گذار دموکراتیک

‍ نەخۆشخانە کەیسی بەرکەوتووانی چەکی کیمیایی بەرواری باڵا پەردەپۆش دەکات

ئەندامێکی ئەو خێزانەی کە لە بۆردوومانەکەی بەرواری باڵا ژەهراویی بوون دەڵێت’تەندروستی خێزانەکەی هێشتا ناجێگیرە’، ئاشکراشی دەکات لای دەستەی مافی مرۆڤ سکاڵایان تۆمارکردووە، بەڵام نەخۆشخانە کەیسەکەیان پەردەپۆش دەکات و لە ڕاپۆرتەکانیاندا دیارییان نەکردووە، کە بەهۆی چەکی کیمیاییەوە ژەهراویی بوون.

جیهاد عەبدوڵا، ئەو هاوڵاتییەی گوندی هرور، کە دایک و باوک و خوشکێکی، لە ڕۆژی چواری ئەیلول بەهۆی بۆردوومانی فڕۆکەکانی دەوڵەتی تورکی داگیرکەرەوە ژەهراویی بوون، دوایین زانیاریی لەسەر دۆخی تەندروستی بەرکەوتوان و کەیسەکەیان، بە ڕۆژنیوز دەدات.

جیهاد عەبدوڵا، باسی لەوە کرد، “ئێستا هیچ کام لە بەرکەوتووەکان لە نەخۆشخانە نەماون و لەماڵەوەن، بەڵام هێشتا بارودۆخی تەندروستی دایک، باوک و خوشکەکەم نا جێگیرە و بەهۆی کاریگەریی ژەهری بۆمبەکەوە گێژدەبن و بیناییان نا ڕوونە”.

ئەو هاوڵاتییە نیگەرانە لە بێدەنگیی و نەبوونی هەڵوێست لە بەرامبەر کەیسەکە و وتی: ئەم کەیسەی ئێمە هیچی کەمتر نییە لە کیمیابارانکردنی هەڵەبجە، بەڵام بەداخەوە پشتگوێخراوە، ئێمە لە مافی مرۆڤ سکاڵامان تۆمارکردووە، بەڵام نەخۆشخانە ڕاپۆرتێکی دروستمان پێنادات وەکو بەڵگە بەکاریی بهێنین.

ئەو خێزانە چەند جارێک هەوڵیانداوە ڕاپۆرتی پزیشکیی دروست وەربگرن، بەڵام “نەخۆشخانە ڕوونی ناکاتەوە، کە بە ژەهری چەکی کیمیایی وایان لێهاتووە و دەڵێن بارودۆخیان باشە و کێشەیان نییە”، جیهاد وای وت.

جیهاد عەبدوڵآ، لە لێدوانێکی پێشووی بۆ ڕۆژنیوز ئەوەی ڕاگەیاندبوو، کە لە نەخۆشخانە پزیشکەکان ئاشکرایان کردووە، کە ژەهراویی بوونە و دەرمانی دژە ژەهریان پێداون، بەڵام بۆیان ڕوون نەکردوەتەوە کە کیمیاوییە.

فڕۆکە جەنگییەکانی دەوڵەتی تورکی داگیرکەر، چواری ئەم مانگە، ناوچەی بەرواری باڵای سەربە پارێزگای دهۆکی بۆردوومان کرد، بەگوێرەی زانیارییەکان دەوڵەتی تورک لە بۆردومانەکەدا چەکی کیمیایی بەکار هێناوە و سێ هاوڵاتیی گوندی هرور بەهۆی ئەو بۆردومانەوە ژەهراویی بوون.

ڕۆژنیوز

🆔 @GozarDemocratic

attach 📎

420 views10:53