ويبقى من ضمن الأصنام:
الصور الجماعية للبنات والشباب؛ تحت أي مسمَّى!
ربنا يتوب علينا منها ويهدي من يُساعد في استمرارها

من ضمن الأمور اللي مش بفهمها إطلاقًا وكانت سبب في فتنة عدد مش قليل:
الأخ ينزِّل قراءة من كتاب الله، وحاطت صورته على القراءة! سواء يوتيوب أو ساوند
وكمان مش أي صورة؟
لأ، دي أحلى صورة، وأوضحها، وأتمَّها جمالًا، وأقلها بيانًا للعيوب!
وبعدين؟
إيه الفايدة؟
هي التلاوة دي مش هيطلع عليها بنات؟
إيه الاستفادة من إنهم يشوفوا صورتك؟
ما يكفي اسمك!

والله أمر غريب جدًا
نصحنا ولم يتمّ الاستجابة
والله الأمر أقرب للغلط منه إلى الصح

مش عارف بصراحة بيبقى نيِّته إيه وهو بيختار من الصور أحلاها عشان يُحطها على تلاوة، هو يعلم يقينًا إن فيه بنات هتشوفها، والصورة حجمها وجودتها غنيان عن التعريف!

ربنا يهدينا ويهديهم

مقطع الفيديو الأخير لتامر اللبَّان وهو عامل بلور على إيد "أمه" عشان ظهرت في الفيديو؛ شيء جميل الصراحة
أمُّه ست كبيرة، وظاهر إيدها بس اللي ظهر، لمدة ثانية أو ثانيتين، وعمل عليها بلور

غالبًا دي فِطرة الغيرة اللي المفروض تكون موجودة عن كل إنسان، قبل ما يتلعب فيها

وده مش غُلو في الغيرة،
لأن ده تعامل على الميديا، موقف مثبَّت، يُكتب في الصحيفة قبل أن يراه الناس
بيكون قبله تفكير، وتخطيط وتنفيذ؛ قبل كتابة أو نشر أي كلمة أو صورة أو فيديو على الفيس أو الميديا
ده مش موقف عابر في الشارع

فده طبيعي مش غُلو ولا حاجة نهائي، ده الطبيعي

اللي مش طبيعي ظهور أي جزء من أي بنت على الفيس والميديا، والرجالة موافقة على الكلام ده، وراضية بيه، وكمان بتتفاعل عليه !
وحتى لو شخصية مشهورة، مش هتتحاسب على فعلها، بس هتتحاسب على رضاك بالفعل ده
فاللي بيرضوا هما مش على الفِطرة السوية، حتى لو كانوا كل الناس؛ فطرة منتكسة ولا كرامة
(ده تحديدًا على موضوع تثبيت شيء على الميديا، مش على المواقف الحياتية في الشوارع والمعاملات)

هيفضل بالنسبة ليا أي شخص بيخلِّي واحد تاني يسجِّل اسمه في الغياب أو في كويز أو في أي شغل في الكلية، وهو مش موجود، وتحت أي ظرف كان، شخص حرامي وغشّاش ومش أمين

ومن التوبة والأمانة: إنه يبيِّن ويوضَّح للناس إنه كان بيعمل حاجة غلط وحرام، ومعدش هيعمل كدا

تحت أي ظرف؟
آه تحت أي ظرف
طب والعمل لو مضطر وفيه درجات وأنا مش عارف أحضر وووو؟
تتكلم مع المعيد أو مع الدكتور وتقوله الموضوع، والموضوع بسيط

أنا من ساعة ما دخلت الكلية دي وأنا بقول أسبابي بكل وضوح للدكتور والمعيد؛ والدنيا بتمشي عادي جدًا
أسبابي:
أنا كنت نايم
مكنتش مذاكر

أكيد محدش أسبابه أتفه من كدا يعني، لكن الناس حابّه النطاعة والنصب عشان تاخد الدرجات
وبعدين يعني؟
بجد وبعدين؟
استغفلت المعيد، عشان مكسِّل تنزل الكلية، أو عشان مشغول
طب وربنا؟
والناس اللي هتتفتن بفعلك؟

درجة هتاخدها في الدنيا
لكن حسابها مش هيبقى سيئة واحدة يوم القيامة، الحساب شديد
لأن دي مش طريقة معاملة مع الخلق أو الخالق!

اللهم ارزقنا موالاة عبادك المؤمنين، والبراءة والبُعد عن الفاسقين المجاهرين بعصيانِك
.

3 قواعد فرض على الكُونتسَّة إن شاء الله:
- أسماء أولادنا الذكور مش هيخرجوا من أسماء الأنبياء
- كابشن الجواز:
فأنتِ -يا حديث أنفاسي- جوِّي وأرضي وسمائي
أنتِ أنتِ،
شاركيني أمري؛ كي نسبِّح الله كثيرًا
- اسمها على الفيس هيبقى قبله كلمة أوتشيها

وأسماء البنات
وكابشن الخطوبة
ده نبقى نتشارك فيهم بقى

بحب جدًا في أسماء البنات: رقيّة ومريم
جدًاا، بس للأسف مش هسميهم بقى، مش هعرف 😢
ومن أسماء الأنبياء برده: إبراهيم، وكان هيبقى الاسم إبراهيم إسلام إبراهيم
بس برده مش هعرف😢
حصل خير بقى

من المواقف اليومية المخيِّبة للآمال، وأنت داخل المسجد كدا، وفجأة تلاقي الناس خارجة من المسجد
بتدخل وكإنَّك بتجر أذيال الهزيمة وراك وموطِّي راسك

ومن المواقف المُكسفة أسبوعيًا، إنك تكون ماشي في الشارع وأذان الجمعة شغَّال أو خطبة الجمعة شغّالة، بتمنى ساعتها أختفى من الشارع ومحدش يشوفني

يا رب ارزقنا اتباع الحق مهما كانت مرارتُه
وارزقنا موالاة عبادك المصلحين الناصحين مهما كانت شدة نصيحتهم
يا رب استجب

هتفضل الصور الجماعية بين شباب وبنات، من أكتر الأشياء العبثية اللي ممكن يحصل، مهما كان السبب والهدف وتحت أي ظرف
ببساطة لأنه مش هيكون له محل من الإعراب
ومفيش صورة جماعية بالإجبار
ولو كانت بالإجبار؛ اطلع فيها وأنت مكشَّر!

لو لقيت مسوِّغ للاختلاط بأي شكل ممكن،
فإيه مسوِّغ التجمُّع للتصوير؟
إيه هدف الذِكرى المحرَّمة دي؟
إيه الهدف من حِفظ لحظة هي للحرام أقرب للحلال ولا شك
يعني الصورة دي هتتحط في ميزان الحسنات؟
حاشا الله والله !
واللي يقول إنها مش هتتحط في أحد الكفتين يُكذِّب القرآن !
واللي يقول إنها هتتحط في كفّة الحسنات يُكذِّب القرآن !

الموضوع ده من ضِمن موضوعات كتير، بشوفها شخصيًا بتنتهي قبل ما ندخل أساسًا في حُكمها الشرعي، لأن ببساطة أنا مش هقبل حد من محارمي يقف في صورة جماعية مع رجالة
وطبيعة المرأة برده مش هتقبل جوزها يقف في صورة جماعية مع بنات !

أصلًا كون إننا ندخل في حكمها الشرعي، فده بداية انحراف للفطرة، أو مسألة إجبار خارج عن الإرادة

قال الله تعالى:
ونضع الموازين القسط ليوم القيامة
فلا تظلم نفس شيئًا !
وإن كان مثقال حبة من خردل أتينا بها
وكفى بنا حاسبين
لا إله إلا الله
.

مش هيفرق المسمَّى، لأن العِبرة مش بالمسمَّيات البشرية ولا بمسمَّياتك
(صورة الدفعة- صورة العيد- صورة الزمايل- صورة الكورس- صورة الفرح- صورة الشغل- صورة السفر- صورة أولاد أعمامك إلخ إلخ إلخ)
كلها شبه بعضها

بشوف الأنانية في موضعين:
- واحد مش بيعمل فعل معين، عشان عارف إنه حرام، وهو مش بيعمله ولا ناوي يعمله في المستقبل، بس لما حد بيعمله قدامه؛ بيفرح معاه وبيشجَّعه، وبيرضى بفعله
وفي الحالة دي بنقول: ياليته سكت، حتّى مش عايزين منه نصيحه، ياليته اتكتم وبس

- واحد بيجاهر بمعصية؛
الأنانية إن المجاهرة هتتسبب بالسُّوء بشكل أساسي في دينه وفي المسلمين حواليه، وفي صورة الدين بشكل عام

شخص أناني بيفكَّر في نفسه وبس، بيفكِّر يكون هو محقق بعض أحكام الدين في نفسه، وميهمُّوش الباقي يحققها ولا لأ
بيفكر في شهوة نفسه ونشرها، بغض النظر هتئذي اللي حواليه ولا لأ
هو غالبًا مافيش في مرَّة فكَّر في أثر المجاهرة بتاعته في صورة الدين بشكل عام

والله أنا مستحيل أدخل في علاقة صحوبية أو خطوبة اختيارًا منّي؛ إلا بعد ما أتأكد إن الشخص اللي قدامي مش أناني ومش بخيل
والأنانية في الدين أصعب بكتير من الأنانية الدنيوية
(ومن يوق شح نفسه فأولئك هم المفلحون)

سبحان الله؛ موقف مش هيكلِّفه فلوس ولا مجهود ولا وقت ولا أي شيء، يكفيه بس السكوت، بس
وبرده مش ساكت
أمال لو اتحط في مواقف فيها بذل؟
طبيعي مستحيل يبذل، إلا لو فيه :
- هدف دنيوي
- وكمان قريب

ربنا قال:
فأما من أعطى واتقى وصدق بالحسنى = فسنيسره لليسرى
وأما من بخل واستغنى وكذب بالحسنى =فسنيسره للعسرى

الأناني= بخيل في البذل، ولو كان البذل السكوت!
قال ابن كثير:
( فسنيسره للعسرى ) أي : لطريق الشر
والآيات في هذا المعنى كثيرة دالة على أن الله ، - عز وجل - يجازي من قصد الخير بالتوفيق له ، ومن قصد الشر بالخذلان . وكل ذلك بقدر مقدر، والأحاديث الدالة على هذا المعنى كثيرة

كشخص شايف حُرمة الأفراح المختلطة، وحُرمة الفساتين وتحديد الجسم واللبس الحرام ده كلُّه
ومستحيل تعمل الكلام ده في فرحك، ولا تفرَّج مراتك للناس كدا
ليه لما صاحبك ينزِّل صورته وخطيبته أو مراته على الفيس تعمل عليها لايك؟
بتغشُّه؟
ولا بتشجَّعه يتمادى في الحرام؟
ولا اللايك ده إيه محلُّه من الإعراب؟

ولو بنت لابسة لبس شرعي سواء حجاب أو نقاب، وقاعدة تُعجب بصور البنات الحرام أولًا وبلبسهم الحرام الغير شرعي ثانيًا !

أنانيَّة مفرطة والله

أفضل إحسان تقدمه ليَّا شخصيًا، وتقدمه لصاحبك عمومًا، هو النصيحة
ولكن حتّى النصيحة وهي مجرّد كلمات بسيطة، ومع وجود الميديا، فالنصيحة العامّة على الميديا من أسهل ما يكون، وأدنى شيء في النصيحة، بدون أي تجريح أو إحراج لأحد
وبرده أدنى البِر، وأدنى الإحسان، أنت بخيل فيه، وأناني !
الأمر بالمعروف والنهي عن المنكر والنصيحة حقوق عليك، مش تطوع منك
ولما تعملها تكون كدا بتمِّن عليه!

وقال عمي:
بعض إحسانك إليَّ حيًّا أنفع لي من كل بكائك عليَّ ميتًا؛ لكن النياحة أسهل من العطاء.
.

قال رسول الله صلى الله عليه وسلم: (لتأمرنَّ بالمعروف، ولتنهون عن المنكر، أو ليوشكن الله أن يبعث عليكم عذابًا من عنده، ثم تدعونه فلا يستجيب لكم) !

يعني: ترك الأمر بالمعروف والنهي عن المنكر من أسباب حلول العقوبات، ومن أسباب عدم إجابة الدعاء.

ولسه الناس بتفضَّل خاطر أصحابها، أو مصلحة أصحابها، أو بيحبُّوا الصحبة "الكدابة" اللي حواليها أو لأي سبب كان، عن استجابة دعائها !!
سبحان الله العظيم

هما صنْفَان:
(كنتم خير أمة أخرجت للناس تأمرون بالمعروف وتنهون عن المنكر)
خيريَّة الأمَّة

والصنف الآخر:
(المنافقون والمنافقات بعضهم من بعض ۚ يأمرون بالمنكر وينهون عن المعروف ويقبضون أيديهم ۚ نسوا الله فنسيهم)

فيه طبقة في النص: الناس اللي بتسكت لا بتعمل ده ولا بتعمل ده؟
فيه حد بيترك الأوامر وبيترك النواهي؟
أمال بيعمل ايه في حياته؟

وعمومًا السكوت علامة من علامات الرضا، والرضا لو كان في خير فخيرًا، ولو كان في شر فشرًّا

وقال قديمًا عمَّ الناس:
- اللي معندوش شغلانة تشغله؛ بيفتح الشباك ويقفله.
.

هفضل شايف أي مأذون موجود في كتب الكتاب وشايف الاختلاط الحاصل وشايف لبس البنات الحرام، ومش بينصح ويأمر وينهى الناس، ولو على سبيل التذكرة العامة
فهو مخطئ
حتى لو اتزِّين كلامه بـ: مفيش أغاني تشتغل في القاعة لحد ما نخلَّص كتب الكتاب
وهو قدامه معصيتين جماعيتين من الاختلاط والتبرج ونضيف عليهم عدم غض البصر؛ وده أسوأ بمراحل من الأغاني !
فمش فاهم على أي أساس بيتم وصف المشهد ده كلُّه كدا بـ: (كتب كتاب إسلامي) !

وأنا مش بقول مأذون يغيَّر الموضوع، لكن الأقل الأمر بالمعروف والنهي عن المنكر

أقصد المأذون الداعية، مش المأذون العادي اللي شغَّال وخلاص، المأذون اللي بيصف كتب الكتاب بتاعه بإنه كتب كتاب شرعي وإسلامي!

المأذون له التغيير بالقول
والحضور لهم التغيير بالقلب
والعريس له التغيير بالفعل

فكله اللي بيحصل في كتب الكتاب "الإسلامي" هيشيله العريس وهيُحاسب عليه يوم القيامة، نظرة نظرة، وخطوة خطوة !

الناس كانت نايمة في بيوتها، قومتُّهم من النوم ومن الشغل، وجمعتهم في مكان واحد بلبس غير شرعي وعدم الفصل فكان عدم غض البصر !

وحتى منصحتش الناس قبل ما تيجي وأنت بتنزِّل دعوة الفرح، تنزِّل معاها: البنات تيجي بلبس شرعي، والرجالة تغض بصرها
أبسط كلمات يعني، مكسوف تقولها تحرج الناس

ماشي ياسيدي، خليك دايمًا حاطت مشاعر الناس قبل أوامر الدين
.

والبنت اللي بيتقال عليها متدينة ومحترمة جدًا ولبسها شرعي جدًا
ومتنصحش أصحابها وهما جايين الفرح يكونوا لابسين لبس شرعي، وتشدِّد عليهم أهمية الموضوع
فهي بنت أنانيَّة درجة أُولى

أنا مش بقول تطردهم من الفرح
لا تتخاصم معاهم لو جم كدا
ولا تكشَّر في وشهم
ولا شيء

بس تشدِّد على الموضوع ويوميًا تنزِّل كلام عنُّه، عشان ده فرض
الناس على الأقل تتكسف من نفسها، أو لو حتى مش مُسلمين للأمر ده، يعملوه احترامًا لعلاقة الصحوبية، وإن دي حاجة هتزعّل العروسة في يوم فرحها !

فكون إنها متعملش ده فهي قولًا واحداً نفسي نفسي أنانيّة

لو فعلًا مش عايز تغش في الامتحانات، بس مقاومتك ضعيفة في اللجنة، ادعي ربنا بفقد أسباب الغش في الامتحانات في اللجنة
وربنا يعينك لو صادق في دعواك

أمَّا تبييت النيَّة على الغش في الامتحان، فدي مصيبة
.

أعلى الشيء أشرفه وأعظمه
أشرف الرأس أعلاه،
وأعظم شعائر الإسلام الجهاد،
وذروة سنام شعار الريال؛ الصليب!
.

أنا فرحان جدًا
الفان داي بتاع حفلة التخرُّج بتاع الدفعة، كان عدد يتعد على الصوابع
إحنا 400 وشوية الدفعة، اللي طِلع الحفلة هما الفكَّة اللي فوق ال400
والله حاجة جميلة وكويسة، وربنا يجازي الأدمن خير لأنه كان له سبب في تحجيم العدد بالشكل ده

افتكر في بوست مناقشة على الحفلة التخرج، كنت كاتب كومنت إن الناس عايزه تطلع تغني وترقص ولاد وبنات
وبنت ردت عليَّ كتبت: أنت كدا بتتهمنا ومينفعش الكلام ده والشغل ده
فقلت: دي مثاليَّة كدابة وسكت

طبعًا "ذكور وإناث الدفعة" لقوا في الكومنت بتاعها المخرَّج من الكومنت بتاعي، فكان التفاعل على الكومنت كبير، أكتر كومنت خد تفاعل في سبعتلاف كومنت على البوست

وهي طلعت من كلامي بمثالية كدابة، عادي مش مشكلة، بس معرفتش تطلع من حكم الشرع في المسألة بنفس الحِيلة دي ، ومردتش على الجزء الديني

المهم أنا شوفت مقطع واحد مدته 30 ثانية من الحفلة فقط
المقطع: لعبة بين الشباب والبنات
والعدد ميكملش عشرين واحد
فالحمد لله
ربنا يزيد ويبارك