الحجاب عبادة، لها شروطها وأركانها
التغيير فيها بدعة
والنقص فيها إثم

لا العُرف الفاسد
ولا الصحبة السُّوء
ولا العائل العاصي
لن يُغني عن المسلمة من الله شيئاً
لا خير فيمن لا ينصح ويُقوِّم من يعول من النساء
ولا خير فيمن لا تنصح أصحابها من البنات
لو مكنتش العبادة اللي بتتحسب باللحظات والثواني دي، موضع ومَحل نصيحة، هتكون النصحية أمتى؟ عشان يبقى اسمي مُسلم أولًا، ثم صاحب صالح
غريبة موضوع الأنانية اللي انتشر فجأة ده
الشخص يكون مش هيعمل فرحه مهرجان للحوم محارمه
لكن عادي جدًا يفرح ويرضى بفرح صاحبه، ويشجعه على فِعله!
وعادي تكون لبسها منيح، لكن مستحيل تنطق لصاحبتها بكلمة إن لبسها حرام!
أنانية وما نالها الكافر

من غير كلمات فلسفية كتير
هو السَّعي وصول؛ من ضمن معاني الوصول
والسعي ممكن يكون بالدعاء بس، عادي برده
التقليل من قِيمة الدعاء والعبادة في السعي، مينفعش

قال سلمة بن دينار:
‏إذا عزمَ العبدُ على تركِ الآثامِ أتَتْهُ الفُتُوح!

أنا والله أشهد
من أهم أسباب السعي: الترك؛ ترك الآثام؟
لا والله، حتى مُجرَّد العزم النيَّة
يعني سبب من أسباب الفتوح:
مفيهوش عَمل أداء
هو عمل ترك
وكمان قبل الترك، هو نيّة

فقالب السعي اللي ثابت في أذهاننا ده لما حد يحتاج فلوس، أو شفاء، أو جواز، أو أولاد، أو نجاح
مش صحيح، ولا حتى كمان المفروض يكون ده أول تفكيرك
دي خطوة تالتة في التفكير، اللي هو السعي بالعمل الدنيوي

سبحان الله
إحنا نجحنا في الامتحانات بسبب الموضوع ده بس، ومعظم الحياة ماشية كدا
.

لاعيبة ليفربول الكفَّار، بيحتفلوا بالبطولة ومع مؤمن زكريا، وبالأغاني هما بينشدوها، ومن غير بنات، ومن غير مزيكا !
وعادي يعني
والفيديو منتشر بشكل واسع جدًا
والناس فرحانة

أظن لو اتعمل حاجة زي كدا عندنا، تلاقي واحد قاعد في جمب وبيقول: إيه الملل ده؟ فين الأغاني ياجدعان؟ دي فرحة
واللي بيفرجوا على الفيس بوك، طلَّعوا عينهم

على العموم الحاجات دي مش بنعملها عشان حرام، حتى لو مفيش أي فرحة، بس المشكلة في النوع اللي بيحِس بالدونية والانتقاص لما بيشوف أمر من أوامر الله يُفعل أو نهي من النواهي بيُترك !
المفروض يراجع نفسه ونيته ودنيته
أصلًا تطبيق الأمر أو الترك لله، دي حاجة تفرَّح المسلم، بدون أي حاجة تانية معاها

هو الصراحة كنت أتمنى معظم الناس اللي حواليا تبقى نسخة "أنضف" شوية دينيًا من عائلاتهم
والكل كان بيتكلم وبيستنكر الأفعال اللي بتصدر من أفراد عائلته، وحتى كان في كلامه قلة أدب وتعدِّي عليهم
لكن بعد فترة..
بعد ما انتهت فترة الحماس
وبدأت الجامعة تختفي واحدة واحدة
وهندخل على مسؤوليات
ضد الشغل (الجيش)
ضد العُرف (الجواز)
ضد التعليم (الأطفال)
بدأت أشوف إن الناس بتفضَّل الحل الآمن: الحل التقليدي
"أشوف الناس بتعمل ايه واعمل زيهم"
متحججين بمليون حجة، وكلهم في ميزان العقل والأدب مفيش، فضلًا إن يكون ليهم وزن في ميزان الدين

فغالبًا هيقدموا نسخة اسوأ بمراحل من النُسخ اللي كانوا بيشتموها وبيضحكوا عليها
ليه؟
لأن مع نمط الحياة، زاد وجود الميديا، مكنش موجود في النُسخ القديمة
فبدل ما كان فيه عادات ومحرَّمات مُتعارف عليها والكُل بيعملها في إطار مجتمعي لطيف
وفيه عادات ومحرَّمات تانية، بتحصل لكن بشكل فردي جوا البيوت، محدش بيتطلع عليها
حتى لو كل الناس بتعملها، بس مفيش انتشار للموضوع وسط الناس، بالتحديد مفيش كلام عن الحاجات دي في القعدات الجماعية
كل واحد بيعملها في بيته ومع أهل بيته وخلاص

حاليًا بقت الحاجات اللي كانت بتحصل بشكل فردي دي، بقت موجودة على الميديا
فبقت غالبًا كُل المحرَّمات بتتعمل بشكل جماعي، ومفيش إنكار، بل بالعكس فيه تشجيع وضحك وهزار من الناس المعترضة "قلبيًا"

نُسخ هتطلع مطحونة في ما بين المسؤوليات وما بين صداع أهلها وما بين فروض المجتمع
ومع ده مفيش ولو مساندة بسيطة من أي حد من أصحابها، والله ولو شخص واحد، يفضل مخلِّي نقطة المبادئ والحلال والحرام في دماغها، حتى تستعملها في أوقات الرفاهية
(مش لازم نعمل كل الحاجات الحرام مع بعض، ممكن نقف شوية لو الموضوع مش هيزِّود اللذّة)
مفيش، صُحاب أسوأ من الفازة
على الأقل الفازة مش بتشجعك ولا هترضى بأفعالك الحرام

الحاجة اللي مكنتش بقدر أعملها، ولحد دلوقتي أظن لو كُنت لسّه مكمِّل في الموضوع مكنتش هعملها برده: إن أنا أسمع أغاني لشخص ميّت
ولما كان حد يشغل قدامي أغنية، واسأله مين ده؟ يقولي فلان الله يرحمه مات
كنت أبقى مصدوم والله
ومش عارف الناس بتتعامل بأريحية إزاي مع الموضوع
أنا فعلًا بخاف اسمع لحد ميّت، أو اتفرج على ممثلة ميتة

أظن ده مثال لـ جلال الموت، وهيبة الموت
والأولى من إنك تدعي لحد مات بالرحمة، إنك متكونش سبب في استمرار كتابة أعماله السيئة بعد موته
.

سبحان الله
اليوم التاني على التوالي أروح المسجد في صلاة المغرب، ألاقيه مليان على آخره وأمشي

مجَّرد بس أما يجي شخص صوته حلو، والمسجد بيفتح المكروفون الخارجي، الناس حتى لو مكسلة بتتكسف وتيجي تصلي

حابب أوثَّق إن انهاردة استلمت آخر مبلغ في الفلوس اللي اتنصب عليا فيها
من نوفمبر 2019😂

من ضِمن التقدير العجيب في الموضوع ده سبحان الله
إن إحنا اتنصب علينا، عشان قالوا إن إحنا إخوان، تمام؟
وبعدين رفعنا قضية
طِلع القاضي وسكرتير المحكمة بيسبوا ويلعنوا في الإخوان، وهما اللي بيمسكوا قضايا الإخوان
وبعدين قالولنا هنحل الموضوع ودِّي
قلت ماشي
قام جاي يهددني إنه عارف رئيس مباحث قسم تاني، اللي قابض على نص إخوان المدينة
والموضوع السنة اللي فاتت كان هيوصل خلاص حيطة سَد
بسبب أسلوبه التهديدي ده
فكلمت واحد صاحبي يكلم رئيس المباحث
ورحتله مهدده برئيس المباحث
وسبحان الله هو استجاب للتهديد في ساعتها
ولو أي واحد في الاتنين كان كلِّف نفسه ودوَّر خمس دقايق زيادة، كان زمان الوضع مختلف بس الحمد لله

الراجل ده جاب عنواني ورقم تليفوني والرقم القومي، وكل حاجة عنِّي قبل ما يكلمني
وسبحان الله، مدفعش ولا وافق يسمع الكلام غير من تهديد حد في نفس صفه
بعد ما كنت خلاص فقدت الأمل
الحمد لله رب العالمين

هو دفع الفلوس كلها لآخر جنيه
وكمان دفع فلوس المحامي
مع إن في البداية اتخانقنا كتير جدًا، وفرَّجنا المحكمة على بعض
حاجة من الكرامات 😂
الحمد لله

تقريبًا الموبايل بقاله 3 سنين صامت حتى بدون هزاز
وبدون منبهات وصوتها
مش بيطلع صوت نهائي
مش بايظ، أنا اللي مخليِّه كدا
ولما حد بيتصل بعرف من النُّور
وبصحى في الأوقات اللي عايز اصحى فيها بالضبط الحمد لله
ما عدا بعض أيام الامتحانات اللي فلتت منّي

أنا كنت شايف إنه من الحاجات الأساسية في الفرح، وبتدل بشكل غير مباشر على دين الرجل والست
وكون الراجل المسؤول الأول عن الفرح بكل تفاصيله
الناس بتبقى نايمة في بيتها أو في شغلها أو بتعمل أي حاجة
وهو اللي بيكلمهم وبيجمعهم في مكان واحد

فكنت بشوف إن من مسوؤليات الراجل الديِّن: النصيحة حتى ولو أدنى النصيحة،
إنه بعد بوست تحديد الفرح
ينزل بوستات بنصائح متعددة عن المخالفات اللي بتحصل عادةً في الأفراح من الشباب، سواء عن تشغيل الأغاني في العربيات في الزفَّة أو غض البصر عن نساء عيلته، وعن البنات عمومًا اللي في الفرح، حتى لو كان منفصل بس فيه احتمالية إنهم يشووفهم في الدخول أو الخروج

وكذلك من مسؤولياته إنه يبلَّغ مراته إنها تبلَّغ أصحابها بضرورة الالتزام باللبس الشرعي، وعدم التزُّين بالمكياج إطلاقًا، إلا لو حد هيغطي الزينة دي، ويقلع في قاعة البنات بس
لكن أي حد مش منتقب، ومش ناوي يغطي وشّه أو جسمه، فهي تنبِّه إنها هتتقبل جدًا موقفه، بس ميجيش الفرح
وكذلك هو ينبِّه على محارمه من الستات، سواء اخواته أو أمهاته وخلافه

هل النقطة دي مهمة؟
آه مهمة جدًا
لأن العريس المسؤول الأول عن الحدث
هل لو العريس مكنش عمل فرح، كان حد من دول هيعمل المعاصي دي في الوقت ده؟
لأ
طب هل فرض عليه الكلام ده؟
هو عمومًا النصيحة والأمر بالمعروف والنهي عن المنكر دي فروض، وحقوق
ودي نصيحة عامّة
مقولتش نصائح فردية

والله دي أدنى النصيحة، وواجب علينا إن إحنا نعمله
بأي شكل ممكن من الكلام، وبأي لهجة لطيفة في النُصح
بس المهم الناس تعرف إن الحاجات دي حرام، ويتم تذكيرهم بحرمتها، ولو مضطرين يعملوها ومش عارفين يعيشوا من غيرها
ومفيش احترام أولًا لأحكام الدين، وثانيًا مفيش احترام لأصحاب الفرح، مفيش احترام لعلاقتنا كأصدقاء، وهتعمل حاجة تضايفني وأنت عارف إنها هتتضايقني

فبصراحة مش شايف أي معنى لاستمرار علاقة مؤذية بالشكل ده!

الناس بتعمل الحاجات دي بشكل فردي
والصُحاب بتطبق الكلام بالظبط، وبدون أي تعنُّت
لكن لما بتبقى أمور متعلِّقة بالصفات الشخصية، وليس المسائل الدينية

يعني يدخل خاص لفرد فرد من أصحابه:
يا فلان متشتمش في الفرح نهائي عشان أبويا هيبقى موجود وحمايا؟
حاضر
يا فلان متشربش سجاير عشان محدش عارف إن أصحابي بيشربوا سجاير؟
حاضر
يا فلان متعملش كذا، عشان الناس ممكن تقرف من تصرفك؟
حاضر
وهكذا، والله المواقف بتحصل قدام عنينا، والناس بتستجيب احترامًا لرغبة صاحبهم

فأما يكون فيه رغبة دينية بالدرجة الأولى، وبعدها رغبة الصحوبية، ويتم تطنيش ده بأبرد رد فِعل ممكن، ده اسمه إيه!

وعادي لو في الآخر معظم الناس عملت حاجات حرام:
( وما على الرسول إلا البلاغ المبين )
( فإنما عليك البلاغ وعلينا الحساب )
( فذكر إنما أنت مذكر لست عليهم بمسيطر )
وعادي ممكن تخلِّي علاقتك بيهم زي ما هي برده، بدون قطع لها

لكن الأهم إن مهما كنت عارف بالنتائج ومهما كنت مستقل الموضوع
مينفعش بأي حال من الأحوال تتغاضى عن النُصح والأمر بالمعروف والنهي عن المنكر في الأمور دي نهائي
لله
هي كلمات في سبيل الله
ممكن يكون محدش عملها قبل كدا قدامك
ممكن تكون أنت عارف إنها بنسبة 100% مش هتلاقي استجابة
ممكن تكون عارف إن فيه ناس هتاخد الكلام على نفسها وتزعل منك
لكن عادي
الأمر والنهي والنصيحة ده هو الوُصول في حد ذاته
وده المطلوب منك
ويجب تأديته على أتم وجه
والله المستعان

وبصراحة يعني، بكل صراحة
الراجل اللي ميعرفش يسيطر على يوم فرحه، في وجهة نظري الشخصية المتواضعة: مش راجل!
الراجل اللي يفضَّل مشاعر أصحابه على مشاعره الشخصية وعلى الأحكام الدينية: مش راجل
فكك من أي حِجج في الدنيا
اليوم الوحيد اللي أنت المسؤول المباشر والأساسي فيه هو يوم فرحك، ببساطة ممكن متروحش وتروَّح أنت ومراتك عادي جدًا
أنت السبب المباشر في استمراره أو إلغائه

لكن لو جالك حد وقالك:
هما شغَّلوا أغاني غصب عني
هما كل شوية يشغلوا أغاني في قاعة البنات وأنا بقفلها
والشغل ده
ده شغل أطفال ولِعب عيال
وهتلاقي تعامله دائمًا في الأمور دي في حياته بعد الجواز بالمنطق ده من البرود
مش هيتحرك إلا لو حد نبِّهه إن فيه حاجة بتحصل ولازم يتحرك على شكله قدام الناس
لا عنده شخصية، ولا قادر ياخد موقف من الناس اللي مش بتقدر متطلباته الشخصية في يوم فرحه
وبيفضلوا نفسهم عليه في يومه!

ما هي بنت لقت مسوِّغ لإظهار تحجيم جسمها وصدرها عشان جمال تيشيرت حفلة التخرُّج، وجمال الديزاين
وإن دي شهوة مستحيلة المقاومة

معرفش هتقدر تجاهد نفسها في إيه تاني؟
لو الموضوع محتاج جهاد يعني في قلع الخمار عشان التي شيرت يبان
فعادي وطبيعي
ما الدين كُله جهاد
ما هو بدون جهاد كانت الناس رضيت بالإسلام دينًا فعلًا للأوامر وتركًا للمحرَّمات

الخمار أو الطرحة الطويلة أو أيًا كان المسمى، المهم تغطية منطقة الصدر؛ ده فرض على كل مسلمة، مش كماليّة وموضة وشكلي حلو فيه
سواء في حفلة التخرج أو في الفرح أو في أي مناسبة، ظهور حجم الجسم مؤشر سيء على النوايا

كنت عايز أكون بعرف أعمل فلوج، عشان أعمل فيديوهات يومية كدا مُلخص اليوم والأحداث، لحد نهاية الامتحانات، عشان أوثَّق:
لإما المعجزة، ونجاحي السنادي
لإما إعادة السنة😢

كنت عملت الموضوع ده في تالتة ثانوي، والنتيجة كانت غير متوقعة
الفيديوهات 90% شعري، و10% وشّي
وطبعًا كلام تعبان
دلوقتي بقيت خبرة أكتر
-

ربنا يكفيكم شر اتنين مُتكلِّفين بيردوا على بعض في كومنت على الفيس أو تويتر: أخي وأُخيّة، وأخيتي، وكلمات فُصحى ونقطة وعلامات تعجب وحاجة آخر مرار والله

ايه اللي بتستفاده لما تعمل نِمرة وأنت بترد على صحابك أو أخوك؟
لا شيء
زيادة في التصنُّع وغرقان في التكلُّف

فعليًا الرد الناشف على صاحبك أو أخوك على الميديا ده شيء معفن، مش حاجة حلوة
وخصوصًا لما يبقى ردك عليه بالشكل ده بسبب إنه رد عام، وفي نفس الوقت لو بعت له خاص، تلاقي الأسلوب العادي خالص
طب ليه يعمّ

للي بيسألني هتشارك في حفلة التخرج ولا لأ؟
أو هتجيب التيشيرت والناس تكتب لك عليه؟
أو هتجيب النوتة والعيال تكتبلك؟
أو هتنزل بوست على الفيس؟
الذكرى بقى والحاجات اللطيفة دي
الإجابة: لأ،
مش هعمل حاجة من الحاجات دي خالص
حتى لو كانت الحفلة مفيهاش أي مخالفات؟
آه، ما هو كتابة الأسماء والحاجات دي مفيهاش مخالفات أصلًا للشباب يعني

بس أنا مش بحب الحاجات دي كتفضيل شخصي
وحصلت معايا قبل كدا، أكون في مكان والناس تطلب منّي أقول كلمة أو أنزل بوست، أو أكتب حاجة، وأنا عارف إن بسببها مش هقرأ غير كل خير، أدعية أو شكر أو مجاملات، المهم اللي هيتكتب حاجات حلوة وبس
زي لو مسكت مكان، أو طلعت من مكان، أو عملت موقف حلو وخلافه
مش بحب المواضيع دي

+ فيه بقى حاجات كدا معدتش حابب نهائي ادخل فيها كـ تابع، لو شاركت فيها أشارك كـ مسؤول، لكن حاجة أنا شاركت فيها قبل كدا كمسؤول للأسف مش هعرف اشارك فيها كتابع بعد كدا
ببقى عارف المشاكل والأخطاء اللي بتحصل، فمش بحب أدخل خالص في الموضوع

وموضوع حفلة التخرج ده أنا عرضت إن أنا أقوم أصلًا بالموضوع يُعتبر كله، وبمجهودي وبفلوسي، مش هكلِّف حد شيء
بس عشان يكون حاجة كويسة دينيًا من الباب الأول
لكن طبعًا اترفض الموضوع
وهما اللي ماسكينه أتوسّم فيهم الخير، أكتر من أي كلية تانية طبًعا
بس مش هيبقى برده بالشكل اللي أنا حابه
وما دام مش زي ما أنا عايز يبقى مش هشارك فيه