#سلسلة_نصيحة

كثير طلاب بتسأل هلق اذا عملت إعادة للسنة بقدر عوض وجيب علامات عالية ولا لأ


أول شي لازم نعرف أنو الاعادة شغلة مو سهلة
بدك تكون واعي وقت تاخد هل قرار
صدقني ان كنت مقتنع بهل فكرة وعندك عزيمة وإصرار ف انت قادر انك تعوض وتجيب علامات عالية
في أشخاص أول سنة رسبت ووقت عادي جابت مجاميع عالية
بعرف شخص اول سنة جاب مجموع كثير قليل
ولما عاد جاب ٢٣٥٠ ف انت متل هل شخص وقادر تعمل متله

بس كمان الاعادة للطالب يلي مو مقتنع صعبة
وممكن ترسب او تجيب مجموع عادي
في شخص صديق إلي هديك سنة جمع ٢٢٠٠ صافي
ف قرر انه يعيد وطبعاً حسيته مو مقتنع بالفكرة ابداً
وضل معند
ولما عاد هل سنة جاب ٢١٥٠ يعني اقل ب خمسين علامة
(طبعاً المجاميع يلي عم احكيها هيي مجاميع صافية)

ف لازم تعرف ان كنت مقتنع وعندك اصرار وعزيمة ف انت قادر انك تعوض الخسائر يلي خسرتها بهي السنة
#ملاحظة
بس لاتنسى كمان انو تغير نمط الأسئلة من اتمتة لمقالي
يعني ممكن يأثر هل شي عليك

بتنمالكن التوفيق 🤍
#nedal@NerdatBac

#سلسلة_نصيحة

في معلومة مهمة جداً
يا طالب وقت بدك تدرس لا تحدد عدد ساعات معين
يعني مثلاً لازم ادرس خمس ساعات باليوم
هيك غلط❌❌❌

الصح
مثلا
أنا لازم ادرس درسين علوم ودرس وطنية ومع شوية كلمات فرنسي
وهيك ما بتنام لتخلص هدول
وإن خلصت بكير بتدرس غيرهن
وممكن تاخد استراحة ان كان انجازك رائع


وان قصرت فيهم بتعاقب حالك وتاني يوم بتشد حالك وبتشيل هل كسر 💁🏻‍♂🤍

وأريح إلك بالتخطيط هيك✅✅✅✅

#nedal@NerdatBac

#سلسلة_نصيحة
#المدرسة 🎒

كتير من الطلاب بتعاني من موضوع المدرسة، لأنو أحياناً بتحسها تضييع وقت، خصوصاً للّي مسجلين بمعاهد أو عندن دروس خصوصي.
وبصير الطالب مضغوط، لا عندو وقت، ولا قادر يترك المدرسة لأنه خايف يقدم حر بدون رفقاتو.

بس خلينا نحكي بصراحة 👇
في مدارس فيها أساتذة رائعين، وفي غيرهم أداؤهم ضعيف، والطلاب الله يعينهم، عاملين المدرسة ساحة لعب وشغب 😅

يا طالب 👨‍🎓
لازم نعرف كيف نتصرف ونتعامل مع هي الحالة:

1️⃣ إن كنت مهتم أو مو مهتم بالمدرسة، خليك ساكت.
لأن في طلاب ما عندن قدرة يسجّلوا بمعاهد، وجايين ليستفيدوا من الدرس، فحرام تظلمهن بشغبك وضجيجك.

2️⃣ بدك تفهم؟ اقعد بالمقدمة.
ركّز مع الأستاذ، لأنو نفس هالأساتذة اللي عم يدرّسوا بالمدرسة، بيدرّسوا كمان بالخاص، يعني الفايدة مضمونة لو انت ركّزت.

3️⃣ ما لقيت فائدة؟
اقعد بالآخر، افتح كتابك، ادرس، أو حل مسائل.
وخلي فترة الصبح لمواد سهلة متل اللغات، مشان وقتك ما يروح عالفاضي.

🚫 بلاها قصة “خلينا نطلع رياضة” و”مو ناقصنا درس”
اتسلى ما في مشكلة، بس مو دايماً.

وأخيراً 🤍
إذا بتحب، فيك تسجل حضور وتطلع تدرس بالبيت.
بس لا تروح تاكل وتنام 😂
استغل وقتك بهالفترة، لأنو هي أهم مرحلة بحياتك الدراسية.

اتعب هلأ، وارتاح بعدين.
صدقني التعب ما بيروح هدر 💪

موفقين يا أبطال البكالوريا 🌟
#nedal@NerdatBac

هذه البوستات خاصة بقناة 🤍نيردات البكالوريا 🤍

#سلسلة_نصيحة
طريقة حفظ ممتازة❤️
أغلبكن مشكلتوا بالنسيان طيب اقتراح جربوا هي الخطوات.
#الخطوة_الاولى
ادرس درسك بهدوء وتأني وتركيز وحفظ عن ظهر قلب.

#الخطوة_التانية
أي درس بتدرسوا وبتحفظوه بعد ساعتين أو 4 ساعات بس رجعوا سمعوه لحالكن تسميع سريع.

#الخطوة_الثالثة:
خطوة قبل ما تناموا
مراجعة سريعة لهل درس أو يفضل لكلشي درستوه بفترة النهار (قبل ما تناموا يعني آخر شي بتعملوا هوي المراجعة وبتناموا دغري).

#الخطوة_الرابعة
خطوة بعد يومين
اعملوا نظرة ع يلي درستوه مراجعة سريعة عن حاضر أو غايب ويلي بتكون نسيتوا احفظوا.

بأول خطوة انت بتكون درست الدرس وحفظتوا بعد كم ساعة بتكون بلشت تفقد جزء من معلوماتك لهيك بيجي دور الخطوة الثانية يلي بترجع بتذكرك بجزء من هالمعلومات بيجي دور الخطوة الثالثة يلي هي بتعمل ع تركيز كلشي بدماغك بعد كم يوم بتكون نسيت وفقدت جزء ضعيف من المعلومات يلي ما تثبتت مليح هون بيجي دور الخطوة الرابعة يلي بتكون ثبتت كل المعلومات بدماغك وأمورك تمام اعمل هيك ع كل دروسك النظرية أما العملي (رياضيات وفيزياء وكيمياء) ف كتر تطبيق وحل مسائل.

بتمنالكن التوفيق والنجاح الدائم انتوا قدها
#Nedal@NerdatBac

#سلسلة_النصائح_الدراسية
#الضغوطات

بهالفترة بالذات، الضغط على الطالب بيكون بأعلى مستوى… لدرجة إنو في طلاب ما عم يلاقوا حتى وقت يقعدوا مع أهاليهم.
هاي فعلياً من أصعب مراحل البكالوريا، بين المذاكرات والمراجعات ودراسة المواد الجديدة.

لكن صدّقني… هاي الفترة إلها فضل كبير عليك.
هي الفترة يلي بتبني استعدادك النفسي والمعنوي للفحص، وبتزيد قدرتك على الدراسة والصمود، ومن هون بتتعود تمسك الكتاب لفترات أطول بدون ما تمل.

يلي بيلتزم ويمشي صح بهالفترة، رح يستفاد أكتر من غيره.
اتعب هلأ… وبترتاح بعدين.

المهم ما تدرس كميات كبيرة بدون فهم.
ركّز… افهم… دقّق… لأن الفهم هو اللي بيخليك تثبّت المعلومة وتنجح.

رح تمر عليكم أيام صعبة…
بس رب العالمين ما بيضيع تعب حدا ♥️

ويلي صار طالب جامعة وحقق حلمو؟
مو لأنو أذكى منك…
بس لأنه فهم الخطة ونظّم وقتو صح.

بتمنالكن كل التوفيق والتيسير 🤍🤍
#Nedal @NerdatBac


#ملاحظة:
تم كتابة البوست يدوياً وتم ارساله ل ChatGpt بهدف إضافة حركات تجميلية للبوست وتوفير الوقت
دائماً إعتمد على نفسك وخليك أنت الاولوية بكلشي🤍

قال ﷺ: "ركعتا الفجر خير من الدنيا وما فيها".

#العبادة

الاغلب عم يمر بظروف صعبة وضيق بالروح


الشي الوحيد يلي بخليك نشيط هوي العبادة

لا تتخيل انك بيوم من الأيام تلاقي حالك شخص كل اموره تمام وعندك تقصير بصلاتك وعبادتك

متل ما الإنسان بجوع
الروح كمان بتجوع وبدها عبادة تغذيها

إلتزم والك مني وعد كلشي رح يتيسر معك وروحك بتصير أحلى وبتصير حدا نشيط

كل يوم بداية جديدة
لاتقول أنا كتير مقصر ورب العالمين ماعاد يقبل مني شي

لأ بالعكس
"خير الخطائين التوابون"

بلش من بكرى ومانك خسران شي
هيي حياة لمرة وحدة ماحدا أخد معو شي

ولازم تعرف انو الروح اذا جاعت رج تصير انسان كئيب كسول وممكن تتسكر بوجهك من كتير محلات
حتى الاخلاق رح تتبهدل ومارح يكون في قبول الك ك شخص

الله يهدينا ويهديكن جميع

بالتوفيق❤️
#Nedal.@NerdatBac

#الشتاء
كلنا منعرف أنو صار الجو بارد وصارت الدراسة أصعب للبعض
خصوصاً للأشخاص يلي بتبرد كتير
طيب

كيف فيني بغرفتي بهل فترة
مبدئياً عزيزي الطالب بدك تحط ببالك أنو الدراسة مو سهلة خصوصاً بهيك أجواء

لازم تعاني شوي مشانك حلمك وهدفك

كل يلي عليك انك تتسلح باللبس الشتوي فقط لا غير

الصوبة أو الصوبيا فخ النوم للطالب
خلص بثقل لبس وبحط حرام عليي وبدرس

ان كان البيت فاضي انت واهلك فقط
اقعد معهن
بس خليك بعيد شوي عن صوبة

بس دفيت كتيير نعست و نمت

في حال كنت دفيان وحسيت بنعس
اعملك فتلة بالبيت خلي جلدك ينسلخ🤣
بضمنلك تصحصح

طبعاً هاد مو يعني نضل بردانين
لأ خليك دفيان بس بحيث تضل بتركيزك ووعيك

ودفوا حالكن لما تطلعوا ع المعهد أو المدرسة

مشان مانفوت بقصة المرض


لأن بس مرضت كبيت ثلاث أيام أقل شي بدون دراسة

انتبهوا لحالكن
قناة النيردات بتخاف عليكن 😁😂🤍


موفقيين 🤍

#Nedal.@NerdatBac

#العاطفة
#الحب


يمكن العنوان ليوم غريب شوي
بس بصراحة هاد الشي مهم ولازم ينحكى فيه

في كتير طلاب خصوصاً لما يكون الدرس مختلط
بيقعد بقلك والله بدي حب هاي أو بدي حب هداك

وانا حاسس بمشاعر لهل شخص

لا تفوت حالك بهيك قصص أبدا بهل فترة المهمة من حياتك
ليوم انت رايح مشان تدرس وتتعب

لا تخلي هيك اشياء تاخد من وقتك
وخصوصاً هيك شي بدوو وقت ووقت كتير وأنت بحاجة كتير لوقتك بفترة البكالوريا

أجلوا هل اشياء لبعد البكالوريا ووقتا روح اخطبها أو اخطبيه😂

فترة حساسة جداً وياريت ننتبه لهل شي

يلي جد ملتزم بالدراسة وراكض ورا حلموا
مارح يلاقي وقت لهاد الشي أبداً

ويلي عم يدور على شغلات الزعرنة
بلاقيها😐


بقى كبرولي مخكن الله يرضى عليكن

اهلكن عم يتعبوا عليكن مو مشان هيك فصلات
تذكروا دائماً وراكن أب وام حاطين أملهن فيكن
انكن ترفعوا راسهن

بتمنالكن التوفيق🤍

#Nedal.@NerdatBac

#كيمياء _حلب 💜⚗️

🧪 ترقبو الدورة #المجانية الثانية بعد نجاحها في سنة ٢٠٢٥ في حلب
بمادة # الكيمياء لطلاب البكلوريا العلمي.

- مما يضمن للطالب الوصول للعلامة الكاملة ✅️🔥
- يوجد مذاكرات لكل وحدة ونصيفية وشوامل 📚🧪
- الدورة مجانية ويوجد أجور قاعات فقط ✅🔥

⏰ تبدأ الدورة بتاريخ 15/1
✅️ في حلب/الفرقان
☎️ للتسجيل التواصل
https://wa.me/qr/WHVCNASZCNDQN1

⛔️⛔️⛔️⛔️⛔️⛔️⛔️⛔️⛔️⛔️
مهم مهم مهم مهم مهم

#وسائل_التواصل_الإجتماعي_والالعاب



من اربع سنين متل هل وقت قلت لحالي
أنا فحصي قرب
وعم ضيع وقتي بالفيس والإنستا والالعاب وغيرها

ليش ما بحرم حالي منهن هل فترة وبعد ما خلص فحص بنزل كلشي وقتي كتير
طبعاً هون أنا كنت خايف لأن قربنا من راس السنة
وحسيت الفحص كتير قرب

قطعت وعد ع حالي أنو بس صرنا بتاريخ ١/١
رح احذف كلشي مصدر تلهاية إلي
والتزم بدراستي هل كم شهر
ورب العالمين بهونها عليي

وفعلاً هل شي جاب نتيجة معي من أول يوم

درست وقتها 10 ساعات وتعودت انو ساعات دراستي ما تنزل اقل من هيك

طبعاً مع انجازات وكنت اقطع وخلص شي منيح

حتى اني ختمت المنهاج قبل رفقاتي
لأن هل شي كان عن #قناعة

وصلت لرمضان كان المنهاج خالص تقريباً

وبرمضان عملت اعادة شاملة بهاد الشهر فقط

بس طبعاً هاد الشي كان من وراه حرمان
يعني لا طلعة ولا فوتة قليل

حتى الهاتف نسيتوا بوقتها
ضل عندي بس #التلغرام لأن كنت عم استفيد منو

ف بدي منكن من هلق كلشي مصدر ازعاج الك احذفوا ووقفوا وبعد الفحص بتنزل كلشي

#بكرى رح ينزل استفتاء مشان نعرف كم طالب التزم معنا
بدي العدد يكون كبير

هي النصيحة كانت بجمل
ويلي بلتزم فيها ما رح يندم صدقوني

انك تحذف تطبيق احسن من انك تحذف الفرع يلي بتحبوا عن قائمة الرغبات

!

الاختيار الكن
بتمنى تكونوا فهمتوني💚

بالتوفيق يارب💚
#Nedal @NerdatBac

#العطلة_الإنتصافية

بالعطلة الانتصافية بعد تفريغ الوقت
بصير عندك غالباً بس دوام المعهد
أو ما بكون عندك شي
يعني شبه مرتاح

بهي العطلة لازم نستغل مراجعات لكل مادة
مشان المعلومات ما تنتسى

بتجيب ورقة وقلم وبتشوف من كل مادة شو مخلص ووين واصل
وبتحدد مراجعات لكل مادة بحيث تقدر تراجع كمية كبيرة من المواد بهي العطلة

أهم فكرة أنو اوقات الصبح لدراسة الإفكار الجديدة وبس خلصت يلي محددهن

بتروح بتراجع القديم
مثلاً خصص كل يوم مادة معينة
بتدرس شو فيها جديد
وبس خلصت بتفتح من الأول وبتبلش فرم فيها


طلعات فوتات بلاهن هلق
إن طبقت هي الخطة صدقني رح ترتاح بفترة ماقبل الفحص
وأهم شي لازم تعمل كويز لكل وحدة وكويز شامل

ان بتطبق هي الخطة وعد مني لتجيب علامات عالية بإذن الله

#المطلوب

انك تخلص الفصل الاول دراسة ومراجعة هلق

وإن بتقدر تكمل لبعد الفصل الأول
بتكون وحش♥️

بتمنالكن التوفيق 🤍
#Nedal.@NerdatBac

"لا الرّحلة ابتدأت..ولا الدرب انتهى"

ضغوطٌ نفسيَّة مُتراكمة تأكل فقط من جسدي..

مئات المعلومات التي تجتاح دماغي ف أشعرُ بهِ يكادُ ينفجر..



ظننتُ حينها "و نسيت أنَّ بعض الظن إثم" أن الطاقة لا تفنى..
و أن الشَّغف يبقى في أعلى مستوياته دوماً ..

كانت مواساتي لنفسي دائماً.. أن أحظى بالفرع الجامعي الذي احبه..و أنا على أتمِّ الاستعداد لما سأكابده في الطريق...الذي ظننتُه سيفرَشُ وروداً أمامي...ما إن اكتشفت ُ بأنَّها وعرةٌ مليئة بالحجارة..

أقفُ الآن بروحٍ أُخرى..فهذهِ ليست أنا..
ولا هذه همَّتي التي اعتدتُ عليها..
ولا هذا جهدي الذي وددتُ أن أبذله..
أين أنتِ يا أنا من ذاك الكم الهائل من الطُّموحات؟!

ولكن بتلك الروح.. أو بثانيها.. أو بثالثها..

ف بتعبي و حُزني ..بصمتي و جنوني..و فرحي
أقولها و بملءِ قلبي..
سأكونُ يوماً ما أريد..لا الرحلة ابتدأت..ولا الدَّربُ انتهى..💚
هل يُعقَل أن تقف على جبهةٍ ولا تستريح كما المُقاتِل؟
ابنِ لنفسك طُرقاً جديدة..
نحنُ الذين نغيّر الطَّريق كُرمَةً لعينيّ الهدف..فكان ولا زال دوماً يستحقّ
ولا تنسى إن طريق الذي سنسلكه صعب
وليس بالسهل❤️
@NerdatBac

عم تتلهى مو؟ 🙂


و غيرك قاعد عم يدرس و ماشي و رح يخلص المادة، و انت خليك نايم بالتلغرام ! بكرا خليه يفيدك بالفحص

ايمت رح تحس على حالك! انت طالب و قدامك مستقبل! و أهلك متأملين فيك!

يا اخي شيل اهلك ع جنب ، مشانك انت!
ما بدك تنجح! ما بدك تجيب معدل! ما بدك تكون شخص مهم و عندك مكانة مرموقة! بين اهلك و ناسك ! و مجتمعك!

ترا ألم الدراسة و السهر و التعب كلو يروح، و الي بضل ألم الحسرة و الندم و ياريتني درست! قوم لسا عندك وقت!

كافي تتلهى
وقوم ادرس♥️
ضميركن النايم فيقوه
حتى لو برد معلش
فترة وبتمر
مارح تضل طول العمر قاعدة ع قلبكن


يلا خلصوا مراجعة المادة وبلشوا بحل النماذج
مشان تروح ع المادة و ثقتك بدراستك عالية🤍💪🏻

موفقين
#nedal@NerdatBac

#أوهام!

عم تدرس بس حاسس نفسك ما رح تجيب علامات و ما رح تنجح!

هي أوهام، لأن تعبك ما رح يضيع ابداً اطمئن! و حتى لو درست شهر واحد لو يوم واحد ساعة وحدة رب العالمين ما رح يضيعها ابدا!

أوهام

عم تدرس بس عم تسأل نفسك يا ترى رح يجي شي من الي عم ادرسوا ؟ معقولة هاد الشي الي درستوا يجي منو !

اي نعم بيجي من الي درستوا ليش مستغرب؟ كل الأسئلة تجي من الكتب، من الشغلات و الدروس الي عم تدرسوها فلا تفكر زيادة و اتخلص من هيك تفكير!

أوهام

عم تدرس و بتحس حالك مو متذكر اي شي، و عم تسأل نفسك كيف رح اتذكر كل هالشغلات وقت الامتحان؟ و تيأس و تتعب نفسياً!

كل شي درستوا رح تتذكروا وقت الامتحان، ولا حرف واحد رح يغيب عن بالك، كلو رح يجي غصباً عنو مع أول 5 دقائق بقاعة الامتحان!

خايف من الامتحان و عم تحسوا شي كبير، و صعب و من هلق بترجف كل ما قرب موعد الامتحان و في براسك فكرة انو انا ما فيني عالامتحان الاخير و ما رح انجح !

أوهام فقط و وسواس، الامتحان الاخير أسهل من الي قدمتوه ، ولا في أوضح منو ، و مافي داعي للخوف لان امتحان اقل من عادي! و كل ما قرب موعد الامتحان، عم يقربب مَوعد نجاحك و خلاصك.. ف افرح ولا تضوج!

تخلصوا من كل هالأوهام، و استمروا وإن شاء الله بتنجحوا بأعلى العلامات❤️
#nedal @NerdatBac

ابداً لا تقارن نفسك بغيرك ، فلان وصل للوحدة العاشرة و انا لساتني بالوحدة الأولى !
وهاد خلص مراجعة المنهاج وانا لسا

فلانة رح تبلش تعيد اول السنة و انا لسا ما خلصت نص المنهاج

كل طالب منكن ظروفوا بتختلف، قدرتوا عالحفظ و الفهم بتختلف ، حتى بيئتوا بتختلف! كل شخص الو حياتوا!

إذا بدك تقارن حالك بحالك
يعني انا مبارح مادرست ليوم درست
معناها في تقدم.


وانت الي عليك تدرس و بس، و تنسى العالم الخارجي ، وتنسى كلام رفقاتك خصوصاً الي بقلك انا موصل لهون و انت وين وصلت!

بعد عن كلشي ، دراستك بس ، الي بيدرس و ما بيهتم لحدا صدقوني رح يوصل ، اما الي بضل تفكيروا مع فلان وين وصل ، و هاد وين صار ، و انا لساتني.. رح يتعب كتير ع الفاضي.

هل فترة ضروري دراستك وبس

و قصة ما بنلحق شيلوها من بالكم ، بتلحقوا و كلشي . انت بس درست رح تأنجز شي ، رح تمشي بالمادة ، رح تسيطر عليها ، رح تخلصها..

بس ادررس بتلحق ❤️

اهم شي التركيز ولا تشتت مخك بغير افكار ممكن تأثر فيك

موفقين💚

#nedal @NerdatBac

بهي الفترة مو بالضرورة لما يوصلك رسالة تمسك موبايلك و تبلش تتسلا و تضيع وقت و تمرق دقايق بحجة الرسالة

حتى لو الرسالة مني او من استاذك او من اي حدا كان قد ما كان مهم لان بس تذكر شغلة ( فحصك قرب👀 )

خلي وقتك منظم بين لحظات تمسك فيها موبايلك تشوف الشي المهم ووقت صغير للرياحة تعمل فيا الي بدك ( لا تتجاوز 30 دقيقة كل ساعتين دراسة )

ووقت الدراسة خليه مقدس ما يقطعو الا الشديد القوي ( لاسمح الله )

ونصيحة اخيرة لا تدرس لانك مجبور عالدراسة
ادروس لان انت بدك تدرس لان انت حابب تدرس
لان اذا رح تتعامل مع دراستك كأنها شي ملزم و مجبر عليه رح تستغرب من نملة عم تتمشى قدامك عالارض كأنو حدث مهم

#كمشة_توعيات

#nedal @NerdatBac

السلام عليكم 🌸
كيفكن ؟

حابة احكي كلمتين من قلبي لقلوبكن التعبانة 🌸🤍

مشان اللي عم يقولو تعبنا وملينا وما عاد عنا قدرة انو نمسك القلم حتى🙃

صدقوني هي المشكلة بتصيب كل الطلاب بهالفترة بس الشاطر هو اللي بيطلع منها وبيتغلب عليها 🔥🌸

لازمكن تحطو ببالكن شي انو كل ساعة دراسة زيادة هلأ حتغيرلكن فرعكن ومستقبلكن كلو 🌸🍇
معقول مشان كم يوم وكم ساعة تعب واحباط وضعف تكملو بقية سنين حياتكن بمكان ما بتحبوه ولا بدكن اياه 🥺

صدقوني لما الانسان يحط براسو هدف ما في شي بالكون قادر يوقف بطريقو 🌸
انتو اللي بتتحكمو بعقلكن مو العكس 🌝
قاومو اي شي عم يخليكن تتشتتو معلش يعني فترة وبتمر اطلعو منها منتصرين مو مهزومين ومكسورين 🥺🌸

اما بالنسبة للي بقول انا تعبت بس خايف يضيع تعبي 🙂

الكلام هاد الك اقرأو وفكر فيه منيح 🌸

لما تسعو وتعملو اللي عليكن وما تجيبو نتيجة تعوضكن وترضيكن انتو هون عالأقل قدمتو عذركن 🌸
وهون ما بتزعلو لان هي بكون قدر رب العالمين الكن واقدار الله النا هي الخير فمنرضى ومنكمل رحلتنا بالحياة 🌸🍇

اما اذا ما سعيتو وقررتو توقفو بآخر هالطريق وتبطلو سعي هون رح تضلو ندمانين طول عمركن وبتكونو ظلمتو حالكن وتعبكن واهلكن معكن 🌝

انتو ملوك قراراتكن و مستقبلكن بايدكن وهاد واجبكن واقل شي فيكن تعملوه هالفترة انكن تتابعو رحلتكن وتقاومو تعبكن وتدرسو ما في شي اهم من هالشي بحياتكن هالفترة 🌝

لهيك اعقدو العزيمة وصدقو المسعى ولا توقفو والكن الأجر ما في شي بضيع هيك حاشاه رب العالمين يظلم تعبكن او يضيعلكن مثقال ذرة من تعب 🌸🥺

كونو اقوياء وفخورين بحالكن متل ما نحن فخورين فيكن وبالشي اللي رح توصلو الو بعد كم يوم ان شاء الله 🌸🍇

بدي وعد منكن انكن ما حتستسلمو لو شو ما صار كل شي معكن وكل شي منظم الكن ولصالحكن ونحن كلنا معكن لآخر لحظة ما عليكن تفكرو غير انكن تدرسو وتوصلو لأحلامكن وتدعو انو أقداركن تكون هيي نفسها أحلامكن 🌸🌸🍇

ربنا يأكرمكن بمراد قلبكن ويلهمكن للاجابات الصح ويجبر بخاطركن ويعوضكن ويفرح قلوبكن وقلوب اهلكن باللي تتمنوه وما نشوف غير الفرح بعيونكن 🌸🌸

موفقين كتير بكل خطوة بتخطوها 🌸🌸🤍🤍

#Engy ❀
@nerdatbac

#رسمياً || يوم الخميس هو أول ايام رمضان المبارك في سوريا 🌙

💥💥💥متل ما عودّناكم💥💥💥

كُتيّب صغير يحوي على عدّة نقاط و منها :

▪️لماذا نعتبر رمضان فرصة للتركيز بالدراسة 🤔؟
▪️ماهو تأثير الصيام على الصحة بشكل عام 🤔؟
▪️أيمتا تدرس وكيف🤔؟
▪️كيف بدي نظم وقتي🤔؟ إذا بتدرس ( بالنهار ـ الليل )

كل هالاسئلة اللي ممكن تخطر ببالك جوابها بالملف ✅

بالإضافة لهاد الفويس اللي جداً هام أضغط »»هنا

من فريق النيردات.. رمضان مُبارك ♥️

و تفاعلوا 🌚💥