السلام عليكم بنقل لكم تجربتي مع شركة okmobility من مطار ميلان

نصيحه اللي بيستاجر سيارة من شركة okmobility ينتبه لانهم يحاولون يضيفون لك اضافات ابلشتتنا الموظفه الله لا يكثر اشكالها الين اخذنا اضافة مساعده على الطريق مع ان تاميني بريميوم تقول ماله دخل خاصة يوم درت انه بنطلع برا ايطاليا
كذلك قالت تستلم السيارة بنزين فل وتسلمها فل تفاجاءت ان السيارة ناقصه مو فل ولقيت غيري كم واحد من اللي استاجرو نفس الوضع معطينهم بنزين ناقص وتفاهمت معهم وقالي الموظف اللي سلم السيارة عادي صور الطبلون فيديو واذا جيت تسلمها رجعها مثل ما استلمتها نفس الكميه وفعلا سويت اللي قال ووريتهم المقطع وقالي خلاص تمام والان بفك الوديعه وللان ما رجعت الوديعه
عموما الشركه سعرها المعروض رخيص لكن بعد ماتاخذ التامين يتغير السعر مقارب لسعر الايجاروبالمكتب بيحاولون يزيدون عليك كذلك نقطه اخرى زحمه عندهم عادي تمسك سرا ٤٠دقيقه عكس المكاتب الاخرى مثل يورب كار او سيكست او بدجت شركات ارقى ولا عليهم زحمه
نصيحتي اذا الفرق بسيط استاجر من هالشركات افضل منها
هذي تجربتي الشخصيه
وسؤالي الى متى تنصحون اصبر على الوديعه يعني اقصى حد ممكن ترجع للبطاقه عشان ارفع نطالبه لهم بها

اسمحوا لي اشارككم تجربتي
رحلتي انا وعائلتي (زوج وزوجه وطفله)كانت على طيران ويز من جده الى ميلان تاريخ الحجز كان قبل ستة اشهر ثلاث مقاعد وشنطتين 26 كيلو ب2800 ريال تاريخ السفر كان 13 مايو والعوده 27 لكن قبل الرحلة بشهرين جاني ايميل بتعديل التواريخ صار الاقلاع يوم 14 مايو والعوده 28
بما ان رحلات ويز توصل الساعه 12 ومكاتب ايجار السيارات مغلقه اضطريت احجز ليلة في فندق idea ب400 ريال في مطار ميلان الصباح استلمت سيارتي من شركة Noleggiare (اخذتها عن طريق rentalcar) الحجز كان سيارة متوسطة هايبيرد وصلت اعطوني بيجو 3008 عرضو علي تأمين شامل وكان ب800 يورو رفضت وحجزوا وديعه 800 يورو وتوكلت على الله قيمة ايجار السياره مع رسوم خروج السياره لدوله اخرى 2000 ريال
اتجهت ل ريفا ديغاردا قضيت فيها يوم واحد في سكن حجزته من موقعهم وكان ب370 ريال
(غاردا حقها يومين انا قلصتها ليوم عشان التغيير الي صار في الرحله) بعدها اتجهنا للشمال سكنت قريب من اورتيجي في سكن اسمه Radhof من بوكينق جميل جداً وانصح فيه 4 ليالي ب1800 ريال بعدها اتجهنا الى النمسا وتحديداً في قرية قريبه من fiss في سكن اسمه Apartment skyline ليلتين ب650 ريال بعدها اتجهنا لسويسرا سكنت في Energy Lodge ب2150 ريال عن طريق بوكينق السكن جميل جداً انصح فيه يبعد 40 دقيقه عن انترلاكن بعدها يومين في ميلان في سكن سيء لايستحق الذكر قبل قليل سلمت السياره بدون اي ملاحظات الحمدلله والان في اللاونج بإنتظار رحلة العوده 😁
وسلامتكم

هذا الرز أخذناه من بيلا بسمتي ممتاز وحبة طويلة وزي الرز اللي عندنا بالضبط وسعره أرخص من عندنا

روزنهايم مدينة صغيرة لا اعتقد أنها تستحق الزيارة ما فيها شيء مميز.

زرناها قبل ثلاث سنوات من أجل زيارة احد الاقارب في مستشفى عظام شهير بالبلدة المجاورة باد أيبلينغ يأتي اليه كثير من العرب علاج على حساب دولهم.



سكنا في بيت عجوز المانية استأجرنا شقة علوية وفيها عليّه🤗 وكان اليوم ب ٥٠ يورو .

جلسنا فيها أسبوعين ونتردد على ميونخ وتبعد ساعة وزيلامسي تبعد ساعتين .

وكان الطقس مرات امطار ومرات شمس وبالمجمل كان الطقس رائع وذلك في منتصف يونيو إلى نهايته.

كسائح ما انصحك وكعابر طريق لازم تتغدا او تتعشى عند مطعم تاج محل الهندي وبعدها تدعي لي🤝.

هذا موقعه

https://maps.app.goo.gl/jYDJGxXSF2S6hEXE9?g_st=ic

اغلب المصطافين اللي فيها جايين للعلاج .

سلام عليكم
بعطيكم تجربتي مع شركة سيكست للسيارات قد استأجرت منهم شهر اكتوبر 2023 وقتها مستأجر ولمن وصلت المطار وانا قد مستأجر ودافع الفلوس من التطبيق واتحايل عليا شكله يقول السياره ماهي موجوده السياره ووو الين دفعت زياده واخذت سيارة ثانيه المهم بعد تجربة احد الاخوان في القروب هنا وقال على تعليق قوقل ماب المهم ارسلت لهم ايميل قبل اسبوع وعلمتهم ب الي حصل وارسلت الاثباتات الفواتير واليوم رجعولي مبلغ الزياده الي دفعته واشكر كل من نوهنا على النقطه هاذي

الحمدلله تم العوده الى ارض الوطن بالسلامه 🇸🇦

بعد رحلة الى النمسا - الشمال الايطالي - سويسرا

هذي الفنادق اللي استأجرتها خلال رحلتي للفائده للجميع.

الفندق الاول في بيسندروف بالقرب من كابرون الاطلاله فيه جميله

https://www.booking.com/Share-mXYUZ0


الفندق الثاني في وادي زيلرتال اطلاله جميله وفيه جميع الخدمات وغسالة ملابس بدون افطار.

https://www.booking.com/Share-lXU3D9

الفندق الثالث في الشمال الايطالي ، فندق في مزرعه ممتع للاطفال فيه حيوانات اليفه ارانب واغنام ودجاج وقطط والعاب ومراجيح ومسبح، ومتوفر فيه جميع الخدمات وغسالة ملابس، بدون افطار

https://www.booking.com/Share-g8G3Xt

الفندق الرابع في شرق سويسرا بالقرب من قرية ابنزل اطلاله جميله على الوادي مع الافطار.

https://www.booking.com/Share-KlUlDqg

الفندق الخامس في سويسرا بمنطقة لوسرن ، اطلاله على البحيرة ، مع الافطار

https://www.booking.com/Share-5weo3v1

الفندق الاخير قبل العوده بالقرب من مطار ميونخ، فندق جميل جدًا ورايق وغرف وسيعه ومريح شامل الافطار

https://www.booking.com/Share-QPqw8Y



واجازه سعيده للجميع حفظكم الله جميعا من كل شر ومن كل مكروه 🌹

صباح الخير
اضطريت الغي حجوزاتي في ايرينب
متى ترجع لي المبالغ
اللي عنده خبره يعلمني شاكره لكم

اليوم رجعوا لي مبلغ على فيزتي وهذي ثلني مره معهم

يومين ورجعوها لي
سريعين

بس فيه حاجة انه ترى ماجاتني رسالة بال Refund انا ادخل من نفسي على التطبيق واشيك

صباح الخير الي يبحث عن شريحة الكترونية في اوروبا رحلتي كانت لمدة اسبوع باريس وامستردام والقرى حولين امستردام بصراحة شريحة جداً ممتازه ورخيصة لمدة اسبوع حدود 95 ريال ومفتوحة ويعطوك رقم بريطاني ايضاً وتدعم اكثر من 20 دولة في اوروبا

https://etravelsim.com/collections/top-selling-products/products/europe-esim?aff=34

اول مرة اجربها صراحة مريحة جداً ⭐️⭐️⭐️
بس ضروري فعل الشريحة الإلكترونية قبل ماتسافر
لان التفعيل يحتاجله انترنت
وتأكد ان جوالك يدعم الشريحة الإلكترونية رغم واغلب الاجهزة الجديدة تدعم هذا الشي .

وصلت الحم لله مطار براغ. شنغن فرنسية اول دخول. سالوني سؤالين كم يوم وسبب الزيارة وتم التختيم الحمد لله

النت شريحة الكترونية من mobimatter واشتغلت قبل تنزل الطيارة للمدرج

شكرا لكم بحجم السماء

مطعم في ميلان ( باستا وبيتزا ) وعندهم اثنين عرب من مصر ( محمد صلاح و ادم ) حبيبين جدا ويخدمونك ف الطلب .. المطعم عنده بعد تراميسو بطططل .. والاكل كان بطططل جدا انصح به وهذي طلباتي 👍🏼♥️

الزملاء اللي يسألون عن تعريف الراتب باللغة الإنجليزية من نظام فارس وموجه للسفارة

عادي جدا تقدر تطبعه باللغة الإنجليزية وبكل سهوله:

1 - اختر اللغة : انجليزي قبل كل شي
لازم تخار اللغة الإنجليزية قبل كل شي


2- اختر نوع التعريف
شهادة تعريف بالراتب أو شهادة تعريف بإجمالي الراتب

3- اضغط على نوع الجهة المرسل إليها
بتلاقي مكتوب : سفارات الدول بالمملكة
ثنتين ورى بعض اختر الثانية

5- اضغط على سهم البحث في خانة اسم الجهة المرسل إليها

6- تفتح معاك نافذة اضغط على انتقال وبتلاقي كل السفارات
حدد السفارة ومن ثم اختيار وطباعة

📣 موقع لمقارنة شرائح e-sim

بناءً على الاقل سعر وافضل تغطية حسب الدولة المراد السفر لها 👇🏻

https://esimdb.com

فقط : قم باختيار الدولة واستعرض الشركات الافضل 🌹

الحمد لله عدنا إلى أرض الوطن بعد رحلة جميلة لمدة 16 ليلة مكونه من زوجين و٣ اطفال.

- الرحلة على الخطوط السعودية نوع الطائرة ايرباص 320 مزودة بشاشات ترفيهيه وتم الحجز في رمضان عن طريق الاميال الصادرة من بطاقة الفيزا ودفع رسوم حجز 4400 ريال ل 5 أشخاص، وبالمناسبة شحنت معي كرسي طفل ومقعدين معزز مجاني.

- الوصول لميونخ والعودة من زيورخ

- التأشيرة فرنسة.

- عند الوصول لموظف الجوازات تم اظهار الحجوزات الاكثر اقامة وهي حجوزات فرنسية قابلة للالغاء وتم الدخول بنجاح وسلاسه، طبعاً سمعت عن تشديد الالمان بالمطارات ولا شفت أي شي من هالقبيل، والحقيقه كل اللي معي بالطياره دخلوا بسلاسه المهم حقق الشرط وخلك نظامي وأمورك بالسليم.

- تم الاتجاه لمكتب يورب كار لاستلام السيارة والحجز كان بكود اللي اخره 53 وعنوان امريكي عشان يعطين عداد مفتوح والسعر يطلع اقل، والوديعة 100 يورو مع العلم بأنه تم رفع السعر بحجة أن السيارة غير متوفر مثلها، المهم دفعت واستلمت السيارة وبعد ما ريحت ارسلت بريد للشركة ووضحت لهم كل شي ووصلني رد اعتذار منهم والغريب تم اعادة كامل المبلغ والمفروض يرجعون الزيادة فقط، ولكن ما ادري وش وضعهم.

- اتجهت لقارميش وسكنت بفندق لمدة 3 ليالي وركبت التلفريك والزحليقه حقتهم وزرت السنتر.
هذا رابط السكن
https://www.booking.com/Share-eZJDZy

الفندق يمشي الحال

-بعدها اتجهت للنمسا وجلست فيها 10 ليالي وزرت زيلامسي وكابرون وسالزبورخ وعدة امكان اروح لها وارجع بنفس اليوم والفعليات كلها قريبه، طبعا السكن يبعد عن زيلامسي 8 دقائق وكابرون 5 دقائق واعجبني السكن حقيقه، دورة المياة فيها شطاف وفي كل غرفه TV فيه يوتيوب ممتاز للاطفال، ويوفر بطاقة زيلامسي ب 13 يورو مدتها يومين وفيها مطبخ متكامل والحاره اللي فيها الفندق مريحه.
هذا رابط السكن
https://www.booking.com/Share-6VHY6T

طبعا اللي بيزور (مصنع لواكر) بالطريق بتدفع رسوم طريق تقريبا 13 يورو وبالرجعه طلعت له فاتورة الدخول ودفعت نصفها 7 يورو وللمعلومية ترا ما تدخل المصنع، تدخل المتجر والكوفي حقهم ولكن اسعاره ممتازه وفيه منتجات غير موجودة عندنا، وحسب افادتهم بانه كله حلال وقريت أغلب منتجاتهم مافيه لا كحول ولا دهن خنزير.


وأيضاً اللي بيزور (متجر شوكولاته ليندور) موجود بسالزبورخ اقرب متجر لزيلامسي وكثير منتجات عندهم فيها كحول ولكن حاطين عليها ورقه صغيره توضح ذلك.

- ثم اتجهت الى فيلدكريتش بالقرب من الحدود السويسرية وفي الطريقة مريت على انسبورك وتغدينا بمطعم عربي سوري رائع وأسعاره معقوله ورحت لمول عندهم وكملنا الطريق.

سكنت في فيلدكريتش 3 ليالي والسكن قريب من (بيت هايدي) بسويسرا يبعد 30 دقيقه وقريب من (مصنع شوكولاريوم مايستراني) الدخول له برسوم وتدخل المصنع تشوفه من فوق وفيها فعالية إعداد شوكلاته تصلح للاطفال وتأكدو قبل شرا شوكولاته انها خاليه من الكحول ودهن الخنزيز.
وأيضا المدينة وما حولها يوجد فيها مراكز تسوق.

هذا رابط السكن ويمشي الحال.

https://www.booking.com/Share-Ar2xpV


ثم العودة من مطار زيورخ ويبعد عن السكن ساعه ونص.
بالنسبة لمطار زيورخ تفتيشهم شديد، يعني مثلا معي بشطنة اليد عصيرات مزاز وحليب نادك مزاز ، وشراب فيفادول، طلعوها وجلسوا يفحصونها ودخلوها في جهازين عندهم ثم تأكدو من تواريخها ثم رجعوها لي. طبعا كان دخولها كسوائل عندهم مسموح خاصه إذا معك اطفال بس بيتأكدون من خلوها من ممنوعات والتواريخ.

طبعا هذا مختصر للرحلة والحقيقه واجد الاماكن اللي زرتها والفعليات ولكن كتبت لكم المفيد.

السلام عليكم
أسعد الله صباحكم
وصول أمس كان لميلان🇮🇹 والڤيزا فرنسية. الحمدلله الوضع عدى بسهولة وماكان فيه زحمة كبيرة. الموظف ما سألنا أي سؤال مجرد تختيم وانطلقنا نستلم السيارة.

حبيت أنقل التجربة للقادمين والله يسهل أمور الجميع 💚

تجربة تأجير سيارة في النمسا :
الشركة abrix قابلني الموظف في فندق لايف هوتيل فينا قريب من المطار رسوم التوصيل 30 يورو وصلها لي قبل الوقت بعد ما كلمته بالواتس وسألني ان كان عادي يجيبها ابكر ووافقت، سلمني سكودا فابيا السيارة تشيل 5 بحد اقصى والشنطة تكفي شنطتين سفر كبار مع اشناط صغيرة او اكياس فوقهم ، التأمين SCDW وتأكدت من الموظف انه مثل البريميوم يغطي الخدوش والصدمات وغيرها باستثناء التلف الكلي للسيارة بالاضافة للاطارات والزجاج ولاحظته كان دقيق بالتشييك على السيارة لدرجة يعتبر بعض الخدوش الصغيرة جدا عيب فما انصح احد ياخذ منهم بدون تأمين، طبعا قالي تستلم السيارة فل ترجعها فل وماجاب طاري تغسيل السيارة، برضوا اخذت منهم ستكر النمسا ب 10 يورو وعندهم خدمات مجانية مثل الكار سيت والسائق الاضافي، باختصار التجربة مميزة معهم وناوي اكررها ان شاء الله، حاولت اذكر كل شيء في حال اذا فيه استفسار انا حاضر.

هدي خريطة لكل الأماكن السياحية في فيينا

تفيدك كثير

الخريطة السياحية لمدينة فيينا الجميلة · الجمال الأوروبي
https://maps.app.goo.gl/3vbLGNS4nEFTxZw68?g_st=i

السلام عليكم جميعا. بالنسبة للي موجودين في زاكوباني أو للي بيزورها ترى مواقف سوبرماركت Lidl إللي في السنتر مجانا لمدة ساعة فقط أكثر من كذا مخالفة ٢٠٠ زلوتي فعشان يبين إنك ماتعديت الساعة لأن مالها بوابة او كاميرات فتحتاج تقطع تذكرة من الماكينة الموجودة عند مدخل السوبرماركت وتحط وقت الإنتهاء بعد ساعة وتحط الورقة عالطبلون. غير كذا مافي شي يثبت لهم إنك ماتعديت الساعة بدون ورقة وتنزل عليك مخالفة