ራስህን ተከላከል‼️

መንግሥታዊ ክርስቲያን የማጽዳት ዘመቻውን ሽፋን ለመስጠት በየሳምንቱ ታቦት አንግሦ ማንጫጫት፣ ሕንፃ መመረቅ፣ የገንዘብ ገቢ መዘገብ፣ የጉብኝት ቪዲዮ መለጠፍ የዘሠናችን የብልጽግና ወንጌል ምርኮኛ የጎሳ ጳጳሳት ሥራ ሆኗል።

ክርስቲያን ምእመንና ከልቡ እምነት ያለው ካህን መተባበር፣ መነጋገር፣ መንቃት፣ መደራጀት፣ ራስን ከዚህ ዘር አጥፊ ሥርዓት እና የፖለቲካ መዋቅራት መከላከል አማራጭ የለዉም‼️

" ከመብዛቱ የተነሳ ስለተለመደ ስለማይሰማ እንጅ ጥቃቱ አልቆመም። ምዕመናን ተገድለዋል " - የወረዳ ቤተክህነቱ እና የዞኑ ሀገረ ስብከት

በኦሮሚያ ክልል፣ አርሲ ዞን ተደጋጋሚ ጥቃት በታጣቂዎች ከሚፈጸምባቸው ቦታዎች መካከል ሆንቆሎ ዋቤ እና ሺርካ ወረዳዎች ውስጥ በተፈጸመ አዲስ ጥቃት 6 ምዕመናን ሲገደሉ ሌሎች መታገታቸውን የሺርካ ወረዳ ቤተክህነት እና የዞኑ ሀገረ ስብከት ለቲክቫህ ኢትዮጵያ ተናግረዋል።

ከአርሲ ሀገረ ስብከት አንድ አመራር ጉዳዩን አጣርተው በሰጡን ገለጻ፣ "በሆንቆሎ ዋቤ ወረዳ ሦስት ምዕመናን ተገድለዋል" ብለዋል። ግድያው የተፈጸመው ከዚህ በፊት ተደጋጋሚ ጥቃት ባስተናገደ "መጪቱ ላሎ" በሚባል ቦታ ጥቅምት 5 ቀን 2019 ዓ/ም መሆኑን ገልጸዋል።

ከሺርካ ወረዳ ቤተክህነት አንድ አመራር በሰጡን ቃል፣ "ጥቃቱ በአዲስ መልክ ቀጥሎ ምዕመናን ተገድለዋል" ብለዋል። የሟቾች ቀብር ትናንት እና ከሰሞኑ መፈጸሙን ገልጸዋል።

"የተለመደው ግድያ ነው የተፈጸመው ጥቅምት 2 እና 7 ቀን 2019 ዓ/ም ሦስት ምዕመናን ተገድለዋል። አምስት ሰዎች ደግሞ ታግተው ተወስደዋል። ቆስሎ ሆስፒታል የገባም አለ። የተለያዩ ሰዎች የሆኑ ወደ 50 ከብቶች በታጣቂዎች ተወስደዋል" ሲሉም ተናግረዋል።

" በጎረቤት ሆንቆሎ ዋቤ ወረዳ ጥቅምት 5 ቀን 2019 ዓ/ም ሶስት ሰዎች ተገድለዋል። ሆንቆሎ ላይ ይህን ጥቃት ካደረሱ በኋላ ነው በቀን 7 ደግሞ ሺርካ ላይ መጥተው ጥቃት የፈጸሙት" ነው ያሉት።

" 50 ሰዎች ታግተው ተወሰዱ" የሚል መረጃ እየተሰራጨ ሲሆን፣ የሺርካ ወረዳ ቤተክህነት አመራር ደግሞ "ያን እኔም አይቸዋለሁ በተለያዩ ማህበራዊ ሚዲያዎች ላይ ተለጥፎ፤ ግን የተወሰዱት #50_ከብቶች ናቸው፤ ሰዎች አይደሉም። ሺርካ ላይ የታገቱት አምስት ሰዎች ናቸው" በማለት ለቲክቫህ ኢትዮጵያ ተናግረዋል።

በአካባቢው የሚስተዋለውን ሁኔታ ሲያስረዱ፣ "ትናንሹ ጥቃት ከመብዛቱ የተነሳ ስለተለመደ ስለማይሰማ እንጅ ጥቃቱና ስጋቱ አልቆመም" ብለዋል።

ሀገረ ስብከቱ በበኩሉ የሟቾና ታጋቾችን ስም ዝርዝር አጋርቶ፣ ለጥቃቱ መፍትሄ እንዲሰጥ ጠይቋል።

በ​ጥቅምት 2/2019 ዓ/ም የሺርካው ጥቃት፥ ጌቱ አሰፋ የተባሉ ግለሰብ የእርሻ ሥራ ላይ እያሉ ከቀኑ 7 ሰዓት መገደላቸውን አስታውቋል።

​ጥቅምት 7 ቀን 2019 ዓ/ም እንደገና በሺርካ ወረዳ ለሊት በሄላ ዘንባባ ቀበሌ፦
1. ​አቶ ዘውዴ ኃብቴ
2. ​ወ/ሮ አስራሱ ተስፋዬ ተገድለዋል።
1. ​አቶ ፍርዴ አሰፋ
2. ​አቶ ገናና አሰፋ
3. ​አቶ እፋ ዘነበ
4. ​አቶ አስናቀ ዘውዴ
5. ​ወ/ሮ ወጋየሁ መርሻ በታጣቂዎች ታግተው ተወስደዋል ብሏል። ቀሲስ ናርዶስ አሰፋ ተቆስለው በሆስፒታል መግባታቸውን ገልጿል።

በሆንቆሎ ዋቤ ወረዳ ​ጥቅምት 5/2019 ዓ/ም፦
1. ​አቶ ዘነባ ነጋሽ
2. ​አቶ ሳሙኤል ዋሌ
3. ​አቶ ብሩህ አበራ ተገድለዋል ብሏል።

​በተለያዩ ወረዳዎች በተደጋጋሚ በሚከሰተው የጸጥታ ችግር ምክንያት ምዕመናን ከጊዜ ወደ ጊዜ እየተገደሉ፣ ከቀያቸው እና ከንብረታቸው እየተፈናቀሉ፣ ለከፍተኛ ችግሮች እየተጋለጡ እንደሚገኙ ገልጾ፣ የሚመለከተው አካል እነዚህን ችግሮች አጣርቶ ዘላቂ መፍትሄ እንዲሰጥ ጠይቋል።

ከቀያቸው እንዲሁም ከንብረታቸው ለተፈናቀሉም አስፈላጊው ሁሉ ጥበቃና ክትትል ተደርጎላቸው ወደ ቀያቸውና ንብረታቸው እንዲመለሱ አስፈላጊው ድጋፍ እንያረግላቸው እንዲሁም በአካባቢው ለሚገኙ ለቀሩት ሕዝብ አስፈላጊው ጥበቃ እንዲደረግላቸው አጥብቆ አሳስቧል።

ቲክቫህ ኢትዮጵያ
ጥቅምት 9 ቀን 2019 ዓ/ም

@tikvahethiopia