من شهرين بالظبط، مكنتش بعرف أركّب كانيولا… ولا حتى حاولت قبل كده.
وكنت دايمًا بقول إن ده شغل تمريض ومش هيأثر معايا كدكتور.
لحد ما في يوم من شهرين، الساعة 2 بالليل، جتلي حالة
Hypoglycemic coma
وكان لازم يتركب لها كانيولا فورًا وندي جلوكوز بسرعة.
لكن للأسف… التمريض ماكنش موجود.
وقتها بلّغت الأمن يدور على التمريض ،
وتخيل الإحساس ساعتها:
دكتور واقف قدام مريض محتاج تدخل فوري… ومش قادر يساعده بإيده.
الموقف ده كان نقطة تحول بالنسبة لي.
من يومها، قررت إني أتعلم بنفسي،
وأي حالة داخلة الاستقبال محتاجة كانيولا… أنا اللي بركبها.
ومع الوقت بقيت الحمد لله كويس جدًا فيها، ويمكن أحسن من ناس كتير.
النصيحة من أخوك:
ما تستهونش بأي مهارة، خصوصًا الـ hand skills.
اتعلم كل حاجة بإيدك، وجرب، واغلط، واطوّر نفسك.
لأن في لحظة واحدة،
ممكن مهارة بسيطة زي تركيب كانيولا…
تكون الفرق بين حياة وموت.

توقيت إعطاء المذيب الthrombolytic يختلف حسب الحاله :

✅فالischmic stroke أربع ساعات ونص فقط من بدايه الاعراض

✅فالSTEMI لغايه ١٢ ساعه من ال onset of maximum pain

✅فالpulmonary embolism معاك لغايه ١٤ يوم

وطبعا اولاً لازم استبعاد كل الcontraindications اللي تمنع إعطاء المذيب

د. محمد أبوشنب

الحمد لله.دكتور النساء والتوليد طلع مالوش ذنب..

دكتور محمد ؟؟
نعم
انا لسه مولد مدام دلوقتى والطفل عنده مشكلة فى رقبته
ابعتلى صورة
حاضر
ياغالى لاتقلق ده كلفت
Cleft.
يادكتور محمد بأقولك فى رقبته
ايوه ماهو ده كلفت فى الرقبة
يادكترة هو انت علشان بتحب شغل الكلفت بتقول ده كلفت؟
لا يادكتور ده فعلا اسمه العلمى median cervical cleft.
ازاى احنا نعرف أن الكلفت ياإما شفة ارنبية او سقف حلق مشقوقة..؟.
Cleft lip
Cleft palate.
فقط.

لا ده نوع نادر من التشوهات الخلقية فى الرقبة نسبة حدوثة قليلة جدا جدا واسمه كلفت برضه..
طيب إيه علاجه يادكتور ؟؟
ماتقلقش خالص..بننتظر ونعمله عملية جراحية بعد عمر ٦ شهور أو سنة .
تسلم يادكتور محمد..

دكتور محمد ممكن طلب
خير ؟؟
ممكن تكلم الأهل وتوضحلهم التشخيص السليم ده..
ليه بس؟ ماحضرتك توضحلهم وخلاص..
لا علشان هم راحوا لأحد الزملاء وقالهم ده تعويرة من دكتور النسا ودكتور النسا اللى عور الواد فى رقبته وهو بيعمل القيصرية..
معقولة !!!!
اه والله..
طيب معلهش طبعا هو غلطان ..بس اعذره علشان هتلاقيه أول مره يشوفها..
بس الأهل بيتهمونى فعلا أنى عورته لانهم كل مايروحوا احد يقولهم اول مرة نشوف حاحة زى كده فبيشكوا أنى فعلا عورته 🥲🥲
ماتقلقش هأشرحلهم الوضع وأوريهم صور الحالات دى على اللابتوب وأفهمهم كل حاجة..
تسلم دكتور محمد..
وبالفعل الأهل جم وطمنتهم وشرحتلهم الموضوع كله والحمد لله..واقتنعوا أن الدكتور مالوش ذنب..

الرسالة
1..كلنا فيه حاجات نعرفها وحاجات مانعرفهااش..اللى نعرفه نقوله واللى مانعرفوش نقول مانعرفوش ونسأل غيرنا...ده مش عيب..
2..ماينفعش ك دكتور أقول كلام اولا غلط علميا..ثانيا كلام يسخن الأهل على زميلى .لان رد فعل الأهل ممكن يكون عنيف وبكده هتظلم زميلك بدون وجه حق..والأهل هياخدوا وقت على مايقتنعوا ان الطبيب مش غلطان فى حاجة..

دمتم بخير..

د. محمد سعده

أسوأ حاجة في الطب…
إن إحساس التقصير عمره ما بيسيبك،
حتى وإنت بتبذل أقصى مجهودك،
وبرغم كل اللي بتعمله… دايمًا جواك صوت بيقول: "كان ممكن تعمل أكتر"
بتذاكر؟ حاسس إنك متأخر
بتشتغل؟ حاسس إنك محتاج تتعلم أكتر
بتتعب؟ بتحس إن غيرك بيعمل أحسن
وده بيخليك دايمًا في سباق…
مش مع غيرك، لكن مع نسخة أفضل من نفسك
يمكن ده أصعب إحساس…
بس هو في نفس الوقت السبب إنك بتتطور كل يوم.

رسالة الى شباب الاطباء :

من الحاجات المهمة اللي تحطها في بالك ..

ال DKA وحموضة الدم بتحصل كتير وبسهولة في السن الصغير وسكر النوع الاول .. لو المريض فوت جرعة او اكتر من الأنسولين .

لكن صعب .. تحصل في السن الكبير وسكر النوع التاني ..

عشان كدا لما تشخص حالة DKA في شخص كبير .. متكتفيش بكدا ..

دور على اللهو الخفي .. السبب اللي خلاه يدخل في DKA .

واللي ممكن يكون جلطة في القلب .. جلطة في المخ .. التهاب رئوي .. التهاب مجرى البول .. جفاف .. كورتيزون .. قدم سكري .. قرح فراش ..

لازم تدور على السبب ده وتعالجه كويس .. عشان تعالج ال DKA ..

د. محمد إمام

🚨 كورس طوارئ المخ والأعصاب (Neuro Emergency Course)

لو حابب تلحق من البداية… الفرصة لسه متاحة ⏳
الكورس ممتد لعدة شهور، لكن دي أهم فترة فيها متابعة مباشرة وـ interaction حقيقي مع المشتركين
بجدول منظم يساعدك تحقق أقصى استفادة من المذاكرة 📈
🔁 وبعد كده… كل المحتوى متاح ليك مدى الحياة ترجعله في أي وقت
🎯 محتوى الكورس:
أكثر من 50 ساعة شرح متكامل
محاضرات Recorded + Live (ومتسجلة بالكامل)
مفيش حاجة هتفوتك حتى لو مش حضرت
📚 هتاخد إيه؟ (Lifetime Access):
محاضرات كاملة
ملفات شرح + Cases
امتحانات & MCQs
Flashcards
وكل تحديث جديد في النيورو بيتضاف تلقائي 🔄
🧠 طريقة الشرح: كل Topic بيتشرح على 3 مراحل:
شرح تفصيلي (Deep Understanding)
من الـ basics لحد الـ clinical بشكل عملي
Summary عملي مختصر
تمشي بيه في الشيفت مباشرة 📝
Cases + Live Discussion
تتدرب تعمل management بإيدك وتفكر كـ دكتور طوارئ
🔥 الهدف من الكورس: مش بس تفهم…
لكن تعرف تتصرف صح في الحالات الحرجة بثقة

🔥عرض خاص لأطباء الامتياز والطلبه: خصم 50 %

📩 للاستفسار والتفاصيل:
@A_m_Ebrahim

خلال آخر 8 شهور كنت مشترك في ٤ كورسات طوارئ، وبنزل الطوارئ كتير
وحبيت التخصص جدًا…
وفجأة تويته واحدة خلتني أفكر أغيّر التخصص! 😅

ربنا بيقدر الأقدار
فالحمد لله على قدره
من اسبوعين كنت مخطط لسفر اربع وخميس وجمعة (اللي هو انهاردة)
وبسبب تقلبات الجو لغيت الخطط كلها

وامبارح بالليل خططت لسفر تاني انهاردة وقولت هصحى بدري اسافر
صحيت متأخر حتى على صلاة الجمعة وزعلت جدا قولت حتى الصلاة هروح متأخر !
وقولت لعله خير .. محدش عارف الخير فين

المهم عشان رحت المسجد بعد بداية الخطبة فملحقتش ادخل المسجد وصليت في دار المناسبات بتاعة المسجد
(مكان مش معتاد بالنسبة لي)
وبعد ما الخطبة خلصت وقامت الصلاة ولسة هقول الله اكبر لمحت في الصف قدامي طفل ٤ سنوات وقع على الارض
وقعة غريبة جدا مش وقعة طفل بيلعب .. مدخلتش في الصلاة ورحت للطفل لقيت الطفل شرقان ونفسه مقطوع

بفضل ربنا عليا وعلى ابوه اللي جنبه وعلى امه بدأت له اسعافات اولية وجريت بيه برة المسجد وكملت اسعافات لغاية ما ربنا وفقنا وطلعنا اللي كان سادد زوره ورجع يتنفس بفضل ربنا وكرمه علينا جميعا

وقتها سجدت لله شكرا على اقداره

مش قادر انسى نظرات ابوه وانا بعمل له اسعافات ونظراته بعد ما الولد رجع يتكلم

فالحمد لله حمد الشاكرين .. الحمد لله ولي النعم

وشعرت بآية : "وعسى ان تكرهوا شيئا وهو خير لكم"

اوعى تزعل او تندم على حاجة محصلتش .. يمكن ربنا شايل لك الاحسن

د. محمد ماهر

مش عارف مين اللي زرع في عقول الناس أن اي مريض عنده اعراض السكتة دماغية نديله ASPOCID
اهو ده مريض كان ضغطه فوق ال 180/120
وجاي باعراض ال stroke
يقوموا يديله ايه ASPOCID.
ده لو عنده نزيف بسبب الضغط العالي هيزوده
ممنوع تدي مريض السكتة الدماغية اي دوا قبل ما تعرف سببها سواء
Ischemia or hemorrhagic stroke
علشان كده الأشعة المقطعية جزء لا يتجزأ من قرار العلاج
#NB
The most common cause of a spontaneous (non-traumatic) intracerebral hemorrhage (ICH) is chronic hypertension (high blood pressure). It is responsible for approximately 60% to 85% of all primary cases.

د. حنفي جمعه

بمناسبه البوست الأخير
كان عندي حالة من حوالي أسبوعين جاية بـ DCL
قِسنا السكر وكان طبيعي، لكن الضغط كان 200/110 🚨
عملت Neurological examination ولاحظت وجود lateralization
فبسرعة طلبت CT Brain
والنتيجة كانت: Hemorrhagic stroke 🧠💥
المشكلة إن أهل المريض كانوا مدّينه Aspirin قبل ما يوصل المستشفى!
والحقيقة إن الموقف ده بيتكرر كتير جدًا، وده ممكن يزود النزيف ويأثر على الحالة بشكل خطير
علشان كده إحنا محتاجين نركز أكتر على التوعية
ونقدّم محتوى بسيط وواضح للناس عشان يتجنبوا الأخطاء دي
أي مريض فقدان وعي أو أعراض عصبية مفاجئة → ممنوع ياخد أي أدوية قبل التقييم الطبي ❗

وكم من شبابٍ يُرتجى طول عمرهم
وقد أدخلت أجسـادهم ظلمة القبرِ

بقلوبٍٍ منكسرة حزينة، ونفوس راضية بقضاء الله وحُكمه، ننعي زميلنا الدكتور
حسام طبيب الامتياز
الذي أصيب منذ أيام في المستشفي بعدوى إلتهاب السحايا المميتة meningitis بعد تعامله مع أحد المرضي المصابين دون أن يعلم
، يُمسي ابن آدم ويصبح والموت أقرب من شراك نعله

نسأل الله أن يجعل دراسته وطلبه لعلم الطب شفيعا له عند ربه، وأن يجعل هذه الليلة في قبره خير لياليه، وأن يُيَمّن له الكتاب وييسر له الحساب ويثبته عند السؤال وأن يرحمه رحمة واسعة إنه ولي ذلك والقادر عليه.

هقول كلمتين وأجرى علي الله..
أنا حزين جدا اليوم ...
مريضه بتابعها من حوالي سبع شهور والحمد لله اتحسنت معايا ...
لكن كانت جايه دائما شكواها كحه وضيق نفس ...

نصحتها تكشف صدر
الست مشكوره كشفت عند اكتر من خمس دكاتره باطنه واتنين تخصص صدر
كل مره اسألها تقولي الباطنه بيقولوا ارتجاع مرئ والصدر بيقول حساسيه
طب حضرتك كشفتي عند فلان اللي هو استاف جامعه قالك ايه ...قالتلي قالي حساسيه صدر وكتبلي العلاج بتاع الحساسيه ..

قولتلها طب ارجوكي انا فيه قليل من الناس اثق فيهم روحي عند فلان ده دفعتي وممتاز وراجع من بره وكتبت رقمه ع الروشته وكمان ورقه توصيه ...
مراحتش ليه وسألتها كذا مره وكانت مسكينه ملخومه ف الحياه ..
بالصدفه عرفت انها تعبت ودخلت مستشفي جامعي اكتشفوا وجود ورم في الرئه ...حزنت جدا جدا أن مفيش حد فكر بره السماعه ...حد يعمل اشعه
ربنا يشفي

Dr Amir hamed

متعمليش خير تانى بقا 😂

أسنان من الكليات الرايقه اللى الواحد كان نفسه يدخلها بدل الهم اللى الواحد فيه
عندى أخويا فى أسنان لو معاه حالة غسلت سنانها بس بينزل إستورى وعليه أغنيه شوف كنا فين وبقينا فين
والإستورى اللى بعده ينزل صورتين before, after😂

زملائنا الجناير:
كما قيل: العلم صيد ! والكتابة قيد !
ولو اعتمدت على الذاكرة ستفشل وتفقد كل العلم تقريبا !
لما كنت في الامتياز ولما كنت في النيابة
كان الله يمسيه بالخير د. محمد السباعى
من أمهر الناس علميا وأخلاقا سواء في فترة الامتياز أو النيابة
وكانت أكتر حاجة لاحظتها معاه
هي بلوك نوتس وقلم
وتقريبا مفيش حالة دخلت أو شافها
ومفيش معلومة عرفها
إلا وتقريبا كان بيسجلها
ورايح جاي معاه ورقة وقلم !
.
فيه ناس عندها حياء من الحوار ده
لكن العلم بيضيع بين الكِبْر والحياء
وبالتالي معظم علمك هيضيع لو مكتبتش كل حرف اتعلمته !
.
خلي ورقة وقلم معاك أساسي !
أو سجل في الموبايل كل حرف اتعلمته لو الموضوع مضايقك أوي ومش قادر تشيل معاك ورقة وقلم !!! بس غالبا مش هينفع ولو نفع مش عايزين غير كدة !

د.أحمد العسكري

عيان يجيلك بالتلاته مع بعض فكر ف pulmonary embolism

unexplained dyspnea

+ chest pain

+ haemoptysis

= pulmonary embolism

د. أحمد أبوشنب