استقبال الحريمي ممكن أفضل طول الشيفت مشخصتش حالة MI
سبحان الله أنزل النهارده استقبال الرجالي ساعتين أشخص حالتين MI وحالة AF
لو كنت كملت الشيفت لاخره كان نايب الكارديو طردني من الاستقبال
من كتر العروض اللى بعملهاله 😂

راجل طيب كان قاعد بيفطر مع عياله عادي، وبعد الفطار حس إنه دايخ شوية.. قاس السكر لقاه فوق الـ 500.. راحوا جابوا الصيدلي اللي تحت البيت..
قالهم : سكر عالي! يبقى انسولين على طول.. معروفة يعني..

وراح رازع الراجل 70 وحدة انسولين!! والرقم دا لما يقرأه دكتور أو مريض سكر هيلطم من الخضة! رقم مهول جداً..

المهم إن الراجل أخد الـ 70 وحدة من هنا واتشنج ودخل في غيبوبة، وجالنا الرعاية بدرجة وعي 6.. ودي درجة سيئة جداً.. والسكر بتاعه كان 55.. واتحط على تنفس صناعي، وبنحاول معاه لكن مفيش أي نتيجة للأسف وغالباً مش هيكمّل..

بناته في الزيارة كانوا بيعيطوا ومش مصدقين.. أبوهم كان كويس وقاعد بيفطر معاهم، وفجأة محطوط على تنفس صناعي بين الحياة والموت.. وكل دا بسبب بني آدم فاشل استكبر إنه يقول معرفش، ويقول لأهله خدوه وروحوا المستشفى..

د /محمد فهيم .

مفيش حد حياته وردية، ومفيهاش مشاكل، وماشية بشكل مظبوط على طول الخط. الفرق بس إن في واحد مبسوط بحياته زي ما هي كده – بحلوها ومرّها – وبيسعى وبيجتهد، وبيرضى بالنتايج اللي مجهوده وصله ليها.. وفي واحد تاني معيش نفسه في جحيم الإستريس وتعاسة المقارنات، ومش عارف ينبسط باللي معاه.
الفرق هنا فرق عقلية مش أكتر،، فحاول تبقى الشخص الأول.

Dr_Mostafa_Salah

آمين يارب العالمين 🤲

عزيزي المدير الطبي

لو الطبيب الشاب أخطأ في حالة طبية
يتم تكليفه بتجهيز محاضرة عن الموضوع
العقاب بالخصم ما بيعلمش

د. سيد المر

المحاضرة دي من أحب المحاضرات إلى قلبي، وفرقَت معايا جدًا في الشغل العملي.
وعشان كده قررت أنزلها على القناة أكتر من مرة، وكمان نزلت التفريغ الخاص بيها علشان الفايدة تعمّ.
انبارح مثلًا كان معايا حالة في الطوارئ:
Female patient, 80 years old
معروفة بـ HTN من 10 سنوات
حضرت باضطراب في مستوى الوعي
أول خطوة كانت قياس الـ RBS وطلع 140، تمام.
تاني خطوة دورت على أي signs of lateralization، وفعلاً لقيت weakness.
بناءً عليه عملنا CT brain، والنتيجة كانت Hemorrhagic stroke.
المحاضرة دي بجد بتعلّمك تفكر صح في الطوارئ،
وتخليك ماشي step by step،
ومن غير ما تضيّع منك حالة أو تـmiss تشخيص مهم.
أنصح أي حد بينزل طوارئ يسمعها…
هتفرق معاه كتير جدًا.

من الامور المهمة في الرعاية المركزة إدراك بعض المفاهيم :

أنت موجود في مكان عدد الوفيات فيه أعلى من عدد حالات التحسن، ودورك انك تكون سبب يقلل عدد الوفيات بقدر الاستطاعة، فمتحبطش من عدد الوفيات.

متكونش سبب في الوفاة باي شكل، لا بتقصير في العلم، ولا الجهد، ولا السؤال لو مكنتش تعرف .

حياة الإنسان اهم من الايجو الشخصي، ونزولك عن كبرياءك وتقول معرفش اعمل دي، أو هجيب حد كبير يعملها احسن، وتبان قدام الناس مش عارف، افضل مليون مرة من انك تبان اجمد الجامدين وتتسبب في وفاة انسان، نظرة ربنا اهم من نظرة الناس.

احنا مش بنزود عمر الانسان، احنا بنقلل معاناته في الحياة، فلما تعمل كل حاجة ممكنة مع العيان ويموت متجزعش، وشوف العيان اللي بعده عشان متقصرش معاه وتشيل ذنبه.

تسكين الالم، الجسدي والنفسي للعيان في الرعاية مش رفاهية، والنوم بليل وبراحة تامة حق العيان.

ممكن يبقى دورك كله مع عيان انك تمنعله المعاناه قبل الموت، أو انك تلقنه الشهادة.

راجع ورا اللي قبلك في الشفت كويس، مهما كان شاطر، وعرفه لو نسي حاجة بينك وبينه، كلنا هدفنا العيان، مش هدفنا نثبت أننا الاشطر والأمهر.. ربك اللي ساترنا.

اكسب فريق العمل وقدر مجهودهم، واشكرهم على اللي بيعملوه كل يوم، تسلم ايدك، ربنا يعينك، شكرا.. بسيطة بس بتفرق.

سيب اثر، مع العيان، أهله، زمايلك و اساتذتك، بابستامة، احترام، تقدير، والأهم على الاطلاق يبقى عندك ضمير.. ضميرك الصاحي هيدلك على اللي ناقصك تكمله.

د. مصطفى زيدان

لشباب_الاطباء

مفيش تخصص سهل في الطب
مفيش تخصص دخله أكبر
مفيش تخصص سفره اكتر

في تخصص بيضغطك جسديًا
وتخصص بيستهلكك ذهنيًا
وتخصص بياخد من وقتك وحياتك
وتخصص مسؤولية الغلطة فيه عالية جدًا

الفكرة مش
أختار تخصص مريح
لأن ده مش موجود

الفكرة إنك
تسأل
تفهم
تشوف يوم الشغل عامل إزاي بجد
مش من بوستات ولا كلام قعدات

اختيار التخصص
هو:
هل هتقدر تعيش مع نوع الصعوبة دي سنين طويلة؟
هل هتقدر تنجح فى تخصصك ده ؟

وفترة النيابة؟
خصوصًا نيابة الجامعة
غالبًا أصعب فترة في حياة أي دكتور
ضغط
تعليم قاسي
مسؤولية
وقليل جدًا من التقدير

بس هي كمان
الفترة اللي بتشكّل الطبيب
وتطلعك فاهم نفسك
وحدودك
وقدرتك على الاستمرار

قبل ما تختار تخصصك:
اسأل ناس جوه التخصص
احضر معاهم
وشوف نفسك مكانهم بعد ١٠ سنين

الطب مش سهل
والتخصص مش فتره
هو رحلة طويلة
لازم تختارها بعقلك و بقلبك سوا

Dr Ahmed elhadidy

DCL
من أكتر أسباب الارتباك في الطوارئ
سكر؟ جلطة؟ نزيف؟ تسمم؟ عدوى؟
المحاضرة دي بترتب لك التفكير خطوة بخطوة
من أول الفحص السريع
لحد القرار الصح اللي ينقذ المريض 👨‍⚕️

محاضره ال disturbed conscious level كاملة
فى دكاتره كتير سألتني عليها 💙

لما بنقبل حالة دخول للعناية بنبلغ التمريض.. وعادةً أول سؤال بيسألوه بيبقى له علاقة بحالة المريض، زي :
الحالة حلوة ولا وحشة؟ على ڤنت أو أكسجين؟ على سبورتات؟

أو له علاقة بالتوزيعة، زي :
المريض كام سنة؟ ميل ولا فيميل؟ بيتحرك ولا بيد ريدن؟

المهم من يومين بكلم سينيور الشيفت بقولها في حالة طالعة.. لقيتها بتقولي "كام كيلو؟!"..

ودا كان أغرب سؤال اتسألته عن أدميشن.. واضح إن الكير والتقليب عند بعضهم أصعب من باقي الشغل 😁

Dr Mohamed faheim

التأخير ع زمايلك وانت بتستلم منهم الشفت من الحاجات اللى ربنا هيحاسبك عليها "طالما معندكش مبرر للتأخير"

لو أخرت ع زميلك وانت بتستلم منه الشفت وضيعت وقته دي من الحاجات اللى ربنا هيحاسبك عليها لانك ممكن تكون سبب ف انه يتأخر عن صلاة او شغل او ميعاد مهم بالنسبة ليه او هتخليه يتمرمط ف المواصلات ويتبهدل ويروح بيته متأخر او هتخليه يتأخر عن شغل تاني هو المفروض بيشتغله جنب الشغل بتاعه فياخد جزا بسبب انك اخرت عليه وغيره وغيره وغيره..

زي ما انت بتحب تروح بيتك بدري وتقعد وسط اهلك وتطمن عليهم وترتاح وتغير هدومك وتأكل وغيره وغيره وغيره هو كمان زيك..

زي ما انت ابوك وامك واخواتك بيكونوا قلقانين عليك هو برضو عنده اهل..

ممكن تأخيرك ع زمايلك ده يأذي حد تاني من اهله او ولاده او اخواته زي انه عنده حد فيهم مريض وهو اللى بيديله العلاج وغيره وغيره وغيره..

زي ما انت عايز زميلك ييجي يستلم منك بدري عشان تروح وترتاح تعالى انت كمان استلم بدري...

مش هتبقى حلوه ليك ووحشه لزميلك..

زي ما بتحب الخير والراحة لنفسك حبهم لغيرك عشان ربنا يسترك ويسهلك كل صعب..

ممكن تبان تكون دي حاجه تافهه بالنسبالك بس صدقني ربنا هيحاسبك عليها...

ف استقم يرحمك الله♥

Ahmed bakry

كلمة أعجبتني فنقلتها جزى الله خيراً قائلها و ناقلها:

لو علمت کيف ستُنسى بعد مماتك
‏ما اجتهدت لتُبهر أحد !

نصيحة قالها ليا النايب بتاعي في أول يوم نزلت فيه المستشفى ممكن تنفع زمايلي اللي داخلين امتياز..

اختار النايب المحترم قبل الشاطر..
ويا بختك لو لقيته شاطر ومحترم.!

الفترة دي إنت عامل فيها زي "الإسفنجة"، بتتشرب كل حاجة بتشوفها حواليك؛ طريقة التعامل، نبرة الصوت، وحتى النظرة للمريض. عشان كدة لازم تختار "المنبع" اللي بتشرب منه بعناية.

العلم ملوش حصر وموجود في كل مكان، لكن الأخلاق عملة نادرة. دوّر على النايب اللي بيعامل المريض كإنسان مش كـ "حالة"، واتعلم منه الأدب قبل الطب.

كان الإمام مالك يقول: "كانت أمي تقول لي: اذهب إلى ربيعة فتعلم من أدبه قبل علمه".
الطب "حكمة" والحكمة لا تُؤخذ إلا من أهل الأدب.

اختار النايب اللي بيتكلم باحترام مع المرضى وبيكون حنين معاهم وبيبتسم في وشهم وتذكر قول النبي ﷺ:
"الكلمة الطيبة صدقة"، "وتبسمك في وجه أخيك صدقة".
المريض أحياناً بكلمة حنينة منك بيخف نص الوجع قبل ما ياخد الدواء.

خليك إنت اللي بيخفف الكُربة، لقوله ﷺ: "من نفس عن مسلم كربة من كرب الدنيا نفس الله عنه كربة من كرب يوم القيامة"

خلي المريض يحس إنك عملت كل اللي عليك ويدعيلك وهو مروّح وافتكر إن دعوة المريض مستجابة.!

- احمد شاهين

هتكلم عن Hematemsisis 🩸

📌هتلاقي العيان بيرجع دم ودى حالة مشهورة جدا في استقبال الباطنة واستقبال الجراحة هتشوفها كتير

📌اول حاجة تفيتل العيان لأن ممكن تلاقي :

الضغط قليل
Pulse عالي tachycardia 🫀
O2 saturation واقع

🚨Urgent Mangement

📝 طبعا لو العيان severe او shocked بيتحول علي اريست او الرعاية

📝 لو العيان No-hepatic

📌هتركب 2 كانيولا و رايل و قسطرة بولية

1️⃣ كانيولا فيها
📍2 amp diacynon
📍+ 2 amp kapron
📍+ 1 amp konakion
علي 500 saline

📌طب ايه الaction بتاع كل واحد منهم

📝 Diaycnon :
بيزود platelet aggregation
📝 Kapron :
بيقلل fibrinolytic activity
📝 Konakyion :
بيحفز تصنيع عوامل التجلط 1972 من الكبد

2️⃣وكانيولا تانية فيها :

2 amp pantazol (40mg)
علي 50 saline
وبيتعلق تاني المحلول ده بعد 12 ساعة

+ gastrobiotic 500💊 مرتين في اليوم عشان يمنع hepatic encaphalopathy

3️⃣وهتجيب سرنجة الرايل و تflush فيها امبول واحد ادرينالين 🌡️ علي محلول 100 saline ساقع عشان تحسن الHemostasis بتاعت العيان

📌وعلقله ماسك اكسجين لو saturation بتاعه واقع

📌وخد هيستوري من العيان عن الاسباب المحتملة للدم ده زي :

📍كنت بتتعالج من قرحة المعدة ؟
Bleeding peptic ulcer
( و ده اشهر سبب بالمناسبة )

📍كنت بتتعالج من جرثومة المعدة ؟
H- pylori

📍هل انت مريض كبد ؟
Liver cirihosis or failure or encaphalopathy

📍او عندك دوالي مرئ ؟
Oseaphageal varices

📍او عندك فشل كلوي او فشل في القلب ؟
Renal failuer - Heart failure

📍او addict on NSAIDS

📌لو العيان Hepatic

(علي اساس ان العيان قالك في الهيستوري ان مريض كبد او لقيت معاه تحاليل وظائف كبد من فترة قريبة بإنزيمات عالية)

وهيأكدلك ده العلامات اللي هتلاقيها عليه :

1️⃣ earthy look
2️⃣ asctis
3️⃣ lower limb edema
4️⃣ flapping tremors
5️⃣ fetor hepaticus
6️⃣ jaundice
7️⃣ spider navei

هنزود علي الmangement اللي فات
لو العيان Hepatic

🌡️ 2 amp sandostatin
+
علي 250 saline

( ده عبارة عن octeroide
بيشتغل ك Splanchic vasoconstrictor to reduce bleeding but Contraindicated in ischemic cardic patient )

📝 Investigation

اطلبله سونار ع البطن 📹

واكتب في اورنيك الاشعة 1st attack hematemsis عشان فني الاشعة يرضي يعملهولك لأن ده روتين هما ماشيين عليه 🩸

🚨 اطلب full lab 🔬

CBC - VBG - Na - K - Urea - Creatinine

🚨 اطلب تحليل وظايف كبد LFT

AST - ALT

🚨 اطلب INR - PTT

🚨 و اطلب كمان H-pylori Ag in stool
لو العيان peptic ulcer عشان تستبعد الجرثومة 🦠

🚨 طب تعالو نشوف نتايج التحاليل المتوقعة

📍لقيت Hemoglobin اقل من 7 في CBC انقل دم

📍لقيت creatinine عالي بمقدار بسيط يبقي هتشوف سبب AKI وتعالجه زي :
Acidosis - Hyperkalemia - Pulmonary edema
📍ولو العيان مستجابش للعلاج اغسل كلي

📍لقيت AST و ALT و INR عاليين يبقي ده عيان liver cirrihosis with vascular decompensated و يوقف ادوية السيولة اللي ماشي عليها وأشهرهم ال marevan

📝شوية N.B مهمين خد بالك منهم

📝وطبعا العيان هيتححز و هتيفيتل كل ساعة والتحاليل دي هتتسحبله كل يوم وتتسجل النتايج في ورقة بجدول

📝و لو لقيت melena متقلقش ده بيحصل عادي في اول 24 ساعة من عيان hematemsis

📝و لو عيان epistaxsis و جاب دم بوقه غالبا ده عيان pseudohematemsis وبتحصل كتير في الاطفال

📝وممنوع العيان ياكل اي حاجة إلا بعد 6 ساعات من ال attack وياكل حاجات خفيفة مش بتتمضغ

Advanced Emergency medicine
🟢كورس طوارئ الباطنه 🚑

آخر فرصه لخصم ال %50 للدكاتره اللي طلبته

لمزيد من الإستفسارات :
⭐تليجرام : 
https://t.me/A_m_Ebrahim

⭐واتس :
https://wa.me/message/MGL36GVQ2KHUI1

زمان كنا بنقول لمريض السكر
خد جلوكوفاج
"وسط الاكل"
لحد ما اكتشفت ان فيه مريض بيحط الحباية وسط الاكل حرفيا " وسط طبق الرز "

د.السيد المر