الحمد لله رب العالمين
يا رب تكمل على خير
.

هيفضل "المتفرِّجين" هما الفئة الأكثر سوءًا في أي مجتمع
في الحرام؛ يرضوا به، ولو عن طريق السكوت
وفي الحلال؛ ينظَّر عليه، لحد ما يخلِّي ملوش هيبة ووجاهة في عيون الناس

ولسه المتفرِّج شايف نفسه من كِبار أهل الصلاح (عارف الزيتونة) زيتونة الدين وخلاصة الحوار، في أي وقت يقدر يرجع وفي أي وقت يقدر يلم الليلة!
وفي باقي الحياة، هو متاح له يعمل اللي هو عايزه، لأنه عنده مبررات وحِجج وأدلَّة يقدر يطلع بيها من زَن أهل الحق عليه، وكدا كدا هو موجود في وسط المتفرجين أصحابه، فأهل الباطل مش شايفينه غريب!

لكن لا تقلق، الموضوع مش مطوِّل، بيحصل غربلة وبيحصل اختبارات وابتلاءات عشان الشخصية دي سواء كان متفرج أو مهزوز
قال الله:
( ما كان الله ليذر المؤمنين على ما أنتم عليه حتى يميز الخبيث من الطيب )
وقال النبي صلى الله عليه وسلم:
(حتى يصيرَ الناسُ إلى فسطاطَين ، فسطاطُ إيمانٍ لا نفاقَ فيه ، وفُسطاطُ نفاقٍ لا إيمانَ فيه)
والكلام في الموضوع ده كتير والأدلة أكتر
ونتمى السلامة من الابتلاءات والاختبارات، والثبات من الله إن وقعت

لكن؛ مفيش لون تالت
"لا دار وسطى بين الجنة والنار؛ تصلح لأولئك الوسطيين".
"لا دار بين الجنة والنار؛ تنتظر المذبذين بين سبيليهما".

لإما متفرَّج تتعالى بمعلوماتك الضئيلة على العبادة، وأكيد ده مش لسان حالك، بس أكيد ده لسان أفعالك

لإما مهزوز عامل حياة راقية متعايش بين الطاعة والمعصية

يا رب نسألك الجنّة والإيمان الخالص
.

أنا بصراحة هفضل شايف شريحة "العارفين" بأحكام وحرمات الشريعة، وداقوا من الدين وانغمسوا فيه، ومع ذلك مجاهرين بالمعاصي وخصوصًا ما عمّ به البلوى من أفراح وربا وأغاني وسجاير وتبرج وغيره، بأقداره المختلفة، حتى لو أقل القليل، بس مع مجاهرة
أسوأ بكتير من الفئة البعيدة تمامًا

وهيفضل حُبِّي لفئة راقصوا الساحل، أفضل من حُبِّي للفئة العالمة العاطلة دي!

ده رأيي الشخصي، وعادي يتغيَّر لو لقيت دليل يهدم كلامي طبعًا

وحديث أول من تسعَّر بهم النار ثلاثة، منهم: (عالم)
عالم بالحرام، وواقع فيه مع العلم، مش مجرَّد ذلّة وغفوة
وكمان الحرام في الحديث كان حرام النيَّة، يعني مكنش فيه مجاهرة بمعصيته
فما بالك لما يكون عالم وعاصي على علم ومُجاهر !
مصيبة سوداء، ربنا يعافينا منها

وهيفضل نسبة توبة البعيد أكبر من العالم العاطل
ونسبة التماس الأعذار للبعيد أوسع

وهيفضل العالم العاطل المجاهر شغَّال في حملته في الصد عن سبيل الله باسم دين الله وبديانة دين الله !

يا رب احفظنا وثبتنا، واستعملنا ولا تستبدل بنا
.

لما ربنا ييسرها معاك وتفتح مشروع أي محل، متشغلش أغاني في المحل
الأغاني ليها مكانها المخصص: (الكبارية)
أظن ده المكان الوحيد اللي الناس بتروحه فعلًا قاصدة سماع الأغاني والرقص
لكن محدش بيروح القهوة عشان يسمع أغاني، أنا رايح أستريح وأشرب شي
ومحدش بيروح البلايستيشن عشان يسمع أغاني، أنا رايح ألعب، ومن ضمن متعة اللعب إنّي أسمع صوت اللعبة مش الأغنية
ومحدش بيروح المطعم عشان يسمع أغاني، أنا رايح عشان آكل
فملهاش لزمة تضيَّق على الناس نفسيتها في حاجة هما مش جايين عشانها
ببقى قاعد في المكان بتمنّى أخلص رغبتي المقصودة بسرعة وبكروتة، عشان الصداع اللي شغَّال في الخلفية
حتى بتدخل جوا الخصوصية بتاعتي، ومش بعرف أصوّر فيديو شخصي، أو اسجل ريكورد

رزقك مش هيزيد لما تعلِّي صوت الأغاني في المكان
لأنه بالأساس الناس مش جاية عشان تسمع أغاني 🤷🏻
ولا الأغنية هتشد الزبون من برا المحل، فهيدخل يسمع
فالرَّحمة
.

مش عارف ليه بيعملوا في المحلّات أماكن مخصصة لغير المدخِّنين
ومش بيعملوا أماكن مخصصة من غير أغاني
معقولة كل الناس اللي جاية دي، عادي حابّة تسمع أغاني؟
ولا هو إجباري؟
دي ميزة في المحل يعني إنه البلاي ليست أروع من باقي المحلات؟
أنا مش جاي والله عشان حلاوة الأغنية

مواقف كتير أوي عدِّت عليا، اللي كان بيطالب بقفل الأغاني وبيتخانق عشانها، كان شخص ملوش مزاج للموضوع، أو مصدع، أو في حالة حزن بسبب حالة وفاة
.

إيه ده يا دكتور ، فاجئتني😂

مفيش حاجة اسمها اللي بيحب حد بيتقبله بعيوبه
ممكن أحب حد، وبعدين ألاقي عيوبه غير مُتقبله بالنسبة لي، فتكون عائق قدامنا، فلازم هو اللي يغيرها عادي

ولو تعدينا النقطة دي
ففي نقطة تانية مهمة جدًا:
معصية الله مسمهاش عيوب شخصية

ميكونش حد بيعمل حاجة حرام قدام الناس، وحد يجي ينصحه ويقوله يغير فِعله، يقوم قايله: اللي بيحب حد بيتقبله بعيوبه!

دي مش عيوب، دي حاجات حرام واجب عليك تتركها، وواجب عليك على الأقل المجاهدة اليومية في الرجوع عنها، لكن التعايش معاها بسلامة نفس ده غلط

هي المجاهرة بمعصية الله بقت عيب بشري عادي؟
ده تحديث جديد؛ لا يمت للإسلام بِصلة
.

(بسم الله الذي لا يضر مع اسمه شيء في الأرض ولا في السماء وهو السميع العليم)

الحمد لله رب العالمين

إحنا نرجع لـ أوتشيها زي ما كُنَّا

بلا هيتاش بلا تأليف

(بسم الله الذي لا يضر مع اسمه شيء في الأرض ولا في السماء وهو السميع العليم)

اللهم لك الحمد يا رب يا حنَّان يا منَّان يا واسع يا محيط يا مغيث يا قادر على كل شيء
عيد مبارك بإذن المولى
كل عام وأنتم بخير

لو عملت شركة إن شاء الله في المستقبل، أو كنت مسؤول عن أي شيء له جروب عمل واتس أو تليجرام أو فيس، هيبقى إجبار إن محدش من البنات يحط صوره على الأكونت نهائي أو على الرقم
لإما يدخلوا بأكونت فيك أو رقم تاني احتياطي

ولو رجع بيا الزمن كنت هخلي ده شرط أساسي في دخول التيمات الطلابية اللي كنت فيها

أنت هتتحكم في حاجات شخصية ليه؟
ما هو أساسًا التيمات الطلابية بتتحكم في حاجات شخصية أسوأ وأدق من كدا، بس على قلبنا زي العسل ما دام (إنا وجدنا آباءنا على أمة وإنا على آثارهم مهتدون)
ما بالك ودي حاجة حرام أساسًا، مش محتاجة للكلام ده
.

بمناسبة الفراغ والعيد
الحجاب الموضة "الفساتين" فيها مشكلتين، لازم يتم التأكد منهما:
هل أنا لابسة الفستان عشان حجاب؟ ولا عشان شكله حلو؟ ولا إيه الفرق بينه وبين العباية؟ وليه مجبش عبيان، وأجيب فساتين، ما دام الغرض الأساسي هو "عبادة الحجاب" مش الزينة ولا الاوتفيت ولا الكلام ده؟

والنقطة التانية:
ليه الفستان لبس شرعي، وهو بيحدد حجم الصدر؟
عشان واسع من عند الرجل؟
لامؤاخذة يعني هو فيه حُكم للرجل والفخاد وفيه حُكم لمنطقة الصدر؟
بجد والله، يعني ليه اللي لابسة بنطلون ضيق وعليها بلوزة واسعة، اسمها في عُرف البنات: مش حجاب شرعي
لكن اللي لابسة فستان "واسع من تحت، وضيق من عند الصدر" اسمها في عُرف البنات: حجاب شرعي
مين اللي حط المصطلحات دي؟

الهوى؛
هوى البنات في التزيُّن الخفي، عشان تهرب من الحُكم الديني، أو تهرب من أمر الزوج أو أمر الأب أو أمر الأخ الكبير
تمام؟
صراحةً الأمر ده أسوأ من التبرج ذات نفسه
لو فعلًا بنت فكَّرت إنه إظهار حجم صدرها ده حجاب شرعي، وتاني حاجة فكَّرت إن المسميات هتخليها تهرب وتسقط عنها الحُكم الدين اللي فرضه ربنا !
لا إله إلا الله
(فلا تظلم نفس شيئا وإن كان مثقال حبة من خردل أتينا بها وكفى بنا حاسبين)
الله المحيط
الله الواسع
(يعلم خائنة الأعين وما تخفي الصدور)
.

لبس الرجالة قدام البنات؛ مباح
لبس البنات قدام الرجالة الأجانب؛ "عبادة"
والعبادة ليها النية وليها شروطتها، مش بالموضة ومش "أحسن من غيرنا" ومش بالمزاج

محدش بيصلي الفرض أقل من عدد ركعاته ويقول: أحسن من اللي مش بيصلي خالص؛ ده حرام

مفيش حاجة اسمها "أحسن من غيري" في الحجاب
هي عبادة، مش مادة في الكليَّة !
التعامل مع ربنا مش تعامل مَنّ!
(يمنون عليك أن أسلموا !
قل لا تمنوا علي إسلامكم بل الله يمن عليكم أن هداكم للإيمان إن كنتم صادقين)

واحدة لابسة حجاب شرعي، لو طلبت تتصور مع واحدة لابسة لبس غير شرعي أو متزينة بمكياج أو غيره في الشارع، تأثم بطلبها
إلا لو كان لبسها أو زينتها في مكان للنساء فقط المطلع عليها

لكن الطبيعي المُشاهد منتقبة أو محجبة تروح تتصور مع بنات لابسة لبس غير شرعي في الجامعة، البنت تأثم بتصويرها طبعًا، مع برده الواجب عليها بنصح البنت باللبس الشرعي

هل أنا ينفع أشوف واحد بيشرب خمرة أو مخدرات وأروح أتصور معاه؟
ما أكيد حرام عليا

ولو واحد ماسك سيجارة؟
بنقوله ارميها أو أطفيها ونتصور

لو عرفتي تقوليلها غطِّي أحجاب أعضاء جسمك، وامسحي المكياج من على وشك، عشان نتصور
يبقى كويس واتصوري عادي

غير كدا إعانة على حرام وتعاون على الإثم
.

المهم يعني الحجاب عبادة والله
واللي عايزه تتباهى الأوت فيت بتاعها، واللي بتظبط لون الطرحة على لون الشنطة واللي بتلبس لبس موحَّد في فرح أو في مناسبة
ده مش من مقصد "عبادة الحجاب"

عايزه تعملي ده، اعمليه براحتك
بس ده فعل من طبيعته المجاهرة، وفيها فتنة للمسلمات المحجبات وفتنة لغير المحجبات برده

والأهم ابعدي بالأفعال دي عن أمهات المؤمنين رضي الله عنهن أجمعين
أوعي لما حد يسألك ليه لابسة وشنطة وكوتش بلون وبشكل معين، هو أنت نيتك من اللبس ده الحجاب؟ والاحتجاب عن أعين الرجالة؟
تقومي تقولي زوجات النبي كانوا ..... وتبدأئي ترجَّعي وتتأوَّلي الأحاديث، وتخلِّي واحدة من أمهات المؤمنين إن نيتها تكون شكلها حلو وهي ماشية قدام الرجالة!
أوعي

ولو لقيت واحدة قالتلك كدا، سيبها، لحد ما تتخلص من أفعالها دي
ربنا يرضى عن أمهات المؤمنين ويلعن من يتعرض لهم بسوء، لتمرير فساد قلبه وهوىً لنفسه
.

أي بنت نازلة من بيتها وفي نيتها: شكلها ولبسها والأوت فيت وتظبيط الألوان والموضة والتزيُّن وشكلها يبقى حلو وهي نازلة والكلام ده، فهي على خلط في نيتها
النية الوحيدة من نزول البنت من بيتها: إن اللبس يكون حاجب زينة جسمها عن الرجالة + مكونش هو زينة، هي مش مانيكان