زملائنا الجناير:
كما قيل: العلم صيد ! والكتابة قيد !
ولو اعتمدت على الذاكرة ستفشل وتفقد كل العلم تقريبا !
لما كنت في الامتياز ولما كنت في النيابة
كان الله يمسيه بالخير د. محمد السباعى
من أمهر الناس علميا وأخلاقا سواء في فترة الامتياز أو النيابة
وكانت أكتر حاجة لاحظتها معاه
هي بلوك نوتس وقلم
وتقريبا مفيش حالة دخلت أو شافها
ومفيش معلومة عرفها
إلا وتقريبا كان بيسجلها
ورايح جاي معاه ورقة وقلم !
.
فيه ناس عندها حياء من الحوار ده
لكن العلم بيضيع بين الكِبْر والحياء
وبالتالي معظم علمك هيضيع لو مكتبتش كل حرف اتعلمته !
.
خلي ورقة وقلم معاك أساسي !
أو سجل في الموبايل كل حرف اتعلمته لو الموضوع مضايقك أوي ومش قادر تشيل معاك ورقة وقلم !!! بس غالبا مش هينفع ولو نفع مش عايزين غير كدة !

د.أحمد العسكري

عيان يجيلك بالتلاته مع بعض فكر ف pulmonary embolism

unexplained dyspnea

+ chest pain

+ haemoptysis

= pulmonary embolism

د. أحمد أبوشنب

للأسف في موضوع مسكوت عنه و هو الناس اللي بتبقى عاوزه تتعلم الغرز و خلاص و مبتقدرش الموقف

راعوا ربنا في العيان بتاعكم ، متخلوش حماس البدايات في الخياطة يعميكم عن حرمة العيان ، خصوصاً في الحالات زي دي ، طفلة بنوته يتخيطلها بخيط ٢ زيرو
حراام بجد

د. عبدالله ياسر

لو حسيت إن يومك عدى من غير إنجاز وبدأت تحس بالإحباط، اذكر الله

لأن الذكر ممكن يغفر ذنب، يكتب حسنة، يرفع درجة، يبني بيت أو يزرع نخلة في الجنة، يكون عدل تحرير رقبة، يعتق من النار

كل دى إنجازات حقيقية وملموسة هتشوف حصادها بنفسك فى الحياة الآخرة بسبب اللى هتعمله فى يومك ده.

- أحمد صالح.

ربنا يرحم زميلنا حسام ويرزقه الفردوس .. وخليني هنا أوضح كام نقطة عن الـ Bacterial Meningitis ،، وركزوا في اللي هقوله يا شباب.

١- الـ Meningitis عمومًا مش شرط تكون ناتجة عن عدوى بكتيرية .. لكن زيها زي أي عدوى تانية .. ممكن يعملها ڤايرس أو حتى فطريات

٢- الـ Meningitis .. بنشخصها بحاجة اسمها Classic Triad .. يعني ٣ أعراض بيظهروا مع بعض وهم :

• الـ Fever : مريض درجة حرارته عالية
• الـ Neck Stiff : مش قادر يتني رقبته لقدام
• أي Neuro Signs : صداع .. وعي أقل .. توهان

٣- مش كل حالات الـ Meningitis بيكون معاها الـ Classic Triad كامل .. لكن دول ٤٠٪ من الحالات فقط. يعني لو لاحظت اتنين منهم افترض إنها Meningitis حتى يثبت العكس

٤- لما بتعرف إنها Meningitis .. لازم المخالطين للمريض دا أو اللي استقبلوه واتعاملوا معاه ياخدوا حاجة اسمها Chemoprophylaxis أو وقاية دوائية

• الوقاية الدوائية الشائعة هي Ciprofloxacin 500 مرة واحدة فقط في خلال أول ٢٤ ساعة من مخالطة المريض .. بياخدها الطاقم الطبي وأهل المريض

٥- لو هنتكلم بالدليل الطبي المثبت هنقول إن الوقاية مش CiproFloxacin فقط .. لكنها بتتغير طبقاً لـ عمر المُخالط للحالة زي ما هوضح كده

• لو المُخالط للحالة كان طفل أقل من 15 سنة .. بياخد Ceftriaxon 250 .. تكتب كده لأهله ( حقنة سيفترياكسون ٢٥٠ عضل بعد عمل اختبار حساسية ) والحقنة بتتاخد مرة واحدة فقط

• لو المُخالط للحالة كان Adult زينا .. هياخد Ciprofloxacin 500 .. قرص مرة واحدة ( يعني تكتبله كده في ورقة Cipro 500 tab .. هاته من الصيدلية وخدلك منه قرص دلوقت وخلاص

د.أحمد الفقي

أصدقائي الأطباء و غير الأطباء و كل من هو في الدنيا غير دكاترة الأورام
محتاجين نفتكر معلومة بسيطة أوي أوي سوا
الا وهي انه العلاج الإشعاعى سواء ثنائي أو ثلاثي الأبعاد أو متغير الشدة او  او
بإختلاف التقنيات مش بيؤثر علي الأشخاص المحيطة بالمريض بعد إنتهاء الجلسة

اللي بنبعدهم حاجتين الناس اللي بتتلقي يود مشع و الناس اللي بتعمل مسح ذري و بتستخدم مادة مشعة وقتها بنبعدهم وكل حاجة ليها عدد ساعات معينة

لكن والله العلاج الإشعاعى مفيش منه أي مشكلة

قد يبدو لبعضكم الكلام basic ولبعضكم مكرر و لبعضكم معلومة مش مهمة
بس والله هتفرق

أنا مقدرة كل الأعذار بس الجهل بمعلومة زي ده و تحذير الناس من زيارة المريض بيؤثر فيهم بشكل مش هتتخيلوه

أنا هتخيله لأني بقابل الشكوي دي كل أسبوع

ليه بكتب البوست؟
علشان موقفين
واحد فيهم أب بياخد علاج إشعاعي تلطيفي و حالة متأخرة جداً و بنته مش قادرة تزوره ومنهاره لأنه جوزها مانعها بناء علي تعليمات طبيب النسا !!

طب ليه كدا طيب!
الذنب ده مين هيشيله؟

والموقف التاني انهرده بتحرك من القسم و مريضة بسيطة يا حبيبتي و كبيرة في السن في منتهي الغلب فاتحه تسجيل الموبايل بتقولي كرري تاني ابوس علي إيدك انه ولادي ينفع ييجولي البيت وانه مفيش خطر مني علي ولادهم

والله قطعت قلبي
متسيبوش مريض الأورام وهو بياخد علاج إشعاعي يا جماعة و زوروه عادي والله العظيم ما هيحصلكم أي حاجة!
وربنا يسامح كل اللي بيفتي ومش عارف أثر كلامه هيطول كام واحد وينور بصيرتهم

أخيراً بقي

أفتكروا النهارده في أيامنا الكريمة دي مرضانا الحلوين و ادعولهم بدوام الصحة و العافية🌸
©️الاء عادل

‏نصف جمال الإنسان لسانه، فأحسنوا حديثكم

- اي النصيحه اللى تديها لدكتور محمود وهو صغير؟

= أقول لنفسي حط الدنيا تحت رجلك وهي هتجيلك يعني لأن أنا كنت tension أوي ، كنت مركز أوي في شغلي ومش عاوز يفوتني هفوه ، كنت طَموح جدًا ومش عاوز حد ياكل الجو مني ، كنت تاعب نفسي ..

بس بعد ما كبرت قولت إن كان لازم أبقي هادي لأن ال ربنا كاتبه هو ال هيكون ف اعمل الي عليك وخلاص يعني دي نصيحتي ليكم اعمل ال عليك وملكش دعوه بالنتيجه خد بالأسباب وفقط ، شكرًا ..💗

- دكتور محمود علام

رسالة الى شباب الاطباء 💕 ✨

اسباب آلام فم المعدة قد تسبب الوفاة لازم تبقى عارفها وحاططها في دماغك عشان تعرف تشخصها :

جلطة حادة في القلب . Inferior MI
انشطار الشريان الاورطي dissection abdominal aorta
التهاب البنكرياس الحاد acute pancreatitis
التهاب المرارة الحاد المضاعف perforated acute cholecystitis
قرحة المعدة المضاعفة perforated peptic ulcer
انسداد الامعاء intestinal obstruction
جلطة في الاوعية المغذية للامعاء messentric vascular occlusion
حموضة في الدم نتيجة السكر dka

د. محمد إمام

اتصل بيا طبيب في السنة الثانية من الامتياز يستشيرني علي نوع معين من الادوية .. فكنت أظن أنه يستشير لاحد أقاربه .. ولكن انزعجت عندما اخبرني انه محتار في توظيفه لمريض قام بتوقيع الفحص عليه .. لان طبيب الامتياز ده ماسك الاستقبال بتاع مستوصف في إحدي القري .. طبعا لم أتردد أني أعطيله المعلومة كاملة ونصحته ببعض النصائح . التي سأسردها سريعا ✍🏼
.
فترة الامتياز هي أكثر فترة ممكن تتعلم فيها كطبيب وممكن تعمل فيها فلوس ولكن التعليم في حدود إمكانياتك .. والفلوس تعملها من البرايڤت في حدود توصيفك الوظيفي ..
.
اولا بالنسبة للتعليم .. انت مش مطالب انك تغوص في أعماق التخصص .. كل المطلوب منك تعرف الهيكل العام والقشور من كل قسم إكلينيكي من ال ٣٢ . ..
.
. ومطلوب منك تعرف ال basics بتاعة ال hand skills
تعرف ازاي تركب كانيولا ..
تدي حقنة ..
تركب رايل تغذية ..
تسحب غازات ..
تسحب ABG ..
تقرأ رسم قلب ..
تعمل سي بي آر ..
تركب قسطرة حريمي ورجالي ..
تغير علي الجروح غيار صحيح ..
تعرف أنواع الغرز المختلفة وعملها عملي ..
تقرا الغازات
لا تظن ان ده شغل تمريض لا دا هتحتاجه لقدام لسنوات في اي تخصص .
.
.
ثانيا البرايفت :-
ليك طريق واحد ينفع تشتغل فيه برايڤت .. والطريق ده هو الطريق الوحيد الأخلاقي والقانوني ليك انك تشتغل بيه وهو
✍🏻✍🏻 مساعد لدكتور في عيادة خاصة او مستشفي خاصة ✍🏻✍🏻 وأي اجراء بنعمله بيكون تحت إشراف الطبيب ده اللي انت شغال معاه .. دا مسموحلك بيه
بس يفضل تختار الدكتور اللي هتشتغل معاه في القسم اللي انت ناوي تتخصص فيه ..
صدقني
هتزداد خبرة
هتستمتع بالطب جدا
هتكتسب communication skills رهيبة
هتعمل فلوس حلوة جدا
.
دا الطريق الوحيد اللي ينفع تشتغل فيه
لكن سوري يعني تروح تلاقي مثلا تاجر رمان فاتح مستوصف طبي ويجيبك انت كطبيب امتياز تمسكله الكشوفات لانه مش هامه غير البيزنس فقط .. لا والف لا .. لانه بعيدا عن المسؤولية الطبية امام القانون او اذيت مريض والمسؤليه الدينية امام الله .. بتكون فقدت احترامك لنفسك ووقارك الطبي .
.
بشوف بنات امتياز بتمسك مراكز ليزر وتجميل لوحدها .. معنديش مانع تشتغل في المراكز دي بس تحت غطاء طبيبة جلدية .
.
.
امتياز يبقي تشتغل برايفت وتتعلم وتبقي فل الفل بس تحت غطاء معلم لك ..

Dr Osama Ghorab

ايه ال Red flag signs اللي تخلينا نقلق من perforation of appendix؟

💡Sudden relief of pain
لما بيحصل perforation ال pain بيختفي شوية، بعدها بيرجع تاني بس بدال مهو localized بيبقي severe and diffuse نتيجة ال peritonitis اللي حصلت.

💡High fever
درجة الحرارة بتعلي فوق ال 38.5.

💡Tachycardia
مش بتبقي متناسبة حتي مع حجم ال fever اللي عنده.

💡Rigid abdomen
نتيجية ال peritonitis.

💡Paralytic ileus
صوت الأمعاء بيختفي، وبيبدأ يحصل distention.

💡Marked elevation of TLC & lactate.

✔ البيشنت ده غالبا اتأخر في انه يتشخص صح او اتأخر في انه يدخل عمليات، وممكن يبقي السبب ان مناعته ضعيفة "مريض سكر، او كبير في السن".

✔ بيتوجه للجراحة فوراً، ولو دخل في shock بيتعمله resuscitation، وبياخد broad spectrum antibiotics.

Dr_Mostafa_Salah

زعلان جدًا من نفسي بشكل صعب يتوصف…
النهارده كان أول شيفت ليا في قسم المخ والأعصاب.
بقالي حوالي أسبوعين بذاكر كويس جدًا عشان أبقى مستعد للـ rounds وأقلل أخطائي على قد ما أقدر، خصوصًا إن ده تخصص مفيهوش مساحة للغلط.
الحالة كانت:
Male patient, 84 years old
Known case of HTN from 3 years on Erastapex 40
Non-diabetic
RT eye blindness since 7 years
LT ear deafness since 10 years
Presented with:
Loss of consciousness + Lt side weakness for 2 days
Vitals were stable.
فحصت الحالة، وبصراحة مكنتش شايف أي weakness واضح، وكان بيتكلم كويس ويمشي كويس… لكن بنته كانت بتقول إنه متغير ومش زي طبيعته.
كان عامل CT brain قبل ما ييجي، وشوفتها وكانت free.
في اللحظة دي، كنت ناوي أكتب له متابعة في العيادة وأمشيه…
لكن كان عندي حالة تانية هبلغ بيها النائب، فقولت أعرض الحالة دي عليه برضو من باب الأمان.
النائب نزل فحص الحالة، ولاحظ وجود Lt side weakness بسيط.
وبناءً عليه، شخّص الحالة ischemic stroke.
تم طلب MRI، والحالة هتتحجز ICU.

🟢 حاله مهمه ‼️

👩 جاتنى العياده ست عندها ٣٥ سنه عندها اسهال مزمن غير مستجيب لكل أدوية الاسهال وغير مستجيب لكل أدوية القولون العصبى لأنها اتشخصت قولون عصبى على مدار سنه ونص !!

👩 المريضه بتقول أن عمر الاسهال ما خف اصلا على اى نوع من أنواع العلاج !!

👩 لما عملت full systemic enquiry عن الـ chronic diarrhea بكل تفاصيل الـ history ماكنش فيه اى red flags خالص ولا معاه اى significant associated symptoms !!

👩 حتى الاسهال نفسه مالوش Criteria واضحه ماشيه مع حاجه معينه او يمكن المريضه مش عارفه تجاوب على الاسئله اللى سألتهالها كويس !!

👨‍⚕️اضطريت اعمل full workup لكل الـ investigations المتاحه فى الـ DD of chronic diarrhea

👨‍⚕️ التحليل الايجابى الوحيد هو الـ fecal calprotectin
ويدل على inflammatory colitis وبالتحديد IBD !! الصوره لجزء من التحاليل اللى اتطلبت !!

👨‍⚕️ طلبت منظار قولونى طويل شامل الـ terminal ileum للمريضه لان الـ terminal ileum اهم مكان بيتأثر فى الـ Crohn's disease وفى انتظار النتيجه مع الـhistopathology !!

👨‍⚕️الشاهد من الموضوع أن ال chronic undiagnosed diarrhea اللى مش بتسجيب للـ empirical medications لازم هيطلع وراها حاجه ومن ضمن أهم الاسباب هو الـ IBD بنوعيه الـ UC & CD !!

د.حسام مختار

ثقافة الخبث و اللؤم و داري علي شمعتك ولازم تبقي احسن واحد من خلال انك توقع الآخرين دي محتاجة تنتهي !

الطب مش one man show الثقافة الحالية كلها Multi-disciplinary يعني احنا أطباء كتير من تخصصات مختلفة كل واحد بيعمل دور بما يخدم المريض مافيش دكتور بيعمل كل حاجة اكيد

و حتي داخل التخصص نفسه انتا لو استاذ مش هتعرف تعمل كل حاجة لوحدك انتا محتاج نواب ومساعدين شاطرين وللأسف لو حد فيهم مش شاطر ممكن يخسرك أو يزعلك أو علي أو لو هتحمل علي نفسك اكيد هترتكب أخطاء انتا بشر

يخي اعمل حساب اليوم الي انتا ممكن تتعب فيه لا قدر الله و تحتاج حد شاطر هو الي يعالجك هتلاقي الحد ده ازاي و انتا مش راضي تعلم حد ؟ و محتكر العلم فعلا

خد فلوس مقابل وقتك و مجهودك في التعليم ماشي
خد شهرة و براندينج مقابل وقتك و مجهودك في التعليم اوكيه
خد منصب في مستشفي ما مقابل وقتك و مجهودك في التعليم المنصب بيجبرك تعلم الي تحتك علفكرة
يخي تخلي عن كل ده و علم الناس لوجه الله تعالي وخد حسنات من ربنا
ممكن تmix & match من كل ده مش أزمة

الأزمة انك مش عايز حد يعرف منك اي حاجة لا حقيقي دي أزمة و أزمة كبيرة كمان و هو ده كتم العلم المذموم شرعا في الحديث الصحيح "مَن كتمَ علمًا ألجمَهُ اللَّهُ يومَ القيامةِ بلجامٍ من نارٍ"

د.خالد خاطر

مريض جاي المستشفي خصوصا الاطفال جاي ب abdominal pain, vomiting without diarhea

اسال المريض ان كان polyurea ولا لا وإن كان بيعطش ويشرب كتير ولا لا ؟؟
ولو كان اه اعمله random blood suger(RBS)
لانه غالبا DKA
للأسف بيتشخص غلط والحاله بتوه من ناس كتير
دمتم موفقين ❤️

دخلت ام وشها عليه علامات القلق ماسكة ايد ابنها أحمد 16 سنة ولد نحيف شوية و pallor وعينيه فيها إرهاق واضح

قعدت الأم وقالت
دكتور أنا تعبت كل شوية أكشف على ابني كل شوية تحاليل كل شوية دواء حديد والأنيميا بترجع تاني

من إمتى الأنيميا بدأت معاه؟
من حوالي سنتين يا دكتو وكل شوية يدوخ ويتعب

سألت أحمد
في حاجة تانية؟ تعب؟ فقدان وزن؟
رد بصوت واطي
أنا تعبان دايمًا وآخر فترة يا دكتور جالي إسهال كتير

مسكت ورقة و قلم و سالته
الإسهال ده بقى من امتى؟ فيه دم مع البراز؟
رده كان
أيوة أوقات بيبقى فيه دم بسيط

بدأت القصة تتحرك في اتجاه مختلف

رفعت عيني وسألت الأم
والده فين يا ست الكل؟
ابتسمت بحزن
والده الله يرحمه يا دكتور توفى من خمس سنين

وقفت شوية وسألت بهدوء:
كان عنده حاجة؟
سرطان القولون يا دكتور

هنا وقعت الكلمة عليا كالصاعقة

في لحظة بدأت صورة واضحة تتجمع في ذهني
أنيميا متكررة + دم في البراز + إسهال + تاريخ عائلي قوي لسرطان القولون

ماضيعتش ثانية
لازم نعمل منظار قولون و هنا خلصت جلستنا مع بعض

بعد أيام جايين و معاها التقرير
المنظار أكد ما كنت أخشاه
مئات ال Polyps مبعثرة على طول القولون التشخيص بدأ واضح ليا

Familial Adenomatous Polyposis (FAP)

الخطوة اللي بعد كده
حولت أحمد فورًا لجراحة عامة لعمل Prophylactic colectomy ومعها توصية بعمل Genetic testing وفحص لباقي أفراد الأسرة

بعد شهور
رجع أحمد نفس الغرفة لكن المرة دي كان مختلف بشرته ردت وجهه مرتاح
والأم مبتسمة
دكتور أنا مش مصدقة أحمد بقى أحسن وربنا يكرمك و يعلي من مراتبك

الدرس
في أي شاب أو مراهق عنده أنيميا متكررة + دم في البراز + تاريخ عائلي قوي لسرطان القولون

فكر فورًا في FAP واطلب Colonoscopy بدون تأخير

د.عمرو الدبوري

الشعور بالأمان مرتبط بثقتك الكاملة في أن المستقبل بيد الله وحده، وأن ماهو مكتوب سيحدث، وأن رزقك ستأخذه كاملاً لا ينقص منه شيء، وأنه لا ندم على ماحدث فلو عاد بك الزمن لاخترت ماقد اخترت فهو قدرك، وأننا نؤجر على تفاعلنا مع الأحداث، وأنه لا شيء يظل على حاله
،فكل يوم هو في شأن، وإن مع العسر يسرا، وتلك الأيام نداولها بين الناس

رسالة الى شباب الاطباء 💕✨

كلنا عارفين ان عيان جلطة القلب ممكن يجي بألم في فم المعدة ..

لكن بصراحة الجملة دي بيحصلها abuse لدرجة ممكن تضيع عيان !!

الطب مش جمل محفوظة وترند ..

والموقف ده حصل معايا شخصيا كتير ..

مريض جاي بألم في فم المعدة .. بيتعرض قلب بغض النظر عن اي حاجة..

وده للأسف سوء ممارسة طبية .. انا طبعا مقدر خوفك من فكرة ان المريض يكون عنده جلطة ويموت ..

بس اللي عايزك تعرفه ان في حاجات كتير بتيجي بألم في البطن ..وبتموت برضه !!

كذا مرة حالة تتعرض قلب .. وتضيع وقت في رسم القلب والانزيمات .. وكمان الحالة تتلود اسبوسيد ..

والحالة تطلع perforated peptic ulcer مثلا !!

الحالات دي بتبقى shocked والدقيقة معاها بتفرق ..

لأ وانت كمان بتزود عليها اسبوسيد .. كأنك شايف ان ال perforation صغير .. فبتكبره 🤷‍♂️

الحالة ممكن تكون I.O او acute pancreatitis .

او اي سبب يعمل acute abdomen .

والمريض محتاج يكون NPO .. ويدخل جراحة فورا ..

في المرات دي .. كنت بشوف الحالة بعد ما تم التعامل معاها لوقت طويل بيصل لساعات على انها قلب ..

ومرة تانية الحمدلله .. شوفتها بدري شوية وشخصتها .. ودخلت عمليات فورا .. واتلحقت ..

وحالات زي دي كتير .. وحالات ممكن تموت وانتوا فاكرين انها جلطة .. وفي الحقيقة هي حالة طوارئ جراحية باسباب مختلفة ..

طب ايه الحل ؟!

اولا الهيستوري ..لازم تاخد تاريخ مرضي كويس وتشوف العيان ده اصلا high ischemic risk ولا لأ ..

ثانيا الفحص .. لازم تفحص المريض وتشوف في أعراض acute abdomen ولا لأ .. rigidity tenderness

ثالثا حتى لو مش قادر توصل لتشخيص واضح .. متركزش في اتجاه واحد وتهمل باقي الاتجاهات .. يعني اعمل رسم قلب بسرعة واستبعد وجود stemi ودي الحالة الاخطر .. واسحب تحاليلك اللي من ضمنها التروبونين ..

وكلم حد جراحة مثلا يبص معاك ع الحالة .. يستبعد وجود مشكلة جراحة طارئة .. سونار طوارئ مثلا erect x ray .

وهكذا

يعني مثلا متكونش بنت عندها 19 سنة معندهاش امراض مزمنة .. ورسم القلب كويس و بتاخد مسكنات كتير.. وانت مصمم انها جلطة في القلب .. لا دي الاقرب ان دي هتكون قرحة معدة مضاعفة ..

وهكذا .. فخليك دكتور بجد .. مش واحد حافظ كلمتين .. واتعامل مع الحالة كلينكال صح .. كويس جدا ان يكون في دماغك ان الم فم المعدة ممكن يكون سببه جلطة قلب .. لكن مش هو السبب الوحيد 👌

د. محمد إمام

"نهجان مفاجئ.. والسر وراء حبة منع الحمل"

شابة عندها ٢٤ سنة
اسمها ليلى
محامية ناجحة
حياتها سريعة، شغل وتوتر، بس صحتها كانت دايماً "زي الفل"

بس في يوم، وهي طالعة السلم لمكتبها، حست بنهجان مش طبيعي
نهجان كتم نفسها لثواني
ضربات قلبها كانت سريعة جداً وكأنها بتجري ماراثون
افتكرت إنه مجرد إرهاق من ضغط الشغل
أخدت راحة وشربت ميه، بس الموضوع اتكرر تاني يوم مع وجع "ناغزة" في جنبها اليمين مع النفس

قررت تروح للطوارئ

الدكتور كشف عليها
الضغط كان تمام، بس سرعة ضربات القلب (Tachycardia) كانت عالية
والأكسجين كان نازل حاجة بسيطة ٩٣٪
عملوا رسم قلب (ECG) وأشعة سينية (X-ray) على الصدر.. والاتنين كانوا "طبيعيين" تماماً!

هنا اللغز بدأ.. ليه شابة صغيرة بتنهج كده والأشعة سليمة؟

الدكتور سألها: "رجلك وجعتك أو ورمت الفترة اللي فاتت؟"
ليلى: "لأ خالص، بس أنا كنت مسافرة من أسبوع رحلة طيران ١٢ ساعة وكنت قاعدة طول الوقت"

الدكتور بدأ يشك، وطلب تحليل D-dimer
والنتيجة كانت: High Positive (مرتفع جداً)

طلب فوراً أشعة مقطعية بالصبغة على شرايين الرئة (CT Pulmonary Angiography)
والنتيجة كانت الصدمة:

Pulmonary Embolism (PE)
جلطة في الشريان الرئوي

شابة ٢٤ سنة، مش مريضة قلب، ولا مدخنة، ومبتعملش عمليات..
السؤال كان: ليه؟

الدكتور قعد مع ليلى وبدأ يفتش في تفاصيل حياتها:
"بتاخدي أي أدوية بانتظام؟ حتى لو في نظرك بسيطة؟"
ليلى: "بس باخد حبوب منع الحمل بقالي ٦ شهور عشان أنظم الهرمونات"

هنا كان مفتاح اللغز!

القطع بدأت تركب:
* Oral Contraceptive Pills (OCPs): بتزود تجلط الدم.
* Long Flight: الجلوس لفترة طويلة (immobilization).
* Sudden Dyspnea: نهجان مفاجئ.

التشخيص بقى واضح:
الجلطة بدأت في أوردة الرجل (DVT) بسبب الحبوب والسفر الطويل، واتحركت لغاية ما سدت شريان في الرئة.

ليلى اتحجزت في الرعاية المركزة
بدأت علاج فوري بـ:

* Anticoagulants (Heparin infusion)
* Oxygen therapy
* Strict bed rest

اتعمل لها فحوصات تانية عشان يتأكدوا إن مفيش خلل جيني في التجلط (Thrombophilia screen).

بعد ٤ أيام
النفس رجع طبيعي
ضربات القلب استقرت
ليلى عرفت إن "الحباية" اللي كانت فاكراها بسيطة، مع ظروف تانية، كانت ممكن تنهي حياتها.

الدرس؟

مش أي نهجان "توتر"، ومش أي وجع صدر "برد"
التاريخ المرضي والأدوية اللي بنستهين بيها هي أوقات كتير نص التشخيص.
اسمع لجسمك.. الخيط الصغير ممكن ينقذ عمرك.


د. أحمد العشماوي