گذار دموکراتیک

زەینەب موراد: بەدەمەوە هاتنی لایەنەکان ئەرێنییە بۆ داواکارییەکانی ئێمە

هاوسەرۆکی کەنەکە ڕایگەیاند، ئامانج و داواکاری سەرەکییەکەی ئێمە لە سەرجەم لایەنەکان ئەوەیە هەڵوێستێکی نەتەوەییمان هەبێت لە بەرامبەر لەشکرکێشیی تورکیا، خۆشبەختانە بەدەمەوەهاتنیان ئەرێنیی بوو.

هاوسەرۆکی کەنەکە، زەینەب موراد، لە چاوپێکەوتنێکى تایبەت بە ڕۆژنیوزى ڕاگەیاند، “لەگەڵ زۆربەی حزب و لایەنە سیاسییەکان و نوێنەرایەتیی ڕێکخراوەکان و کەسایەتییە جیاجیاکان چاوپێکەوتنمان ئەنجامداوە، وەک ژمارە ناتوانم بڵێم لەگەڵ چەند لایەن کۆبووینەتەوە، چونکە زۆرن، بەڵام لایەنی جیاجیامان بینیوە، لە هەرە ڕاستەوە بۆ هەرە چەپ و لەگەڵ پێکهاتەکانی وەک کلدانی، سریانی، ئاسووریی و کاکەیی کۆبوونەوەمان ئەنجامداوە، ئامانجە سەرەکییەکەمان گفتوگۆکردنە لەسەر دۆخی ئێستای باشوری کوردستان و بەتایبەت مەترسییەکانی لەشکرکێشیی دەوڵەتی تورکیا، چونکە ڕۆژ بەڕۆژ دەبینین داگیرکاریی دەوڵەتی تورکیا فراوانتر دەبێت و پیلانەکانی فراوانتر دەکات، بۆیە بەپێویستمان زانی هەڵوێستێکی نەتەوەیی یەکگرتوو لەبەرامبەر ئەم داگیرکارییە پێکبێت”، دەشڵێت، “ئێمە تەئکید لەسەر هەبوونی دیالۆگ دەکەینەوە، چونکە هیچ کێشەیەک لە خزمەتی گەلی کورد نییە، ئەمڕۆ تورکیا ئەگەر لەو چیایانە تێبپەڕێت هەتا کەرکوک ڕاناوەستێت”.

ئاماژەى بەوەشکرد، “ئامانج و داواکارییە سەرەکییەکەی ئێمە ئەوەیە هەڵوێستێکی نەتەوەییمان هەبێت لە بەرامبەر لەشکرکێشیی تورکیا، خۆشبەختانە بەدەمەوەهاتنیان ئەرێنیی بوو، هەر کەسێک لەو دۆخە مەترسیدارە ئاگادارە، لایەنەکانیش بەپێویستیان زانی کە ئێمە خاوەن هەڵوێست بین، بەڵام هەڵوێستەکانمان دەبێت یەکگرتوو یەکڕیزبێت”.

ئەوەشى خستەڕوو، “وەک وتم بەدەمەوەهاتنی هەموو ئەو لایەنانەی تائێستا بینیومانن ئەرێنیی بووە، پشتگیریی لە هەوڵەکانی کۆنگرەی نەتەوەیی کوردستان دەکەن و بەپێویستی دەزانن، کە هەموومان بەیەکدەنگ یەکڕیزیی ناوماڵی کورد ببێتە وەڵامدەر بۆ ئەو هێرشانە و بۆ داگیرکارانی گەلی کورد”.

باسی لەوەشکرد، “ئێمە چەند پارچە پارچە بین زیاتر لاوازدەبین، نەیارانمان دەتوانن ئامانجەکانیان بەدیبهێنن، بۆیە ئێمە هەر هەنگاوێک بەئاراستەی یەکڕیزیی ناوماڵی کورد بنێین، نەیارانمان زیاتر هەوڵی پەرتەوازەکردنی ناوماڵی گەلی کورد دەدەن”.

ڕاشیگەیاند، “ئێمە هیچ جیاوازییەک لە نێوان لایەنە سیاسییەکان ناکەین، داواکاریی دیداریشمان بەبێ جیاوازیی ناردووە بۆ هەموو لایەنەکان، بەداخەوە هەندێک تائێستا وەڵامیان نەداوینەتەوە، بەتایبەت ئێمە لە هەولێر زۆر هەوڵماندا لەگەڵ پارتی دیموکراتی کوردستان چاوپێکەوتن ئەنجامبدەین، بەڵام بەداخەوە تائێستاش وەڵامی داواکارییەکەی ئێمەیان بۆ ئەنجامدانی دیدار نەداوەتەوە”.

لەبارەى وەڵام نەدانەوەى پارتى بۆ داواکارییەکەیان، دەڵێت، “هۆکارەکەی بەلای ئێمەوە نادیارە، هەتا ئێستا هیچیان پێ نەوتووین، بەڵام ئێمە بەنیگەرانییەوە دەڕوانینە ئەو دۆخە، دەبینین هەوڵێک هەیە بۆ ئەوەی ناکۆکیی نێوان لایەنەکان زیاتر زەقبن، دەوڵەتی تورکیاش هەموو بۆشاییەک بەکاردەهێنێت بۆ ئەوەی ناکۆکییەکان ببنە پێکدادان و شەڕێکی ناوخۆیی”.

وتوشیەتى، “هیچ کەسێک ئەو بارودۆخەی پێ باش نییە، بە مەترسییەکی گەورە لەسەر دەستکەوتەکانی گەلەکەمان و دۆخی ناوچەکە بەگشتیی دەبینرێت، ئێمە و حزب و لایەنە سیاسییەکانی کوردستانیش لەوباوەڕەداین کە ئەمڕۆ ڕۆژی ئەوە نییە پێکدادانی ناوخۆیی دروستببێت”.

تیشکى خستۆتەسەر، “پێداگریی لەسەر ئەوە دەکەین ئەگەر ناکۆکیی و کێشە و گرفت هەیە دەتواندرێت بە کردنەوەی کەناڵی دیالۆگ چارەسەربکرێت، ئێمەش لەمڕووەوە زۆر هەوڵمانداوە کە لایەنە ناکۆکەکان بێنە سەر مێزی گفتوگۆ، چونکە دوژمنامان زۆر دڕەندەن بەتایبەت دەوڵەتی تورکیا”.

ڕونیشیکردۆتەوە، “بێگومان تائێستا ئێمە ناتوانین لایەنی تۆمەتبار دیاریی بکەین، بەڵام گواستنەوەی هێز بۆ ئەو ناوچانەی دەوڵەتی تورکیا هەوڵی داگیرکردنی دەدات جێگەی پرسیارە، بۆچی لەمکاتەدا هێز دەبرێتە ئەو ناوچەیە، بەبێ ئەوەی هەماهەنگیی لەگەڵ هێزی گەریلا هەبێت”.

هەروەها، “پەکەکە هەبێت یان نەبێت تورکیا هەر پیلانی خۆی جێبەجێ دەکات، خۆ لیبیا و کەرەباخ و ئەرمینیا پەکەکە نەبوو، ئەوە تەنها بیانوویەکە تورکیا بۆخۆی بەکاریدەهێنێت، بەڵام ئێمە پێمانوایە مافی هەر هێزێکی کوردییە کار و خەباتی خۆی لە هەرپارچەیەکی کوردستان ئەنجامبدات، وەک چۆن ئێمە لە سەدەی ڕابردوودا بینیمان هێزە کوردییەکانی باشوری کوردستان لە ڕۆژهەڵات و باکور و ڕۆژئاوای کوردستان هەبوون”.

لەبارەى هەڵوێستى لایەنەکانى دیکەى هەرێم، جگە لە پەدەکە، دەڵێت، “هیچ کەسێک لەو دۆخەی ئێستا ڕازی نییە و داگیرکاریی دەوڵەتی تورکیا بە مەترسیی دەزانن، بەڵام ئەرکی ئێمەیە چۆن بتوانین بە هەماهەنگیی دژی ئەو بارودۆخە ببینەوە، چونکە ئەمڕۆ دەوڵەتی تورکیا هیچ بەربەستێک لەبەردەمی خۆی ناناسێت”.

371 views06:13