشكال
مينفعش والله مهما كانت درجة فُجر الفرح، احتفظ بتعظيمك للتوحيد، وإنه ميبقاش عبارة عن أغنية معزوفة + تبقى لازمة ومتلازمة مع دخول عريس وعروسة للعرض على المشاهدين، مشهد مقرف، تنزيهًا وتعظيمًا للتوحيد، ومهما كان الفرح شكله عامل ازاي، ارفض واتفق مع الدي جي وصاحب القاعة إنها متشتغلش خالص

كان فيه فيديو ليوتيوبر مشهور جدًا كان بيعمل بلور على أي بنت يجيب صورتها أو فيديو ليها في الفيديو بتاعه
بعد فترة للأسف تنازل عن الموضوع ده، وبقى بيجيب شكلها عادي
ولما الناس عاتبت عليه، قال أكتر سبب زبالة ممكن يتقال، أولًا كدب وقال أنا مكنتش بعمل بلور على أي بنت، وقال: أنا بعمل بلور بس لما تكون الست لابسة لبس مكشوف أوي، لكن ست لابسة لبس محترم مش بعمل
اللبس المحترم: اللي هو مش حجاب، يقصد مش مبيِّنة جزء كبير من منطقة الصدر لحد الركبة، لكن غير كدا عادي اسمه: لبس محترم، ولازم تبان عشان المحتوى يعرف يوصل للمشاهدين
عشان لفّة سمانتها مهمة في شرح المشكلة، وطريقة كوي شعرها مهمة، وهكذا بقيت الجسم

وبصراحة مش عارف هو استخدم مقياس إيه للبس المحترم واللبس اللي مش محترم، جاب المقياس ده منين؟
والله ما أعرف فعلًا، لأن اللي قاله ده مش موجود في حتة نهائي
هو مش منزل الفيديو في منطقة متدينة، أو في منطقة شعبية أو منقطة يعني غالب لبس ستاتها الغير محجبات بالشكل ده، عشان يكون محترم: يعني مستساغ في عيون الناس
لأ
هو منزله على اليوتيوب، وعلى مستوى العالم، اللي بنسبة أكتر مستخدمينه بالنسبة ليهم أي لبس للست غير الحجاب مش محترم دي طائفة، وطائفة تانية أي لبس للست محترم عشان هي حُرَّة، لكن مقياس اللبس المكشوف واللبس المكشوف أوي، دي مقياس واطي

فكذلك مفيش حاجة اسمها بنت مبيِّنة رجلها عادي، وبنت مبيِّنة رقبتها مش عادي، الاتنين حرام، والاتنين مش من الحجاب
الحتة اللي بتتشمر في الكُم حرام زي ما لو شمَّرت حتة من البطن

توصيل للناس إن العُرف واستساغة الناس للبس، ده بقى مقياس ودين للناس في قبول ورفض اللبس، ده غلط وحرام، وتقديم لمقياس مخروم فوق مقياس الشرع المقدَّس
مقياس المسلم بلا خلاف: ظهور الوجه والكفين قدام الرجل الأجنبي وبس، لون جِلد الوجه ولون جِلد الكف، غير كدا حرام، مهما كان اسم العضو
والتساهل فيه من البنت اللي عارفه الموضوع، مع حجِّة: أحسن من غير، أو: بقى شيء طبيعي، أو: محدش هياخد باله، أو: محدش هيركز، أو: محدش شايفني
كلها أسباب حرام، وإثمها أكبر من إثم اللي معندهاش المعلومة، وكمان فيه نوع من الاستهانة بنظر الله لها
.

أنا كنت كاتب جزء من الكلام ده، مع اسم اليوتيوبر، بس للأسف دلوقتي مش هعرف أكتبه بقى، فعادي، كدا أحسن، لأن الهدف مش الشخص، الهدف الفكرة وتفكيره اللي فيه ناس بتفكر بيه