هو دفع الفلوس كلها لآخر جنيه
وكمان دفع فلوس المحامي
مع إن في البداية اتخانقنا كتير جدًا، وفرَّجنا المحكمة على بعض
حاجة من الكرامات 😂
الحمد لله

تقريبًا الموبايل بقاله 3 سنين صامت حتى بدون هزاز
وبدون منبهات وصوتها
مش بيطلع صوت نهائي
مش بايظ، أنا اللي مخليِّه كدا
ولما حد بيتصل بعرف من النُّور
وبصحى في الأوقات اللي عايز اصحى فيها بالضبط الحمد لله
ما عدا بعض أيام الامتحانات اللي فلتت منّي

أنا كنت شايف إنه من الحاجات الأساسية في الفرح، وبتدل بشكل غير مباشر على دين الرجل والست
وكون الراجل المسؤول الأول عن الفرح بكل تفاصيله
الناس بتبقى نايمة في بيتها أو في شغلها أو بتعمل أي حاجة
وهو اللي بيكلمهم وبيجمعهم في مكان واحد

فكنت بشوف إن من مسوؤليات الراجل الديِّن: النصيحة حتى ولو أدنى النصيحة،
إنه بعد بوست تحديد الفرح
ينزل بوستات بنصائح متعددة عن المخالفات اللي بتحصل عادةً في الأفراح من الشباب، سواء عن تشغيل الأغاني في العربيات في الزفَّة أو غض البصر عن نساء عيلته، وعن البنات عمومًا اللي في الفرح، حتى لو كان منفصل بس فيه احتمالية إنهم يشووفهم في الدخول أو الخروج

وكذلك من مسؤولياته إنه يبلَّغ مراته إنها تبلَّغ أصحابها بضرورة الالتزام باللبس الشرعي، وعدم التزُّين بالمكياج إطلاقًا، إلا لو حد هيغطي الزينة دي، ويقلع في قاعة البنات بس
لكن أي حد مش منتقب، ومش ناوي يغطي وشّه أو جسمه، فهي تنبِّه إنها هتتقبل جدًا موقفه، بس ميجيش الفرح
وكذلك هو ينبِّه على محارمه من الستات، سواء اخواته أو أمهاته وخلافه

هل النقطة دي مهمة؟
آه مهمة جدًا
لأن العريس المسؤول الأول عن الحدث
هل لو العريس مكنش عمل فرح، كان حد من دول هيعمل المعاصي دي في الوقت ده؟
لأ
طب هل فرض عليه الكلام ده؟
هو عمومًا النصيحة والأمر بالمعروف والنهي عن المنكر دي فروض، وحقوق
ودي نصيحة عامّة
مقولتش نصائح فردية

والله دي أدنى النصيحة، وواجب علينا إن إحنا نعمله
بأي شكل ممكن من الكلام، وبأي لهجة لطيفة في النُصح
بس المهم الناس تعرف إن الحاجات دي حرام، ويتم تذكيرهم بحرمتها، ولو مضطرين يعملوها ومش عارفين يعيشوا من غيرها
ومفيش احترام أولًا لأحكام الدين، وثانيًا مفيش احترام لأصحاب الفرح، مفيش احترام لعلاقتنا كأصدقاء، وهتعمل حاجة تضايفني وأنت عارف إنها هتتضايقني

فبصراحة مش شايف أي معنى لاستمرار علاقة مؤذية بالشكل ده!

الناس بتعمل الحاجات دي بشكل فردي
والصُحاب بتطبق الكلام بالظبط، وبدون أي تعنُّت
لكن لما بتبقى أمور متعلِّقة بالصفات الشخصية، وليس المسائل الدينية

يعني يدخل خاص لفرد فرد من أصحابه:
يا فلان متشتمش في الفرح نهائي عشان أبويا هيبقى موجود وحمايا؟
حاضر
يا فلان متشربش سجاير عشان محدش عارف إن أصحابي بيشربوا سجاير؟
حاضر
يا فلان متعملش كذا، عشان الناس ممكن تقرف من تصرفك؟
حاضر
وهكذا، والله المواقف بتحصل قدام عنينا، والناس بتستجيب احترامًا لرغبة صاحبهم

فأما يكون فيه رغبة دينية بالدرجة الأولى، وبعدها رغبة الصحوبية، ويتم تطنيش ده بأبرد رد فِعل ممكن، ده اسمه إيه!

وعادي لو في الآخر معظم الناس عملت حاجات حرام:
( وما على الرسول إلا البلاغ المبين )
( فإنما عليك البلاغ وعلينا الحساب )
( فذكر إنما أنت مذكر لست عليهم بمسيطر )
وعادي ممكن تخلِّي علاقتك بيهم زي ما هي برده، بدون قطع لها

لكن الأهم إن مهما كنت عارف بالنتائج ومهما كنت مستقل الموضوع
مينفعش بأي حال من الأحوال تتغاضى عن النُصح والأمر بالمعروف والنهي عن المنكر في الأمور دي نهائي
لله
هي كلمات في سبيل الله
ممكن يكون محدش عملها قبل كدا قدامك
ممكن تكون أنت عارف إنها بنسبة 100% مش هتلاقي استجابة
ممكن تكون عارف إن فيه ناس هتاخد الكلام على نفسها وتزعل منك
لكن عادي
الأمر والنهي والنصيحة ده هو الوُصول في حد ذاته
وده المطلوب منك
ويجب تأديته على أتم وجه
والله المستعان

وبصراحة يعني، بكل صراحة
الراجل اللي ميعرفش يسيطر على يوم فرحه، في وجهة نظري الشخصية المتواضعة: مش راجل!
الراجل اللي يفضَّل مشاعر أصحابه على مشاعره الشخصية وعلى الأحكام الدينية: مش راجل
فكك من أي حِجج في الدنيا
اليوم الوحيد اللي أنت المسؤول المباشر والأساسي فيه هو يوم فرحك، ببساطة ممكن متروحش وتروَّح أنت ومراتك عادي جدًا
أنت السبب المباشر في استمراره أو إلغائه

لكن لو جالك حد وقالك:
هما شغَّلوا أغاني غصب عني
هما كل شوية يشغلوا أغاني في قاعة البنات وأنا بقفلها
والشغل ده
ده شغل أطفال ولِعب عيال
وهتلاقي تعامله دائمًا في الأمور دي في حياته بعد الجواز بالمنطق ده من البرود
مش هيتحرك إلا لو حد نبِّهه إن فيه حاجة بتحصل ولازم يتحرك على شكله قدام الناس
لا عنده شخصية، ولا قادر ياخد موقف من الناس اللي مش بتقدر متطلباته الشخصية في يوم فرحه
وبيفضلوا نفسهم عليه في يومه!

ما هي بنت لقت مسوِّغ لإظهار تحجيم جسمها وصدرها عشان جمال تيشيرت حفلة التخرُّج، وجمال الديزاين
وإن دي شهوة مستحيلة المقاومة

معرفش هتقدر تجاهد نفسها في إيه تاني؟
لو الموضوع محتاج جهاد يعني في قلع الخمار عشان التي شيرت يبان
فعادي وطبيعي
ما الدين كُله جهاد
ما هو بدون جهاد كانت الناس رضيت بالإسلام دينًا فعلًا للأوامر وتركًا للمحرَّمات

الخمار أو الطرحة الطويلة أو أيًا كان المسمى، المهم تغطية منطقة الصدر؛ ده فرض على كل مسلمة، مش كماليّة وموضة وشكلي حلو فيه
سواء في حفلة التخرج أو في الفرح أو في أي مناسبة، ظهور حجم الجسم مؤشر سيء على النوايا

كنت عايز أكون بعرف أعمل فلوج، عشان أعمل فيديوهات يومية كدا مُلخص اليوم والأحداث، لحد نهاية الامتحانات، عشان أوثَّق:
لإما المعجزة، ونجاحي السنادي
لإما إعادة السنة😢

كنت عملت الموضوع ده في تالتة ثانوي، والنتيجة كانت غير متوقعة
الفيديوهات 90% شعري، و10% وشّي
وطبعًا كلام تعبان
دلوقتي بقيت خبرة أكتر
-

ربنا يكفيكم شر اتنين مُتكلِّفين بيردوا على بعض في كومنت على الفيس أو تويتر: أخي وأُخيّة، وأخيتي، وكلمات فُصحى ونقطة وعلامات تعجب وحاجة آخر مرار والله

ايه اللي بتستفاده لما تعمل نِمرة وأنت بترد على صحابك أو أخوك؟
لا شيء
زيادة في التصنُّع وغرقان في التكلُّف

فعليًا الرد الناشف على صاحبك أو أخوك على الميديا ده شيء معفن، مش حاجة حلوة
وخصوصًا لما يبقى ردك عليه بالشكل ده بسبب إنه رد عام، وفي نفس الوقت لو بعت له خاص، تلاقي الأسلوب العادي خالص
طب ليه يعمّ

للي بيسألني هتشارك في حفلة التخرج ولا لأ؟
أو هتجيب التيشيرت والناس تكتب لك عليه؟
أو هتجيب النوتة والعيال تكتبلك؟
أو هتنزل بوست على الفيس؟
الذكرى بقى والحاجات اللطيفة دي
الإجابة: لأ،
مش هعمل حاجة من الحاجات دي خالص
حتى لو كانت الحفلة مفيهاش أي مخالفات؟
آه، ما هو كتابة الأسماء والحاجات دي مفيهاش مخالفات أصلًا للشباب يعني

بس أنا مش بحب الحاجات دي كتفضيل شخصي
وحصلت معايا قبل كدا، أكون في مكان والناس تطلب منّي أقول كلمة أو أنزل بوست، أو أكتب حاجة، وأنا عارف إن بسببها مش هقرأ غير كل خير، أدعية أو شكر أو مجاملات، المهم اللي هيتكتب حاجات حلوة وبس
زي لو مسكت مكان، أو طلعت من مكان، أو عملت موقف حلو وخلافه
مش بحب المواضيع دي

+ فيه بقى حاجات كدا معدتش حابب نهائي ادخل فيها كـ تابع، لو شاركت فيها أشارك كـ مسؤول، لكن حاجة أنا شاركت فيها قبل كدا كمسؤول للأسف مش هعرف اشارك فيها كتابع بعد كدا
ببقى عارف المشاكل والأخطاء اللي بتحصل، فمش بحب أدخل خالص في الموضوع

وموضوع حفلة التخرج ده أنا عرضت إن أنا أقوم أصلًا بالموضوع يُعتبر كله، وبمجهودي وبفلوسي، مش هكلِّف حد شيء
بس عشان يكون حاجة كويسة دينيًا من الباب الأول
لكن طبعًا اترفض الموضوع
وهما اللي ماسكينه أتوسّم فيهم الخير، أكتر من أي كلية تانية طبًعا
بس مش هيبقى برده بالشكل اللي أنا حابه
وما دام مش زي ما أنا عايز يبقى مش هشارك فيه

وأنا بطبيعتي من زمان، وفي كل الحياة عمومًا مش بستثني حاجة
مش بمشي بموضوع: (أحسن من غيره)
هو ده غلط وده غلط
فيه غلط أكبر من التاني؟
مش عارف بصراحة، معدناش جهاز لقياس المحرَّمات غير مقياس الشرع
لكن المقاييس العُرفية دي، مليش فيها

موضوع (أحسن من غيره ده) لما تبقى مضطر، وبتحاول تطلع من اضطرارك ده بأقل الخسائر الممكنة

لكن حاليًا الموضوع بدايةً:
بسم الله
(أحسن من غيره) دي في البداية بدون اضطرار ولا شيء

لما يبقى فيه اضطرار، تتحول القاعدة لـ (كل شيء مُستباح)
حتى مش بيحاولوا يقللوا المشاكل وهما مضطرين؟ لأ طبعًا، دول ما بيصدقوا إنهم في مرحلة اسمها (غصب عنهم) و(استثناء) و(اضطرار) عشان يعملوا اللي محرومين منّه

طبعًا الدفعة عندنا اللي ماسكها إن شاء الله يقوموا بحاجات كويسة، ربنا يعينهم
ناس محترمة وأنا بحبهم

طبعًا مش محتاج أقول رأيي في أي حد يشارك في فان داي أو حفلة تخرُّج أو الحاجات دي، بشكلها المتعارف عليه
هو بالنسبة ليا: شخص مهزأ، عديم الشخصية، معندوش مبادئ، يُجاهر بعصيان الله في أرض الله
سبب في استمرارية السنة السيئة دي في الكلية
وسبب في استمرار سكوت الناس عن الحرام في الكلية

ويزيد الأمر سوءًاا إن يكون الشخص اللي حاضر الحفلات دي
من ضمن الناس اللي موصوفة بالديانة والعبادة
ده مصيبته سوداء
وهكتب كلام طويييل جدًا عن الموضوع ده
بس لما أكتبه بقى
والكلام ممكن يكون فيه حاجات مش مظبوطة، فلو حد عنده معلومة يعرفني لو فيه غلط في اللي هكتبه

لسه شايف دلوقتي بوست لواحد يساري، وطبعًا مراته مش محجبة، واضحة يعني، كاتب:
(ربنا كرمني بولد وسميته "هود")
وامبارح طبعًا الحملة بتاعة اللاعيب اللي رفض يدعم الشواذ، اسمه: (إدريس)

والله الأسماء ليها هيبة وحضور قوي جدًا، ومش بتتأثر بحداثة أو موضة

وطبيعي يا جماعة ربنا اصطفاها، لأفضل خلقُه
سبحان الله العظيم

يا مَن تُشيرُ إليك كلُّ صبيَّةٍ:
هذي أوتشيها قال شعرًا فيها !
.

ليه محدش من الناس اللي هتموت وتعمل حفلة تخرج وفان داي، مكنوش بنفس الشغف ده وهما بيتخرَّجوا من الثانوية العامّة؟
أكتر سنة فيها مذاكرة
وأكتر سنة فيها ضغط
وأكتر سنة بتكون قريب فيها من أصحابك، غالبًا معظم الأيام
وأهم سنة غالبًا في ال17 سنة تعليم
ليه محدش بيحتفل بيها؟

ببسبطة، لإن قرارك بعمل حفلة التخرج مش قرار شخصي
ده قرار نابع من المجتمع والعُرف، لكن عشان تبيِّن نفسك صاحب شخصية والقرار قرارك؛ بتقول عايزين نعمل حفلة تخرج وبتلاقي أسباب كتير لده


وزيه زي حاجات كتير أوي، كانت هتتغير لو كان المجمتع والعُرف مختلفين!
لكن الحاجة الوحيدة اللي هتبني ليك شخصية ومبدأ في الحياة، لما يكون قرارك نابع من منطلق ديني، بعيدًا عن تغيُّر وتلوُّن العادات والأعراف

عُرفًا:
لو كان فيه حفلة تخرُّج من التعليم الأساسي؟
كنت هتصمم تعملها عادي
لو كان الفرح ومراسم الفرح بتبقى منفصلة تمامًا، والرجالة في يوم والستات في يوم؟
كنت هتعمل كدا
لو كان الحجاب السَّواد وقطعة واحدة؟
كنت هتعمل كدا
لو كان الأصل التعدد؟
كنت هتوافق على كدا، وكان هيبقى اللي متجوز واحدة بس اسمه: فقير أو أناني
لو مكنش فيه ستات بتشتغل؟
مكنش هيجي على بالك فكرة الشغل من الأساس!

فبلاش تنشيف الدماغ من باب: ده الصح وده رأيي وده الأفضل وو
لأنه بعيدًا عن كل الحاجات دي، دي أفكار طارئة عليك
متحولش تبيِّن نفسك عندك شخصية على قفا الدين!
أوعى
عشان كدا كدا في نظر الناس العاقلة: أنت أهبل معندكش شخصية، بتستمد شخصيتك من مخالفتك للدين والعُرف القويم
متحاولش تكسب شخصية وحضور على قفا القوانين اللي حددها خالقك وخالق الشخصيات وهو اللي واضع القوانين والحدود دي ليك
وَخَلَقَ كُلَّ شَيْءٍ فَقَدَّرَهُ تَقْدِيرًا ﴿٢ الفرقان﴾


ومش كل الأفكار الخارجية مرفوضة، لكن اللي متوافق مع الشرع قُبل واللي مُخالف رُفِض

شخصيتك هتكتسبها من إتباعك لقوانين وأوامر ونواهي خالق الشخصية
أَيَبْتَغُونَ عِندَهُمُ الْعِزَّةَ فَإِنَّ الْعِزَّةَ لِلَّهِ جَمِيعًا !

ويبقى من ضمن الأصنام:
الصور الجماعية للبنات والشباب؛ تحت أي مسمَّى!
ربنا يتوب علينا منها ويهدي من يُساعد في استمرارها