عاملين لجنة مخصوص عشان طالب واحد من 450 طالب
مش عارف أنا الدكتور متكسفش يسقَّط طالب واحد لواحده كدا؟

جماعة الكلام ده غلط جدًا جدًا !
ودي مجاهرة بحاجة غلط برده

والله المنظر ده أسوأ من منظر تشغيل الأغاني في الخلفية اللي الشيخ بيرفضها

مفيش بنت بتقعد في مجلس العقد مع الرجالة كدا أبدًا !
الدفتر بيتبعت لها، عند النساء أو في غرفة قاعدة فيها
لكن أنها تقعد مع الرجالة عادي كدا والحجَّة إنه كتب كتاب!! ده مش سبب شرعي لمخالطة الرجال
ده لو كانت لابسة لبس شرعي يعني

أما إنها تقعد بالشكل ده وباللبس ده وبالمكياج ده ومع الرجالة؟
فمحدش يشك لذرَّة إن الكلام ده حرام جدًا
وكون المأذون مينصحش في موقف زي ده، فهو غلطان

حتى لو بيعمل كدا لأي سبب شخصي، أو مضطر للعقد بالشكل ده عشان الفلوس أو اتكلم في التغيير ومش قادر يغيَّر
فمينفعش بأي حال من الأحوال إنه ينشر صورة زي دي
الصورة دي كدا = اختلاط محرَّم، وإطلاق بصر، وتبرج من جميع النساء الحضور في حضرة الرجالة الأجانب
وبلاوي سوداء

فمتتغرُّوش بالشكل

أما الفيديو التاني بتاع البنت اللي بتقول كلام كويس في كتب كتابها ده، وفي مكان زي الصورة بالظبط كدا: فهو حرام برده

واللي بتتمنى تبقى زيها، فهي بتتمنى فعل شيء محرَّم، ربنا يغفر لها ويتوب عليها قبل إتيانه

سبحان الله
البوست عليه ألف رياكت ضحك، أكيد معظمهم من أهل الدين
وهم بمشاركتهم دي من الأسباب الأساسية في استمرار أُلف المناظر المحرَّمة دي، واستساغتها
وإعانة المأذون على استمرار نشرها

ده بخلاف الفيديوهات، اللي بيبقى فيها مخالفات كتير شرعية
الضابط الوحيد اللي ملتزمين به، هو قفل الأغاني

عايزه ألبس فستان شيك جدًا، وأحط مكياج عند فلانة
- وأنا برده والله عايز الاتنين دول ، نفسي فيهم جدًا
أنا عايزهم لنفسي، أنا كمان أصلًا مش عايزك تلبسي حجاب في الفرح، لولا عدم ائتماني على دين كل المدعوِّين من صحابك، كنت عملت كدا، وأنتي عايزه الحاجات دي لمين؟

عايزاهم ليا، ولأصحابي، ولأهلي وبابا وماما وأخواتي
- من عيوني والله، إن شاء الله تظهري بيهم قدام الناس دي، ومفيش راجل أجنبي -ولو أخويا- هيشوفك بيهم

مرضيَّة؟
اشطا

تغطية الصدر في فستان الفرح، ده فرض شرعي، ملناش إن إحنا نتكلم عليه أساسًا
اللي بتبيِّن حجم صدرها بسبب فستان الفرح، ده قليلة الدين قولًا واحدًا

لكن أنا عايز أقول: إن الراجل اللي مراته مش منتقبة، وبتلبس نقاب في الفرح لما تطلع قدام الرجالة، عشان المكياج اللي هي حاطاه، بحترم الراجل ده جدًا، وده الواجب عليه، وبحترم البنت جدًا إنها وافقت، وده الواجب عليها برده

ربنا يبارك فيهما ويحفظهما

ناس كانت بتنزل بوستات لأغراض دينية، أو الثواب أو النصيحة أو خلافه
بقت بوستاتها وكلامها معظمه شتايم وأغاني وكوميك!
استبدال من الله، لعِظم حمل وتبليغ كلام وأحكام الله !

المصيبة الناس اللي بتضحك على الشتايم والأغاني اللي بتنزل دي (مع إنهم مش بيعملوا كدا في صفحاتهم عشان حرام)
يوشك أن يتم استبدالهم من الله
ويبعدوا عن الحاجات الطيبة، ويبدأوا في الكوميك والشتايم والأغاني

ما هو لو ملقاش تفاعل وقبول على شتايمه وعلى أغانيه، مش هينزل
والله ما هينزل
والله العظيم ما هينزل
في أغلب الحالات
هما عايشين على عدَّاد اللايكات

بلاش أنانية، وأقل حاجة انصح الشخص، وبطَّل تتفاعل مع الحرام

كلمة الدين وكلمة الميت
الشتيمة بيهم يكاد يكون من أعظم الشتايم، إن لم يكن أعظمهم !

فهما مش مجال للهزار والكوميك ورياكت الضحك !
والله ما مجال أبدًا

واللف والدوران على قفا اللفظين، ده تعمله لما يكون اللي محرَّم الكلمتين مسؤول بشري عنك، لكن لما يكون المسؤول الله
مينفعش تلف وتدور وتقول قصدي كان كذا !!

ادخال لفظ الدين ولفظ الأموات في الشتايم حرام

يلعن ديك أهلك؟
كدا مش بتسب الدين؟
أمال؟
ارحم دين امي؟
دي مش شتيمة؟
أمال؟
لما تلعن الناس الميتة، مين هيحييهم عشان تطلب منهم السماح؟
مش قصدك تشتم الناس الميتة؟
دي كلمة مش المقصود منها الأموات؟

اشتم أهلك بالزنا أو بخلافه، وأقول مقصدش أتهمهم بالزنا؟
دي وجهة نظرك في الحياة؟

شتيمة الميِّتين حرام، مهما أختلفت الصيغ والنوايا
وشتيمة الدين حرام، مهما اختلفت الضيغ والنوايا

حتى لو اتقالت الألفاظ دي على الجمادات، هتبقى حرام بس
لكن لو اتقالت على بني آدميين، حتى لو على نفسك، هيبقى حرام + حقوق للناس الميِّتة دي هياخدوها منك يوم القيامة

الشتايم مش بتاخد قدسيتها من العُرف
لأن قبل العُرف هي حرام شرعًا
وكان أهون لك أنك تستخدم شتايم شوارعية، أحسن ما تشتم حد ميِّت
ربنا يهدينا

ومازالت القاعدة الأم: المتفاعل مع الحرام شريك الفاعل
وخلاف حول الحاضر الساكت عن الحرام

بيزيد على المتفاعل: بُخله بالنصيحة، وأنانيته واستئثاره بفعل الحلال، وتشجيع الناس من حوله على الحرام عادي !

الله يلعن الأنانية والأنانيين
الأنانية والبُخل في الدين، أسوأ من في التعاملات المادية والجهدية بكتير
مش بتعمل كدا أنانية؟
ومش بتعمل كدا بُخل؟
أمال بتعمل كدا ليه؟

هات سبب واحد فقط، يكون صاحبك منزِّل صورته مع خطيبته وتعمل عليها لاف، وأنت أصلًا مستحيل تعمل كدا
ليه تعمل اللاف؟
وكذلك البنت في نفس الموقف
ليه؟
مش هتلاقيها غير أنانية والله

وده يدل على أنانيتك الحقيقية في البذل العمومي، بس هيبان مع الوقت، لما التكلفات تتشال
لا تقلق

ونصيحة للي بيكتب حاجات حرام على الميديا
الكتابة= تثبيت وإقرار بالفعل
نصيحة عم الناس:
في نهاية الطريق ستجد نفسك وحيدًا وجهًا لوجه مع صحيفتك فهي أولى من حكم الناس عليك

وهي أولى من ثناء الناس على خفِّة دمّك،
وأولى من إضحاك الناس بسخط الله
وأولى من تشجيع الناس على كتابة الحرام
وأولى من أي رياكت أو رد فِعل تشجعيني على حرامك

سوف يواصلون العيش من بعد مماتي
أريد لهم ان ينعموا بحياة مديدة تغمرها السعادة...

ادِّ عبادة الصلاة على النبي محبةً
حُبًّا للنبي صلى الله عليه وسلم
اللهم صلي وسلم وبارك على رسولك وعلى أزواجه وعلى ذريته
صلى الله عليه وسلم

منظر البنات وهي بتغش، مش مألوف بالنسبالي
مشوفتش قبل كدا أصلاً إلا مرتين تلاتة
وحتى في الكلية لجنتي طول السنين مكنش فيها بنات، غير مرة أو مرتين

انهاردة شوفت بنتين في اللجنة بيغشُّوا وصوتهم عالي، الصراحة كان منظر يقرف بحركات الحرامية، وشغل النصابين ده
والبنات اللي المفروض من ضمن مميزاتهم: حافظات للغيب
بيتفننوا في السرقة
واللي خلَّى الموقف مستقذر أكتر، إن شكلهم كان محترم، موقف جابلي صداع

أنا لو كان ليا اختيار الصحاب من أول يوم في الكلية، كنت بلا تردد مش هختار أبدًا واحد بيغش في امتحان
لكن للأسف بنكتشف الموضوع ده بعد ما السنة تخلص وندخل في الامتحانات

حركات الحرامية دي قسمًا بالله مكمِّلة مع الشخص وهيتعامل بيها بعد الجواز ومع أولاده ومع قرايبه
إلا لو تاب منها، وهتحتاج مجاهدة كبيرة منُّه
وهيتعرض عليه شغل الغش والنصب والمقابل هيبقى فلوس أو شغلانة، مش درجة ودرجتين

إيه ده الناس بتنصح على العام عادي كدا ؟
عادي يعني؟
وشيء كويس؟

ويجي عيِّل لما يشوفني كتاب كومنت على واحد منزِّل صورة مراته وهي محددة أحجام جسمها المختلفة، يقولي: إزاي بتنصحه على العام كدا في كومنت!
المفروض تنصحه خاص

الصراحة بيكون ردِّي عليه، ما دام "مفروض النصح خاص" أنت نصحته خاص؟
طبعًا الجواب بيكون لأ، ووالله لو بعد سنة هيكون لأ

هو شُغل تثبيطي عن النصح والأمر والنهي وفقط

فلو حد عمل معاك كدا، قوله: أنصح أنت على الخاص وأنا أنصح على العام
وبعد كذا يوم اسأله عمل ايه، وافضل زن عليه عشان ينصح

النصيحة هي سلاح البشر السببي في تحسيين صفات أي بشري
.

فتوى من ملتزِمو الأُسر الطلابية:
حضور الحفلات الغنائية والحث عليها والاجتماع على الذهاب لها= حرام
حضور فرح صاحبتي اللي مشغَّلة أغاني والحث عليه والاجتماع عليه= حلال

إيه وجه الاختلاف؟
دي صاحبتي! مينفعش محضرش
وبما إن مينفعش أصرَّح بكوني بعمل حاجة حرام، فبيتم تغليف الموضوع في شكل فتوى دينية

فبدل ما كانت معصية جماعية واحدة، زاد عليها التألي على الدين، والخوض فيه بدون علم
وإيه سبب كل ده؟
عشان "المحترمين" اللي بيدُّوا شرعية للاجتماع على الأغاني، سواء كان الفرح منفصل أو مختلط

هما أحسن من غيرهم؟
والله العظيم هما أسوأ من غيرهم

طالب الجامعة الأمريكية اللي بيحضر حفلة المغنِّي، عُمره ما وقف في صلاة تراويح بالساعات، ولا عُمره قرأ قُران، ولا سمعه بحلاوة قراءتك وسماعها، ولا عُمره سِمع درس ديني وبكى منه، ولا حضر مجالس دينية، ولا يعرف أدلة قطعية للتحريم
لكن أنت معاك كل ده، وفي ثانية ترميه على الأرض، عشان تحافظ على صحوبيتك مع صاحبك!
براحتك

قاعدة: (ثم لا يكونوا أمثالكم)

(وإن تتولوا يستبدل قومًا غيركم ثم لا يكونوا أمثالكم)
.

(فإذا ركبوا في الفلك دعوا الله مخلصين له الدين فلما نجاهم إلى البر إذا هم يشركون)

ممكن تحس معنى قريب للآية، لما تلاقي نفسك في عِز فترة الامتحانات وتوترك وانشغالك ودعائك وصلواتك الكتير جدًا
وإظهار الفشل للناس

ولما تظهر النتيجة وتطلع كويسة:
تبدأ تشكَّر في إجاباتك
وفي ذكائك في اكتشاف ألاعيب الدكتور في الامتحان!
وفي طُرق مذاكرتك المستحيلة اللي كنت بتعملها
وفي المجهود الجبَّار اللي كنت بتبذله
وفي كُل سبب يظهر لك فيه صفة نادرة وفاذّة قدام زمايلك
وميجيش في بالك استجابة الدعاء، ولو لمرَّة واحدة قدامهم إنك تقول بعد ظهور النتيجة:
(الحمد لله ربنا استجاب دعواتي بالنجاح!)
شخصية ظالمة، ولأصحابها أشد ظُلمًا

(وعصيتم من بعد ما أراكم ما تحبون منكم من يريد الدنيا ومنكم من يريد الآخرة)

ممكن تحس معنى قريب للآية، بعد فترة التقرُّب لله اللي بتبقى في فترة الامتحانات من دعوات لمرور أيام الفاينال بسلامة، وبدعوات للنجاح بعد ظهور النتيجة

وفجأة بعد الامتحانات لما تعدي بسلام بدل ما يكون أوِّل همَّك تشكر ربنا وتحمده سواء بالدعاء أو بالصلاة ركعتين؛ تلاقي أول همَّك: احتفالات حرام قدام الكليَّة؛ بأشكالها المختلفة
وكذلك لما تظهر النتيجة

هتشكر ربنا بعدين، بس المهم تفرح دلوقتي؟؟؟
أنت راضي يعني بالترتيب ده؟
ومتخيِّل إن الموضوع في إيدك، وهتعبد ربنا بعبادة الحمد في أي وقت تريد؟

ماشي براحتك، بس خليك فاكر حديث النبي صلى الله عليه وسلم:
(إنما الصبر عند الصدمة الأولى)
أول شعور ليك ورد الفعل منك، بعد نعمة ربنا عليك كانت إيه؟
.

ليه تحضر فرح فيه أغاني، ويبقى حلال بالنسبة لك، ومتحضرش مكان فيه خمور؟
ومتحضرش مكان فيه مخدرات؟
ومتحضرش مكان فيه رقاصة؟

ما هو الشرعية اللي بتديها للمكان اللي فيها معصية جماعية، حتى لو أقل معصية (على حسب زعمك!) هتسحب وراها بقيت المحرَّمات، لأن بالنسبة لك الأغاني حاجة تافهة! وبالنسبة لشخص تاني الخمرة حاجة تافهة! وهكذا
هنمشِّيها بآرائنا الشخصية؟
ماشي تمام مفيش مشكلة
دينك هواك، عادي
المهم متلزَّقهاش في الدين الله يخليك
عشان هتاخد على دماغك مننا، قبل ما تلاقي حسابك في الدنيا وفي الآخرة من ربّ الدين اللي أنت أهنته

غالبًا مشكلة النصيحة، إن الشخص المتلقِّي لما بيشوف نصيحة
بيبص في نفسه وفي أبوه وأمه وفي إخواته وفي أصحابه، بيلاقي الموضوع بعيد أوي، وصعب التغيير، فبالتبعية بيكسل هو كمان يعمل بالنصيحة، وبيفضل عايش معاهم على الدين العام بتاعهم
لكن المفروض مش كدا، المفروض تفضل عايش معاهم عادي جدًا، وتفضل تنصحهم عادي يوميًا، مفيش مشكلة، وتفضل عايش معاهم وتتعامل معاهم وكل حاجة، ما لم تكن حرامًا، ولما تيجي حاجة حرام تنصحهم ميعملوهاش وبس، لو أصرُّوا يعملوها، امشي ويعملوها هما
وهكذا لحد ما أنت تموت أو هما يموتوا
عادي جدًا
مش لازم هما يتغيروا عشان أنت تتغير، أو تفضل زيهم لو مرضوش

النبيين كانوا عايشين مع عُصاة ومع كفّار في بيت واحد، لحد الموت، واللي كانوا بيعملوه كان النصيحة ليهم اليومية، وعدم المشاركة معهم في حرامهم
.