باجر نبلش الما داز رقمه لهسه خل يدزه

خلّوا ببالكم هاي الأمور الراح نحتاجها أو راح نسويها أو نخطط إلها من هسه

1- الاتفاق على زي التخرج بكل تفاصيله من باجر (أشياء على كروبنا العام هنا واشياء على الكروبات الخاصة) فدزوا ارقامكم حتى نضيفكم

2- إرسال الخيّاط لكم مع أسعاره وأعماله (وايجابيات وسلبيات حسب الدفع السبقتنا جمعتهن منهم).

3. المصوّر وأسعاره وأعماله وصورته الجماعية والفردية والفيديو والألبوم وأسعاره (وكذلك الايجابيات والسلبيات من الدفع القبلنا).
ومع العلم هذول عندي هواي جوه إيدي مصوّرين وخيّاطين بس نفسي طويل وجاي أحاول أختار بتأني أنسب واحد من حيث السعر والجودة ... فلا تستعجلون عليّ.

4- مشروع التخرج: هذا راح ينشرونه قبل بداية الدوام بأسبوع أو أول يوم دوام بالرابعة فورم وأنت تسجل بيا مشروع تريده وشرط يكون الفريق من 3 أشخاص عدا المشاريع المختلفة عن هذن ممكن يكونون ثنين أو بس واحد ... وأغلب الطلاب كل سنة يسوون مشاريع ويب لأن هن أسهل شي وبسرعة يحصلون عليها أمتياز، لذلك قوّوا نفسكم بالعطلة بالويب حتى تسوون مشروع ضخم ...
ومناقشة بحث ومشروع التخرج أو تقرير التدريب الصيفي على الأغلب يكون بعطلة نهاية الكورس الأول نصف السنة.

5- الحجز على صورة التخرج (وهاي من أول يوم دوام أبدي أمشي بإجراءاتها) وبالنسبة للأماكن راح يكون الملعب وديوان محافظة البصرة والقصور الرئاسية ... والملعب براحتكم تردون جذع النخلة أو المعقل أنتم تالي تختارون ... وكلشي تردونه راح يصير إن شاء الله.
وراح تكون ببداية الكورس الثاني مباشرة بعد العطلة الربيعية.

6- لا تستعجلون عليّ بتعليق الصور والظروف للرسائل التذكارية ... راح أخليهن آخر الدفع حتى تبقى معلّقة لنهاية السنة لنهاية الكورس الثاني ومحد يگللنا بعد شيلوها نريد نعلّك صور دفعتنا ... وأحتاج مصمم قوي يصمّملنا فدشي مرتّب مثل الرابعة المسائي هلسنة.

7- آخر يوم وآخر إمتحان إلنا راح نجتمع مع كل الدفعة وندعوا كل الأساتذة مثل الرابعة حاليًا ... راح تودعوهم ويودعوكم، تصورون وياهم آخر صورة ... فضلاً عن صورة جماعية إلنا كلنا مع الأساتذة.
بعدها ناخذ ملازمنا وأوراقنا بعدما نطلع من الإمتحان ونشمرهن من الدرج مثل حركة النظم.
بعدها ننطيكم كلينكس وكل واحد يحضن صاحبه ويودعه وترجعون لبيوتكم.
وتنامون نومة ما بعدها دراسة للأبد ...

وباقي الأشياء الثانوية من سفرات وترندات بالرابعة ووو فكلها نسويها إن شاء الله

وهاي خريطة طريقنا بالرابعة ... كل التوفيق إلكم 💙

إلّي يريد يسوي مشروعه ويب خل يتعلم من هسه، أكو هواي كورسات مجانية على اليوتيوب خل يستغل فترة العطلة هاي ويطوّر روحه ويضبّط وضعه من هسه حتى بالدوام يسوي مشروع تخرجه بعد ما بيها مجال، وامشي بمسار صحيح مو حلقات عشوائية.

وإذا تريد كورس مدفوع حتى تمشي بمسار واحد وشخص يتابعك أول بأول حتى ما تضيع وما تعرف شنو تدرس أول وشنو تعوف وما تبقى محتار إذا واجهتك مشكلة فزميلتنا وأختنا سارة مسوية كورس من الصفر (من الأساسيات والقالب لحدما تكدر تبني موقع كامل ومشروع ضخم بنفسك) وبأجور رمزية 25 ألف، يبلش بشهر السادس ... والشرح ع الميت وبنفس الوقت مُسَجّل تكدر ترجعله بأي وقت، مع متابعة منها أول بأول لكل مشترك وين وصل ... فاليريد يسوّي مشروعه ويب هلشي يفيده لأن الكورس كله عملي مو نظري ومو كدراسة الشرح كمشاريع تخرّج، والأهم المتابعة المباشرة عن أي مشكلة تواجهك يعني مثل المشرف بمشروع التخرّج تتابعك، فشي حلو ويساعد الناس الضعيفة حتى تضبّط وضعها بالعطلة هسه حتى بالدوام جاهزة تسوّي مشروعها.

للاستفسار أكثر: @it_sarawi

بسم اللّٰه الرحمن الرحيم

نبدأ بأول خطوة لرسم ملامح التخرج


خريطة التصويت والتفاصيل راح تكون كالآتي:

1- الوشاح والروب:
الوشاح ثابت من الكلية باللون الماروني، لكن راح يكون التصويت على درجة اللون ... أما الروب فهو ثابت من الكلية أسود.

2- لون ونوع الخط والكتابة:
لون الكتابة ونوع الخط على الوشاح
وتطريز الجهة اليسرى من الوشاح

(هذا التصويت لليوم فقط)
ويكون على الكروب العام

بعدما نتفق على شي بالأغلبية نروح نختار (لون الرباط للشباب) و(لون الشال للبنات) وهذا يعتمد بدرجة كبيرة على تفاصيل الوشاح الراح نختارها


فيعني باجر السبت التصويت راح يكون

للشباب:
1- لون القاط (يفضل أسود حتى كلشي يكعد عليه)
2- لون الرباط (يعتمد على تفاصيل الوشاح)
3- الحذاء رسمي (أسود)

للبنات:
1- لون الشال (يعتمد على تفاصيل الوشاح)
2- لون القميص
3- باقي الأمور النسائية، دزولي اتفاقكم على شنو صار.

وأكو أمور ما ذكرناها تالي نذكرها

وبالنسبة للتطريزات والإضافات وشكل الروب ومثلث الوشاح كل واحد واختياره، المهم درجة اللون وحدة والتفاصيل العامة وحدة، باقي الأمور براحتك.

يوم الأحد بعد ما كمّلنا أغلب الأمور، هسه نختار الخياط:

عندي هواي خياطين أعرف، فراح أدزلكم أفضل 3 خياطين وكل واحد ايجابياته وسلبياته حسب كلام الدفع القبلنا الأشتغلوا عنده، وأنتم تختارون التردونه، مع مراعاة السعر والجودة والتسليم بالموعد.

وهذا التصويت يستمر يومين حتى يصير عدكم وقت تشوفون أعماله وتسألون عليه ...

يوم الثلاثاء بعد ما اخترنا الخياط، صار دور نختار المصوّر (بشكل مبدئي قابل للتغيير إذا لگيت أفضل أبلغكم بكلشي)
والآن أنا أرشح واحد من ثنين
أما (فوكس) أو (حيدر هاجر) وكل واحد منهم عنده سلبيات وإيجابيات نگلكم بيها الثلاثاء ونشوّفكم أعمالهم وكل التفاصيل

وهذا أيضًا يستمر التصويت يومين حتى تاخذون وقتكم بالبحث والسؤال وما تصوتون مباشرة ...

ملاحظة مهمة: أخوان لا تصوتون كبل بمجرد ما ينزل الاستفتاء، راح ننزلكم كل تفاصيل الخياط والمصوّر وايجابياتهم وسلبياتهم وصفحاتهم وأعمالهم وآراء الدفع السابقة عنهم ووو وهذا غير سؤالكم أنتم عنهم وشنو يكلولكم عنهم تگلولنا لأن هو بالنهاية تخرجنا كلنا ونريد نختار أحسن شي وشكدما چنتوا متعاونين وياي شكدما صار تخرجنا أحسن تخرج، فكل معلومة تحصلوها تبلغونا بيها.


الخميس
نتفق على اسم الدفعة + نحدد يوم التخرج
(هو ما نكدر نحدد يوم معين إلا بعد الموافقات بس قصدي ع الفترة)
يعني تردونها قبل نهاية الكورس الأول، لو بعطلة نصف السنة، لو أول أسبوع من الكورس الثاني.

الجمعة هو مفتوح إلكم ولمقترحاتكم من حيث (فعاليات، ترندات، تصاميم، تزيين، ...إلخ) سواء قبل أو بعد أو أثناء صورة تخرجنا، وسواء بالكلية أو بالأماكن الثلاثة الراح نروحلهن

ملاحظة: الركص ممنوع من وزارة التعليم حسب الكتاب (هنا) وممكن يعرّضنا إلى لجنة إنضباط الطلبة.
فشراح نسوي؟ راح نسوّي فعالية إختيارية نصفك ونغني بيها (بدون ركص) نفس الرابعة هلسنة (يا شمس يا شموسة) بس غير أغنية 😂 وهواي سوالف وفعاليات نكدر نسوي بهلفقرة مال التصفيك ... ويجوز نسوّي عراضة وتهوسون فحضرولكم هوسات مال تخرّج :) لا أشاقة التصفيك كافي بيه هواي أشياء نكدر نسوي.

وإن شاء الله يكون يوم من العمر 💙

وصدگوني أنا متحمس أكثر منكم وحريص على أن أسوي تخرّجنا أحسن تخرّج أكثر من أي واحد ثاني، فإذا تعاونتم وياي والأكلكم عليه تسوونه والأنهاكم عنه ما تسوونه راح أسويلكم هذا اليوم ثاني أحلى يوم بحياتكم (بعد عرسكم :) ... أما إذا واحد عرقل الأمور أو گلتله هذا لا تسويه لأسباب أنا أشوفها وهو ما يشوفها أو معاند فما راح يطلع تخرّجنا مثل الشي الأريده والتردونه، يعني مثلاً أتفقوا الأغلبية على لون شال معين للبنات أو لون رباط للشباب، والأغلبية صوّتوا على هذا الشي، بس فلانة وفلان ما عجبهم هذا الشي فعدهم طريقين أما يحترمون رأي الأغلبية ويتقبلونه مهما كان، وأما يسوون أنفسهم عود أحنا محد يفرض علينا شي ويجون بألوان مختلفة، وهنا هم ما يدرون راح يتفشلون والمصوّر راح يحرمهم من التصوير، بل الدفعة نفسها راح تطردهم لأن ما مضطرة تعب 16 سنة بهذا اليوم ودافعين بيه دم گلبهم وفلوس ومصاريف يجي فلان أو فلانة يخرّبونه لأن والله ما عاجبهم رأي الدفعة ... وإن شاء الله كلكم مرتبين وما تصدر من أحد هيج تصرفات طفولية وإذا صدرت فما رايح يضر غير نفسه، محد مستعد يضحي بيوم عمره علمود يجبر خاطره ويخلّيه يصور وياه ...

وإن شاء الله ما يصير هذا الشي وكلكم متعاونين 🤍

راح تنزل تصويتات اليوم الأول بالكروب وتستمر لباجر ... فركزوا على الرسائل المثبتة خاف الطلاب تحجي ويصير فوك لا تضيعونه

لأن ما أريد أسد الكروب أريدكم تتناقشون ليش هذا أنسب وليش هذا مو أنسب و...إلخ

وما أكدر أنزّل الاستفتاء ع القناة لأن يتزوّر، فلازم يكون التصويت علني

حتى إذا واحد من المسائي لو التحميل يصوّت أحظره مباشرة من الكروب

فراح تكون أكو رسايل مثبتة بالكروب بعد هاي الرسالة اقروهن ...

السلام عليكم ...
قريت كل رسايلكم وآرائكم بالكروب وهذا القرار نهائي ويلزم الكل إحترامه:

1- ما راح نجيب فرقة
لأن أكثر من نصف الدفعة مصوّتة ما تريدها فما نفرض عليكم شي.
فمنعًا للتصادم بين الطلاب والمشاكل والحزازيات نلغي فقرة الفرقة وياريت الكل يحترم رأي الأغلبية مثل ما أتفقنا بالرسائل الفوك، وما يجي يفرض رأيه عناد وتكبّر ويكول أنا محد يفرض عليّ ووو لأن هاي الحركات طفولية ... خليكم متعاونين مثل ما أتفقنا فوك نمشي برأي الأغلبية مهما كان الشي ما عاجبك أحترم رأي الأغلبية وأمشي وياهم، ولا تخافون فعاليات الفرح هواي ما مقتصرة ع الفرقة راح أسويلكم هواي أشياء مثل ما وعدتكم أخليه إلكم يوم كلها تسولف بيه بس ردت منكم شغلة وحدة وهي التعاون وتمتثلون لرأي الأغلبية بدون عناد وكِبر مهما كان رأيكم والأكلكم عليه تسوونه والأنهاكم عنه ما تسوونه وتخلون الباقي عليّ وراح تشوفون التخرج شلون يصير بإذن الله ...
(ممكن تطلعولكم فرقة بجلسات خاصة إلكم مو وي الدفعة، هاي حريتكم).

2- الحنة موجودة
هي اختيارية بالنهاية ومو بيوم التخرج فالما يحب يحضر براحته بس هاي الفقرة كلش حلوة وكلش أحبها وكلش راح أرتبها بطريقة توّنسكم .... ممكن الشباب يلبسون زي عربي بيها .... وراح نزيّن الكلية ونرتب كلشي لهذا اليوم ونسوي بيها هواي أشياء، فالما يحضر تفوته، وأكيد نحترم كل الآراء وبراحته الما يريد يحضر لأن هاي مو بيوم التخرج مثل الفرقة حتى تنمنع، هاي اختيارية
(وهكذا لباقي الأشياء والفعاليات والترندات ووو مدام إختيارية فيكدر ما يشارك بدون ما يعترض)

3- الفعاليات
لا تسوون فعاليات البنات ابحد وفعاليات الولد ابحد هي باقية بس هلسنة خلّوا ترنداتنا وفعالياتنا سوه، وأنا عندي مسار فعاليات كامل نسوّيه السنة الجاية، وكذلك ناخذ اقتراحاتكم الجمعة القادمة بالفعاليات التردون تسووها، فباجر بس صوّتوا على سوالف زي البنات وأجلوا الحجي بالفعاليات ليوم الجمعة هنا بالكروب العام ...

بالنهاية أخواني/خواتي:
كل الفعاليات التردوها راح نسويها وأكثر، بما في ذلك فعاليات يوم التخرج، وقبل التخرج وبعد يوم التخرج وفعاليات الفرح والترندات وووو يعني راح أشبّعكم فعاليات وسوالف والله مسار كامل للفعاليات عندي يعني كلشي تردونه أسويه بس أريدكم تتعاونون وياي والأگلكم بيه تسوونه وراح تشوفون بعينكم النتيجة ...

تردون فوضى لو مركزية وتنظيم؟

إذا تبقون هيج تتصرفون بعشوائية وكلمن يريد يتصرف بكيفه ويفرض رأيه بدون مركزية للموضوع وبدون ما تخلّون شخص هو الفيصل بين (أ) وبين (ب) وهو القراره يلزم الطرفين يمشون بيه ... فما راح يصير التخرج مثل ما تردون

أخوان، كلشي أكلكم بيه أنا ما جاي أكوله علوًا وتكبّرًا مني وأنتم تعرفوني زين أنا مو هيج، جاي أكلكم هيج لأغراض تنظيمية، لازم يكون أكو واحد هو الفيصل حتى تمشي الأمور بسهولة، فإذا كلامي ما تعتبروه مُلزِم إلكم فأنا ما راح أستمر بتنظيم يوم التخرج لأن ما راح يطلع مثل الأريده ومثل التردونه

أما إذا گلتوا كلشي يقرّره رأي الأغلبية وكلشي تگوله أنت نمشي عليه علمود تصير مركزية وتنظيم للموضوع فأنا أوعدكم راح تشوفون تخرّج يسولفون بيه كل الكليات ويكون أحسن تخرّج مر على كليتنا

وهذا الشي راجعلكم ... إذا تردون هيج فوضى أو تردون مركزية وتنظيم.

شباب (الولد) تعالوا بهذا الكروب بلشنا تصويت
https://t.me/+z40xiRtNPPMyOWI0

الما داخل لهسه خل يدخل ويروح على الرسالة المثبتة يصوّت على سوالف زي الولد

اكو بيكم ما گدرت أضيفهم بسبب إعدادات الخصوصية فخل يدخل من الرابط

واللي ما داز رقمه لهسه ياريت يدزه

(الكروب للولد فقط)

كذلك (البنات) بلشوا تصويت فاللي بعدها ما داخلة أو ما شايفة التبليغ خل تدخل لكروب البنات هسه تصوّت

https://t.me/+8SEHq_fh8kkyNjdk

والما دازه رقمها خل تدزه لممثلة شعبتها

بالنسبة لتصويت يوم أمس الجمعة انتهى

وهذا ما أتفقت عليه الدفعة بالإجماع 👇

1- تم اعتماد درجة لون الوشاح هذه
2- تم اعتماد لون الخط هذا (الفضي).
3- تم اعتماد نوع الخط هذا (الطبيعي).

148 صوت (ثلث أرباع الدفعة).
97 صوت (نصف الدفعة تقريبًا).
90 صوت (نصف الدفعة تقريبًا).

بالنسبة للجهة اليسرى هذا التصميم هو الفائز بس هواي طلاب حبّوا تكون الجهة اليسرى اختيارية حسب طلب كل طالب وأنا دازلكم 3 نماذج بالكروب فعادي اختاروا منها وأنا أبلغ الخياط بيها

بس ملاحظة: بعد الاستفسار گالوا الخياطين ياخذون على الشعار 5 آلاف زايدة ... أما إذا بس سنة أو بس كتابة ما ياخذون زايد

فهذا الشي راح يبقى حسب رغبة كل طالب لأن مو فد اختلاف قوي ويطلّعنا نشاز، فعادي ...

بالنسبة لتصويت يوم أمس السبت انتهى

وهذا ما أتفقت عليه الدفعة بالإجماع 👇

الطالبات:
1- تم اعتماد لون الشال رصاصي
2- تم اعتماد لون الكعب أسود.

3- القميص قيد المداولة ...

••••••••••••••••••••

الطلاب:
1- تم اعتماد لون القاط أسود.
2- تم اعتماد لون الحذاء أسود.

3- الرباط قيد المداولة ...
•••••••••••••••

تعتبر هاي الألوان نهائية ويُلزَم الجميع الالتزام بها.

بالنسبة للكعب للبنات والحذاء للولد اختياري براحتكم أي لون

يبقى القميص للبنات والرباط للولد هذا لازم موحد للكل ... فاليوم نكمل الاتفاق عليهن إن شاء الله

وصلنا للخياط
تصويت يوم الأحد يستمر يومين للثلاثاء ...

أكو عدة خياطين موجودين بس للأمانة أكثر الخياطين المناسبين من حيث (الجودة والسعر وموعد التسليم) هي (مشغل توتة)

باقي الخياطين أما أسعارهم نار، أو جودتهم رديئة، أو يتأخرون بالتسليم

فراح أدزلكم هسه أسعار خياطة مشغل توتة وحسابهم وشغلهم وتشوفونه وعدكم يومين تردولي خبر إذا عجبكم ونخيط يمها لو نغيّرها

وبالنسبة لليريد شي فخم جدًا وغالي (100 وفوك) فهذا يم علاء وعادي مو مشكلة ناخذ خياطين ...
خياط عام مناسب للدفعة كلها (مشغل توتة)
وخياط للشغل الفخم الغالي جدًا (بوتيك علاء)

بس ملاحظة اليختار علاء ياخذ القياسات بالنتائج بعد ما يجي بغير وكت، تمام؟

وهسه ادزلكم كل التفاصيل 👇

1- مشغل توتة
الزي بالكامل بـ 40 ألف فقط

حسابها ع الانستا
https://www.instagram.com/t519a?igsh=MXIzeWlkYWpqOXFnNQ==

على التلي:
https://t.me/t519a

للعلم العلوم المسائي سووا عدها ويمدحون بشغلها
القماش مرتب
الخامة واللون ما يتغير بالشمس وهذا أهم شي بالجودة
(فيعني مراعي السعر والجودة)
.
.
.
شباب عدكم يومين تتصفحون شغلها ... تسألون عنها ... تشوفون ايجابياتها وسلبياتها ... حتى يوم الثلاثاء إذا أتفق الأغلبية عليها نحجز يمها إن شاء الله

وللأمانة بحثت هواي وشفت هاي أنسب سعر وجودة ماكو بعد أرخص (بهاي الجودة التقدمها)

والقرار إلكم وشنو تكولون أسويلكم ...

.
.
.
روب رسمي مع وشاح تطريز مع قبعه ساده ب 40 الف
....
الإضافات
* قبعه تطريز 5 الاف
* قبعة مثلثه 5 الاف
* روب خليجي 5 الاف
* وشاح ملكي 10 آلاف
الوشاح الأمريكي ب 20 الف
تأطار الوشاح ب 5 آلاف
الروب الأمريكي ب 10
روب الخفاش ب 15
* تطريز الردن الواحده 5الاف
تطعيم الردن لكل للدفعه مجاني