اشهر سبب يخلي جهاز ال pulse oximeter يقرأ نتيجة تشبع الأكسجين غلط هو الحركة !

لذالك لو الشخص عنده حركة في مكان القياس زي حالة الشلل الرعاش

لازم نغير مكان القياس ممكن نوصل الجهاز في الجزء السفلي من الأذن أو الصباع الكبير في الرجل

#لشباب_الاطباء

في زحمة الحياة، لو ما حددتش أولوياتك بوضوح… هتتعب من غير ما توصل.

⬇️ رتّب أولوياتك كطبيب:

1️⃣ علاقتك بربنا
هي الأساس اللي بيحافظ على اتزانك وقت الضغط، وبيعطيك بركة في الوقت والطاقة.

2️⃣ صحتك النفسية والجسدية
طبيب مرهق أو مضغوط مش هيعرف يساعد حد. نام كويس، كل كويس، وخد راحة ذهنية.

3️⃣ التعليم المستمر والتطوير المهني
المذاكرة، الكورسات، الحالات… ده رأس مالك الحقيقي، واللي بيفرقك عن غيرك.

4️⃣ العلاقات المهمة (أهلك/شريك حياتك)
الدعم العاطفي مش كماليات… ده وقود للاستمرار.

5️⃣ الشغل اليومي والمهام الروتينية
المناوبات، النبطشيات، المهام اليومية… لازم تتعمل، بس ما تبقاش هي اللي بتحكم وقتك كله.

6️⃣ السوشيال ميديا والمقارنات والتفاصيل اللي مالهاش وزن
دي في آخر القائمة… خد منها المفيد بس، وفلتر الباقي.

Dr Ahmed Elhadidy

🙆لو لاقيت إنه وزنك نزل فجأة من غير ماتكون بتحاول، كده مافيش شك إنه ممكن يكون فيه حاجة غلط في صحتك

1.  الغدة الدرقية (Thyroid Gland)
لو الغدة الدرقية شغالة زيادة (hyperactive)، بتطلع هرمونات كتير، وده بيزود في metabolism ، الحاجه اللي هاتخسرك وزن بسرعة

2.  السكر (Diabetes)
لو عندك Type 1 Diabetes ، الجسم مش هايقدر يستخدم glucose  بشكل كويس، فيبتدي يحرق الدهون والعضلات علشان ياخد الطاقة. ده هايخليك تخسر وزن كبير

3.  مشاكل الجهاز الهضمي (Chronic Health Issues)
أمراض زي Inflammatory Bowel Disease  (التهاب الأمعاء). الجسم مش بيبقى قادر يمتص العناصر الغذائية، فبتخسر وزن

4.  السرطان (Cancer)
السرطان بيعمل حاجة اسمها cachexia ، الجسم هنا بيستخدم الطاقة بسرعة وبتخسر الوزن بسرعة رهيبة ومش طبيعية

5.  الضغط النفسي (Stress and Anxiety)
الضغط النفسي الشديد بيخليك مش قادر تاكل. لما تكون stressed  أو anxious ، شهيتك بتقل، وده ممكن يعملك فقدان في الوزن

6.  عدوى خطيرة (Severe Infections)
عدوى زي Tuberculosis (TB)  أو HIV. دي بتخلق حالة من الاستنزاف لجميع أشكال الطاقة في الجسم، الحاجه اللي هاتخليك تخسر وزن بشكل كبير

الخلاصة، لو وزنك نزل من غير أي سبب واضح، لازم تتأكد إنه مافيش حاجة غلط.

Dr_ahmedeltayb

🚑بعض المرضى اللي عندهم Hypertension
بيحصلهم هبوط في فترة الصيف مع ارتفاع درجات الحرارة🌡️
وبنضطر نقلل جرعات أدوية الضغط مؤقتا خلال الفترة دي

د احمد محسن استشاري القلب 🫀

🩸خلي بالك من الفرق الكبير بين الحالتين :

⭐1- مريض جاي بأعراض انيميا طلبت صوره دم طلعت microcytic hypochromic anemia
ربنا أكرمك وطلبت ليه iron profile وطلع فعلا فيه نقص في serum iron and serum ferritin  وكمان فيه زياده في TIBC يبقى انت كدا فعلا IDA وتشخيصك صح ولو اديته حديد الانيميا هتتحسن

⭐2- نفس المريض طلبت ليه cbc وطلع microcytic hypochromic anemia روحت طالب ليه iron profile راح طلع ليك low serum iron بس مع high serum ferritin وكمان low TIBC يبقى انت كدا مع حاله chronic infection or inflammation ولازم تدور عليه وكمان لو اديت حديد مش هيتحسن

Dr_Hegazi

✍️ في حالات انيميا نقص الحديد

💊 جرعه الحديد يوم بعد يوم له تاثير مشابه ويمكن احسن في علاج الانيميا من الجرعه اليوميه.

وكمان بيقلل الاعراض الجانبيه للحديد واللي بدوره بيخلي المريض يتحمل العلاج وينتظم ويستمر عليه فتره اطول

Clinical notes

✍️ تعمل إي لو إتشكيت بمسمار مصدي أو إتجرحت بأي حاجه مصديه؟ وإمتا لازم تاخد حقنة التيتانوس؟!!
مبدئيًا كدا لو سنك أقل من ١٣ سنه:

مش هتحتاج المصل، لأن المصل اللي بياخده وهو صغير بيغطي معاه لحد ١٣ سنه،
تغسل بس مكان المسمار بماء دافي وديتول وممكن مضاد للتورم لو ف تورم ولا حاجه
Maxilase 100ml syrup ٥سم كل ٨ ساعات للأطفال لو مش بيبلع حبوب
أو
_Alphintern tbs  (كل ٨ ساعات ( لو بيبلع حبوب

——————————————
لو أنت فوق ال١٣ سنه:
لازم تاخد مصل التيتانوس قبل أن يمر ٦ ساعات من زمن الإصابة،

طب لو مر أكثر من ٦ ساعات من زمن الإصابة؟…مش هياخد المصل، ويمشي على العلاج ده:
_ Megamox 1gm tbs كل ١٢ ساعة
_ Alphintern tbs كل ٨ ساعات
_Brufen 400mg عند اللزوم

لو عيان جالك معاه
severe attack of headache
وانت بتفحصه لقيت الشكل ده زي فالصوره كده
لازم تفكر فال temporal arteritis
(giant cell arteritis)

طب ده مهم نشخصه صح ليه ده مجرد صداع هيعمل ايه
يعني؟
لان العيان ده لو متلحقش بكورتيزون فورا قبل اي فحوصات تانيه
ممكن يجيله blindness
لو وصل الالتهاب ophthalmic artery

Early corticosteroid can prevent blindness in these cases !

♻️ ازاي التعرض للتكييف أو المروحة ممكن يسبب برد(common cold)؟

انتشار الفيروسات الي بتسبب common cold بيبقا أسهل في درجة الحرارة القليلة والتعرض للهواء الجاف لأن دول بيأثرو علي المناعة

طب إزاي؟
-حاجتين:

✍️ أولا التعرض للبرد المفاجئ ممكن يدمر الcilia اللي مسؤولة عن طرد الmucous ودا بيزود من فرصة الإصابة


✍️ تاني حاجة: تضييق الأوعية الدموية(vc) التعرض للبرد ممكن يسبب تضييق في الأوعية الدموية وده يعني تقليل تدفق الدم للأنسجة ولما تدفق الدم يقل بتقل كمية الخلايا المناعية زي الأجسام المضادة والماكروفاجات، اللي بتكون مهمة في محاربة العدوى والحفاظ على الدفاعات المناعية

لشباب_الاطباء

الأصعب مش دراسة الطب… الأصعب إنك تنتصر على نفسك كل يوم.
*إنك تقوم تذاكر وأنت مش عايز،
*تحضر شيفت وأنت مرهق،
*تصرف فلوسك على الكورسات و تحرم نفسك من حاجات كتير،
*وتكمّل المشوار وأنت مش عارف هيوصلك لفين.

كل خطوة بتقربك، حتى لو صغيرة.
بس أهم خطوة؟ إنك ما توقفش

Dr. Ahmed Elhadidy

دكتور الشافي قال حته حلوه :
_لما يجيلك مريض عنده
liver disease 
وجاي بComa
متقولش ان دي Hepatic coma 
لازم تستبعد ال Hypoglycemia والintracranial HG علشان المرضى دول بيكون عندهم
Bleeding Tendancy ..

فلازم تعمل تحليل سكر وCT وتستبعدهم

-د.عبده بكر

لينك قناة الطوارئ 🚑 :
https://t.me/EmergenceCourse

ايام الكلية .. كان عندي خاطر بيؤرقني جدا كل ما أشوف اساتذة او معيدين حاسين بعدم الامان ومقررين بصريح العبارة كده انهم مش حيعلموا اللي اصغر منهم اي حاجة بالساهل .. الخاطر ده أشتد عليا لما واحد زميلنا من الاوائل قاللي ان الذل اللي شافه في الكلية يخليه يعمل في اللي اصغر منه زي ما اتعمل فيه وأكتر .. حاجة كده زي سعيد صالح لما قال (بكرة لما اجيب عيال وديني لاقطع عنهم المصروف) ..

الخاطر ده كان: ايه اللي ممكن يحصل بالتدريج للدفعات المتتالية لما كل دفعة تقرر توريث الذل وكتمان العلم عن اللي بعدهم بالحجة الفاشلة بتاعة "المساواة في الظلم عدل"؟ ويا ترى مستوى اللي اصغر مني حيكون كافي أنه يعالجني انا لما أكبر؟ ده المفروض اللي أصغر مني يكون احسن مني بكتير والا منبقاش بنتقدم !

وفضل الموضوع ده مؤرقني لحد في يوم كنت شغال عمليات في مستشفى بالقاهرة لما دخل علينا طبيب التخدير وهو يقول بحماس لا يخلو من التوتر "شفتوا اللي حصل للدكتور (م)؟ عمل عملية كتاراكت وجاتله عدوى خلتهم يستأصلوا له العين كلها!!!" .. في اللحظة دي توقف الزمن تماما .. كل الحاضرين كانوا يعرفوا الدكتور (م) ما عدا أنا .. جراح شديد الشهرة حاز من النجاح والغنى والقرب من الرؤساء والملوك الكثير والكثير .. زعلت عليه طبعا وقلت أكيد مشكلة تعقيم بشعة حصلت ... فسألت دكتور التخدير هو عمل العملية فين بالضبط؟ وكانت المفاجأة انه عملها عند أكبر جراح عيون في العالم .. في اسبانيا!

طبعا مسألة عدوى في العين بعد كتاراكت لدرجة استئصال العين دي حاجة غريبة ونادرة جدا مكانش ممكن اسيبها تعدي كده بالساهل .. لسبب : واحد بالشهرة والنجاح ده كله ايه اللي يخليه يسافر يعمل عملية بسيطة زي الكتاراكت عند أكبر جراح في العالم؟ مفيش حد في مصر يعني قدر يثق فيه من تلامذته انه يعمل له العملية؟! دي كتاراكت يعني أي أخصائي رمد جديد يعملها بسهولة!

رحت سألت كذا واحد من أساتذتي عن الدكتور (م) .. الراجل ده ليه معملش العملية دي عند أي حد منهم؟ فعرفت انه طول عمره لا كان بيعلم حد ولا بيساعد حد أنه يتعلم!!!
واحد من الأساتذة قال لي بالحرف: "لو كان علم أي حد كان وثق فيه يعمل له الكتاراكت .. بس هو سافر اسبانيا عشان يتفادى القدر لكن قدره كان مستنيه في اي حتة يروحها" ...

ساعتها شفت عدل السماء بعيني واتعلمت الدرس:
علم اللي حواليك واللي أصغر منك أحسن مما اتعلمت .. خليهم أفضل منك .. وربنا حيغنيك اكثر مما تستحق!
العلم زيه زي المال .. لا بتاعنا ولا حقنا .. وإنما ربنا بيديهولنا قرض عشان يشوف حنعمل بيه ايه .. والجزاء الحقيقي بيكون من الله مش من الناس!

د.نزار عبد الفتاح

🩺 إيه الفرق بين سرعة الترسيب (ESR) و CRP؟
كتير بنسمع عن التحليلين دول… لكن مش كل الناس عارفة الفرق بينهم!

🔹 سرعة الترسيب (ESR):

تحليل بيقيس سرعة ترسيب كرات الدم الحمراء في الأنبوب.

مش مخصص لمرض معين، لكنه بيقولنا لو في التهابات مزمنة أو أمراض مناعية.

بطيء شوية… يعني النتيجة بتاعته ممكن تتأخر في توضيح لو الالتهاب لسه في أوله.

🔹 تحليل CRP (C-Reactive Protein):

ده بروتين بينتجه الكبد في وجود التهابات حادة.

أسرع في الكشف… لو عندك التهاب أو عدوى نشطة، بيظهر فوراً.

كل ما الرقم بيعلى، كل ما الالتهاب في الجسم بيكون أقوى.

⚠️ معلومة ناس كتير مش عارفاها:
ممكن يكون ESR عالي وCRP طبيعي، وده بيحصل في أمراض زي الروماتويد المزمن.
ولو CRP عالي وESR طبيعي… ده معناه التهاب حاد ولسه الجسم في البداية بيرد عليه.

لسه حالا دلوقتي

شاب ٢٦ سنه مدخن وبيشرب حشيش
ومافيش اي امراض مزمنة

جي بوجع في صدره حاد
ومافيش اي اعراض تانيه

وطلع جلطه حاده في القلب (STEMI)
وده سن صغير جدا للأمراض دي

والسبب الرئيسي التدخين والحشيش

تقريبا اول بوست اكتبه لغير الدكاتره
عشان خطورة التدخين والمخدرات

حاجه زي كده بتنهي الحياه

علشان كده حافظ علي حياتك علشان هتتحاسب عليها وتقصيرك في حق نفسك أمام الله

د. محمد القصاص

فيه لحظة كده، ممكن تعدّي على أي دكتور وهو بيكشف على مريض...
لحظة يحس فيها إن فيه حاجة مش راكبة، حاجة مش مريحة في وش المريض، في طريق كلامه، في لَون جلده، في نبرة صوته...
بس الحاجة دي "مش في تخصصه".

ساعتها، فيه دكاترة قليلين بتختار تسكت وتقول:
"أنا مالي؟ ده مش مجالى، وممكن أطلع غلطان و أكون قلقت العيان ع الفاضى".
لكن اللي فاهم يعنى إيه طبيب بجد، يعرف إن سُكوته ساعات بيكون أخطر من المرض نفسه.

لو جوّاك جرس رن وقالك فيه حاجة غلط، لو إحساسك نبهك، أو عينك لمحِت حاجة مش طبيعية...
اتكلم.
انصح.
وجّه.
قولّه يروح لدكتور كذا أو يعمل تحليل كذا.
اقنعه، طمنه، ان شالله تخوّفه لو لزم الأمر، بس متسكتش!

الطب مش بس تخصص،
الطب النصيحة،
والنصيحة فيه ممكن تكون فرق بين حياة وموت.

Dr Ahmed bendary

- موضوع ال shock باختصار يا رفاق🫡

Shock = Hypotention +DCL

*Shock +Fever = Septic Shock

*Shock +Pale = Hypovolaemic Shock

*Shock + Congested = Cardiogenic Shock

*Shock+warm, Bradycardia = Neurogenic shock

*Shock+Bronchospasm,Rash = Anaphylactic Shock

* ال CVP بينزل فى كل حالات ال shock بتبقى تحت 5 ، النورمال رينج أصلا 5:11 ، وأعراض نزوله
(tachycardia, tachypnea,hypotension)

* استثناء ال  Cardiogenic Shock ال CVP مبينزلش فيها .

لو انت مريض حسيت بالم في الصدر (اي الم من الفك السفلي حتى فُم المعدة بخلاف النغزة اللي بتيجي ثانية او اتنين وتروح) خاصة لو عندك عوامل خطورة للاصابة بازمات قلبية زي السكر والضغط والدهون والتدخين
لو فيه كدا لازم تتحرك باسرع وقت للمستشفى.

ليه؟
لان
لو دا كان ازمة قلبية خاصة الجلطة المكتملة فكل دقيقة بتمر معناه انك بتفقد جزء من عضلة القلب

أفضل وقت بيستفيد فيه المريض من دخول العمليات (قسطرة) وفتح الشريان المقفول خلال ٤٠ دقيقة من بدء الاحساس بالالم (والفايدة بتكون كبيرة ايضا في اول ٦ ساعات)

بعد الوقت دا مؤكد ان فيه خلايا من القلب بتموت (غالبا للابد)

-أحمد عبد المجيد الفرا

اي شخص له قريب درجة أولي
جاله سرطان قولون
لازم يعمل منظار قولوني قبل السن اللي جه لوالده او أخوه بعشر سنين علي الأقل
يعني لو شخص والده تم تشخيصه بسرطان القولون في سن الأربعين
يعمل قبل التلاتين
المنظار آمن وسريع ومفيد