رغم الشقاء رغم التعب والمعانات
وطول السنين وغيبتك ما نسيتك

حتى ولو سجيّت في بعض الاوقات
ما فيه يوم من ( الدعاء ) الا نويتك

جيتك ودمعي حار وافكاري شتات
واقفيت عنك وصاح قلبي وجيتك

وشلون اقفّي وابتعد عنك بالذات
وانا ليا من ضاق صدري نصيتك

يالي مكانك داخل القلب ما مات
عقب ( البطى ) . ما كني الا بديتك

نعممم بكيتك , مرّه وعشر مرات
وهاللحين لامني ,, ذكرتك بكيتك

يا دوى القلب الحزين ويا سبايب دمع عيني
القطاعه . والجفاء والبعد ؟ ماهن شي عادي

ادري انك ما رحلت ، و ما ( قطعت ) الا تبيني
امشي اللحالي بـ وادي والبشر تمشي بـ وادي

ليه .. يا فرحة شبابي ؟ ليه يا فرحة .. سنيني
وانت عندي مانت عادي شي ثابت واعتيادي

يا غلاي وذكرياتي ؟ ويش اسوي في حنيني ؟
رغم صدك والجفاء .. ما كنّي الا فيك بادي

بان شوقي فالعيون . وحط عينك وسط عيني
تعرف اني من ثلاث شهور في سجن انفرادي

الشتاء ؟ ما فاد فيني ،، والمطر ؟ ما فاد فيني
والربيع الي .يشوفونه خضر ؟ شفته ، رمادي

( الحاسد ) الي كفانا الله , من شرّه
خلاك تزعل عليّ !! يامصدر الهامي

اعطاك سهم الفراق !! وقال لك ضرّه
وشديت قوس الغياب وصار بعظامي

يالي لك بسور صدري " مرتع وجرّه "
وشلون تقوى على هجري وانا ضامي

خليتني وانت تدري .. ( صدتّك ) مرّه  
مابين سهر الليال !! وجرحي الدامي

ومابين اعرّض على الطاروق .. واجرّه
يالين جف الكلام .. وجفت اقلامي

اغليك ( واغلي ) مكانن .. دايم تمرّه  
واليا تذكرت طيفك ضاقت انسامي

وافهق عقالي وافك !! ( الثوب ) وازرّه
واكذب على واقعي .!! واصدّق اوهامي

جلست فيه وبكيت ! وليييين ما مرّه 
غلبني النوم فيه .. وقمت ب هيامي

كانك تناسيت ( وجهً ) ؟ تقدر تسرّه
عجزت لا انساك وانسى وجهك الشامي

ما غاب وجهك .. عن عيوني ولو مره 
دايم فـ بالي وبعض ( احيان ) قدامي 

ازعل ولكن ( قبل ) تزعل !! وتتشرّه 
تاكد من الجريمه ؟! واعرف الرامي

انا ( عدوي ) ما احب اوذيه وآضرّه 
وشلون وانت الطموح وفرحة ايامي

يا مضيّف بيض الله ( وجهك ) لحسن الضيافه
جيت يمك من ( غلاك ) ورحت مانيب متعافي

جيت لافي ما حسبت حساب خط ولا مسافه
والحصيله طعنةً بالصدر .. ( يومي ) جيت لافي

قلت من زود ( الغلا ) بشوف لي طيب وكلافه
واثرها قصه ( جديده ) .. للمفارق !! والتجافي

قلت يالله جعلها ( خيره ) وشيً كنت اخافه
عند ( ربي ) ما يضيع .. ولا تزوود شي" كافي "

رحت واقفيت وبكيت من الفراق ومن جفافه
والسهر ملك لعيوني وانت لا جاء الليل غافي

المهم اني تعبت وطحت من زود الضعافه
وكل طيحه به وجع تطري علي يوم انت حافي

لين ما ربي فزع لي من بعد ( طول ) الكسافه
وابديت احط ( جرحك ) والتعب كله خلافي

وانقضت ذيك الهموم ومسرع الوقت التفافه
جيت من بعد السنين ودمع عينك طاح صافي

من دموعك بان جرح وفيك حزن وبك مخافه
لا تعذر ما انت ( لاقي ) من وراي الا جفافي

لا تعذر والله ان العذر !! ( بعض احيان ) تافه
ما ورى طول ( الطريق ) وطعنتك حب وعوافي

صرت جزء من الفراق وصرت جزء من الحسافه
بعد ما انت الي بقلبي لك ( صروح ) ولك منافي

#هايس_الشمري 

يا غايبي طال ( انتظاري ) دون قفلت بابك
‏وابطيت واقف لين حر ( الشوق ) غير لوني

‏من الحياء وعيون حسّادي وبرد اعصابك
‏مافيه شيً ما بكى ( فيني ) .. ما عاد عيوني

‏كابرت والعالم تشوف وما حسبت حسابك
‏انك على وجهك ( مقفي ) لين جن جنوني

‏دلونّي ( الحسّاد ) من صوتي وطرد ركابك
‏وبوجهك ( اقفيت ) ورجعت وعلهم دلوني

‏وقعت ( فالارض ) .. وبكيت وشاعرن غنابك
‏اصبحت وسط الحاسدين الي وراي ودوني

‏ودار الزمان ومات قلبن فيه ( عضّة ) نابك
‏وجفت ضلوعي والغلا مبطي مادق ركوني

‏اليوم جيت وقلت انا آسف وهات عتابك
‏وباب المعاتب والرضاء قاموس خارج كوني

‏ما بعد ضحك ( الشامتين ) وبعد قو غيابك
‏الا الهشيم ( الداخلي ) .. لا تسألن وشلوني

‏انا اسألك عقب المفارق والبطاء وش جابك
‏ما تدري ان الناس مبطي بصورتك عزوني

‏الواضح انك مانت مهتم والدليل اهدابك
‏لا اهدابك اهدابي ولا حتى الجفون جفوني

‏وشلون قلبك طاوعك تنسى جميل احبابك ؟
‏وشلون عشت العمر بعدي والحياة بدوني

‏مع ( السلامه ) والوادع الي بـ رمحه صابك
‏سنين وانا اتجرّع ( اوجاعه ) واجر لحوني

‏⁧ #هايس_الشمري⁩

لا تبرّر لـ ( الرجوع ) .. ! ولا ( تلمّح ) لـ الزياره
من زهد فالحب ( دايم ) رجعته فيها صعوبه

انتهت حرب المحبه واعلن !! الحقد انتصاره
والشمالي صار صدره !! اضوق من ازرار ثوبه

يـ اول ايام الحياة !! ويـ اول ابواب البشاره
ما توقعت الزمان ( يدور ) واعيشك !! عقوبه

جف حلقي يوم اقول ان اول النار الشراره
من سمع هرج العوذال يطفي النار الشبوبه

رحت واقفيت ونسيت وشاعرً طال انتظاره
طق بابك وانتظر نوبه !! وعاد ( يطق ) نوبه

ما استجبت ورحت من عقب الغلا والحب كاره
وابديت اعالج ( جروحك ) وذنبً كيف اتوبه

لين طابت نفسي من الحب والبعد وقشاره
واستقمت وطابت جروحي من الحب ودروبه

من يقفي دون ( عذر ) ودون توجيه استشاره
يلحق ( الليل ) الطويل وينطح البرد وهبوبه

واحدً خاطرْه ( طايب ) !! ما معاه الا انكساره
كيف يرجع وانت عشقّت السلاح وراح صوبه

لا تعوق ( المستقيم ) الي يبي !! رد اعتباره
ولا اقول مسامحك مع ان الاغلاط محسوبه

فالنهايه حربي الي فالهوى ! ( راحت ) خساره
وانهدم صرح ( بنيته ) طوبةً من فوووق طوبه

كنت خطوه !! واتخذّها القلب من دون استخاره
واتخذها !! بعد بكرا ذنب ،، ( واحد ) من ذنوبه

من ( غلاك ) !! وذكرياتك !! والرسايل .والزياره
والهدايا .. والقصايد .. كل ( ابوها ) , تبت توبه

#هايس_الشمري