السلام عليكم شباب ... إن شاء الله تكونون بخير

هذا التحديث الأخير لموقف الطلاب الدازين الاستمارة والدافعين.

اليوم اخر يوم لارسال الاستمارات لذلك الما داز خل يرسل هسه لطفا ... بعدين بالليل ادزلكم ملفاتكم للتأكيد وبعدها ادزها للخياطة تجنبا لأي خطأ

الما يرسل استمارته اليوم راح اعتبره ما راح يخيط ويانا لأن الوقت الأنطيته كلش هواي تقريبا صارللكم شهر فاليوم اخر يوم وغير قابل للتمديد.

وإذا اكو أي خطأ مثل أنت دافع وما مخليك دافع أو داز الاستمارة ومخليك ما داز أو العكس ... بلغني ع الخاص

يرجى تبليغ الطالبات ادناه انه قد شملوا بالقرار

ايه سعيد عبد الله
زينب حبيب زيبق
نبأ مؤيد عبد الواحد
نرجس نوري عباس

السلام عليكم ... العنده أطفال يريد يسويلهم زي التخرج بس خل يدزلي اسماؤهم حتى أثبّت حجزهم يم الخياطة
@HamzahAyoob
واليوم فقط

بعد 15 محرم يلا يوصل القماش

بالنسبة لليشتغلون زي التخرج أبحدهم فالخياطة تكول عادي أنا أعزللهم قماش ويودونه للخياط مالتهم يشتغله

السلام عليكم ...

كمّلنا ترتيب ملفاتكم وراجعناها 3 مرات تجنبًا لأي خطأ.

باجر إن شاء الله راح ندزلكم ملفاتكم كلها مجمّعة بملف واحد ومرتبة أبجديًا (ملفات البنات على كروب البنات وملفات الولد على كروب الولد) وتكون مؤقتة لمدة 24 ساعة ونحذفها لأغراض الخصوصية.

نريد منكم باجر:
1- تتأكدون اسمكم موجود، في حال ما موجود تبلغون الممثلين فورًا باجر قبل لا ندزها للخياطة.
2- تتأكدون من المعلومات المخلينها كلها صحيحة وما بيها نقص.

الهدف من هذا حتى نتجنب أي خطأ من طرفنا وننام وأحنا مرتاحين ماكو أغلاط راح تصير تالي بإذن اللّٰه.

لذلك ياريت تهتمون بهذا الموضوع وتاخذونه بجدية وتبلغون أصدقائكم أو تتأكدون من وجودهم بالملف إذا ماسحين التليجرام، لأن الملفات راح تندز للخياطة وبعد ما بيها مجال غير باجر.

السلام عليكم وعظّم الله لكم الأجر باستشهاد سبط رسول اللّٰه وريحانته سيد شباب أهل الجنة الإمام الحُسَين (عليهِ السلام).

شباب (الولد) راح أرسل هسه ملفاتكم كلها مجمعة بملف واحد على كروب الولد، إلكم باجر كله تتأكدون من الآتي:

1- اسمكم موجود
(خاف ناسي أحد سهوًا ... الترتيب أبجدي)

2- معلومات ملفكم صحيحة
(خاف دازيلي نسختين وماخذ القديمة سهوًا)

وكذلك تأكدوا من وجود أصدقائكم

عكب باجر إذا دزيته للخياطة بعد هاهيه يقفل بعد حسب الموجود بالملف راح تشتغل عليه لذلك جاي اسوي هيج تجنبًا للأخطاء + حتى ما ننسى واحد سهوًا
فياريت تتعاونون ويانا ما ياخذ من وقتك دقيقة بس شوف اسمك ومعلوماتك (ومرتب الاسماء أبجديًا حتى ما اتعبكم)

السلام عليكم شباب ...

هاي المدة كلها وأنا أبحث عن مصوّر ما بيه سلبيات وما لگيت صراحةً، لازم كل واحد عنده شغلة تطلع ما تعجبني ... بالنهاية أشوف أن نختار برودكشن (المؤتمن) لأنه أقل واحد عنده سلبيات
والرأي بالنهاية رأيكم

هذا حسابه وتصفحوه
https://www.instagram.com/almutamn_waleed?igsh=MWlsNDJwejZxeHFiMA==

بالإضافة إلى عرض تنظيم الحفل من شركة لوكيشن بـ (15) ألف فقط، يعني إذا التصوير (35) يصير المبلغ الاجمالي للحفل (50) وأتوقع مناسب جدًا للكل لأن بالمقابل راح تعيشون أجمل يوم بحياتكم فنخلّيه يستحق الذكرىٰ.

شنو راح يقدّملكم لوكيشن:

1- بوستر مشاهير باسم الدُفعة وشعار الجامعة وسنة التخرج للتصوير + كاربت احمر + علم العراق

2- أقواس دخولية بشكل احترافي يتم تزيينها بالورد عددها خمسة وممرها مفروشة بالكاربت الأحمر الملكي.

3 - بوابة دخول يتم تصميمها بشكل مخصص لتكون أشبه بالنصب التذكاري لخريجين الدفعة.

4- أربع ديكورات أركان تصوير فردية احترافية وغير مسبوقة يتم تصميمها بشكل مُخصص للحفل:

• الركن الأول : يكون على شكل كتاب مفتوح مُصمم بطريقة احترافية ولونه يشبه الكُتب القديمة يحتوي كتابات تخص اسم الدفعة وسنة التخرج وآيات قرانية بالإضافة إلى طاولتين بشكل عمودي على جوانب الركن تحتوي رسومات تخص قُبعة التخرج وشهادة التخرج بالإضافات إلى عدد من الشهادات يتم استخدامها للتصوير وقنفة رئاسية للتصوير بشكل الجلوس

• الركن الثاني : يكون على شكل خلفية تحتوي هاشتاگ التخرج من الأعلى ويتم تزيينها بأوراق الأشجار القديمة ويكون الجانبين على شكل أضلع كبيرة بيضاء وفخمة تحتوي افخم أنواع الورد بالإضافة إلى طاولتين عموديتين في الجوانب تحتوي سنادين ورد فاخر

• الركن الثالث : ضلع كبير أسود اللون يحتوي كتابات تخص الدفعة والجامعة ويتم تزيين الجانب بالبالون الفضي والذهبي

الركن الرابع: حسب رغبة الدفعة يتم تصميمه (يحدد لاحقًا)

5- لوكر ابيض يتم تزيينه يُستخدم لتعليق الأرواب والوشاحات

6- مرايا عدد 2 بتصميم مختلف للتصوير الفردي، المرآة الأولى تكون كبيرة على شكل جريدة قديمة تحتوي كتابات تخص التخرج تُستخدم للتصوير (والمرآة الثانية تحدد حسب رغبة الدفعة تحدّد لاحقًا)

7- جدار مشاهير خاص بأسم الدفعة كذلك سيتم تصميمه بشكل رسمي يليق بالحفل ومفروش بالكاربت الأحمر وعلى جانبيه العلم العراقي

8- طاولة كبيرة للبوفيه تحتوي على كيكة كبيرة قياس ٦٠*٤٠ سنتمتر مصممة بشكل مثالي تحتوي إسم الدُفعة.

9- ١٥٠ كرسي عاج ملكي للعوائل

10- لافتة ترحيبة مُصممة بشكل احترافي تحتوي على ورد فاخر تكون بجوار الأقواس للترحيب بالضيوف الكرام، مع لافتات ترحيبية أخرى موزعة في موقع الحفل.

11- كادر متخصص بتنظيم الفعاليات يشرف على سير الحفل بشكل انسيابي ومميز

12- ⁠نظام صوت متكامل للحفل مع مهندس صوت متخصص

يتم إكمال التصاميم في شهر أكتوبر للإطلاع عليها من قِبل الطلبة ومن بعدها يبدأ التنفيذ استعدادًا للحفل الكبير.

نزل استفتاء بالكروب يخص المصوّر والتنظيم دخلوا صوّتوا عليه (بعدما تچيكون حسابهم وتسألون عنهم وتشوفونهم):
https://t.me/c/1582246716/56126

بناءً على تصويتكم تم التثبيت على المؤتمن ولوكيشن

دفعت عربون من عندي حتى يتثبت الحجز، فبعد ما يصير نغيّر لأن العربون ما يرجع.

+ إذا عدكم أي سؤال للمصوّر أو لوكيشن كتبوه وأنا اسألهم وأردلكم خبر

وإن شاءَ اللّٰه اللّٰه يكتب البيه الخير ويكون الحفل صدك يستحق الذكرىٰ

بالنسبة لزي التخرج دزيته للخياطة من البارحة بعد ماكو تعديل أو إضافة، اللي ما دز لهسه يروح يحجز فردي من أي خيّاط.

حسب كلام المصوّر گال ما تلحگون تصورون بأكثر من مكانين لأن راح تطولون هواي بالملعب علمود الفرديات على تجهيزات لوكيشن، فيعني بـ 3 ونص يجوز يلا ندخل لمجلس المحافظة، بـ 5 تبدي تظلّم الدنيا.

فأحنا شراح نسوي، راح نحجز 3 أماكن وإذا لحگنا ع الثالث نصوّر ما لحگنا ما خسرانين شي، وحتى نستغل الوقت بصورة صحيحة شنو رأيكم نختار هاي الأماكن:

1- ملعب الميناء بالمعقل.
2- مجلس المحافظة بالمعقل.

(حتى قريبة عليها ونستغل فترة النقل بالتصوير)

3- شط العرب.

في حال لحگنا فنروح لشط العرب
في حال ما لحگنا فما نروح عادي

وفي حال ظلّمت الدنيا وبعدكم تردون ترحون لشط العرب فميخالف نروح (لا تنسون بالشتاء بسرعة تظلّم الدنيا).

فشنو رأيكم؟ كتبولي بتعليقات الرسالة هلمرة مو تصويت أسولف وياكم واسمع اقتراحاتكم