وحاجة اخيرة

الطريق مش وردي زي ما الناس بتقولك و مش دايماً هتبقي مبسوط ومقبل علي الي بتعمله مهما كنت شغوف بالمجال

والتعلم والمذاكرة بشكل عام عملية مرهقة فهيجي اوقات ملكش مزاج او مكسل تذاكر
ففجأة تروح تغير الكورس او تغير الموضوع الي بتذاكرة
الحل والله في الالتزام
هتذاكر سواء ليك مزاج او ملكش تعبان مكسل لازم تذاكر بردك
وواليوم الي الحماسة فيه علي اخرها زود شوية
وهتبقي مبسوط والله

وبس كدا بالتوفيق ❤️

شوفوا الثريد اللطيف ده علي تويتر
عن ازاي تذاكر من الكتب ال technical

https://x.com/Nidal4real/status/1721229670983802960

ايه الي بعد الاساسيات؟

بعد ما خلصت الأساسيات دلوقت جيه الوقت الي المفروض هتخار فيه التراك بتاعك الي هتتخصص فيه،
الموضوع ده ممكن يكون بالنسبالك عادي وانت عارف انت عايز ايه بالظبط و ل ناس تانية بالنسبالهم كابوس ويفضل يفكر في الموضوع ده كتير اوي
وفي ناس منهم بتوصل معاها انها تنزل بوست تقول اختار تراك ايه (متعملش كدا) وفي ناس تانية مشكلتها انها حابه مجالات كتير ومحتارة بينهم

ف انا بس هحاول في الكام بوست الجايين اني اساعدك تاخد قرارك او الاهم اني افتح عينك علي مجالات كتير انت متعرفش عنها حاجة

طب الأهم ازاي هتختار التراك بتاعك؟

طب قبل ما نتكلم في الموضوع ده خليني اسألك سؤال اهم وهو انت ليه بدأت تتعلم برمجة اصلاً؟

اجابة السؤال ده هتختصر عليك طريق طويل جداً، بمعني ان اغلبنا اختار يتعلم برمجة علشان كان عندة فكرة في دماغه نفسة يعملها يعمل ويبسايت لعبة او حب يبقي هاكر مثلاً والكلام ده ، وفيه الي كان بيلعب جيمز والفضول هو الي جابه هنا زي حالاتي.

لو انت فعلاً من الناس دي ف مبروك عليك روح لأقرب تراك لحاجة دي بدون تردد مفيش احسن من انك تتخصص في المجال الي فيه شغفك
___________________
وفي نوعيه تانية من الناس ويمكن هم الاغلبية داخلين المجال بدون هدف في الي حابب المجال بشكل عام وفي الي تنسيقة جابه هنا وفيه الي شايف المجال ده دخله كويس كل ده جميل مفيش فيه مشكلة

نرجع لموضوعنا

هتختار التراك ازاي؟

قبل ما تختار التراك في كام حاجة هتعملها:

- أولهم انك تقرأ عن المجالات المختلفه وتتفرج علي فيديوهات من كل حته بشكل عام وفيديو من الناس المتخصصه في التراك ده
- هتشوف طبيعة شغل الناس دي ايه الخدمة الي بيقدموها في بيشتغلوا مع مين وهكذا
- هتشوف فرص الشغل في المجال ده في السوق الي انت محددة يعني في مصر مثلاً اوروباً الخليج ....
- هتشوف فرص الترقي الوظيفي في التراك ده بشكل عام و المرتبات

تمام في مجال فيهم عاجبك او حاسس انك هتكون مبسوط فيه هتعمل ايه بقي؟

هقولك، بص انت مش هتروح تجري تشتري اجمد كورس وتبدأ مفيش الكلام ده اتقل

الي هتعمله انك هتروح تجيب كراش كورس صغير وتمشي معاه وبعدين تفضل تخبط معاه شويه اسبوعين ولا حاجة
وفي نفس الوقت ده هتكون بتقرأ عن المجال ده والتحديات الي فيه وفيدوهات وغيرة

بعد الاسبوعين الي بتجرب فيهم خلاص عجبك خير وبركة مبروك عليك وروح اشتري الكورس الفاجر الي كنت هتشتريه

حسيت انك لسه متردد او في مجال تاني عاجبك روح جرب نفس الاسبوعين معاه
و انشلا يارب تجرب 500 تراك اوعي تزهق بالعكس ده هيفيدك جامد في المستقبل وجرب كتير كل ما تجرب كل ما هتبقي متمكن من المجال وكمان هتبقي مقتنع بيه

وطبعاً مش محتاج اقولك انك بتختار التراك الي انت حابه مش الي لقيت كورساته مغرقة اليوتيوب،
ومش التراكات الي كل بيروح يتعلمها وخلاص او علشان مرتباتها اعلي والكلام ده

التراك الي هتدخله تدخله علشان حابه مش علشان فلوس خالص، لو هدفك الوحيد الفلوس يبقي المجال ده مش ليك وفي مجالات تانيه اسهل ومرتباتها يمكن احسن

اما موضوع المرتبات ف مرتبات ال tech كلها في رينج متقارب و البلد والشركه نفسها بتفرق اكيد

حاجة تانية مش محتاج افكرك بيها
انك المفروض راجل مهندس برمجيات يبقي متتمسكش بتراك وتذاكر الي يخصه وخلاص
لا خليك مرن واتأسس كويس وخد بصة علي كل حاجة واتخصص في حاجة واحدة
انت مش عارف انت هتشتغل في ايه

انا مثلاَ تخصصي الاساسي فرونت بس اشتغلت موبايل وبشتغل backend و شويه ورايح شبكات و operating systems
ف مش اكيد انك هتفضل تشتغل بنفس التراك علشان كدا بقولك اتأسس كويس الاول

ومتبقاش صنايعي كود مجرد حافظ كلمتين بيرصهم كل يوم وخلاص

نرجع لموضوعنا

بص
اشهر المجالات في ال tech بتلاقيهم حوالين الكام حاجة دول:

Software Development
وده الجزء الخاص بالتطوير وده الاشهر واغلب الي شغالين في المجال بتاعنا شغالين في الجزء ده
و ده هتلاقي فيه وظائف او تراكات كتير تعرفها
زي ال
Web Development - Mobile App Development - Game Development - Desktop ... etc

Cybersecurity
وده مجال تاني خالص غير التطوير وفي الاغلب بيكون متعلق بحماية الانظمة الي تم بناءها بالفعل
وهتلاقي فيها وظائف مشهوره زي دول
Information Security Analyst - Penetration Tester - Network Security Engineer - SOC Engineer - malware Analyst ..etc

Data Science
وده كل شغلهم في التعامل مع الداتا بكل اشكالها وتحليلها و الاستفادة منها وعليهم طلب كبير ومرتابتهم كويسة
دول اشهر وظايف ليهم
Data Scientist - Data Analyst - Machine Learning Engineer

وفي مجالات كتير تانيه هذكرهم سريعاً بدون تفاصيل بحكم ان تعاملي معاهم مش كبير بس اعرف ان مجالاتهم جميلة جداُ

AI and Machine Learning
Cloud Computing

DevOps

Embedded Systems
اسمع ان المجال ده مرتابته جميلة جداً وممتع بس مشكلته ان الطلب عليه اقل شوية في المنطقة وكمان بيقتصر علي كليه هندسة بالاكتر وممكن حاسبات

Quality Assurance (QA) and Testing

Database Administration

System Administration

وفي كام وظيفة بردك مشهورين جداُ بس في الاغلب مش هتكتب كود

زي ال Project Management
و UI/UX Design
Technical Support
او تبقي HR او Technical Recruiter

الغرض من الكلام ده بس اني افتح نظرك علي المجالات الموجودة وان مش كل حاجة فرونت وباك وان في مجالات كتير اوي غيرهم

كل الي هتعمله انك هتدور علي المجالات دي براحتك وتشوف الانسب ليك

وحاجة اخيره الرود ماب بتاعت الاساسيات الي انا عاملها
مناسبة بس للبرمجة او بمعني تاني الجزء الاول من الليست دي الي هو ال Software Development
اما باقي المجالات فكل واحد فيهم ليه اساسيات مخلتفه مقدرش افيدك فيها

هتلاقي الرودماب مثبته

ولو انت حابب تبدأ في السكيورتي
ف ارشحلك قناة صديقنا ماهر بيساعد الي لسة بيبدأ في المجال ده
https://t.me/twenty_one21ma

وانا بردك لو لقيت اي حاجة تخص الموضوع ده هبعتها هنا ان شاء الله
ولو حد عندة اسأله ممكن يتفضل في الكومنتات او الجروب ونحاول نساعدة ان شاء الله

بالتوفيق ❤️

متخيلتش ان الاغلبية ممكن تكون مهتمه 😂
عمتاَ كويس

بسم الله

انهادة هقولك ازاي تبدأ في تراك الفرونت اند وكل الي هتحتاج تذاكرة لحد ما تبقي جاهز للشغل

مبداياً هفترض انك خلصت الاساسيات وخلاص قررت تختار انك تبقي FrontEnd developer
ف انا عايزك تمشي علي الخطوات الي هقولك عليها بالترتيب

0️⃣ Basic Understanding of the Web:
- How the web works (client-server model)
- Understanding URLs, HTTP, and HTTPS
- Basic knowledge of web browsers and how they render pages
- Difference Between Front-End and Back-End

ف الجزء ده هحتاج منك تقرأ عن المواضيع دي كويس قبل ما تبدأ علشان يبقي عندك فهم اوسع انت داخل علي ايه ووظيفتك ايه واهم المفاهيم الي هتسمعها كتير في المجال وهاكذا
الجزء مش هيطول هو كام فيديو علي كام مقاله وخلاص كفاية لدلوقت
___________________________________________________________

تمام لحد هنا كان ده قبل حاجات يفضل تعرفها قبل ما تبدأ
الخطوة الجاية هي انك هتذاكر المواضيع الجاية دي كويس وفي وهقولك امتي تعمل مشاريع

1️⃣ HTML
- HTML structure and syntax
- Common HTML tags and attributes
- Semantic HTML
🔹هتعمل بعدها مشروع صغير تحط فيه كل الي اتعلمته

2️⃣ CSS
- CSS syntax and selectors
- Flexbox
- Grid
- How to make Responsive design
- CSS Animations

🔹هنا انت هتطبق كتير جدا علشان تبقي متمكن من الي اتعلتمه
معل كل مفهوم هتتعلمه هتحتاج تعمل تاسك صغيره فيها تطبيق علي الحاجة الجديدة الي اتعلمتها
وبعد ما تخلص css هتعفضل تعمل مشاريع بأفكار مختلفة ب HTML و CSS بس لحد ما تبقي متمكن منهم
ومتكسلش الجزء ده ضروري

3️⃣ JavaScript
Basic syntax
DOM
BOM
AJAX and Fetch API
◽️ممكن تأخر دول شوية لانهم مواضيع متقدمة
ES6+ features
Asynchronous JavaScript (Promises, async/await)

🔷 طبعاَ مش هوصيك علي المشاريع, كتر اوي اوي في الجزء ده وكل مرة فكرة مختلفه عن الي قبلها
ولو حاسس بصعوبة في تطبيق الافكار شوف الويبسايت الجميل ده
https://javascript30.com/
واعمل المشاريع الي فيه كلها هتبقي متمكن من ال JS

لحد هنا كانت الاساسيات والي كل الناس هتقولهولك
المشكله مش في الاجزاء الي فاتت دي
المشكلة ان اغلب الناس بيعطل وبيتوه بعد الجزء الي فات ده ومفيش حد بيتكلم هتعمل ايه في الفتره دي

فعايزك تركز معايا في كل الي جاي
معظم الي هقوله من دلوقت مش هيفرق فيه الترتيب بشكل كبير بس يفضل وفي اجزاء كتير تفضيل شخصي

4️⃣ Git & GitHub
علشان ترفع نسخ من الكود وتتبع التغييرات وتشتغل ولو في مشكلة ترجع لأخر نسخة
وكمان علشان تشتغل مع تيم علي نفس البروجيكت وحاجات كتير تانية ملهاش اخر

5️⃣ CSS Preprocessors
ده اشبه بلغة برمجة الفكرة انك هتخلي CSS اقوي وتقدر تعمل بيها حاجات كتير جداً عن طريق انها بتضيف logic لل CSS
بمعني انها بتضيف شوية حاجات موجودة في لغات البرمجة فيها زي (variables, nesting, inheritance, mixins, functions, and mathematical operations)
وبرشحلك تتعلم SASS لأنها الاشهر دلوقت
6️⃣ CSS framework
تمام دلوقت انت خلصت الاساسيات وبدأت تعمل مشاريع ومواقع حقيقة وكدا
بس هتلاقي وانت شغال ان في اجزاء كتير بتتكرر بشكل كبير وحاجات كتير بتلاقيها في كل ويب سايت
ف ل توفير الوقت
بتروح تستخدم حاجات جاهزة بتسرع شغلك وموجود فيها الاجزاء دي فتوفر وقت
برشحلك Bootstrap لأنها مشهورة اوي في الشركات العربيه بس مش المستقبل ليها بصراحة وكدا كدا هتعلم غيرها لما تشتغل ب Framework
والاشهر دلوقت حاجات تانية زي Tailwind - MaterialUI وحاجات كتير ملهاش اخر ف انت ابق اقعد جرب كدا الحاجات دي مش بتاخد وقت

⏺ ممكن لو حابب ابق بص ع السريع jQuery
هي معادتش مهمه بس في شركات كتير مصرية لسة بتستخدمها وبالاخص لو البروجيكت قديم
مش لدرجة كورس يعني بس اخطف بصه عليها ع السريع مش هتضيع فرصه علشان نص ساعة

لحد هنا انت ممكن تلاقي شغل عادي
انا نفسي اول شغل ليا كان بعد ال فات ده بس

بس متضيعش وقت كتير هنا لان متطلبات السوق اتغيرت وبقت المنافسة شديدة فركز علي انك تتعلم
ومتعملش غلطتي وتفضل تضيع وقت في التقديم وخلاص