حديث النبي صلى الله عليه وسلم مشهور جدًا وسط الناس كلها مسلمين وكفَّار: "من غشَّنا فليس منَّا"

لما يكون بيمتحن معك في الدفعة طلاب مسيحيين، وأنت بتغش وبتغشش والحديث بيتقال قدامك في اللجنة وبتضحك! وبيتقال على الفيس بوك وفي معظم النقاشات مع اقتراب الامتحانات
وأنت قدام المسيحي بتغش وبتسرق في تسجيل الغياب، وبتتناول الحديث بهزار وضحك ومش بتطبقه

المفروض المسيحي يفهم ايه من تعاملك كـ مسلم مع حديث واضح وصريح للنبي صلى الله عليه وسلم!
والمجاهرة بالعصيان لكلام نبيَّك
والمجاهرة الجماعية
والاستهزاء الجماعي
وجعل الكلمة مادة للأمثلة الشعبية القديمة
وعدم الوقوف باحترام مع تناولها

هو لو مكنش ده صد عن سبيل الله، يبقى اسمه ايه؟

كمسلمين مأمورين بدعوة غير المسلمين
ولسان أفعال الطلبة دي تصدير التنفير من الدين؛ بالمجاهرة بعصيان الأمر الصريح للنبي عليه الصلاة والسلام

بجد الموضوع صعب جدًا، لما تلاقي المعيد يدخل ويقول قال رسول الله صلى الله عليه وسلم: "من غشَّنا فليس منَّا"
وتلاقي الطلبة بتضحك بعد كلامه، وقاعدين يتفقوا على الغش، وفيه مسيحين في اللجنة!

بعيدًا عن أي حاجة بيِّن احترامك للدين، قدام المحرومين منه!
خلِّي بالك لأحسن تتحرم منه
هي نعمة؛ بتسيء استخدامها في نفسك، واستخدامها قدام الناس
في مقابل الهزار !

لو مش هتغش عشان فيه غير مسلمين معاك في اللجنة، فكويس

والأمثلة كتير، حاجات مُسلَّمات عند غير المسلمين، ولما يلاقوا المسلمين بيتريقوا عليها ويقللوا منها، المفروض يفكَّروا إزاي؟
معروف إن النقاب من الإسلام
والتعدد من الإسلام
لما يلاقوا طلبة "محترمين" في وجهة نظرهم بيشتموا في الحاجات دي، أو بينكروها
أنت بتبيِّن إن الدين فيه تناقض يعني ولا ايه؟
عايز تشكك الناس في الإسلام بدون مجهود منهم؟
عايز تأكد ليهم إنهم على الدين الصح، عشان الإسلام متناقض؟
عايز إيه بالظبط من المجاهرة بعصيانك بحاجة معلومة من الدين بالضرورة بالنسبة لغير المسلمين أساسًا!
وتتناقش فيها وتتكلم فيها بالدين كمان!

حسبي الله ونعم الوكيل
والله موقف مقرف، وهتتحاسبوا عليه في الدنيا قبل الآخرة
ربنا يهديكم أو ياخدكم

وفي الآخر يقولوا جماعة كذا وجماعة كذا بيشوِّهوا صورة الدين!
طب الجماعات دي إيدها بعيدة عن عينينا، ومش عارفين الأحداث بالظبط ولا الأدلة ولا موجودين معاهم
لكن اعتراضك العلني والصريح على التشريع أو الأحاديث واضح قدامهم

على العموم أي حد بيجاهر بالغش، أنا شخصيًا بعتبره غشَّاش وحرامي والله، بدون أي تمييز بين أي حد من صحابي في الموضوع ده، وفعليًا مش بأتمنه على أي حاجة، وببقى منتظر منه النصب عليا في أي موضوع، وأي كلام له معايا بيحتمل الكدب أكتر من الصدق
وده الطبيعي
ولو مشوفتش ده دلوقتي هتشوفه بعدين، لا تقلق
مش هيفضل مستخبي طول عُمره
بس لما تشوفه اعرف إن هو كدا طول عُمره، بس أنت مكنتش واخد بالك

وعلى العموم المقياس عندي برده بالمجاهرة بالغش، مش مجرَّد الغش بس
وكذلك على أي موضوع
.

يا رب اقدر لنا الخير، ثم ارضنا به
.

قاعدة الامتحانات الأولى والأخيرة لعمِّي:

نتوكأ على الأسباب، ونتوكل على مسبِّبها.
.

اللهم صِلني بمن يصلني بك، واقطعني عمن يقطعني عنك.

اللهم ظَهرًا لا تنقضه يومَ التغابن مظالمُ خلقِك.

ديزاين تليفون أرضي عمُّو ندورة

والله أنا شوفت مواقف الإسلام بيمشِّي كلمته فيها، وهو أضعف شيء في الموضوع
يبقى شخص واحد طيّب ضعيف واقف وسط عشرات من الناس، ويجي المسؤول يسأله، وهو يرد عليه ويقوله: حرام
الراجل حرفيًا بيتكتم
ولو حد حبّ يرد عليه ويقوله مين اللي قال كدا؟
فيرد عليه ويقوله النبي صلى الله عليه وسلم قال
بيكست
وهيرد إزاي؟
وربنا قال:
( يا أيها الذين آمنوا لا تقدموا بين يدي الله ورسوله واتقوا الله إن الله سميع عليم !)
وقال في الآية اللي بعدها: (يا أيها الذين آمنوا لا ترفعوا أصواتكم فوق صوت النبي)
والنداء بالإيمان، لأنها صفات للمؤمنين

ولسّه فيه ناس بتسأل وتقدِّم مبررات وأسباب، عشان بدل ما تتباهى بأعضاء جسمها، تتباهى بلبسها !

هو الموضوع حلو وكويس، وينفع مع أوامر الأب أو الزوج أو كدا، ومش هياخدوا بالهم من التلاعب ده
لكن التعامل بالشكل ده مع ربنا؟
وبتقديم مبررات واستشهادات كمان؟
( قل أتنبئون الله بما لا يعلم في السماوات ولا في الأرض سبحانه وتعالى ! )
سؤال فعلًا
( وكان الله عليما حكيما )
سبحانه وتعالى

ادخل في ثريد على الآسك، ألاقي أكتر من 100 سؤال، تحت سؤال: ينفع ألبس كذا وكذا
سبحان الله عشان عارفه إن سؤالها فطريًا مخالف لطبيعة فرض الحجاب
تلاقي جمب السؤال سبعتلاف حجَّة وسبب وعُذر !
قل أتنبئون الله ؟
وبقيت ال100 سؤال اللي تحت السؤال ده، كل واحدة بسبب مختلف شوية، وبحجَّة وأسباب أكتر
وعشان ايه؟
عشان ياخدوا سماحية بلبس يخلِّي شكلهم حلو وسط الناس

والحجاب= حجب زينة المرأة عن الأجانب
بقى بيتسأل فيه:
ينفع ألبس تي شيرت الفان داي؟
ينفع أطقَّم مع زمايلي في المشروع؟
ينفع ألبس فستان في الفرح عشان عاملين داخلة للعروسة؟
ينفع ينفع ينفع؟

طبعًا كله ينفع قدام المحارم من الرجال، وقدام جميع نساء العالم

الأسئلة دي المفروض إنها تترفض من العقل، قبل العرض على الحكم الشرعي والله

كان فيه كلمة للحويني وهو بيقول الستات سبب رئيسي في إضعاف الدين
وكلمته صحيحة من كل الجهات، وهكتب فيها شوية

لكن فعلًا أنا مش بلاقي موقف واحد متمسك بحكم شرعي وسط عشرات من الطلبة، قدام مسؤول، غير من الرجالة
البنات: دايمًا بيرموا الحكم، ويقولوا "مضطرََّة"
وطز في أي حاجة مترتبة على الموقف، المهم إنّي ريّحت ضميري من ناحية أوامر الدين ده

بصراحة أنا مش عايز اتخيَّل النوع ده بالذات، لو كانت هيترتب على التنازل اللي هتقدمه ده:
فلوس
حماية من أذى
بُعد عن خوف
نجاة من مصيبة

لو كان التنازل فعلًا هيقدملها حاجة كانت ممكن تعمل ايه!
مواضيع بتتعب نفسيًا
وياريتها بتقدم التنازل من نفسها وتتكتم
لأ إزاي!
من أنانيتها، لازم ترمي الموضوع على الدين، عشان ضميرها يرتاح!
ربنا يهدي شباب وبنات المسلمين

لو اتخلقنا جماد يُسبِّح، أحسن ما دين ربنا -اللي خلقنا إنسان مش جماد أو حيوان- يحصل فيه تحريف أو يوصل له أذى بسبب تصرفات غبية أنانية مننا

(إن الله لا يغفر أن يشرك به ويغفر ما دون ذلك لمن يشاء)
.

هي الفكرة في الحجاب إنه :
- عبادة أو معصية (مفيس وسط)
- أساسًا بيبقى قدام الناس، منظور

وأي معصية منظورة من الناس، بتقع:
تحت المجاهرة
وتحت الفتنة

وعمِّي بيقول:

إن كان ذنبك يُقضى بك وحدك؛ فلا تورِّط معك فيه غيرك؛ ذلك أخف لك عند ربك لو ذهبت عنك سَكْرتك، وهَبْ أن الوهاب وهبك منه توبةً؛ من أين لك توبة من انتهك بك حرمةً من حرماته؟!
( وقالوا ربنا إنا أطعنا سادتنا وكبراءنا فأضلونا السبيل )

- الاقتصاد بعد الذنب؛ لا ت‍فرح به في نفسك، ولا تجاهر به عند غيرك.

ويحك! ألم تقض منه وطرك؟ ألم تسكِّن غضبك وشهوتك؟ لم تثقِّل سيئاتك بما لا ينفعك؟!
.

احفظ عظمة الله في أفعالك وأقوالك:

( ألا يعلم من خلق وهو اللطيف الخبير )

( يمنون عليك أن أسلموا قل لا تمنوا علي إسلامكم بل الله يمن عليكم أن هداكم للإيمان إن كنتم صادقين )

( قل أتنبئون الله بما لا يعلم في السماوات ولا في الأرض سبحانه وتعالى عما يشركون )

(يعلم ما بين أيديهم وما خلفهم ولا يحيطون بشيء من علمه إلا بما شاء)

(والله أخرجكم من بطون أمهاتكم لا تعلمون شيئا)

(سبحانك لا علم لنا إلا ما علمتنا إنك أنت العليم الحكيم)

شعار المرحلة:
ياما جرينا من اللي بيجري ورانا 😖 ورا ناس بتجري مننا!

- هل فعلًا نريد وجه الله وننتظر الثواب الأخروي من الكتابة؟
والله لن تُغادر صغيرة ولا كبيرة

= نعم نريد وجه الله وننتظر الثواب من عِند الله
وجهدنا وأوقاتنا في سبيل الله

- إيه معنى بقى:
اعمل شير، مش مسامح اللي هياخد كلامي بدون عزو ليا؟

ما دام بتكتب لله، إيه لازمة الجُمل اللي بالمعنى ده؟
بخيل؟ بخلان بوقتك وجهدك وتفكيرك وعلمك ميكونش ليهم عدَّات لايكات أو ثناء وسط الناس؟ للدرجادي عطاء الله قدام عطاء الناس مُهمل؟

بصراحة مش قادر أفهم النوع ده إطلاقًا
زي مش قادر أفهم نوع عنده ألاف المتابعين، ويكتب: أنا هقفل الحساب عشان التفاعل عليه قليل!
أو واحد يكتب: المنشورات مش بتوصل، فمعدتش هكتب!

هو لما المنشور يوصل لمئات الناس، بعد ما كان بيوصل لآلاف، كدا مش بيوصل؟

أنت هتمنّ على الله باستعماله لك في العمل ده؟
لا حول ولا قوة إلا بالله
.

يا رب أنجح

بستغرب جدًا لما الناس تتفنِّن في اختيار اسم مميز لابنهم
ويقعدوا يدوروا في القرآن عن أي صفة أو فعل أو حرف، ينفع يكون اسم طفل، ويقوموا مسمِّين ابنهم بيه!
مش ببقى فاهم بصراحة إيه الهدف؟

الهدف هدف ديني يعني؟
( إنا كل شيء خلقناه بقدر )
حتى نُخامة النبي صلى الله عليه وسلم بقدر
حتى في الآخرة: بصقة الحور العين بقدر
وتيجي على مئات الأسماء اللي ربنا اختارها سواء في القرآن أو في السنَّة، أو من اقتداء الصحابة بالنبي وتسمية أبناؤهم
وتخالف كل الأسماء دي
وتخترع اسم من دماغك، ويخبيه تحت إطار ديني؟

شيء غريب

فترة الامتحانات فترة مليانة ضغط وقت، وضغط نفسي وضغط عصبي، وبالذات لو آخر سنة بيبقى فيه قلق زيادة

والله ظالم لنفسه، اللي بعد ما يخلص امتحان، وما يسجد في اللجنة، أو ينزل المسجد يصلي ركعتين، يريَّح نفسه من الهموم دي
قبل ما يفتح بؤقه في مراجعة امتحانات وأي كلام يزوِّد الحِمل عليه
+ شكر لله

بتفتح الميديا، بيتم تصدير لك:
- الدراسة صعبة جدًا
- الدراسة ملهاش لزمة بعد التخرُّج
- الحياة بعد التخرُّج صعبة جدًا
- مفيش شغل
- تريقة على المرتبات بسبب إنها قليلة
- الجواز صعب عشان العائلات بتبالغ في الطلبات
- العلم الشرعي ملوش لزمة، أهم حاجة تعبد ربنا، ومتتعلمش العلم عشان متدخلش في الجدالات الدائرة
____
بعد فترة من الزمن، سنة أو أقل أو أزيد:
بتطلع أنت بالحد الأدنى من الدراسة والنجاح والشغل والفلوس والخطوبة
بترضى بأقل القليل، والحد الأدنى بالنسبة لك بيبقى انجاز
(في ظِل الفقاعة الوهمية اللي عاملاها الميديا)

وإذ فجأةً تقابل الشخصيات اللي بتكتب على الفيس دي على الطبيعة تلاقي:
- ناجحين في الكلية بتقديرات
- دراسة الكلية هي اللي فادتهم في التعيين وإنهم يلاقوا وظيفة
- المرتب اللي كان بياخدوا كان كافي يحوِّش منه في حدود سنين قليلة إنه يجيب عربية أو شقة أو يتجوز إلخ
-
هتلاقي ناس تقدَّمت في شغلها وبدأت تطور من نفسها، ومازالت على الفيس بوك بتصدَّر إن السوق كحيان !

هتلاقي ناس عملت فلوس وحوِّشتها وبدأت تدور في عمل مشاريع خاصَّة ومازالت بتشيَّر ميم إن المرتب مش بيكفي المواصلات !

هتلاقي ناس عدَّت بأميال في الدين والعبادة والدعوة بسبب دراستها

وهتبص لنفسك هتلاقي نفسك دخلت في مود: الشاب العادي صاحب الوظيفة العادية المطحون، لا مميَّز في علاقات اجتماعية، ولا متطوِّر في شغل دنيا، ولا طالب عِلم ديني، وقاعد داير في طاحونة الشغل، ولسّة بتنزل بوستات على الفيس بوك عشان تجيب لايكات وكومنتات وتعملك شخصية مزيَّفة تراضي بيها نفسك وضميرك
وهتفضل عايش حياة كئيبة مستني المناسبات السعيدة في العائلة، ولما تخلص تقعد مستني الموت

فنصيحة:
الصيَّاحين في الدراسة، هما الصيَّاحين بعد الدراسة
ابعد عنهم، مصاحبتهم فقر ونكد وكآبة، ولو بعد حين
.

نفس النظام موجود بالضبط في الأغاني والأفلام
بيتم تصدير:
- المشاعر الحزينة الحقيقية، فتحسسك إن كل الناس عايشة نفس حالة الحزن بتاعتك، ودي مشكلة مجتمعية

- والمشاعر الحماسية اللي فوق الطَّاقة، فأنت طبيعي متقدرش توصلها، فتحس بالعجز والفشل

- وطريقة النجاح المثالية، بدون تقديم حل واقعي للمشاكل اللي هيقابلها في الحقيقة

أغلب المشاعر السلبية، والصفات السيئة، والمعاصي اللي مضايقاك
لما بتلاقي فيه مشاركة وجدانية من البيئة اللي حواليك في التلات حاجات دول، بتحس براحة نفسية، وضميرك بيرتاح، ونفسيتك بتهدى
عشان كدا لما بتلاقي حد بيكلمك بشكل مختلف، وإن الكلام ده غلط، أنت بتضايق وبتشيل الهم، فبترجع بسرعة للبيئة اللي حواليك اللي حواليك، سواء واقعيًا: أصحابك وزمايلك وعائلتك
أو افتراضيًا: على الفيس والواتس وحالة التسخُّط العامّة
أو تسجيليًا: في الأفلام والمسلسلات والأغاني
كُلُّه بيجتمع إن حالتك العامّة دي، دي حالة شعب بحاله، مش مشكلة فردية
فالمشاركة الجماعية دي، بترضيك
حقنة مسكِّنة
وأنت بتتبسط بيها

وغالبًا لو كملت حياتك كدا، فمتفكرش إنك هتبني أسرة وشخصية مختلفة عن اللي حواليك !
أو هيبقى شكل عيشتك وعيشة أولادك مختلفة عن عيشة أهلك وعيشتك؟
نهائي
هتبقى نفس حياة والدك ووالدك ومشاكلهم، هتتنسخ تاني في أسرتك

والحاجات اللي كنت بتنتقدها فيهم
هيتخلق عندك ليها حِجج وأعذار وهتعملها عادي جدًا
انجوي
.

من أول ما نزّلت الواتس وأنا حاطت الباك جراوند صورة حسام غالي، بقالها سنين نفس الصورة
إن شاء الله هغيَّر الصورة وأحط صورتها وهي صغيرة
لما أتجوز
ده الحل الوحيد للتغيير

الناس اللي بتشوف الكلام أول ما بنزله ده، يعني مش عاملين ليا ميوت؟
واااو
الناس دي على دماغي