گذار دموکراتیک

ڕاستییەک کە پێویستیی بە شرۆڤە نییە

سەرەڕای هەموو بانگەوازیی و هۆشدارییەکان، شانبەشانی هێرشە داگیركارییەكانی دەوڵەتى تورك بۆسەر باشووری كوردستان، هێرشكەكانی پەدەكە و بۆسەنانەوەیان بۆ هێزەكانی گەریلا بەردەوامە و بەوهۆیەوە لە ماوەی زیاتر لە ساڵێکدا، ١٩ گەریلا شەهیدبوون.

لەكاتێكدا گەریلاكانی كوردستان لەگەڵ گەورەترین دووژمنی كورددا لە مانگی نیسانەوە لە شەڕێكی خوێناویی بەردەوامدایە، پەدەكە بە جوڵاندنی هێز بۆ هەرێمەكانی گەریلا و شەهیدكردنی چەندین گەریلا دەیەوێت بەرەیەكی تری شەڕ دژی گەریلا بكاتەوە.

هەرچەندە پەدەكە بە جموجوڵ و هێرشەكانی ئەوەی نیشانداوە، كە بێباكە لە ڕژانی خوێنی كورد بە دەستی كورد و دەیەوێت لەژێر داوای دەوڵەتی توركدا بەرەیەكی نوێی شەڕ لەگەڵ گەریلادا بكاتەوە، بەڵام گەریلاكان بۆ دوورخستنەوەی شەڕی كورد بە كورد، خۆیان پاراستووە لە وەڵامدانەوەی هێرشەكان.

پەدەکە، لە ماوەی ساڵ و نیوێکدا ٢٢جار هێزی ڕەوانەی ناوچەی گەریلا کردووە و هێرشیان ئەنجامداوە، ئەمانەش بووەتە هۆی شەهیدبوونی ١٩ گەریلا.

لەدوای دەستپێکردنی هێرش و داگیرکارییەکانی دەوڵەتی تورک لە ٢٣ی نیسانی ئەمساڵ بۆسەر ناوچەکانی زاپ، ئاڤاشین و مەتینا، هێزەکانی پەدەکە جارێکیتر دەستیان بە جموجوڵ و پێشڕەویی کردووە.

لە ماوەی ساڵ و نیوێکدا لە هەرێمەکانی گەریلا بەسەدان کیلۆمەتر بە پانی و درێژیی، بەدەیان بنکە و بارەگایان دروستکردووە و تێیدا بەهەزاران چەکدار بە چەکی قورسەوە جێگیرکراون، بەهۆی ئەو جموجوڵ و پێشڕەوییانەوە ئەم هێرشانە ڕوویانداوە:-

ڕووداوەکانی زینی وەرتێ یاخود (زینی ئەستێرۆکان)

ڕۆژی ١٨ی ئازار، وەزارەتی پێشمەرگە لەژێر ناوی ڕووبەڕووبوونەوەی ڤایرۆسی کۆرۆنا، لیوای حەوتی پیادەی هاوبەشی سۆرانی لە ناوچەی زینی وەرتێ (زینی ئەستێرۆکان) جێگیرکرد، دواتر پەدەکە ئەمەی قۆستەوە و لە ١٣ی نیسان هێزێکی زۆری پێشمەرگەی لەگەڵ چەک و تەقەمەنی گواستەوە بۆ ناوچەکە، هاوکات جموجوڵی فڕۆکە سیخوڕییەکانی دوڵەتی داگیرکەری تورکیش بەسەر ئاسمانی ناوچەکەدا دەستیپێکرد.

دوو ڕۆژ دواتر فڕۆکە شەڕکەرەکانی دەوڵەتی تورک زینێ وەرتێیان بۆردوومان کرد، لەو بۆردوومانەدا سێ گەریلای هەپەگە شەهید بوون، کە دواتر کەجەکە ئاشکرایکرد: گومانمان هەیە شوێنی گەریلاکان لەلایەن پەدەکەوە بۆ دەوڵەتی تورک ئاشکرا کرابێت.

مانگی تشرینی یەکەمی ٢٠٢٠

تەنها لەو مانگەدا پەدەکە چوارجار بە هێزەکانی گوڵان، چەکدارانی ڕۆژ و هێزەکانی زێرەڤانی، لەگەڵ چەکی قورس هێرش و پێشڕەویی کردووە بۆ شارەدێی دینارتە، دەشتی نەهلێ، چیای گارە، لەگەڵ ناوچەی بامەڕنێ تا دۆڵی دیما و ناوچەی بێروەر، بەدرێژایی ئەم سنوورانە هێز و چەکی قورسیان جێگیرکردووە و سەنگەر و بارەگای نوێیان دروست کردووە، کە بە هەرێمی گەریلا ناسراون.

تشرینی دووەمی ٢٠٢٠

لەم مانگەشدا هێزەکانی پەدەکە پێنج جار جموجوڵ، هێرش و پێشڕەوییان ئەنجامداوە بۆسەر گەریلا و هەوڵیانداوە بچنە ناو کامپەکانیانەوە، گەریلاش لە چوارچێوەی خۆپاراستندا بەرگرییان کردووە و ئاڵۆزیی دروستبوو، پەدەکە بەهەزاران چەکداریی بە چەکی قورس و تانک و زرێپۆشەوە لە سنوورەکانی چۆمان، حاجی ئۆمەران، خەلیفان، ڕواندز و گوندەکانی جێگیرکردووە و چوار جار خاڵی کۆنترۆڵیان داناوە.

کانوونی یەکەمی ٢٠٢٠

هێزەکانی پەدەکە لە گرد و شاخ و بەرزاییەکانی سنووری شارەدێی قەسرێ و زینی وەرتێ جێگیربوون، هاوکات لە گوندی سێگرێی سەر بە شاڕۆچکەی ئامێدی هێرشیان کردە سەر گەریلاکانی هەپەگە و لەو هێرشەدا سێ گەریلا برینداربوون.

حۆزەیرانی ٢٠٢١

پێنجی حوزەیران پەدەکە لە شارۆچکەی ئامێدی هێزێکی گەورەی بەرەو هەرێمی مەتینا بۆ هێرشکردنەسەر گەریلا نارد، لەگەڵ ئەو هێزەشدا زرێپۆش، ئۆتۆمبێلی فریاکەوتن، حەفارە و زۆر کەرەستەی تایبەتی دیکە ڕەوانە کران، لەڕێگادا بە بۆردوومانی فڕۆکە جەنگییەکانی دەوڵەتی تورک، پێنج پێشمەرگە گیانیان لەدەستدا، دوو ڕۆژ دواتر هێزێکی گەورەیان ڕەوانەی برادۆست کرد و لەنزیک هەرێمەکانی گەریلا جێگربوون.

سەرەڕای بانگەوازییەکانی پەکەکە بۆ کشانەوەی هێزەکانی پەدەکە، پەدەکە بەردەوامییدا بە هێز بردن بۆ مەتینا، لە ٣١ی ئاب هەپەگە لە ڕاگەیەندراویکدا ئاشکرایکرد: دوای ئەوەی پەدەکە هێزی بردە ئەوێ، بۆ ئەوەی ئاڵۆزیی دروست نەبێت، بڕیارماندا تاکتیکی شەڕ بگۆڕین و هێزەکانی زەندوورا بکشێنینەوە، لەوکاتەدا شەڕی سەخت لەنێوان ئێمە و سوپای تورک ڕوویدا و بۆردوومانی چڕی ناوچەکەیان کرد، لە ١٠ و ١١ و ١٢ی حوزەیران، شەش گەریلا لە ئەنجامی ئەو شەڕ و بۆردوومانانەدا، شەهیدبوون.

تەمموزی ٢٠٢١

هێزەکانی پەدەکە لەنێوان گردی چارچڵ و گردی مەتینا هێرشیان کردبوو بەرەو هەرێمەکانی گەریلا و بووبوونە هۆی ئاڵۆزیی، هاوکات لە شیلادزێوە ئامادەکارییان کردووە بۆ ڕۆشتنە ناوچەی ڕەنجبەراخ، دەستیان بە لێدانی ڕێگای نوێ و ناردنی هێز و زرێپۆشی زۆر کردووە بۆ ناوچەکانی گەریلا.

359 views07:22