✅وعليكم السلام أهلا وسهلا بيكم

1️⃣ بالنسبة لسؤالكم الأول، اي خياراتكم جيدة

أما الانكليزي شوفوا، اني استاذ محمد العبيدي ما متابعه بس يمكن يعني يفيد الطالب اللي اساسه ضعيف (ما شايف محاضراته بس حسب نظرة بسيطة)
بس بما أن انتم عجبكم وشفتوا محاضراته وفهمتوا عليه اوكي ماكو مشكلة أكيد بعد

2️⃣ ➕3️⃣ نصائح تمام...
📌بما أن انتم الكتروني ف المطلوب منكم أن تحاولون بكل ما عندكم ان ما تخلون تراكمات، اني جنت يعني الحمد لله ما مخلي تراكمات واذا خليت قليل

📌الامتحان التراكمي تقرون اله كلش زين وتراجعون اله قبل الامتحان

📌اني اكيد ما جان كل يومي قراية، اكو اوقات استراحة، لعب، مشاهدة بعض الاشياء اللي احبها... حتى طوبة جنت العب
بس بوقت معين

📌وانتم كون من تقرون تخطوون، يابة اني اليوم مقررة اخلص محاضرات اليوم الثلاثة واقرا مثلا اثنين منهم او ثلاثتهم
واذا زاد وقت اقرا مادة ما مسجل بيها... وهيج افكار ومخططات
اذا تردون جدولي اليومي مال سادس شنو جنت اقرا ويا مواد
كلولي ادزهن الكم

📌والسجلات قصدكم للجدول اليومي؟ اذا هيج اي كلش يكفي
واذا قصدكم لكل مادة ملاحظات وكذا همين ابو ال100 يكفي
انتم اكتبوا اكتبوا وعود اذا خلصن اشتروا

📌 الوزاريات اي، ورة كل محاضرة تشوفوها وتقروها بالملزمة ومثلا كتاب (تقارنون وي الملزمة)... شوفوا الوزاريات وحلوهن ....

📌وسالفة المزاج كلتلكم اني ما جان يومي بس قراية جنت اسوي بعض الاشياء اللي ذكرتهن فوگ.... والهدف مالكم خلوه ببالكم حتى لا يخرب واهسكم

📌ووقت قرايتي تقريبا الصبح وجنت احاول اخلص قراية ب١١،١٢ بالليل

لا تنسوا تحييون هذا اليوم وتقرون على الأقل بعض الأدعية 🌸

أني اتذكر دعيت هواي بهذا اليوم وإحدى الأشياء اللي طلبتها هو أن أخلص السادس بسلامة وبمعدل عالي والحمد لله🤍

كُلُّ عَامٍ وَأَنْتُمْ بِخَيْرٍ بِمُنَاسَبَةِ عِيدِ الْأَضْحَى الْمُبَارَكِ 🌷

📌أَعَادَهُ اللَّهُ عَلَيكُم وَعَلَى أَحْبَابكُم بِالْخيْرِ وَالْبركَاتِ وَقُلُوبُكُمْ طَاهِرَةٌ نَقيَّةً وَغَفرَ اللَّهُ لَنَا وَلَكُمْ وتَقبَّل منَّا ومنْكُم صَالِحَ الأَعْمالِ وَرَزَقُكُمْ سَعَادَةً لَا تَزُولُ ، وَرَاحَةً لَا تُفَارِقُكم وَأنْ يُثَبِّتَنَا وَإِيَّاكُمْ عَلَى نَهْجِ مُحَمَّدٍ وَالِ مُحَمَّدٍ 💙🩵
#١٠_ذو_الحجة

🔴السلام عليكم ، انت تدرس الفرنسي المنهج الجديد ؟

على اي مدرس وعلى اي ملزمة درسته بلا زحمة واذا طالب اساسة مو قوي بي يكدر يجيب بي درجة كاملة اذا التزم بدراسته ؟

✅وعليكم السلام
اي جنت منهج جديد
درست بعض الفيديوهات اللي لكيتهن على القواعد مالتنا لكم مدرس

وجنت ادرس على ملزمة استاذ وقاص
والطالب اللي اساسه مو قوي يكدر يقرا المنهج ويكرر هواي اثناء قرايته ويحفظ كلمات ومعاني.. وان شاء الله يكدرله