የውጭ ሀገር ዝርያ ያለው ውሻ እና የተለያዩ ንብረቶችን የሰረቁ ተከሳሾች በቁጥጥር ስር ውለው ክስ ተመሰረተባቸው፡፡
***
አዲስ አበባ፤ ሰኔ 11 ቀን 2018 ዓ/ም (አዲስ ፖሊስ)፦ ተከሳሾች ሐብታሙ ታፈሰ፣ ዳንኤል ሰለሞንና ይስሀቅ ታደሰ የተባሉ የወንጀል ድርጊቱን የፈፀሙት በጉለሌ ክ/ከተማ ወረዳ 5 ልዩ ቦታው አስኮ ጨረታ ተብሎ ከሚጠራው አካባቢ ነው።

ተከሳሽ ሐብታሙ ታፈሰ በተጠቀሰው ቀንና ቦታ በቀን ሰራተኝነት ተቀጥሮ ከሚሰራበት ከአንድ መኖሪያ ቤት ቅጥር ግቢ አጥር ዘሎ በመግባት ግምቱ 50ሺህ ብር የሚያወጣ አንድ የውጪ ሀገር ዝርያ ያለው ውሻ፣ 47 ሺህ ብር ግምት ያለው የቀለም መቀቢያ ኮፕረሰር ማሽንና ብረት መቁረጫ ግራይንደር በመስረቅ ዳንኤል ሰለሞን እና ይስሀቅ ታደስ ለተባሉ ግብረ አበሮቹ በማቀበል ንብረቶቹን ይዘው ተሰውረዋል፡፡

በጉለሌ ክ/ከተማ ፖሊስ ዋና መምሪያ የአስኮ ፖሊስ መምሪያ የደረሰውን ሪፖርት መነሻ በማድረግ ባደረገው ጠንካራ ክትትል የመጀመሪያውን ተጠርጣሪ በቁጥጥር ስር አውሏል።

ፖሊስ የምርመራ ማስፋት ተግባሩን በመቀጠል በአባሪነት ወንጀሉን የፈፀሙትን ዳንኤል ሰለሞን እና ይስሀቅ ታደስ የሰረቁትን ንብረቶች በተከራዩት ቤት ውስጥ ደብቀው በማስቀመጣቸው ከነኤግዚቢቱ በቁጥጥር ስር ሊያውላቸው ችሏል፡፡

ፖሊስ ምርመራውን በሰውና በሰነድ ማስረጃ አጠናቆ በክፍለ ከተማው አቃቤ ሕግ በኩል ክስ እንዲመሰረትባቸውም አድርጓል፡፡

ህብረተሰቡ ለንብረቱ አስፈላጊውን ጥንቃቄ ማድረግ ይኖርበታል ያለው የአዲስ አበባ ፖሊስ ዋና ጠቅላይ መምሪያ ማንኛውም ግለሰብም ይሁን ቡድን ወንጀል ፈጽሞ ከህግ ተጠያቂነት ማምለጥ እንደማይችልም መልዕክቱን አስተላልፏል፡፡
*
ዘገባ፡- ም/ሳጅን ሳምሶን ሰለሞን