الراسبين بالمرحلة الأولى يعيدون كل مواد المرحلة بدون استيفاء (حتى المواد الناجحين بيها) وفقًا لنظام بولونيا الجديد، لذلك من الشهر السادس وأنا أكرر بهذا الكلام أكثر من مرة والحمد للّٰه هواي منكم فهم الموضوع وشد حيله بالدور الثاني وصعد للمرحلة الثانية (النقطة الثانية (هنا) للتوضيح)، الآن حتلو يرسب بالمرحلة الثانية ما يعيد المواد كلهن حتلو يتطبق عليه بولونيا راح يسووله مقاصة علمية، لكن الجامعة مخيرة تفتح من المرحلة الثانية للرابعة إذا لا سامح اللّٰه أجل كم سنة أو رسب سنتين وأجه قرار عدم الرسوب فما يدرس وفق نظام بولونيا حتلو طلاب هاي السنة صعدوا وياه، راح يفتحون للرسوب من المرحلة الثانية-الرابعة صف خاص بيهم يدرسون وفق النظام القديم مو وفق بولونيا يعني ما يدرسون وي الصاعدين من المرحلة الأولى (في حال أجّل ورسب أكثر من سنة).
شاهد هذه الرسالة للتوضيح (هنا)

وبالنسبة للراسبين بالمرحلة الأولى فإذا أكلكم أنتم محظوظين راح تكولون أبالغ، بس فعلاً أنتم محظوظين لأن نظام بولونيا كلش راقي ويجهزكم فعليًا لسوق العمل، يعني تتخرجون وأنتم بجعبتكم الكثير من المهارات تكدرون تستغلوها وتشتغلون بالمكان الراغبين بيه، لأن نظام بولونيا راح يعتمد على المهارات اكثر من الأشياء الاخرى (التلقين) وراح يخلي الطالب جاهز لسوق العمل والطالب راح يكون الجزء الاساسي بتقييم العملية التعليمية (وهذا أهم وأفضل شي).
+ نظام بولونيا راح يلغي شي اسمه مرحلة أولى أو ثانية أو ثالثة أو رابعة ...إلخ.
النظام راح يحدد ساعات ووحدات معينة لكل قسم أو اختصاص والطالب شكد ما يخلص ساعات ووحدات أكثر يتخرج أسرع، وممكن يكمل الكلية بـ 3 سنوات بدل 4 وممكن يكملها بـ5 سنوات أيضًا إذا أخفق، فأنت تكدر تكملها ب3 سنوات وتتخرج ويانا وتعوض سنة الرسوب هاي وبنفس الوقت مستفاد من مميزات النظام الجديد.
هذا النظام عالمي ومتطور وحديث ومُعترف بيه بالمناطق الأوروبية والفكرة المميزة بيه إن يواكب التغييرات إلّي تصير.
فـ جُلّ التوفيق إلكم 🤍