طلاب للتوضيح

ست ميادة كالت محاضرة التحليل تاخذوها بدل محاضرة العربي
ومحاضرة العربي ماعرف شوكت راح تصير احتمال ما ناخذها واحتمال ناخذها
فـ انتظروا على ما يردون علي بقيه الاساتذة وابلغكم واذا ماكو خبر منهم باجر الاخبار توصل لممثلكم ويبلغكم اذا صار تغيير بالمحاضرت

بالنسبة لامتحانات المرحلة الثالثة والرابعة باجر ماراح تأثر على محاضرة الاحتماليه لان قاعة B1 مابيها امتحان

مو مشكله اني اذا ما اجيت اخذوا عربي لان وضعي الصحي شويه مو تمام
اذا اجيت اخذكم اذا تاخرت هلي د عبدالحي عادي ياخذكم
وضعي شويه تعبانه

بالنسبه للمحاضره عادي اسجلها وانزلها

-أ. بيداء

محاضرة مايكروية وتحليل ماكو اليوم لكل الشعب

الإمتحانات باقية حسب الجدول، الاثنين يوم 11 مايكروية، والثلاثاء يوم 19 تحليل ... لأن هواي طلاب من شعبة C ما ناسبها الموعد وگالوا نلحك ندرس برمجة، فعلى ضوء هذا الإمتحانات باقية حسب الجدول المعلن بدون تغيير وتأجيل.

وبالنسبة لكوز التحليل تأجل ليوم 20 حتى ندرس للإمتحان والكوز مرة وحدة

راح أبشركم بشارة بس أريد وراها عزيمة 😂

بعد معاناة وطلب وتعب وركضة وروحة وجية وافقت ست بيداء تحسب:
1- ع الدرجة الأعلى للشهري
2- ع الدرجة الأعلى للكوز

فدرسوا شكد ما تكدرون وجيبوا سعي عالي هاي فرصتكم تعدلون درجاتكم ويكون سعيكم عالي، وتكول ست بيداء بتاريخي كله ما سويتها وهاي أول مرة، فهاي فرصتكم تدرسون وعدكم وقت كلش هواي من الخميس للثلاثاء تدرسون فضبطوا المادة ويا رب التوفيق للجميع.

بقى بس التقرير جاي أحاول 😂

من الخميس الجاي أبلّش بالتلخيص بنفس طريقة تلخيص الشهر الأول، حالف أخليكم كلكم تنجحون من الدور الأول بالتحليل شني 81% رسوب ذيج الدفعة، عمي هاي دفعتنا تختلف مباركة والكل ينجح بيها إن شاءَ اللّٰه وعلى ضمانتي، سواء طلاب المرحلة أو طلاب التحميل، أنا مركّز على هاي المادة وأريد الكل ينجح بيها كتحدي لأن الدفعة السابقة طلعوا لقب عليها (مجزرة التحليل) من كد الرسوب، نسبة النجاح بس 19% والآن إن شاءَ اللّٰه نخلي نسبة النجاح تتعدى الـ 90% ... فاليريد ينجح ويعبر ويفوّزني بالتحدي خل يدرس ويتابع التلخيص، راح ينجح بالشهري والكوز ويرفع درجاته ويكون سعيه عالي ويدخل مسيطر مهما كانت أسئلة الفاينل صعبة ومهما كان الجواب بالانكليزي ما راح يهتم لأن سعيه عالي وداخل مرتاح ومطمئن ينجح، أما اليظل يسخت ويضيّع هاي الـ 5 أيام فبديهي راح يطلعله سعي قليل وبديهي راح يرسب بيها ويحمّلها، ولات حين مندم.

بالنسبة لمادة أمتحان المايكروية :
-النظري من صفحة 1 لحد صفحة 26(ما داخله).
-العملي كلشي اخذنا داخل يتضمن موضوع ال push و pop .

تقرير الاحتمالية:
گالت ست ميادة

1- الشغل يتوزع ع الفريق كل واحد يشرح جزء من التقرير لان اذا صار ع شخص واحد يصير ظلم لان بس هذا الشخص راح يكون فاهم الموضوع ويعرف كل محتوياته والبقية ياخذون الدرجة ع الحاضر فلازم الكل يكون فاهمه لذلك الشرح للكل. والدرجة تعتمد ع التقديم مو بس ع المحتوى.

2- كل واحد من الفريق إله دقيقتين يقدّم (يعني 6-10 دقايق للفريق الواحد كحد أقصى).

3- راح يكون كل شخص إله درجه يعني مو كلها متساوية حتلو بفريق واحد وهذا يتعمد بعد ع شرحك وتقديمك.

4- لازم تعرف وتفهم كلشي بالتقرير لان راح تسألك من ضمن التقرير بشكل عشوائي.

التقرير تكتبوه بالبداية بالوورد.
أنوب تصمموه ع البوربوينت وتجيبوه بفلاش أو حواسيبكم تقدموه ع الشاشة.
وتطبعون الكتبتوه ع الوورد ورقي وتسلموه للأستاذة بعد التقديم.

فعليًا بعد بس 5 أيام نداوم (كدراسة).
الباقي بس إمتحانات عملية ونظرية

مساء الخير أرجو تبليغ جميع الشعب عن محاضرة غدًا الساعه الـ 3 عصرًا، نشرح فيها موضوع المصفوفات الثنائية
- أ. دعاء

طلاب بالنسبة لعلاقه الموضوع بالحاسوب ست ميادة طلبت على الاقل كتابة مثال واحد ينحل بكود برمجي اما ++C او Java او شرح نظري بدون كود

الرسومات الداخلة بالامتحان :

صفحة 5 و 15 و 18 و 19 و 21 و 22 25

إنّا للّٰه وإنّا إليهِ راجعون

عرفتوا هسه فائدة عدم تأجيل الإمتحانات؟ أحنا المرحلة الوحيدة حرفيًا الراح تصير عدها أسبوع عطلة قبل الفاينل، نكدر ندرس بيها ونضبّط أمورنا ونعالج مشاكلنا، باقي المراحل عدهم يوم 26 إمتحان شهري و28 فاينل حتى ما يكدرون يشتمون هوا.
عطلتنا راح تصير (من الجمعة 22/12/2023 لـ 28/12/2023)

أما الإمتحانات العملية فعدنا لهسه برمجة ما ممتحنين شهري عملي فكل شعبة خل تحدد لنفسها يوم مناسب حسب يوم العملي العدها (مثلاً شعبتي الثلاثاء عدنا، فتصير وي التحليل بحكم راح ندرس برمجة وتحليل سوا أحنا، وشعبة C ممكن تكون الخميس وي إمتحان البرمجة النظري)
وبالنسبة للرسم دكتورة عدالة گالت ما أمتحنكم، فما أدري بالنسبة لست صبا تأكدوا منها.

وبالنسبة للفاينل (للمواد تلاثتهن) نحاول نخلّي إمتحاناتنا العملية بأسبوع العطلة حتى نكون مخلصين إمتحانات نظرية ودارسين المادة بس نجي نمتحن، فنكدر نضبّط أمورنا وبنفس الوقت مستفادين من أيام العطلة للمراجعة، أو نخلّي إمتحان فاينل العملي مع النظري حتى نكون دراسين المادة عدل وجاهزين للإمتحان.

ياريت تكتبولي آرائكم واقتراحاتكم

اطمأنوا بكل الأحوال راح تكونون دارسين المادة إذا قلقين من هلناحية، سواء صار الإمتحان بالعطلة (دارسين المادة بالشهري) أو بيوم الإمتحان (دارسين المادة بالمراجعة).

فإذا ما وافق القسم يكون الإمتحان النظري والعملي سوا محد راح يتضرر، وإذا صار النظري والعملي سوا أيضًا محد يتضرر، وحسب الشي اليخليكم مرتاحين يصير إن شاءَ اللّٰه.