اولا الرياضيات صراحة انا وياها موش اصحاب بكل ابلتنا ف المدرسة كانت كويسة جدا تبارك الله علاها كراستها و شيتاتها مقريتش حاجة غيرهم ف الامتحان و الحمدلله درجتي كانت 53/65 درجة صراحة مكنتش نشوف فيها حتى ف الحلم بحكم العلاقة المشحونة بيني و بين الرياضيات قريتها اونلاين من عند سامي الغريب , حسين العالم و شيتات بوقرين حليتهم كلهم ف الفترة يلي كانت قبل امتحانات الفترة الثالثة الرياضيات متع ثالثة حلوةةة هلبا خصوصا باب المصفوفات لو فهمتوه كويس حيبدا لعبةةة تعلمو تحلو بالالة حتى لو ابلاتكم مانعينها حتستفيدو هلبا انا الالة قريتها من كورس مجاني لاستاد سامي الغريب ف اكاديميا و نصيحة لاي حد يبي يشترك فوتو عليكم كورسات الحضوري و اشتركو عند سامي الغريب ف منصة اكاديميا هلباااا يشكرو فيه❤️.

القنوات :
أ.سامي الغريب
أ.حسين العالم
أ.علي ابوقرين

ثاني مادة الكيمياء متقسمة لجزئين غير عضوية و عضوية بالنسبة للجزء الاول شوي فهم و الباقي انت و حفظك الباب الثالث رزين معبي جداول حاولو تثبتوهم من بداية العام اما بالنسبة لجزئية العضوية حضرت عند انس بوزعكوك و علا و زكريا الهمالي صراحة استاد انس و زكريا ابدعو فيهم و الشيتات صراحة مدورتش قريت هكي كتاب حصة بعدين اسئلته بعدين تدريبات و على عكس كل المواد اسئلة الباب و التدريبات اهم من الشرح و فيهم معلومات مش مدكورة ف شرح الكتاب و اللعب ف الاسئلة يكون عليهم و تو زي كلعام بيكدبو عليكم كتاب نشاط ما نشاط متدوروشي و لو ابلة المدرسة متبيشي لوحوه دوته زايدة و بالطريقة هدي الحمدلله رغم صعوبة الاسئلة جبت 51/56 ❤️.

القنوات :
أ.زكريا الهمالي

نحكو ع الفيزياء طبعا مقسومة شقين الفيزياء و الميكانيكا -لو بتقعدو معاي ف القناة احفظوهم هكي معمريش قلت كهرو و لا دري و لا بصر شنسمه- المهم قريتها عند ياسين الزويك و عبدالقدوس و عبدالمهيمن كشون صراحة كلهم كويسين مادة حلوة تبي واحد فاهم مش حافظ حفظ البيبان الاولى صعبة شوي و طويلة بس مع كثرة القراية و المراجعة حيسهلن واجد بعدين المغناطيسية سهلةة و الدرية اسهل و الشقين هادم مغناطيسية و درية حتقروهم ف السيم الثاني متشوفوش اسئلتنا كانت تعجيزية المادة سمحة رغم ان درجتي فيها هي يلي نزلت المعدل هلبا لكن حقيقة مادة حلوة شوهتلها الوزارة سمعتها قبل الفترة الثالثة قريت مكثف عند اسامة التونسي ممتاز جدا جدا و كتاباته من سلسلة المهندس ممتازات عدا شوية اخطاء فيهم بس طبعا جربت الاتنين الكابتن و المهندس ف الفيزياء المهندس افضل و بالنسبة للميكانيكا متدوروش حد اقرو عند استاد عبدالرزاق هامان و اشرو كتاباته سلسلة المهندس و بادن الله حتحصلو درجة ترضيكم❤️.

القنوات :
أ.ياسين الزويك
أ.عبد المهيمن كشون
أ.عبدالقدوس
أ.عبدالرزاق هامان

و توا جي دور مادتي المفضلة و حبيبتي الأحياء المادة هدي متبيش لا فهم لا حفظ تبي حد يقراها بحب يعني فاهم يلي يقرا فيه ابلتنا كانت كويسة جدا و زدت قريتها عند استاد سعد العكاري و شيتات اسماء الفرجاني و الباب السادس يلي مداير فوبيا و واخد اكتر من حجمه صراحة الباب السادس قريته من بثوث مجانية لاستاد عبد الرحمن حتاش و في بداية الباب الرابع عندكم انقسام ميوزي و ميتوزي لو فهمتهم خلاص شطبت نص الباب الرابع و السادس عموما المادة هدي لعبتي مرات نفكر نشرحهالكم لكن شرح استاد سعد حيغنيكم عني و هكي حصلت على درجة 55/65 ف المادة❤️.

القنوات :
أ.سعد العكاري.

الانجليزي اسهلللللل مادة ف سنة ثالثة و اكثر مادة شارحينها خليكم ستيب باي ستيب مع استاد مصطفى حيدر و قبل الفترة الثالثة راجعو مع علي البكوش و ك شيتات صراحة منفضلش و مقريتش ف شيتات غير شيتات البكوش مراجعة قبل الامتحان و صراحة شيتاته خياااااااال❤️.

قنوات :
أ.مصطفى حيدر
أ.البكوش

بالنسبة للعربي مجملا اسهل بهلبا من اولى و ثانية بالنسبة للغوية زي كلعام نحو يحكي ع الجملة الاسمية و الفعلية و صرف يحكي ع المجرد و المزيد و مصدر الكلمات شوي فهم و الباقي حفظ الاملاء درسين خفاف زراف و بالنسبة للأدبية بلاغة تبي فهم شوي بس غالبا ميطلعوش من امثلة الكتاب و بعدين دروس نفخخخ تبي حفظ ادب اندلسي و عباسي و شويد نصوص حفظ كلشي حتلقوه عند الاستاد بدر القاضي شرحه خيال و كتابه المهندس خيال برضو و درت مكثف مجاني عند دكتور درار قبل الفترة الثالثة حنحوللكم قنواتهم.

القنوات :
أ.درار شرع الله
أ.بدر الدين
أ.براءة

تقنية المعلومات مادة نفاخة و باردة ابلتنا كانت كويسة جدا و صعبة شوي بس كان ف صالحنا المنهج حافظينه عن ظهر قلب عموما سهلة البيبان الثلاثة الاولى حفظ و بسيطة و يجيبوا منها هلبا ف الفترة الثالثة اما بالنسبة للبابين الرابع و السادس قريتهم عند دريبيكة و الديهوم دريبيكة شرحه ممتاز جدا

القنوات:
أ.عبدالرحيم ديهوم
أ.دريبيكة

و توا نجو للمادة النزيكة الاحصاء مادة سهلة جدا و بسيطة اقروها من عند استاد ياسين القماطي و حسين العالم و حلو اسئلة سنوات و حتفلفلوها بادن الله❤️.

القنوات :
أ.ياسين القماطي

ثَلاث تَجارب يَكفي اليُوم ؟

كَان مَا تِتفاعلوش مَنيش زَايدتكم 🙂.

يَ ربّي تَفاعلو عَ التّجارب مِش هَني 🙂!

⁣ـ

أيّ شَي ؟

⁣💌 وصلتك رسالة جديدة
⏱ وقت الرسالة: 2026/09/13 - 04:03:08 PM
----
نصيحه يلي عنده كيمياء بكرى راكو تحلو من سويسي
----

- تبرع لإستمرار عمل بوت صارحني 🎁

كان هما عابيين عليه خلي يحلو منه و يستاهل فوق منها !

⁣💌 وصلتك رسالة جديدة
⏱ وقت الرسالة: 2026/09/13 - 04:50:27 PM
----
نبي نبدا بمواد بحكم اعتصام ومش معروف وضع قرايا ف بنبدا بروحي، هل عادي نعرف احسن اساتذه ويتوفر شرح لهم ع تيلي؟
----

- تبرع لإستمرار عمل بوت صارحني 🎁

#تجربة_سابقة 🌷.
اضغطي عَ الهاشتاق هذا و حَ يطلعلك الأستاذتة ل قريت معاهم ني و بعض الطلبة .

حاليا يتوفر 4 تجارب و حَ نزيدكم .