📢 Адбыўся рэліз Star Wars Jedi: Survivor.

Гісторыя Кэла Кэстыса працягваецца ў STAR WARS Jedi: Survivor, эпічнай новай прыгодзе, якая прасуне Кэла далей, чым калі-небудзь! Прыгатуйцеся адправіцца ў новую эпічную прыгоду, мэта якой, ня даць галяктыцы пагрузіцца ў цемру!

Крытыкі высока ацанілі гульню (практычна на ўсіх рэсурсах, яе адзнака роўная 86 балам), гульню называюць выдатнай прыгодай і практычна лепшай ва ўсёй франшызе Star Wars.
Галоўны мінус праекта — аптымізацыя. Зь ёй усё дрэнна, гульня літаральна на вачах зьядае відэапамяць, не спраўляецца нават RTX 4090. Распрацоўнікі ўжо адрэагавалі на праблему й паабяцалі, што рэлізны патч выправіць усе гэтыя агрэхі

Дадаткова, каб парадаваць фанатаў, Respawn Entertainment выпусьцілі трэйлер гульні, у якім Марк Хэміл (Люк Скайуокер), навучае Камэрона Манахэна (Кэл Кэстыс) джэдайскім прыёмам.

Гульня даступна на PC, Xbox Series і PS5.
Кошт у Steam — $69.99.
❗️Недаступна на тэрыторыі Беларусі.

📢 Адбыўся рэліз атмасфэрнай мэтроідваніі The Last Case of Benedict Fox.

Вазьміце на сябе апошнюю справу Бенедыкта Фокса й акуніцеся ў закручаны сьвет таемных арґанізацыяў, забароненых рытуалаў і халодных забойстваў. Дасьледуйце ўспаміны памерлых ахвяр, шукаючы падказкі й змагайцеся з дэманамі ў гэтай фантастычнай лаўкрафтавай мэтроідваніі!

Кошт гульні ў Steam — $12.00 (зараз дзейнічае зьніжка ў 20%).

📢 FromSoftware назвалі дату рэлізу Armored Core VI: Fires of Rubicon.

Дзеяньне Armored Core VI адбываецца на далёкай плянэце Рубікон-3, дзе чалавецтва знайшло новую крыніцу энэрґіі, якая магла б значна павялічыць яго тэхналягічныя магчымасьці. Аднак замест гэтага рэчыва выклікала катаклізм, які ахапіў полымем усю зорную сыстэму!
Пасьля яго паўторнага адкрыцьця праз паўстагодзьдзя, чалавецтва ізноў спрабуе атрымаць кантроль над гэтым таямнічым рэсурсам.

Гулец кіруе незалежным наймітам, які пілатуе адну з тытулаваных Браняваных ядраў, прымаючы заданьні ад пазаземных мегакарпарацый.

Рэліз адбудзецца 25 жніўня 2023 году.

📰 Windows 10 больш не атрымае буйных абнаўленьняў.

Microsoft заявіла, што вэрсія 22H2, стане апошняй вэрсіяй Windows 10, у далейшым, АС будзе атрымоўваць толькі абнаўленьні зьвязаныя зь бясьпекай і выпраўленьнем багаў.

«Як паказана на старонках жыцьцёвага цыкла Windows 10, падтрымка АС скончыцца 14 кастрычніка 2025 г. Бягучая вэрсія, 22H2, будзе канчатковай вэрсіяй Windows 10, і ўсе кампутары зь ёй будуць заставацца ў падтрымцы з штомесячнымі выпускамі абнаўленьняў бясьпекі да гэтай даты.

Мы настойліва рэкамэндуем вам перайсьці на Windows 11 зараз, паколькі ніякіх дадатковых абнаўленьняў функцыяў Windows 10 больш ня будзе».

📢 Стратэгія Gord выйдзе ў рэліз улетку.

Студыя Covenant. dev (заснаваная былымі супрацоўнікамі CD Projekt RED і 11 bit), прадставіла новы трэйлер і назвала рэлізнае акно, сваёй дэбютнай, змрочнай стратэгіі Gord, натхнёнай славянскім фальклёрам.

Gord — прыгодніцкая стратэгія для аднаго гульца. Каб выжыць, вам неабходна адбудаваць сваё селішча, але каб па-сапраўднаму перамагчы, неабходна сутыкнуцца твар у твар з тым, што чакае ў цемры за варотамі!

Гульня выйдзе гэтым летам, на PC, Xbox Series і PlayStation 5.

📰 Па Vampire Survivors ствараецца анімацыйны сэрыял.

Выданьне Deadline паведамляе, што мэдыя-кампанія Story Kitchen (якая зараз працуе над адаптацыяй Sifu) займаецца стварэньнем анімацыйнага сэрыяла, па матывах экшэн-рагаліка Vampire Survivors.

У працы прымае ўдзел стваральнік гульні Лука Галантэ, які вельмі рады супрацоўнічаць з дасьведчанымі й зацікаўленымі людзьмі, а гэтак жа яго вельмі цікавіць пытаньне — ці ўсьвядомілі яны, што ў гульні з назовам Vampire Survivors, няма ніводнага вампіра.

Кіраўніцтва Story Kitchen, у сваю чаргу, заявілі, што першапачаткова прынялі гульню за чарговы й пусты праект аб вампірах, аднак нагуляўшы больш за сто гадзін, вырашылі, што магчымасьць зрабіць працяг гісторыі Vampire Survivors робіць ім гонар.

У дадзены момант праект знаходзіцца на самым раньнім этапе свайго стварэньня (зараз студыя занята пошукам сцэнарыста для сэрыяла).

📰 Моддэр інтэґраваў у The Elder Scrolls V: Skyrim VR ChatGPT.

Карыстальнік зь нікам Art_from_the_Machine прадставіў свой праект, які дазваляе NPC з Skyrim VR свабодна мець зносіны з гульцом, пры дапамозе чат-бота.

Цяпер пэрсанажы гульні могуць адказваць на пытаньні гульца й нават расказваць гісторыі! Альгарытмы бота ўлічваюць гісторыю кожнага NPC, у выніку гэтага ґенэруецца не проста агульны адказ на пытаньне, а адказ з улікам характару й біяграфіі пэрсанажа.
У дадатак да чат-боту, моддэр выкарыстаў праґраму xVASynth, якая пры дапамозе ШІ-альгарытмаў сынтэзуе патрэбны голас, ператвараючы яго з тэксту (дзякуючы чаму пэрсанажы адказваюць сваім голасам) (голас гульца ў тэкст перарабляе сыстэма распазнаньня гаворкі Whisper).

Асобна распрацоўнік адзначыў, што стварыў і ўкараніў у гульню, сваю, адносна простую сыстэму памяці, якая дазваляе NPC памятаць мінулыя размовы й рэагаваць на некаторыя рэчы вакол (напрыклад надвор’е й час).

Дату выхаду свайго праекту, аўтар пакуль не называе.

📢 Nintendo апублікавала новы, эпічны трэйлер The Legend of Zelda: Tears of the Kingdom.

«Акунуцца ў нязьведанае, выкарыстоўвайце сілу новых здольнасьцяў і дайце волю цікаўнасьці.

У The Legend of Zelda: Tears of the Kingdom для Nintendo Switch вас чакаюць эпічныя прыгоды па зямлі й нябёсах Хайрула. Вы самі можаце ствараць прыгоды ў сьвеце, які падсілкоўваецца вашым уяўленьнем».

The Legend of Zelda: Tears of the Kingdom выходзіць 12 траўня, толькі на Nintendo Switch.

📰 Тэхнічныя спэцыялісты з Digital Foundry назвалі Star Wars Jedi Survivor найгоршым рэлізам 2023 году.

Star Wars Jedi: Survivor (рэліз якой адбыўся нядаўна), нягледзячы на ўсе свае станоўчыя бакі, моцна расчаравала гульцоў PC-вэрсіі сваёй аптымізацыяй (а дакладней яе адсутнасьцю). Шматлікія нэґатыўныя водгукі прыцягнулі ўвагу Digital Foundry, якія пратэставалі гульню й прыйшлі да высновы, што яе катэгарычна нельга было выпускаць у рэліз, у такім выглядзе!

Гульня пачынае дастаўляць праблемы ўжо на старце, а калі дакладней у мэню налад, некаторыя зь якіх банальна немагчыма ўключыць, бо мэню вельмі дрэнна аптымізавана пад клявіятуру. Уключэньне трасіроўкі прамянёў выклікае падзеньне частаты кадраў, выправіць якую можна толькі закрыўшы гульню. Прызначэньне некаторых налад застаецца незразумелым звычайнаму карыстачу, які спрабуе выратаваць свой FPS. DLSS і XeSS у гульні не падтрымліваюцца, што дзіўна, бо гульня створана на UE4.

Калі ўсё ж у карыстача атрымоўваецца запусьціць гульню, то ён сутыкаецца з падтармажваньнямі з-за падгрузкі шэйдараў (пры чым лагі незалежаць ад ПК, так напрыклад Digital Foundry тэставалі гульню на кампутары з працэсарам Intel Core i9-12900K (які гульня практычна цалкам не выкарыстоўвае!) і відэакартай RTX 4090).

Падводзячы вынік, экспэрты заявілі, што ў такім выглядзе, гульню нельга было выпускаць і, што гэта горшы AAA-рэліз 2023!

«Кавалачак жыцця» — канал, які падкажа, што паглядзець увечары. Рэцэнзіі на навінкі кіно і серыялаў на роднай мове.

​​📰 Стваральнік Pillars of Eternity заявіў, што жаданьні фанатаў, цалкам зьмянілі гульню (і магчыма ня да лепшага).

Аўтар серыі Pillars of Eternity Джош Соер, у інтэрвію заявіў, што гульні серыі, першапачаткова, павінны былі быць іншымі, але шмат што прыйшлося зьмяніць, дзеля жаданьняў тых, хто данаціў на гульню, на Kickstarter.

Перад пачаткам працы над Pillars of Eternity, Джош Соер доўгі час працаваў над Baldurʼs Gate і Neverwinter Nights, што ў выніку падарыла яму велізарны досьвед і сваё бачаньне жанру. Аднак распрацоўніку прыйшлося адмовіцца ад шматлікіх сваіх ідэяў, каб дагадзіць фанатам, бо асноўную фінансавую падтрымку гульня атрымала на Kickstarter, таму Соер адчуваў пачуцьцё абавязку перад людзьмі, якія яго падтрымалі.
Большасьць хацела бачыць гульню з клясычнымі мэханікамі, без інавацыяў і нечаканых новаўвядзеньняў.

«Я сапраўды адчуваў пачуцьцё абавязку перад тымі, хто выказаў падтрымку Pillars of Eternity, але таксама я адчуваў, што прымаю дрэнныя дызайнерскія рашэньні. Мне здавалася, быццам я раблю гульню горш для таго, каб спадабацца аўдыторыі, якая жадае чагосьці настальгічнага».

📢 Аўтары змрочнага экшэна Lies of P прадставілі новы кароткі ролік гульні.

«Адпраўляйцеся ў некалі багаты горад Крат, але сьцеражыцеся марыянетак, якія цяпер ім пануюць. Ці адкапаеце вы праўду, пахаваную пад яго брукаванымі вуліцамі?»

У роліку можна ўбачыць розныя будынкі й некалі яркія шыльды ў зараз ужо змрочным горадзе, поўным небясьпечных машын.

Раней стваральнікі прадставілі новую кампазыцыю з саўндтрэку гульні, а таксама прадэманстравалі экран загрузкі, крэатыўна выкананы ў выглядзе рослага носа Пінокіа.

Рэліз плянуецца на канец лета, для PlayStation, Xbox (+ Game Pass) і PC.

📰 Blizzard пачала рассылаць блоґерам і журналістам самае дарагое калекцыйнае выданьне Diablo IV.

Да рэлізу Diablo IV застаўся яшчэ цэлы месяц, аднак журналісты й блоґеры ўжо пачалі атрымліваць пасылкі з самым дарагім (яго кошт $96.66), калекцыйным выданьнем Diablo IV.

У склад калекцыйнага выданьня ўвайшлі:

▫️Суконная мапа Санктуарыя;
▫️Сьвечка Стварэньня (лямпачка на батарэйках, у форме сьвечкі);
▫️Акультны кілімок для мышы;
▫️Значок Харадрыма;
▫️Артбук калекцыйнага выданьня Diablo IV;
▫️Дзьве матавыя карціны.

А вось сама гульня ў камплект за 100$ не ўваходзіць.

Нагадаем, Diablo IV выйдзе 6 чэрвеня на ПК, PlayStation і Xbox.

📢 Дарожная мапа рэлізаў на травень, ад Беларускага геймера.

Не ведаеце, чаго чакаць ад апошняга месяца вясны?
А вось мы ведаем і падзелімся з вамі сваёй дарожнай мапай!

Redfall, зноў Hogwarts Legacy, Outlast і іншае чакае вас у траўні! Заставайцеся з намі, каб анічога не прапусьціць!

#мапа_рэлізаў
#mapa_relizaŭ

📰 The Legend of Zelda: Tears of the Kingdom "зьлілі" ў сеціва.

Карыстальнікі Reddit выявілі, што на торэнт-трэкерах зьявілася абсалютна працоўная вэрсія The Legend of Zelda: Tears of the Kingdom, якую ўжо ва ўсю разабралі на відэа й скрыншоты, а некаторыя й зусім пачалі яе стрыміць.
Асобным гульцам удалося запусьціць новую Зельду на эмулятары Ryujinx.

Само сабой, інтэрнэт ужо апанавалі спойлеры, у сувязі з чым, усім фанатам франшызы варта быць асьцярожней.
Сама Nintendo сытуацыю пакуль не камэнтуе.

Афіцыйны рэліз гульні адбудзецца зусім хутка, 12 траўня.

📢 Адбыўся рэліз вампірскага шутэра Redfall.

Невялікі горад Рэдфол на востраве ў штаце Масачусэтс абложаны легіёнам вампіраў. Яны прымусілі пацямнець сонца й цалкам адрэзалі востраў ад зьнешняга сьвету. Змагайцеся з крывапіўцамі ў адзінотку або абʼяднайце намаганьні зь іншымі гульцамі!

На момант напісаньня артыкула, крытыкі яшчэ не пасьпелі скласьці свае рэцэнзіі на гульню, бо Bethesda адправіла прэс-копіі шутэра ўсяго за чатыры дні да яе рэлізу!

Upd. Першыя адзнакі крытыкаў не перавышаюць 65 балаў.
Гульню лаюць за нудны адкрыты сьвет і агідны ШІ. Многія асобна адзначаюць, што Redfall зусім не выглядае так, як быццам яго стварыла Arkane.

Кошт гульні ў Steam — $69.99 (Bite Back Edition — $99.99).
Гульня таксама даступная на Xbox Series.

📢 Адбыўся рэліз стратэгіі Age of Wonders 4.

Кіруйце фантастычным царствам вашага ўласнага дызайну! Дасьледуйце новыя магічныя сфэры ў фірмовай сумесі Age of Wonders (стратэгіі 4X і пакрокавых тактычных баёў). Кіруйце фракцыяй, якая расьце й зьмяняецца, калі вы пашыраеце сваю імпэрыю з кожным ходам!

Сярэдняя адзнака гульні на OpenCritic 89 балаў з 100. Гульню хваляць за рэгульнёўнасць, прастор для мультыплэера й прапрацаваную ролевую сыстэму. Да мінусаў аднесьлі прадказальнасьць ШІ, слабы сюжэт і дрэнную аптымізацыю.

Age of Wonders 4 даступная на PC, PlayStation 5 і Xbox Series.
Кошт у Steam — $33.49 (Premium Edition — $60.49).

📢 Анансавана каапэратыўная RPG Pathfinder Abomination Vaults.

Pathfinder: Abomination Vaults — гэта прыгода для чацьвярых гульцоў, якім трэба будзе адправіцца ў глыбіні крэпасьці Ґонтлайт. Вандроўнікам трэба будзе ўступіць у бой, са злой вядзьмаркай Белкарай, якая сее зло па ўсім Галарыёне!

Над гульнёй працуюць BKOM Studios і Paizo (дарэчы, паводле чутак, у дадзеных студый, у распрацоўцы знаходзіцца адразу два праекты ў сусьвеце Pathfinder).

На дадзены момант, распрацоўшчыкі запусьцілі кампанію на Kickstarter.
Іншых падрабязнасьцяў аб праекце пакуль няма.

📰 Адбылася прэм'ера першага трэйлера экранізацыі Gran Turismo.

Напружаная спартовая драма, натхнёная аднайменнай відэагульнёй і заснаваная на рэальнай гісторыі таленавітага падлетка-геймера Яна Марденборо, які зь дзяцінства захапляецца аўтамабілямі й відэагульнёй «Gran Turismo», у якой ён дамогся вялікага посьпеху.
Нарэшце, Ян становіцца сапраўдным прафэсійным аўтагоншчыкам пасьля перамогі ў серыі спаборніцтваў Nissan, дзякуючы свайму трэнеру Джэку Солтару й сваім гульнявым здольнасьцям!

Галоўныя ролі выконваюць Арчы Мадэквэ й Дэвід Харбар. У сьпісе актораў таксама заяўлены Арлянда Блюм.

Прэмʼера фільма заплянавана на 11 жніўня.

​​📰 Інсайдэр Том Хендэрсан апублікаваў мапу рэлізаў прылад Sony.

Вядомы інсайдэр і журналіст Том Хендэрсан апублікаваў ґрафік будучых буйных рэлізаў прылад Sony, пад брэндам PlayStation:

🔹Project Leonardo — адзіная афіцыйна анансаваная прылада на дадзены момант, уяўлялае сабой кантролер для PS5 з гнуткай наладай элемэнтаў, яна прызначана для людзей з абмежаванымі магчымасьцямі.
Рэліз адбудзецца ў чацьвёртым квартале 2023 году.

🔹PS5 са здымным дыскаводам — Хендэрсан лічыць, што прэзентацыя дадзенай вэрсіі PS5 адбудзецца на найбліжэйшай PlayStation Showcase, а сам выхад адбудзецца ў верасьні 2023 году.
▫️Новае аўдыяабсталяваньне — Sony зараз працуе над двума новымі бесправаднымі аўдыяпрыладамі для PlayStation 5. Чакаецца, што Project Nomad (бесправадныя навушнікі) і Project Voyager (бесправадная гарнітура) выйдуць да канца 23 фінансавага году (сакавік 2024).

🔹Q Lite — Новая партатыўная прылада з падтрымкай тэхналёгіі Remote Play (прылада падобна на DualSense з 8-цалёвым экранам) павінна выйсьці ў чацьвёртым квартале 2023 году.

🔹PlayStation 5 Pro — Канкрэтнай інфармацыі інсайдэр назваць ня можа, але ўпэўнены, што яна па-ранейшаму ў распрацоўцы й выпуск яе павінен адбыцца ў чацьвёртым квартале 2024-га.