في كذا معلومة بحس انها غايبة عن بعض الدكاترة و التمريض عشان بحسهم مستغربين لما اطلب منهم الحاجات دي :

الكالسيوم ممكن يتاخد بدون ما يتحل على محلول .. بس بيتاخد ببطئ على مدار ١٠ دقايق .

رسم القلب بيتعمل عادي والمريض قاعد حتى لو المريض مش عارف ينام على ضهره .

الانسولين لما بيتاخد حسب الجدول .. مش بنطلب من المريض ياكل عشان ما يهبطش .. الانسولين اللي خده ده مش هيهبطه ده انسولين تصحيحي .. هينزل الجلوكوز اللي فوق ال ٢٠٠ او ١٥٠ بس .. فاحنا لما نطلب منه ياكل كدا هنزود السكر تاني .

الجلسات اللي بنطلبها لحالات ال COPD بتتعمل على جهاز النيبولايزر مش على الأكسجين .. عشان الاكسجين لو زاد هيسوء الحالة .

حالات غيبوبة السكر المنخفض اول حاجة نعملها تركيب الكانيولا واعطاء جلوكوز قبل سحب اي تحاليل .. سحب التحاليل هيعطل اننا نلحق المريض وكل دقيقة بتفرق .. ومش مهم نشك العيان مرتين .. بس نحميه من ال brain damage .

الحالات الحرجة .. الاهم من انك تشتغل شغل صح ١٠٠ ٪ انك تشتغل شغل منظم وكل واحد يبقى عارف دوره ايه ويعمله .. والصح انك كل نباطشية يبقى كل واحد يبقى عارف دوره ايه في حالات الاريست والحوادث بدل ما كله يقعد يلف حوالين بعضه .. ونضيع وقت ومجهود على الفاضي.

Dr Mohamed emam

غاية المني..

غاية المني لكل إنسان سوي، أن يعود الي بيته آخر كل يوم، بريئا من الظلم والجهالة، عفيفا من أذي الناس وأكل حقوقهم..

اليوم المثالي عند الله هو الذي تعود فيه أدراجك، دون أن تضل في نفسك، أو أن تكون سببا في ضلال غيرك..
أن تعود دون أن تَزِلَّ في معصية، أو أن تكون سببا في أن يزِلَّ أحدهم فيها..
اليوم المثالي الذي تعود فيه إلي بيتك دون أن تجهل علي أحد بسوء الخلق أو الإيذاء، وألا يؤذيك أحدهم أو يجهل عليك..

تخيل بأن هذه الأمور هي نفسها التي كان يرفع حبيبنا صلي الله عليه وسلم نظره إلي السماء، كل صباح، ويسألها مولاه..

عن أم المؤمنين أم سلمة رضي الله عنها قالت : "ما خرج النبيُّ صلَّى اللهُ عليهِ وسلَّم من بيتي قَطُّ إلا رفع طَرْفَه إلى السماءِ فقال اللهم أعوذُ بك أن أَضِلَّ أو أُضَلَّ أو أَزِلَّ أو أُزَلَّ أو أَظْلِمَ أو أُظْلَمَ أو أَجْهَلَ أو يُجْهَلَ عَلَيَّ".. "صحيح أبي داود والترمذي"..

يارب.. نعُوذ بِكَ أن نَضِلَّ أو نُضِلْ، ونعُوذُ بِك أن نَزِلَّ أو نُزِلْ، ونعُوذُ بِكَ أن نَجْهَلَ أو يُجْهَلَ علينا....

تصبحون على كل خير..

بمناسبة الكلام المنتشر اليومين دول من بعض الأطباء — المفروض يعني — خلينا نقول الكلام ده:

الطبيب اللي عنده انحيازات ضد مبدأ البحث العلمي، وضد وجود جايدلاينز بيتعملها updates بمنهجية محترمة، غير مؤهَّل لممارسة المهنة دي.

والطبيب اللي مش بيحترم شكوى المريض، لا يؤتمن على حياته.

والطبيب اللي بيألف منهج وطريقة علاج مدعيًا إنها نتيجة خبراته الطويلة، نصاب.

والطبيب اللي مش بيتناقش مع نصائح زمايله بحكمة وعقل، وبيختار العنجهيّة وقلة الأدب، عنده مشكلة أخلاقية قبل ما تكون علمية.

والطبيب اللي بيستشهد بآيات وأحاديث علشان يدعم منهجه، عنده مشكلة دينية قبل ما تكون أخلاقية أو علمية.

الطب مهنة علمية بحتة، لا يستقيم فيها إلا اللي بيحترم العلم والمناهج العلمية. أما الكلام المعسول والمنمّق وجُمل من عينة “دي خبرة سنين” ممكن تنفع في مهن تانية… الطب مش منها.

Dr_Mostafa_Salah

{ رَبَّنا لا تُزِغ قُلوبَنا بَعدَ إِذ هَدَيتَنا وَهَب لَنا مِن لَدُنكَ رَحمَةً إِنَّكَ أَنتَ الوَهّابُ }

كنت بسمع دكتور ناجي ف استوقفني مقطع جميل خالص في الشرح واللي هو زي ما دكتور ناجي بيقول " كل هذا يثبت أنه وراء الخلق خالق"
بيقول إن الواحد لو عنده أحماض كتيره في جسمه "acidosis" ف المصلحة إن الجسم يتخلص من الأحماض دي وبما إن العضلات الإرادية في جسمنا هي أكبر منتج للأحماض "40% من ال skeletal muscles لما بتتحرك بتنتج Lactic acid" ف محتاجين نوقفها شوية عشان نتخلص من الأحماض دي ف من رحمة ربنا بينا إنه العيان بيدخل في غيبوبة "coma" عشان يحصل ريلاكساشن لكل عضلات جسمنا ف تبطل تنتج أحماض ويرجع الجسم بعد فترة لحالته الطبيعية.
علي العكس لو الجسم فيه قلويات كتيرة "alkalosis" ف في الحالة دي الجسم محتاج إنه ينتج أحماض كتير عشان تعادل القلويات ف العيان بيدخل في حالة تشنجات "convulsion" هنا بقا بتشتغل العضلات بقوة شديدة عشان تطلع كميات كبيرة من ال Lactic acid عشان يعادل ال alkalosis اللي حصلت دي.
ف سبحان الله فعلاً أعراض المرض تفيد في شفائِه.
الله يداوي والطبيب يأخذ الأجر. ⁦
سبحان الله العظيم ❤️

Cpd

كانَ أحدَهم كلَّما مرَّ ببلاءٍ يَقول:

مالكٌ يتصرَّفُ في أملاكهِ، حَكيمٌ لا يَفعلُ شيئََا عبثََا

الحمد لله وبعد..

ك طبيب مسلم ع وجه التحديد او طبيب ع وجه العموم ..

إذا اضطررت للكشف على النساء عليك بتقوى الله أولا..

-الكشف يكون بحضرة أحد محارمها فإن لم يوجد فممرضة، ولا تجوز الخلوة إطلاقا

- الطبيب المسلم لا يكشف إلا ما تدعو الحاجة إلى كشفه في عورات النساء والرجال

-الطبيب المسلم عند فحص مواضع الضرورة إن أمكن الفحص بالوصف فقط، فلا يجوز النظر ولا اللمس،

وإذا كان يكفي النظر فلا يجوز اللمس، وإذا كان لابد من اللمس فارتدي جلافز

- ولو فرضنا أنه لابد أن يكشف عن الموضع من غير حائل، فإنه لابد أن يقدر الضرورة بقدرها، فلا يتعدى المكان ولا الوقت اللازمَين للفحص

-لا يدعها تكشف أمامه حتى تصل إلى مكان المرض، بل تكشف من وراء الستارة حتى تصبح جاهزةً للكشف على موضع الضرورة

Dr Ahmed Elashmawy

مديحة الذئبة الحمراء
إبراهيم ورم في الكبد
فلان الإيدز
و علان مريض كذا و كذا
ده موضوع كنت عايز أتكلم فيه من زمان و رسالة للزملاء الأطباء، بعد انتشار تطبيقات معرفة رقم المتصل.

التطبيقات دي بتتعرف على الأرقام من خلال احنا مسميينهم إيه و بالتالي لو كتبت و سجلت اسم مريض عندك بالمرض بتاعه هيظهر في التطبيقات زي اللي فوق كده وهيبقى فيها أكتر من إشكالية.

الأولى هو كشف سر مؤتمن عليه من أسرار المرضي breaching confidentiality و ده قانونياً و أخلاقياً مجرم.

ثانياً ضرر نفسي بشع هيقع على عاتق المريض لما يلاقي نفسه متسمي باسم المرض بتاعه و ما أدراك إيه الجرح العميق اللي هتعمله له.

المرضى المزمنين بيبقى نفسيتهم زي الإزاز بالضبط و محتاجين اللي يطبطب عليهم، فما بال بقى نعمل اللي يكسر نفسيتهم.

رسالة للزملاء بلاش الموضوع ده و أنا عارف إنه ممكن يغيب عن ذهنكم بس خدوا بالكم

د. أحمد زناته

مفيش ادني علاقة بين انك شاطر وإنك متربي
الشطارة شيء مكتسب ( مجهودك يعني ) على توفيق من ربنا
إنما التربية صعب تثبت عليك لو مشفتهاش قبل كده
ممكن تكون شاطر اوي بس اهلك معرفوش يربّوك
وفي كل الحالات التربية أهم من الشطارة

Dr hazem abdeltawab

من اسبوعين دخل حالة فالطوارئ بنت 21 سنة..

والدة من اقل من 48 ساعة قيصري،
جاية ب غيبوبة
درجة وعي 7/15،
ضغط 70/40
اكسجين 33٪ ،
نبض 190

المريضة عاملة اشعة علي الصدر ظاهرة التهاب رئوي عنيف جدا
المريضة دخلت الرعاية مباشرة..
زميل لينا استقبلها
فور دخولها الرعاية اتوقفت عضلة القلب..
اشتغل عليها بسرعة جدا..
رجعت بعد حوالي دقيقة ونص
اتحطت علي جهاز تنفس صناعي،
ركب قسطرة وريدية عوضها محاليل وأدوية ترفع الضغط،

حالة البنت كانت سيئة جدا جدا

اول ما شكينا فيه كان جلطة رئوية بعد الولادة
حالتها مكتتش تسمح ابدا بانها تعمل اشعة مقطعية علي الصدر بالصبغة للتشخيص..

ودا يعتبر اهم عامل في تشخيص جلطات الاوردة الرئوية

اعتمدنا عالتحاليل االي طلعت

الD-dimer كان 15
الferritin كان 5 أضعاف معدلة الطبيعي

بدانا فورا ادوية سيولة ومضادات حيوية
لان كان في التهاب رئوي قوي لانها شرقت بافرازاتها،

كنا بنبات معاها فالاوضة
ومقعدين تمريض كل دوره انه قاعد جنبها عالاجهزة

مكنتش في درجة وعي تحتاج مخدر انها تنام
وهي علي جهاز التنفس الصناعي

كنا كلنا بنكلم بعض نتطمن عليها
ونسال هي عاملة ايه
ولو احتاجت حاجة نجيبهالها

جوزها وابوها وامها كانو هيتجننو عليها
بنتها اللي ولدتها مشافتهاش،
اهتمينا معاها بكل تفصيلة..
بكل نقطة بكل حركة..
مكناش بنسيب فرصة لاحتمالية واحد فالمية لحاجة لدرجة ان ابوها قالي فمرة
يادكتور بنتي لو ماتت حتي
انا هاجي اشكركو لاني معرفش انا عملت ايه ف حياتي يوقفلي ناس زيكو خصوصا د. عادل (اخصائي اليوم اللي استقبل الحالة)..

الجميل ان البنت دي روحت النهاردة بيتها
وهي شايلة بنتها علي دراعها

روحت بعد ما قلبها توقف دقيقة ونص
وكانت جاية بضغط شبه مش مسموع وجلطة فالرئة

روحت علشان تقعد مع بنتها لاول مرة ف بيتهم وتاخدها ف حضنها🩵

المنظر والموقف دا
مفيش حد فالدنيا
ممكن يقدر يجازي حد ماديا
بقدر الاحساس اللي حسيناه ساعتها.

Dr Omar_Elkassas

من باب التوفير
يطلب  بعض الاطباء تحليل ALT  AST
فقط
وذلك علي اعتباره وظايف كبد
مستوي الانزيمات  ليس هو وظيفة الكبد
تحليل  وظايف الكبد الكاملة
يشمل
نسبة الالبيومين وهو وظيفة الكبد التصنيعية
و نسبة البيليروبين ( الصفراء) وهي وظيفته  في التعامل مع السموم
الانزيمات قد تكون طبيعية مع فشل كامل للكبد

وقد تكون مرتفعة
ولا تقلق
ولا تدعو لتأجيل  الجراحة

د السيد المر

لو جاتلك حالة Severe anaphylaxis وأخدت IM adrenaline والحمد لله اتحسنت هل هتروحها؟؟

الجواب: لا.
حالات ال Severe anaphylaxis لو كان عندها Bronchospasm أو laryngeal spasm أو signs of shock وأخدت IM adrenaline سواءاً مرة أو أكتر من مرة يبقي لازم تعملها متابعة علي الأقل من ٦ ل ٨ ساعات وفي بعض الأحيان ٢٤ ساعة.

ال Anaphylaxis بيكون فيه مرحلتين. Early and late phase. ال Early phase دي بتحصل علي طول بعد التعرض لل Allergen وممكن تستمر لساعة وبيحصل release لل Histamine and tryptase علشان كده غالباً هتلاقي high tryptase level.

ال Late phase دي ممكن تحصل بعد ٤ ل٨ ساعات بعد ال early phase وممكن المريض يكون اتحسن تماماً وممكن تستمر ل ٢٤ ساعة وأعراضها ممكن تكون نفس أعراض ال Early phase أو كمان ممكن تكون more severe symptoms ونحتاج ندي IM adrenaline تآني وممكن أكتر من مرة. ال late phase بتكون نتيجة ال Release of prostaglandins, leukotrienes and cytokines.

علشان كده لازم المريض بتاع ال Anaphylaxis ميمشيش بعد ما يتحسن من ال Early phase ويفضل متابعة علي الأقل من ٦ ل ٨ ساعات.

د /وليد المرواني

لما ربنا يكرمك بشوية علم و مهارة وتمكن فى مجالك يا ريت متصعبهاش على اللى تحتك وإنتَ بتوصله ليه، يا ريت أصلًا توصله سهل حتى لو وصل لك صعب. يا ريت متوصلهوش برخامة وتناكة وبطريقة إستجواب، وصله بحب وإحترام و ودّ. سهّل عشان ربنا يسهل عليك.
‌‎مهما بلغ علمك فإنتَ ما زلت جاهل وهتلاقى اللى أعلم منك.
‌‎يا ريت متبقاش جاهل وتوكسيك.
‌‎دنيا وهتعدى والله وملعونةٌ ملعونٌ ما فيها سوى ذكرُ الله وما والاه أو عالمًا أو متعلمًا.

د. أحمد الخطيب