អត្ថបទស្រាវជ្រាវស្ដីពីការវាយតម្លៃការត្រៀមខ្លួនសម្រាប់នវានុវត្តន៍ក្នុងសេដ្ឋកិច្ចប្រទេសសមាជិក APO!
អង្គការផលិតភាពអាស៊ី (APO) បានធ្វើការស្រាវជ្រាវដើម្បីពិនិត្យមើលលើសមត្ថភាពការគ្រប់គ្រងនវានុវត្តន៍ នៅក្នុងសេដ្ឋកិច្ចប្រទេសសមាជិកក្នុងនោះប្រទេសដែលត្រូវបានជ្រើសរើសរួមមាន ប្រទេសកម្ពុជា សាធារណៈរដ្ឋចិន ឥណ្ឌា ឥណ្ឌូនេស៊ី អ៊ីរ៉ង់ ប៉ាគីស្ថាន ហ្វីលីពីន សិង្ហបុរី ថៃ និងវៀតណាម។ ការស្រាវជ្រាវនេះបានវិភាគលើស្ថានភាព និងបញ្ហាប្រឈមរបស់ប្រទេសនីមួយៗ។ យោងតាមការស្រាវជ្រាវនេះ បានណែនាំនូវគំរូ និងការអនុវត្តល្អបំផុតសម្រាប់ការអនុវត្ត ពង្រីក កែលម្អ និងវាយតម្លៃប្រព័ន្ធ ទៅលើការគ្រប់គ្រងនវានុវត្តន៍នៅកម្រិតស្ថាប័នដើម្បីជាគោលដៅយុទ្ធសាស្រ្តក្នុងការលើកកម្ពស់ប្រព័ន្ធអេកូឡូស៊ីនវានុវត្តន៍ដ៏រឹងមាំ។
ឯកឧត្តមបណ្ឌិត ហ៊ុល សៀងហេង អគ្គនាយកនៃអគ្គនាយកដ្ឋានវិទ្យាសាស្ត្រ បច្ចេកវិទ្យា និងនវានុវត្តន៍ នៃក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ដែលតំណាងឱ្យព្រះរាជាណាចក្រកម្ពុជា ក្នុងការចូលរួមចំណែកតាក់តែងនូវឯកសារនេះឡើង។
បើលោកអ្នកមានចំណាប់អារម្មរណ៍ សូមទាញយករបាយការណ៍នេះ តាមរយៈតំណរដែលមានភ្ជាប់ជូនដូចខាងក្រោម: INNOVATION READINESS ASSESSMENT
STI News: JOIN

សហគ្រិនបច្ចេកវិទ្យាខ្មែររបស់យើងមួយរូប គឺលោក ឡី កំថូង ដែលជាស្ថាបនិកក្រុមហ៊ុន CheckinMe បានតំណាងឱ្យប្រទេសកម្ពុជា ទៅប្រគួតប្រជែងនៅក្នុងកម្មវិធី The 2022 China-ASEAN Innovation and Entrepreneurship Competition ហើយបាននាំជ័យលាភីលេខ៣ ជូនប្រទេសកម្ពុជាថែមទៀតផង។
កម្មវិធី The 2022 China-Asean Innovation and Entrepreneurship Competition គឺជាកម្មវិធីប្រគួតប្រជែងភាពច្នៃប្រឌិតបច្ចេកវិទ្យា និងសហគ្រិនភាពថ្នាក់អន្ដជាតិ របស់ប្រទេសចិន និងអាស៊ាន ដែលមានអាជីវកម្មជាង៨០ មកពីបណ្ដារប្រទេសផ្សេងៗជាច្រើន។ ហើយជាលទ្ធផលចុងក្រោយ CheckinMe ទទួលបានជ័យលាភីលេខ៣ ដែលបានផ្ដល់កិត្តិយសយ៉ាងខ្លាំងតំណាងឱ្យប្រជាជនកម្ពុជាទាំងមូល។
អគ្គនាយកដ្ឋានវិទ្យាសាស្ត្រ បច្ចេកវិទ្យា និងនវានុវត្តន៍ នៃក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍គឺជាអ្នកសម្របសម្រួល និងបានជ្រើសរើសធុរកិច្ចថ្មីរបស់ប្រទេសកម្ពុជាចំនួន ៤ ក្នុងនោះក៏មាន CheckinMeផងដែរដើម្បីចូលរួមក្នុងការប្រកួតប្រជែងនវានុវត្តន៍ និងសហគ្រិនភាព ចិន-អាស៊ាន ឆ្នាំ២០២២។
STI News: 👉 JOIN

ពិធីចុះហត្ថលេខាលើអនុស្សណៈនៃការយោគយល់ (MoU) រវាងអគ្គនាយកដ្ឋានវិទ្យាសាស្ត្រ បច្ចេកវិទ្យា និងនវានុវត្តន៍ នៃក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍(ឧ.វ.ប.ន.) ជាមួយក្រុមហ៊ុនបច្ចេកវិទ្យាចំនួន ០៤ដែលរួមមាន Publox Co., Ltd, the Mobile C&C (Cambodia) Co., Ltd, Korea Venture Business Association, និង KyungRim Tech Co., Ltd ត្រូវបានប្រារព្ធឡើងក្រោមអធិបតីភាពដ៏ខ្ពង់ខ្ពស់ ឯកឧត្តមកិត្តិសេដ្ឋាបណ្ឌិត ចមប្រសិទ្ធ ទេសរដ្ឋមន្រ្តី រដ្ឋមន្រ្តីក្រសួង ឧ.វ.ប.ន. នៅថ្ងៃទី ១៦ ខែមករា ឆ្នាំ២០២៣ នៅភ្នំពេញ។ ពិធីចុះហត្ថលេខាលើអនុស្សណៈនៃការយោគយល់នេះត្រូវបានរៀបចំឡើងក្នុងគោលបំណងផ្សារភ្ជាប់ទំនាក់ទំនងរវាងស្ថាប័នរដ្ឋ និងវិស័យឯកជន ដើម្បីពង្រឹងកិច្ចសហប្រតិបត្តិការ និងកិច្ចសហការក្នុងវិស័យវិទ្យាសាស្ត្រ បច្ចេកវិទ្យា និងនវានុវត្តន៍ ។
STI News: 👉 JOIN

សមាគមអាស៊ាន និងទីភ្នាក់ងារជំនួយអាមេរិក USAID ដោយសហការជាមួយក្រុមហ៊ុន Underwriters Laboratories បានរៀបចំការប្រឡងប្រចាំឆ្នាំ ផ្នែកវិទ្យាសាស្រ្ត លើកទី ៩ របស់ខ្លួន ដែលការប្រឡងនេះមានឈ្មោះថា «រង្វាន់វិទ្យាសាស្រ្តពីមន្ទីរពិសោធន៍ អាស៊ាន អាមេរិក សម្រាប់ស្រ្តី » ។
ប្រធានបទសម្រាប់រង្វាន់ឆ្នាំ ២០២៣ គឺ “Electrification ដែលផ្ដោតលើដំណើរការនៃការបំប្លែងឬការជំនួសបច្ចេកវិទ្យាដែលប្រើឥន្ធនៈហ្វូស៊ីល (ធ្យូងថ្ម ប្រេង និងឧស្ម័នធម្មជាតិ) ដោយបច្ចេកវិទ្យាដែលប្រើអគ្គិសនីដែលជាប្រភពថាមពលកកើតឡើងវិញ។” ប្រធានបទនៅឆ្នាំនេះ នឹងផ្ដល់ឱកាសអោយអ្នកស្រាវជ្រាវស្ត្រីដែលបានបង្កើតម៉ាស៊ីន ឬប្រព័ន្ធប្រកបដោយនវានុវត្តន៍ដែលប្រើដោយថាមពលអគ្គិសនីសម្រាប់សហគមន៍នានារបស់អាស៊ាន។
អ្នកឈ្នះក្នុងផ្នែកអ្នកវិទ្យាសាស្រ្តពាក់កណ្តាលអាជីព និងជាន់ខ្ពស់ នឹងទទួលបានប្រាក់ ១២ ៥០០ ដុល្លាក្នុងម្នាក់ៗ ហើយរង្វាន់ ៥ ០០០ ដុល្លានឹងត្រូវផ្តល់ឲ្យអ្នកឈ្នះបន្ទាប់។ សូមដាក់ពាក្យចូលរួមចាប់ពីពេលនេះរហូតដល់ថ្ងៃទី ១៤ ខែមេសា ឆ្នាំ ២០២3 ដោយចូលទៅកាន់ https://scienceprize4women.asean.org
STI News: 👉 JOIN

ការប្រកួតប្រជែង «អ្នកវិទ្យាសាស្ត្រឆ្នើមកម្ពុជាឆ្នាំ២០២៣» ចាប់ផ្ដើមបើកទទួលពាក្យហើយ!
អគ្គនាយកដ្ឋានវិទ្យាសាស្ត្រ បច្ចេកវិទ្យា និងនវានុវត្តន៍ នៃក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ កំពុងបើកទទួលពាក្យសម្រាប់ការប្រកួតប្រជែង «អ្នកវិទ្យាសាស្ត្រឆ្នើមកម្ពុជាឆ្នាំ២០២៣» នៅក្នុង ទិវាជាតិលើកទី១ «វិទ្យាសាស្ត្រ បច្ចេកវិទ្យា និងនវានុវត្តន៍ (វ.ប.ន.)» ដែលជាព្រឹត្តិការណ៍ដ៏ធំអស្ចារ្យមួយ មិនធ្លាប់មាននៅក្នុងព្រះរាជាណាចក្រកម្ពុជា ហើយគំនិតផ្តួចផ្តើមនៃការប្រកួតប្រជែងនេះធ្វើឡើងទាន់ពេលវេលាសម្រាប់ការលើកកម្ពស់ វិស័យវ.ប.ន.។
ប្រសិនបើអ្នកជាអ្នកវិទ្យាសាស្ត្រ និងអ្នកស្រាវជ្រាវពាក់ព័ន្ធផ្សេងទៀតនៅក្នុងប្រព័ន្ធអេកូឡូស៊ីដែលមានចំណាប់អារម្មណ៍អាចដាក់ពាក្យដើម្បីចូលរួមក្នុងការប្រកួតប្រជែងនេះ ហើយការចាប់ផ្ដើមបើកទទួលពាក្យចាប់ពីថ្ងៃទី១៤ ខែកុម្ភៈ ដល់ថ្ងៃទី១៣ ខែមីនា ឆ្នាំ ២០២៣។ ជ័យលាភីលេខ១ នឹងទទួលបានប្រាក់រង្វាន់ ២៤,០០០,០០០ រៀល លេខ២ ទទួលបាន ១៨,០០០,០០០ រៀល និងលេខ៣ ទទួលបាន ១២,០០០,០០០ រៀល ។ លោកលោកស្រីអាចស្វែងរកព័ត៌មានបន្ថែម និងគោលការណ៍ណែនាំ ឬដាក់ពាក្យតាមរយៈ ខិត្តប័ណ្ណ និងQR Code ដូចដែលមាននៅក្នុងរូបភាពខាងលើ។
STI News: 👉 JOIN

ក្នុងនាមលេខាធិការដ្ឋាននៃក្រុមប្រឹក្សាជាតិវិទ្យាសាស្ត្រ បចេ្ចកវិទ្យា និងនវានុវត្តន៍ និងអគ្គនាយកដ្ឋាន វិទ្យាសាស្ត្រ បច្ចេកវិទ្យា និងនវានុវត្តន៍ (វ.ប.ន.) នៃក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានរៀបចំចងក្រងឡើងនូវ ឯកសារ “របៀបវារៈស្រាវជ្រាវជាតិ” ដែលជាឯកសារណែនាំ ដ៏សំខាន់សម្រាប់ការលើកកម្ពស់ការស្រាវជ្រាវ និងអភិវឌ្ឍន៍ សំដៅរួមចំណែក ដល់ការអនុវត្តក្របខ័ណ្ឌគោលនយោបាយពាក់ព័ន្ធ រួមទាំងផែនទីបង្ហាញផ្លូវវិទ្យាសាស្ត្រ បច្ចេកវិទ្យា និងនវានុវត្តន៍ កម្ពុជា ២០៣០ ដែលជាការបន្ថែមពីលើការសម្រេចបាននូវចក្ខុវិស័យឆ្នាំ២០៣០ និងឆ្នាំ២០៥០។ បើលោកអ្នកមានចំណាប់អារម្មរណ៍ សូមទាញយករបាយការណ៍នេះទាំងភាសាខ្មែរ និង អង់គ្លេស តាមរយៈតំណភ្ជាប់នេះ https://misti.gov.kh/documents/index?dctype=MQ==
STI News: 👉 JOIN

ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ (ឧ.វ.ប.ន.) បានសហការជាមួយគណៈកម្មាធិការសេដ្ឋកិច្ច និងសង្គមនៃអង្គការសហប្រជាជាតិ ប្រចាំអាស៊ីប៉ាស៊ីហ្វិក(UNESCAP) បានរៀបចំចងក្រងឡើងនូវ ឯកសារ “ប្រព័ន្ធអេកូឡូស៊ីការស្រាវជ្រាវកម្ពុជា” ដែលជាឯកសារណែនាំ ដ៏សំខាន់ដើម្បីពង្រឹងសមត្ថភាពនិងគុណភាពស្រាវជ្រាវ និងកំណត់ទិសដៅយុទ្ធសាស្ត្រសម្រាប់សកម្មភាពស្រាវជ្រាវ។
ឯកសារ “ប្រព័ន្ធអេកូឡូស៊ីការស្រាវជ្រាវកម្ពុជា”នេះក៏ផ្ដល់នូវភស្ដុតាង និងក្របខណ្ឌសម្រាប់ការបង្កើតរបៀបវារៈស្រាវជ្រាវជាតិដោយចង្អុលបង្ហាញនូវប្រព័ន្ធអេកូឡូស៊ីនៃការស្រាវជ្រាវបច្ចុប្បន្នរបស់កម្ពុជា និងអនុសាសន៍លើការពង្រឹងរបៀបវារៈស្រាវជ្រាវជាតិនេះ។
បើលោកអ្នកមានចំណាប់អារម្មរណ៍ សូមទាញយករបាយការណ៍នេះទាំងភាសាខ្មែរ និង អង់គ្លេស តាមរយៈតំណភ្ជាប់នេះ៖
• ខ្មែរ: https://misti.gov.kh/public/file/202302151676477018.pdf
• អង់គ្លេស: https://misti.gov.kh/public/file/202302151676477042.pdf
STI News: 👉 JOIN