بصراحة أنا مش عايز اتخيَّل النوع ده بالذات، لو كانت هيترتب على التنازل اللي هتقدمه ده:
فلوس
حماية من أذى
بُعد عن خوف
نجاة من مصيبة

لو كان التنازل فعلًا هيقدملها حاجة كانت ممكن تعمل ايه!
مواضيع بتتعب نفسيًا
وياريتها بتقدم التنازل من نفسها وتتكتم
لأ إزاي!
من أنانيتها، لازم ترمي الموضوع على الدين، عشان ضميرها يرتاح!
ربنا يهدي شباب وبنات المسلمين

لو اتخلقنا جماد يُسبِّح، أحسن ما دين ربنا -اللي خلقنا إنسان مش جماد أو حيوان- يحصل فيه تحريف أو يوصل له أذى بسبب تصرفات غبية أنانية مننا

(إن الله لا يغفر أن يشرك به ويغفر ما دون ذلك لمن يشاء)
.

هي الفكرة في الحجاب إنه :
- عبادة أو معصية (مفيس وسط)
- أساسًا بيبقى قدام الناس، منظور

وأي معصية منظورة من الناس، بتقع:
تحت المجاهرة
وتحت الفتنة

وعمِّي بيقول:

إن كان ذنبك يُقضى بك وحدك؛ فلا تورِّط معك فيه غيرك؛ ذلك أخف لك عند ربك لو ذهبت عنك سَكْرتك، وهَبْ أن الوهاب وهبك منه توبةً؛ من أين لك توبة من انتهك بك حرمةً من حرماته؟!
( وقالوا ربنا إنا أطعنا سادتنا وكبراءنا فأضلونا السبيل )

- الاقتصاد بعد الذنب؛ لا ت‍فرح به في نفسك، ولا تجاهر به عند غيرك.

ويحك! ألم تقض منه وطرك؟ ألم تسكِّن غضبك وشهوتك؟ لم تثقِّل سيئاتك بما لا ينفعك؟!
.

احفظ عظمة الله في أفعالك وأقوالك:

( ألا يعلم من خلق وهو اللطيف الخبير )

( يمنون عليك أن أسلموا قل لا تمنوا علي إسلامكم بل الله يمن عليكم أن هداكم للإيمان إن كنتم صادقين )

( قل أتنبئون الله بما لا يعلم في السماوات ولا في الأرض سبحانه وتعالى عما يشركون )

(يعلم ما بين أيديهم وما خلفهم ولا يحيطون بشيء من علمه إلا بما شاء)

(والله أخرجكم من بطون أمهاتكم لا تعلمون شيئا)

(سبحانك لا علم لنا إلا ما علمتنا إنك أنت العليم الحكيم)

شعار المرحلة:
ياما جرينا من اللي بيجري ورانا 😖 ورا ناس بتجري مننا!

- هل فعلًا نريد وجه الله وننتظر الثواب الأخروي من الكتابة؟
والله لن تُغادر صغيرة ولا كبيرة

= نعم نريد وجه الله وننتظر الثواب من عِند الله
وجهدنا وأوقاتنا في سبيل الله

- إيه معنى بقى:
اعمل شير، مش مسامح اللي هياخد كلامي بدون عزو ليا؟

ما دام بتكتب لله، إيه لازمة الجُمل اللي بالمعنى ده؟
بخيل؟ بخلان بوقتك وجهدك وتفكيرك وعلمك ميكونش ليهم عدَّات لايكات أو ثناء وسط الناس؟ للدرجادي عطاء الله قدام عطاء الناس مُهمل؟

بصراحة مش قادر أفهم النوع ده إطلاقًا
زي مش قادر أفهم نوع عنده ألاف المتابعين، ويكتب: أنا هقفل الحساب عشان التفاعل عليه قليل!
أو واحد يكتب: المنشورات مش بتوصل، فمعدتش هكتب!

هو لما المنشور يوصل لمئات الناس، بعد ما كان بيوصل لآلاف، كدا مش بيوصل؟

أنت هتمنّ على الله باستعماله لك في العمل ده؟
لا حول ولا قوة إلا بالله
.

يا رب أنجح

بستغرب جدًا لما الناس تتفنِّن في اختيار اسم مميز لابنهم
ويقعدوا يدوروا في القرآن عن أي صفة أو فعل أو حرف، ينفع يكون اسم طفل، ويقوموا مسمِّين ابنهم بيه!
مش ببقى فاهم بصراحة إيه الهدف؟

الهدف هدف ديني يعني؟
( إنا كل شيء خلقناه بقدر )
حتى نُخامة النبي صلى الله عليه وسلم بقدر
حتى في الآخرة: بصقة الحور العين بقدر
وتيجي على مئات الأسماء اللي ربنا اختارها سواء في القرآن أو في السنَّة، أو من اقتداء الصحابة بالنبي وتسمية أبناؤهم
وتخالف كل الأسماء دي
وتخترع اسم من دماغك، ويخبيه تحت إطار ديني؟

شيء غريب

فترة الامتحانات فترة مليانة ضغط وقت، وضغط نفسي وضغط عصبي، وبالذات لو آخر سنة بيبقى فيه قلق زيادة

والله ظالم لنفسه، اللي بعد ما يخلص امتحان، وما يسجد في اللجنة، أو ينزل المسجد يصلي ركعتين، يريَّح نفسه من الهموم دي
قبل ما يفتح بؤقه في مراجعة امتحانات وأي كلام يزوِّد الحِمل عليه
+ شكر لله

بتفتح الميديا، بيتم تصدير لك:
- الدراسة صعبة جدًا
- الدراسة ملهاش لزمة بعد التخرُّج
- الحياة بعد التخرُّج صعبة جدًا
- مفيش شغل
- تريقة على المرتبات بسبب إنها قليلة
- الجواز صعب عشان العائلات بتبالغ في الطلبات
- العلم الشرعي ملوش لزمة، أهم حاجة تعبد ربنا، ومتتعلمش العلم عشان متدخلش في الجدالات الدائرة
____
بعد فترة من الزمن، سنة أو أقل أو أزيد:
بتطلع أنت بالحد الأدنى من الدراسة والنجاح والشغل والفلوس والخطوبة
بترضى بأقل القليل، والحد الأدنى بالنسبة لك بيبقى انجاز
(في ظِل الفقاعة الوهمية اللي عاملاها الميديا)

وإذ فجأةً تقابل الشخصيات اللي بتكتب على الفيس دي على الطبيعة تلاقي:
- ناجحين في الكلية بتقديرات
- دراسة الكلية هي اللي فادتهم في التعيين وإنهم يلاقوا وظيفة
- المرتب اللي كان بياخدوا كان كافي يحوِّش منه في حدود سنين قليلة إنه يجيب عربية أو شقة أو يتجوز إلخ
-
هتلاقي ناس تقدَّمت في شغلها وبدأت تطور من نفسها، ومازالت على الفيس بوك بتصدَّر إن السوق كحيان !

هتلاقي ناس عملت فلوس وحوِّشتها وبدأت تدور في عمل مشاريع خاصَّة ومازالت بتشيَّر ميم إن المرتب مش بيكفي المواصلات !

هتلاقي ناس عدَّت بأميال في الدين والعبادة والدعوة بسبب دراستها

وهتبص لنفسك هتلاقي نفسك دخلت في مود: الشاب العادي صاحب الوظيفة العادية المطحون، لا مميَّز في علاقات اجتماعية، ولا متطوِّر في شغل دنيا، ولا طالب عِلم ديني، وقاعد داير في طاحونة الشغل، ولسّة بتنزل بوستات على الفيس بوك عشان تجيب لايكات وكومنتات وتعملك شخصية مزيَّفة تراضي بيها نفسك وضميرك
وهتفضل عايش حياة كئيبة مستني المناسبات السعيدة في العائلة، ولما تخلص تقعد مستني الموت

فنصيحة:
الصيَّاحين في الدراسة، هما الصيَّاحين بعد الدراسة
ابعد عنهم، مصاحبتهم فقر ونكد وكآبة، ولو بعد حين
.

نفس النظام موجود بالضبط في الأغاني والأفلام
بيتم تصدير:
- المشاعر الحزينة الحقيقية، فتحسسك إن كل الناس عايشة نفس حالة الحزن بتاعتك، ودي مشكلة مجتمعية

- والمشاعر الحماسية اللي فوق الطَّاقة، فأنت طبيعي متقدرش توصلها، فتحس بالعجز والفشل

- وطريقة النجاح المثالية، بدون تقديم حل واقعي للمشاكل اللي هيقابلها في الحقيقة

أغلب المشاعر السلبية، والصفات السيئة، والمعاصي اللي مضايقاك
لما بتلاقي فيه مشاركة وجدانية من البيئة اللي حواليك في التلات حاجات دول، بتحس براحة نفسية، وضميرك بيرتاح، ونفسيتك بتهدى
عشان كدا لما بتلاقي حد بيكلمك بشكل مختلف، وإن الكلام ده غلط، أنت بتضايق وبتشيل الهم، فبترجع بسرعة للبيئة اللي حواليك اللي حواليك، سواء واقعيًا: أصحابك وزمايلك وعائلتك
أو افتراضيًا: على الفيس والواتس وحالة التسخُّط العامّة
أو تسجيليًا: في الأفلام والمسلسلات والأغاني
كُلُّه بيجتمع إن حالتك العامّة دي، دي حالة شعب بحاله، مش مشكلة فردية
فالمشاركة الجماعية دي، بترضيك
حقنة مسكِّنة
وأنت بتتبسط بيها

وغالبًا لو كملت حياتك كدا، فمتفكرش إنك هتبني أسرة وشخصية مختلفة عن اللي حواليك !
أو هيبقى شكل عيشتك وعيشة أولادك مختلفة عن عيشة أهلك وعيشتك؟
نهائي
هتبقى نفس حياة والدك ووالدك ومشاكلهم، هتتنسخ تاني في أسرتك

والحاجات اللي كنت بتنتقدها فيهم
هيتخلق عندك ليها حِجج وأعذار وهتعملها عادي جدًا
انجوي
.

من أول ما نزّلت الواتس وأنا حاطت الباك جراوند صورة حسام غالي، بقالها سنين نفس الصورة
إن شاء الله هغيَّر الصورة وأحط صورتها وهي صغيرة
لما أتجوز
ده الحل الوحيد للتغيير

الناس اللي بتشوف الكلام أول ما بنزله ده، يعني مش عاملين ليا ميوت؟
واااو
الناس دي على دماغي

إحنا نؤمن بـقول: (ما نقص مال من صدقة)
زي إيماننا بنبوِّة قائلها صلى الله عليه وسلم
لا فرق
نؤمن بكل نص جاء في السنَّة الصحيحة
وبكل فِعل أجمع عليه الصحابة
كإيماننا بآيات القرآن
كُلُّه وحي من عند الله

مفيش فرق بين حُكم شرعي عليه دليل واحد فقط، وبين حكم عليه كذا دليل !

مفيش فرق بين حُرمة شيء معين وحُرمة شيء آخر بسبب إن حاجة فيها أدلَّة أكتر من التانية، أو أدلَّة أوضح من التانية !

ربنا قال: (ما فرطنا في الكتاب من شيء)
وقال: (اليوم أكملت لكم دينكم)

أي تعليق منَّك على نقص دليل، أو عدم كَمال دليل في حُرمة شيء أو فرضية شيء، ده خلل في الإيمان، وتكذيب للآيات (احترامًا هقول للآيات)

فميجيش حد يقول: أصل أنا دوَّرت ولقيت حديث واحد بس اللي بيحرَّم الشيء ده، فمش متأكد هو حرام ولا لأ!
والله؟
للدرجادي حديث للنبي صلى الله عليه وسلم قليل أوي كدا؟
ملوش قيمة؟
والله لو كان 100 حديث، هتلف حوالين الموضوع، همَّك مش الاتباع، همَّك اللف والدوران
ولو لفِّيت حوالين الموضوع لا تقلق، أحب أبشَّرك: هتلاقي الحُكم اللي أنت عايزه
ربنا قال: (فسنُيسِّره للعُسرى)
وقال: (فأما الذين في قلوبهم زيغ فيتبعون ما تشابه منه ابتغاء الفتنة وابتغاء تأويله)

فبعد ما تخلَّص لفِّتك وتوصل للحكم اللي يناسبك، متلزقش الحكم في الدين
كفاية عليك ذنبك، متورَّطش الدين في مصيبتك

وعلى قدر إيمانك بأحاديث الصدقة، على قدر صدقتك
وعلى قدر إيمانك بقول الرسول صلى الله عليه وسلم بحُرمة شيء، ولو كان في حديث واحد، على قدر إتيانك وتركك !

عمِّي وعمَّك بيقول:

جِدُّك في عبادتك على قدر يقينك في قلبك.

تأمل كيف جمع الله بين ضديهما، فقال: "بَلْ هُمْ فِي شَكٍّ يَلْعَبُونَ".
.

الله الواسع
الله المحيط
الله الكبير
الله المهيمن
لا إله إلا هو
.

فيه موضوع شايفه أشبه بالابتزاز العاطفي، ودي صفة سيئة جدًا، وهي في الأغلب صفة موجودة في البنات، صفة نسائية

موضوع يخص الكليات الطبّيّة؛
أنا كاتب الكلام من زمان، بس كل شوية ألاقي واحد صاحبي ينزل بوست عن الموضوع، فأؤجل الكلام عن الموضوع، عشان ميتاخدش بشكل شخصي، بس هو تقريبًا خلص خلاص، فهقوله

في الأيام دي بيجي امتحانات العملي للكليات الطبية، وبيحتاجوا حالات يشتغلوا عليها عملي
فبيعملوا ايه بقى؟
ينزِّل بوست يكتب فيه الآتي:
اللي عنده المشكلة الفلانية وعاوز يعالجها، يجي كلية كذا، يوم كذا الساعة كذا، أو يتواصل معايا
والعلاج مجانًا، ولو معالجتش الموضوع ده هيترتب عليه بلاوي سودة، (ويكتب البلاوي السودة دي)

فهنا فيه مشكلتان في الموضوع
بيبتز المريض الفقير بحاجتين: العجز المادي، والأضرار المترتبة على عدم علاجه (اللي هي في الأغلب الأعم أمراض نسبة الوضول لها قليل، وإلا كانت الناس كلها اتعالجت)

والأسوأ إن الفئة المستهدفة بسبب صغية الابتزاز دي، هي فئة: الكبار في السن + معلوماتهم قليلة في الحياة
ناس غلابة طيبين، أول ما يشوفوا مجانًا، ويشوفوا آثار مترتبة على عدم العلاج سيئة
فخلاص يروحوا يتعالجوا منها

وده بيعمل مشكلتين عند الحالة:
بيضيَّع جزء كبير من يومه، وهو غالبًا رأس ماله الوقت في شغله
وتاني حاجة بيتبهدل جامد في دخول الكلية وفي الحر وفي الانتظار وبيتعب، بجد بعدِّي عليهم بيتعبوا جامد، بسسب ابتزازهم بالنقطتين اللي فوق !

وفي المقابل؟
مين المستفيد الوحيد في الموضوع؟
الطالب
مين المتبهدل الوحيد في الموضوع؟
الحالة

تمام، ليه الطالب ميسهلش الموضوع على الحالة؟
ليه الطالب هو اللي يتعب في كل الحاجات دي؟
ليه الطالب ميقدمش مساعدة نفسية للحالة؟
لو مينفعش يمنع المراحل المتعبة اللي بتمر بيها الحالة قبل دخول العيادة، طب ليه ميفضلش جمبه لحد ما يدخل؟

أنا مش فاضي عندي سكاشن وشغل ووو؟
طب ما هي الحالة عندها شغل سواء ست أو راجل
طب ما هو الحالة دي شغلك !
استفادتك منه أعلى بكتير جدً جدًا من استفادته منك !
ليه بتتعامل بأنانية في الموضوع؟


شايف الأفضل كذا نقطة:
البوست يكون مكتوب بطريقة محترمة واضحة وصريحة عن امتحانات العملي وإن الاستفادة مشتركة، وفُكك من شغل الغلو بتاع الآثار المترتبة، عشان ميبقاش أسلوب حياة ليك، تَغلُو في الأمور عشان تكسب درجات أو فلوس

الأفضل يكون الحالة زميل في الكلية
أو يكون زميل من أي كلية تانية
أو حد من إخواتهم
دول مش هيبقى فيه تعامل بابتزاز معاهم وهيبقى التعامل راقي ومحترم

لو جبت راجل أو ست كُبار في السن، فتعاملك معاهم باحترام وانتظارك معاهم واجب عليك
متتعاملش مع دول بالذات بأنانية، انتظارك جمبهم في الحر وفي الزحمة وفي الانتظار وكل ده أفضل بكتير
متتعاملش معاه كإنه كلب! يفضل مرمي تحت، وتسيبه متبهدل
هو في الأول وفي الآخر متطوع، فكك من الهبل اللي أنت كاتبه في البوست بتاعك، كلنا عارفين الحكاية

في الهامش:
أنا متكلمتش عن تفاصيل التضييق في الكلية
تمام عارف والله
بس برده متكلمتش عن تفاصيل النصب في الكلية
النقطة اللي اتكلمت فيها متساوية

فأنا بشوف الشخص عنده نقطة ابتزاز عاطفي ودي صفة ستات، فلو موجودة عن الرجالة فتبقى مشكلة

أما بقى لو كان شخص استغلالي، وبيتعمَّد يتكلم في جروبات الناس الغلابة، وقدام الناس الغلابة ووو، عشان يستفاد بخطابه وغُلُوّه فيه، والناس تتجاوب معاه:
فلا يستغل ضعف الناس إلا خبيث النفس، دنيء الطبع، ساقط الخلق
وغالبًا النوع ده قليل يعني

الناس شغَّالة في الابتزاز بس

مش بقول الكلام ده عشان الكلية، لكن ده هيبقى أسلوب حياتك في الشغل بعد الكلية، وفي تعاملك مع مراتك وأولادك بعد الجواز

متبقاش مبتز
متباش زي صفحة قاوم
اسلك
.

وعلى الهامش
بيقولوا:
إحنا بندخل الكليات الطبيّة، وبنستحمل الاختلاط والتحرش بتاع الطلاب الزملاء وتضييع الصلوات والنصب في الحضور والغش في الامتحانات سواء بشكل مباشر أو بغير مباشر
بنستحمل كل الحاجات الحرام دي، عشان نطلَّع الطبيبة المسلمة اللي تكشف على مرات حضرتك لما تتعب

وفي الآخر تدخل العيادة، تلاقي 99.99% من البنات، شغالين على حالات رجالة !

نظام الكليات الطبيعة مجملًا قايم على تخبُّط بين حرام وحرام واللي بيحجِّز بينهم حرام

ومن هنا، فالواجب على الطالب المسلم اللي موجود في كلية طبية، الأمر بالمعروف والنهي عن المنكر

طالب يقضِّي عدد سنوات في كلية طبيّة بكم الفُجور اللي فيها، ويطلع منها وهو مقدمش نصيحة واحدة وأمر واحد ونهي واحد، ولو بالكلام؟
مصيبة سوداء

ربنا يوفَّق عباده الدكاترة للعمل الحلال والكسب الحلال
.

طبعًا أي حد يتحجج بالاضطرار وبالدرجات وبالحاجات دي
تفّ في وشُّه
.
والله لو راح للدكتور وقاله دوَّرت على حالات من بني جِنسي وملقتش ومش هشتغل على الجنس الآخر
كان أنفع له في الكلية وفي دينه

لكن النطاعة تحكُم

أنت يا عم أوتشيها بتتكلم عشان مش جوا الموضوع، اللي إيده في المية مش زي اللي ايده في النار؟

أولًا لو حد قال كدا يبقى متعاملش معايا
+ هيبقى عيب عليا والله لما أستخدم حيلة الاضطرار والمبررات دي عشان ألم درجات في الكلية !
والله عيب
وعيب لما تتوجه تهمة زي دي لأي حد أساسًا
طب سيبها تتوجِّه لك في الفلوس
في المصروف على الأسرة
حتى لو كان ساعتها الكلام في قالب تهمة، يبقى تهمة شريفة = مش تهمة

لكن هتوصل للرُخص ده؟
مستحيل

ده زمان الذُل والشحاتة في طلب الدرجات على أشدُّه في الكلية

شحَّّاتين درجات؟
أمال هتعملوا إيه لما تبقوا مزنوقين في فلوس؟
ربنا ييسر لنا الخير ويهدينا لما فيه خير ديننا ودنيانا
.

يا نائمَ الليلِ محزونًا بأوَّلهِ
إنَّ المباهجَ قدْ يأتينَ أسحارا
**

(بسم الله الذي لا يضر مع اسمه شيء في الأرض ولا في السماء وهو السميع العليم)

مخطئٌ من ظنَّ يومًا أن للمتلوِّن دينًا