أسوأ حاجة في الطب…
إن إحساس التقصير عمره ما بيسيبك،
حتى وإنت بتبذل أقصى مجهودك،
وبرغم كل اللي بتعمله… دايمًا جواك صوت بيقول: "كان ممكن تعمل أكتر"
بتذاكر؟ حاسس إنك متأخر
بتشتغل؟ حاسس إنك محتاج تتعلم أكتر
بتتعب؟ بتحس إن غيرك بيعمل أحسن
وده بيخليك دايمًا في سباق…
مش مع غيرك، لكن مع نسخة أفضل من نفسك
يمكن ده أصعب إحساس…
بس هو في نفس الوقت السبب إنك بتتطور كل يوم.

رسالة الى شباب الاطباء :

من الحاجات المهمة اللي تحطها في بالك ..

ال DKA وحموضة الدم بتحصل كتير وبسهولة في السن الصغير وسكر النوع الاول .. لو المريض فوت جرعة او اكتر من الأنسولين .

لكن صعب .. تحصل في السن الكبير وسكر النوع التاني ..

عشان كدا لما تشخص حالة DKA في شخص كبير .. متكتفيش بكدا ..

دور على اللهو الخفي .. السبب اللي خلاه يدخل في DKA .

واللي ممكن يكون جلطة في القلب .. جلطة في المخ .. التهاب رئوي .. التهاب مجرى البول .. جفاف .. كورتيزون .. قدم سكري .. قرح فراش ..

لازم تدور على السبب ده وتعالجه كويس .. عشان تعالج ال DKA ..

د. محمد إمام

🚨 كورس طوارئ المخ والأعصاب (Neuro Emergency Course)

لو حابب تلحق من البداية… الفرصة لسه متاحة ⏳
الكورس ممتد لعدة شهور، لكن دي أهم فترة فيها متابعة مباشرة وـ interaction حقيقي مع المشتركين
بجدول منظم يساعدك تحقق أقصى استفادة من المذاكرة 📈
🔁 وبعد كده… كل المحتوى متاح ليك مدى الحياة ترجعله في أي وقت
🎯 محتوى الكورس:
أكثر من 50 ساعة شرح متكامل
محاضرات Recorded + Live (ومتسجلة بالكامل)
مفيش حاجة هتفوتك حتى لو مش حضرت
📚 هتاخد إيه؟ (Lifetime Access):
محاضرات كاملة
ملفات شرح + Cases
امتحانات & MCQs
Flashcards
وكل تحديث جديد في النيورو بيتضاف تلقائي 🔄
🧠 طريقة الشرح: كل Topic بيتشرح على 3 مراحل:
شرح تفصيلي (Deep Understanding)
من الـ basics لحد الـ clinical بشكل عملي
Summary عملي مختصر
تمشي بيه في الشيفت مباشرة 📝
Cases + Live Discussion
تتدرب تعمل management بإيدك وتفكر كـ دكتور طوارئ
🔥 الهدف من الكورس: مش بس تفهم…
لكن تعرف تتصرف صح في الحالات الحرجة بثقة

🔥عرض خاص لأطباء الامتياز والطلبه: خصم 50 %

📩 للاستفسار والتفاصيل:
@A_m_Ebrahim

خلال آخر 8 شهور كنت مشترك في ٤ كورسات طوارئ، وبنزل الطوارئ كتير
وحبيت التخصص جدًا…
وفجأة تويته واحدة خلتني أفكر أغيّر التخصص! 😅

ربنا بيقدر الأقدار
فالحمد لله على قدره
من اسبوعين كنت مخطط لسفر اربع وخميس وجمعة (اللي هو انهاردة)
وبسبب تقلبات الجو لغيت الخطط كلها

وامبارح بالليل خططت لسفر تاني انهاردة وقولت هصحى بدري اسافر
صحيت متأخر حتى على صلاة الجمعة وزعلت جدا قولت حتى الصلاة هروح متأخر !
وقولت لعله خير .. محدش عارف الخير فين

المهم عشان رحت المسجد بعد بداية الخطبة فملحقتش ادخل المسجد وصليت في دار المناسبات بتاعة المسجد
(مكان مش معتاد بالنسبة لي)
وبعد ما الخطبة خلصت وقامت الصلاة ولسة هقول الله اكبر لمحت في الصف قدامي طفل ٤ سنوات وقع على الارض
وقعة غريبة جدا مش وقعة طفل بيلعب .. مدخلتش في الصلاة ورحت للطفل لقيت الطفل شرقان ونفسه مقطوع

بفضل ربنا عليا وعلى ابوه اللي جنبه وعلى امه بدأت له اسعافات اولية وجريت بيه برة المسجد وكملت اسعافات لغاية ما ربنا وفقنا وطلعنا اللي كان سادد زوره ورجع يتنفس بفضل ربنا وكرمه علينا جميعا

وقتها سجدت لله شكرا على اقداره

مش قادر انسى نظرات ابوه وانا بعمل له اسعافات ونظراته بعد ما الولد رجع يتكلم

فالحمد لله حمد الشاكرين .. الحمد لله ولي النعم

وشعرت بآية : "وعسى ان تكرهوا شيئا وهو خير لكم"

اوعى تزعل او تندم على حاجة محصلتش .. يمكن ربنا شايل لك الاحسن

د. محمد ماهر

مش عارف مين اللي زرع في عقول الناس أن اي مريض عنده اعراض السكتة دماغية نديله ASPOCID
اهو ده مريض كان ضغطه فوق ال 180/120
وجاي باعراض ال stroke
يقوموا يديله ايه ASPOCID.
ده لو عنده نزيف بسبب الضغط العالي هيزوده
ممنوع تدي مريض السكتة الدماغية اي دوا قبل ما تعرف سببها سواء
Ischemia or hemorrhagic stroke
علشان كده الأشعة المقطعية جزء لا يتجزأ من قرار العلاج
#NB
The most common cause of a spontaneous (non-traumatic) intracerebral hemorrhage (ICH) is chronic hypertension (high blood pressure). It is responsible for approximately 60% to 85% of all primary cases.

د. حنفي جمعه

بمناسبه البوست الأخير
كان عندي حالة من حوالي أسبوعين جاية بـ DCL
قِسنا السكر وكان طبيعي، لكن الضغط كان 200/110 🚨
عملت Neurological examination ولاحظت وجود lateralization
فبسرعة طلبت CT Brain
والنتيجة كانت: Hemorrhagic stroke 🧠💥
المشكلة إن أهل المريض كانوا مدّينه Aspirin قبل ما يوصل المستشفى!
والحقيقة إن الموقف ده بيتكرر كتير جدًا، وده ممكن يزود النزيف ويأثر على الحالة بشكل خطير
علشان كده إحنا محتاجين نركز أكتر على التوعية
ونقدّم محتوى بسيط وواضح للناس عشان يتجنبوا الأخطاء دي
أي مريض فقدان وعي أو أعراض عصبية مفاجئة → ممنوع ياخد أي أدوية قبل التقييم الطبي ❗

وكم من شبابٍ يُرتجى طول عمرهم
وقد أدخلت أجسـادهم ظلمة القبرِ

بقلوبٍٍ منكسرة حزينة، ونفوس راضية بقضاء الله وحُكمه، ننعي زميلنا الدكتور
حسام طبيب الامتياز
الذي أصيب منذ أيام في المستشفي بعدوى إلتهاب السحايا المميتة meningitis بعد تعامله مع أحد المرضي المصابين دون أن يعلم
، يُمسي ابن آدم ويصبح والموت أقرب من شراك نعله

نسأل الله أن يجعل دراسته وطلبه لعلم الطب شفيعا له عند ربه، وأن يجعل هذه الليلة في قبره خير لياليه، وأن يُيَمّن له الكتاب وييسر له الحساب ويثبته عند السؤال وأن يرحمه رحمة واسعة إنه ولي ذلك والقادر عليه.

هقول كلمتين وأجرى علي الله..
أنا حزين جدا اليوم ...
مريضه بتابعها من حوالي سبع شهور والحمد لله اتحسنت معايا ...
لكن كانت جايه دائما شكواها كحه وضيق نفس ...

نصحتها تكشف صدر
الست مشكوره كشفت عند اكتر من خمس دكاتره باطنه واتنين تخصص صدر
كل مره اسألها تقولي الباطنه بيقولوا ارتجاع مرئ والصدر بيقول حساسيه
طب حضرتك كشفتي عند فلان اللي هو استاف جامعه قالك ايه ...قالتلي قالي حساسيه صدر وكتبلي العلاج بتاع الحساسيه ..

قولتلها طب ارجوكي انا فيه قليل من الناس اثق فيهم روحي عند فلان ده دفعتي وممتاز وراجع من بره وكتبت رقمه ع الروشته وكمان ورقه توصيه ...
مراحتش ليه وسألتها كذا مره وكانت مسكينه ملخومه ف الحياه ..
بالصدفه عرفت انها تعبت ودخلت مستشفي جامعي اكتشفوا وجود ورم في الرئه ...حزنت جدا جدا أن مفيش حد فكر بره السماعه ...حد يعمل اشعه
ربنا يشفي

Dr Amir hamed

متعمليش خير تانى بقا 😂

أسنان من الكليات الرايقه اللى الواحد كان نفسه يدخلها بدل الهم اللى الواحد فيه
عندى أخويا فى أسنان لو معاه حالة غسلت سنانها بس بينزل إستورى وعليه أغنيه شوف كنا فين وبقينا فين
والإستورى اللى بعده ينزل صورتين before, after😂

زملائنا الجناير:
كما قيل: العلم صيد ! والكتابة قيد !
ولو اعتمدت على الذاكرة ستفشل وتفقد كل العلم تقريبا !
لما كنت في الامتياز ولما كنت في النيابة
كان الله يمسيه بالخير د. محمد السباعى
من أمهر الناس علميا وأخلاقا سواء في فترة الامتياز أو النيابة
وكانت أكتر حاجة لاحظتها معاه
هي بلوك نوتس وقلم
وتقريبا مفيش حالة دخلت أو شافها
ومفيش معلومة عرفها
إلا وتقريبا كان بيسجلها
ورايح جاي معاه ورقة وقلم !
.
فيه ناس عندها حياء من الحوار ده
لكن العلم بيضيع بين الكِبْر والحياء
وبالتالي معظم علمك هيضيع لو مكتبتش كل حرف اتعلمته !
.
خلي ورقة وقلم معاك أساسي !
أو سجل في الموبايل كل حرف اتعلمته لو الموضوع مضايقك أوي ومش قادر تشيل معاك ورقة وقلم !!! بس غالبا مش هينفع ولو نفع مش عايزين غير كدة !

د.أحمد العسكري

عيان يجيلك بالتلاته مع بعض فكر ف pulmonary embolism

unexplained dyspnea

+ chest pain

+ haemoptysis

= pulmonary embolism

د. أحمد أبوشنب

للأسف في موضوع مسكوت عنه و هو الناس اللي بتبقى عاوزه تتعلم الغرز و خلاص و مبتقدرش الموقف

راعوا ربنا في العيان بتاعكم ، متخلوش حماس البدايات في الخياطة يعميكم عن حرمة العيان ، خصوصاً في الحالات زي دي ، طفلة بنوته يتخيطلها بخيط ٢ زيرو
حراام بجد

د. عبدالله ياسر

لو حسيت إن يومك عدى من غير إنجاز وبدأت تحس بالإحباط، اذكر الله

لأن الذكر ممكن يغفر ذنب، يكتب حسنة، يرفع درجة، يبني بيت أو يزرع نخلة في الجنة، يكون عدل تحرير رقبة، يعتق من النار

كل دى إنجازات حقيقية وملموسة هتشوف حصادها بنفسك فى الحياة الآخرة بسبب اللى هتعمله فى يومك ده.

- أحمد صالح.

ربنا يرحم زميلنا حسام ويرزقه الفردوس .. وخليني هنا أوضح كام نقطة عن الـ Bacterial Meningitis ،، وركزوا في اللي هقوله يا شباب.

١- الـ Meningitis عمومًا مش شرط تكون ناتجة عن عدوى بكتيرية .. لكن زيها زي أي عدوى تانية .. ممكن يعملها ڤايرس أو حتى فطريات

٢- الـ Meningitis .. بنشخصها بحاجة اسمها Classic Triad .. يعني ٣ أعراض بيظهروا مع بعض وهم :

• الـ Fever : مريض درجة حرارته عالية
• الـ Neck Stiff : مش قادر يتني رقبته لقدام
• أي Neuro Signs : صداع .. وعي أقل .. توهان

٣- مش كل حالات الـ Meningitis بيكون معاها الـ Classic Triad كامل .. لكن دول ٤٠٪ من الحالات فقط. يعني لو لاحظت اتنين منهم افترض إنها Meningitis حتى يثبت العكس

٤- لما بتعرف إنها Meningitis .. لازم المخالطين للمريض دا أو اللي استقبلوه واتعاملوا معاه ياخدوا حاجة اسمها Chemoprophylaxis أو وقاية دوائية

• الوقاية الدوائية الشائعة هي Ciprofloxacin 500 مرة واحدة فقط في خلال أول ٢٤ ساعة من مخالطة المريض .. بياخدها الطاقم الطبي وأهل المريض

٥- لو هنتكلم بالدليل الطبي المثبت هنقول إن الوقاية مش CiproFloxacin فقط .. لكنها بتتغير طبقاً لـ عمر المُخالط للحالة زي ما هوضح كده

• لو المُخالط للحالة كان طفل أقل من 15 سنة .. بياخد Ceftriaxon 250 .. تكتب كده لأهله ( حقنة سيفترياكسون ٢٥٠ عضل بعد عمل اختبار حساسية ) والحقنة بتتاخد مرة واحدة فقط

• لو المُخالط للحالة كان Adult زينا .. هياخد Ciprofloxacin 500 .. قرص مرة واحدة ( يعني تكتبله كده في ورقة Cipro 500 tab .. هاته من الصيدلية وخدلك منه قرص دلوقت وخلاص

د.أحمد الفقي

أصدقائي الأطباء و غير الأطباء و كل من هو في الدنيا غير دكاترة الأورام
محتاجين نفتكر معلومة بسيطة أوي أوي سوا
الا وهي انه العلاج الإشعاعى سواء ثنائي أو ثلاثي الأبعاد أو متغير الشدة او  او
بإختلاف التقنيات مش بيؤثر علي الأشخاص المحيطة بالمريض بعد إنتهاء الجلسة

اللي بنبعدهم حاجتين الناس اللي بتتلقي يود مشع و الناس اللي بتعمل مسح ذري و بتستخدم مادة مشعة وقتها بنبعدهم وكل حاجة ليها عدد ساعات معينة

لكن والله العلاج الإشعاعى مفيش منه أي مشكلة

قد يبدو لبعضكم الكلام basic ولبعضكم مكرر و لبعضكم معلومة مش مهمة
بس والله هتفرق

أنا مقدرة كل الأعذار بس الجهل بمعلومة زي ده و تحذير الناس من زيارة المريض بيؤثر فيهم بشكل مش هتتخيلوه

أنا هتخيله لأني بقابل الشكوي دي كل أسبوع

ليه بكتب البوست؟
علشان موقفين
واحد فيهم أب بياخد علاج إشعاعي تلطيفي و حالة متأخرة جداً و بنته مش قادرة تزوره ومنهاره لأنه جوزها مانعها بناء علي تعليمات طبيب النسا !!

طب ليه كدا طيب!
الذنب ده مين هيشيله؟

والموقف التاني انهرده بتحرك من القسم و مريضة بسيطة يا حبيبتي و كبيرة في السن في منتهي الغلب فاتحه تسجيل الموبايل بتقولي كرري تاني ابوس علي إيدك انه ولادي ينفع ييجولي البيت وانه مفيش خطر مني علي ولادهم

والله قطعت قلبي
متسيبوش مريض الأورام وهو بياخد علاج إشعاعي يا جماعة و زوروه عادي والله العظيم ما هيحصلكم أي حاجة!
وربنا يسامح كل اللي بيفتي ومش عارف أثر كلامه هيطول كام واحد وينور بصيرتهم

أخيراً بقي

أفتكروا النهارده في أيامنا الكريمة دي مرضانا الحلوين و ادعولهم بدوام الصحة و العافية🌸
©️الاء عادل