جماعة الطواريء في المستشفيات للطوارئ فقط (خاصة المستشفيات الحكوميه)
كلام بديهي جدا لكن مش بيحصل
معني طوارىء يعني حاجه لو ماتلحقتش تؤدي الي الوفاه او إصابه مستديمه
اي حد ضغطه اقل من 160 دا مش طوارىء
اي حد ضغطه اكتر من 160 طوارىء لكن مايخدش قرص تحت اللسان او برشام السيوله روح الطواريء وهما هيتعاملو معاك
البرد سواء في معدتك رجلك صباع مش طوارىء
وجع الكتف مش طوارىء
مفيش حاجه اسمها بستريح علي المحلول دا مش علاج
الدوخه والهمدان اللي بقيلهم اسبوعين مش طوارىء
خبطه الرجل اللي بقيلها شهر مش طوارىء
شعرك اللي بيقع مش طوارئ
خنقاتك مع جوزك خطيبك عشيقك مش طوارىء
مفيش حاجه اسمها بستريح علي المحلول دا مش علاج
الدمل مش طوارئ
طلاما حضرتك معندكش أمراض مزمنه ومش ماشي علي علاج وحاسس انك مش كويس وبقيلك فتره زود ساعتين وروح اكشف في العياده متجيش الطواريء الساعه 4 الفجر
المحلول مش علاج
عاوز تقيس ضغطك وسكرك روح الصيدليه
عاوز حاجه مسكنه روح الصيدليه
عاوز تعمل سونار او اشعه تعالي العيادات او مركز خاص
عاوز تعلق كانيولا روح خلي المركز او الدكتور اللي قالك كدا هو يركبها
انيميا 8 مش طوارىء والله
مفيش حاجه اسمها بستريح علي المحلول دا مش علاج
حضرتك روحت الطواريء والدكتور قالك دي مش حاله طارئه يبقي تروح عاوز تتطمن ع نفسك روح مستشفي خاص او تيجي العيادات التابعه للمكان مجانا او سعر رمزي
الزعيق وقله الادب والعشرين واحد اللي داخلين مع المريض مش هيفيدوه والمريض هو اللي هيضر
متحاولش تستنصح وتعمل فاهم وعارف طلاما عارف عالجك نفسك ومتتكلمش كتير
عاوز بقي تعرف وتفهم يبقي تسال بادب وزوق وهتعرف عادي ومحدش هيتاخر عليك

د. بلال رأفت

عارف زميلك اللي بيحبطك ليل ونهار ؟!
بيحضّر زمالات وبياخد شهادات !
عارف زميلك اللي عامل مظلومية فقر وبلد بنت كذا ؟!
معاه فلوس أكتر مني ومنك ! وبيشتم علشان مش عارف يشتري شقة في العلمين !!
وأنت أهبل ومصدقه وفي دماغك أنه مش عارف يشتري شقة طعمية 🥙
.
وهتعرف كلامي ده قدّام شوية بس لما تعقل وعمرك يضيع
.
ولو أنت من النوع اللي بيصدّق أي حاجة على الميديا
وبيصدّق المظلوميات وبيهيص معاهم في الهيصة !
.
روح اكشف على مخك
وروح لطبيب نفسي
بكلمك بجد وبكل أمانة

د. أحمد العسكرى

مساء الخير يا جماعة
سرطان القولون لو اتشخص في حد من العيلة، بنعمل منظار قولون لكل قرايب الدرجة الأولى.
اسألوا الطبيب المعالج عن العمر اللي يتعمل فيه المنظار.
أنا كل يوم -كل يوم بدون مبالغة- في العيادة باكتشف حد في عيلة مريضاتي عنده سرطان قولون ومحدش من قرايبه بيعمل منظار.
السادة الأطباء... كلنا بنسأل عن سرطان الثدي بس سرطان القولون له عامل وراثي قوي جدًا، من فضلكم اهتموا بده.

د. منار مبارك

صعب جداً إحساس إن يجيلك مريض واعي، بيتكلم معاك ومع عياله عادي خالص.. ومع ذلك محكوم عليه بالموت في خلال ساعات!

امبارح بالليل كلموني في الطوارئ على ست طيبة عندها 70 سنة جايه مهبّطة.. بقول لعيالها ايه اللي حصل.. قالولي جالها دور إسهال وسخونية من اسبوع وبقالها يومين مش بتاكل ولا بتشرب والنهارده هبطانة كدا..

بحس النبض في إيدها.. مش محسوس.. بقيس الضغط.. مش مسموع.. حطيت إيدي على رجليها.. ساقعة تلج.. اسحبوا ABG بسرعة..
Severe Metabolic Acidosis
Lactate = 12!!
والمرعب إن الست فايقة وبتتكلم! عامله ايه يا حاجه؟ الحمدلله يابني انا كويسة.. طاب قولي لا إله إلا الله..

بسرعة سنتر ومحاليل وليفو.. مفيش استجابة.. محاليل كمان.. حط أدرينالين.. مفيش.. هنا اتأكدت إنها Irreversible Septic Shock.. اطلع بالليفو لـ 1000 نانو.. لسه النبض مش محسوس.. الضغط مش مسموع.. القسطرة مش جايبه نقطة بول.. عامله ايه يا حاجه؟ الحمدلله يابني أنا كويسة.. طاب قولي لا إله إلا الله..

اسحب ABG تانية.. الـ Acidosis بيسوء.. الـ Lactate فوق الـ 15.. ادي بايكارب.. محاليل كتير، وصلنا لـ 10 لتر.. لسه النبض مش محسوس.. الضغط مش مسموع.. القسطرة مش جايبه نقطة بول.. الـ IVC Collapsed.. باقي التحاليل طلعت.. فشل كلوي حاد.. إنزيمات الكبد ودلائل الإلتهابات في السما.. عامله ايه يا حاجه؟ الحمدلله يابني أنا كويسة.. طاب قولي لا إله إلا الله..

ماما عامله ايه يا دكتور؟ الحالة وحشة جداً يا جماعة واحتمالية الوفاة عالية.. بيبصولها وهي قاعدة بتتكلم، وبيبصولي ومش مصدقين.. ساعات معدودة.. النفس بيعلى.. درجة الوعي بتقع.. لسه النبض مش محسوس.. والضغط مش مسموع.. أنبوبة ومنظار.. تنفس صناعي.. توقف في عضلة القلب.. وماتت رحمة الله عليها..
-----

رسالة للشباب.. أهالينا الكبار علاجهم في المستشفيات أو العيادات.. حالة زي دي لو جت أول ما تعبت كانت ممكن تتلحق.. لكن عيالها مارضوش يتعبوها وجابولها حد في البيت يعلقلها محاليل..

رسالة للدكاترة والتمريض.. ادعوا ربنا ماتقابلوش في حياتكم حالات Irreversible Shock عشان هتكرهوا الشغلانة..

د. محمد فهيم

إوعى تكذب نفسك وتطاوع المريض:
جالي مريض عنده تقريباً 55 سنة أو أكبر عنده غثيان وقيء مرة واحدة وألم في البطن من امبارح بالليل ! السخونية كانت خفيفة وراحت مع باراسيتامول !
بس المريض شكله مش مريح
فحصته، لقيت الحالة ماشية جداً مع التهاب الزايدة
مش مشهورة في السن الكبير !
لكن واضحة جداً !
المهم بلغته أن فيه اشتباه في التهاب بالزائدة
الرجل زعق وإزاي زايدة في سن زي ده
ودا التهاب قولون ونزلة معوية واكتب لي أي حاجة
قلت له معلش مش هكتب حرف واحد غير لما حد جراحة يشوف حضرتك
طلع من العيادة مش مقتنع بكلامي !
وانتهت الأخبار عند كده
بعد أسبوعين لقيت واحد داخل عليا في العيادة بيقولي يا دكتور: جالك فلان من أسبوعين هنا وقلت له كذا وكذا ؟!
افتكرته وقلت له نعم فعلاً
قال لي على فكرة راح مستشفى ما وقالوا له دا نزله معويه وكتبوا له محلول وعلاج وراح البيت
الساعة ٣ بالليل لقيته بيتصل عليا وبيقولي الحقني بموت !
روحت له البيت لقيته فعلاً كأنه بيموت من التعب وبطنه
روحنا به مستشفى مركزي كبيرة وطلع عنده التهاب في الغشاء البريتوني بتاع البطن والزائدة منفجرة وقعد في العناية لحد النهاردة 😳
.
إوعى تكذب نفسك وتطاوع المريض
ولو شكيت في حاجة مفيش أي مشكلة أنك تعمل الفحص اللي يثبت وجودها أو ينفيه
مصلحة المريض أهم من دماغ المريض


Dr ahmed elaskary

*لابد أن يكون طبيب التخدير الذي سيقوم بتخدير أي عمليه جراحيه أخصائي أو استشاري
أن يكون متواجد طوال الوقت في غرفة العمليات التي تُجرى فيها العمليه الجراحيه
ولا يكون مشغولا بشغل آخر أو يترك الغرفه لعمل آخر أو أي غرض .

*تواجد طبيب التخدير طوال الوقت من اساسيات الأمان في عملية التخدير لمراقبه المريض المستمره
والاكتشاف المبكر لأي مشكله وحلها فى الوقت المناسب باذن الله وتوفيقه

*عدم تواجد طبيب التخدير قد يؤدى إلى كوارث عظيمه
هذه أمانه …. لابد أن يشترك فيها طبيب التخدير والجراح وإدارة المستشفى ( مجتمعين ) … وهى أمر عظيم لمن لايعلم
اللهم بلغت اللهم فاشهد

ا د اشرف عرفات

الواحد مع كل عيان بيشخصه صح clinically بعد ما العيان لف ودار بيبقى عاوز يروح يبوس جزمه اساتذتنا اللي علمونا clinical وعرفونا قيمه ال clinical ف يوم من الايام
وببقي عاوزه اصب غضبي كله ع اللي بيتعامل مع العيان كانه ورق لكن ازاي يبص ع العيان ازاي يقعد مع العيان ويسمعه ( جيل محبط لاقصي حد، جيل مخلي الواحد بيمشي يكلم نفسه احنا ازاي وصلنا لكدا ولا حول ولا قوة الا بالله)

د. هدى سيد

🔥هام للأطباء

نبطشية الـ ER زحمة، عيان كبير في السن داخل بيشتكي بهمدان وتعب عام، مفيش Fever ومفيش أي حاجة واضحة في الفحص المبدئي.. تكتبله مسكن وتروّحه؟
استنى لحظة! العيان ده ممكن يكون بيبدأ Sepsis، والتأخير هنا ثمنه حياة العيان.
مشكلة الـ Sepsis الحقيقية إن بداياته خادعة جداً وممكن تظهر كأنها Routine infection عادية. وعشان الـ Surviving Sepsis Campaign Guidelines دايماً بتأكد على أهمية التشخيص السريع، لخصنالك الـ Takeaways و 5 قواعد أساسية عشان تلقط العيان صح في الـ Clinical Practice اليومي بتاعك:

1️⃣ متتخدعش بالـ Nonspecific Complaints
كتير من العيانين بييجوا بأعراض تبان بسيطة زي تعب شديد، رعشة، نهجان، أو لخبطة في الوعي.
Clinical Pearl: كبار السن (Older adults) ممكن يدخلوا في Sepsis من غير ما يجيلهم Fever أصلاً!
خليك دايماً Alert لو لقيت الـ Red flags دي:
• Tachypnea
• Hypotension
• Altered consciousness
• Cold or mottled skin
• Cyanosis & Oliguria

2️⃣ حدد الـ High-Risk Patients من بدري
مش كل عيان عنده Infection نسبة الخطر عنده واحدة. الـ Threshold بتاعك للحجز (Admission) لازم يكون قليل جداً لو العيان:
• كبار السن والـ Frail patients.
• عنده أمراض مزمنة زي الـ Diabetes, Renal insufficiency, Liver disease, أو COPD.
• مرضى الـ Cancer والـ Immunosuppression.
• عيان مركب Catheters، عنده Wounds، أو عامل جراحة قريب.

3️⃣ الـ Vitals مش مجرد ضغط وحرارة!
لو شاكك في Infection محترم، لازم تاخد الـ Vitals كاملة (Pulse, BP, RR, SpO2, Temp).
Clinical Pearl: الـ Respiratory Rate (RR) هو أكتر Vital sign بيتنسى أو بيتقاس بالويم في الشغل اليومي!
أي RR ≥ 22/min يعتبر علامة خطر واضحة، وهو واحد من أهم كرايتيريا الـ qSOFA Score اللي بتشمل:
• RR ≥ 22/min
• Systolic BP ≤ 100 mm Hg
• Altered level of consciousness
(ملاحظة: دراسات كتير بتأكد إن الـ NEWS2 Score أحياناً بيكون Sensitive أكتر من الـ qSOFA في حالات الطوارئ).

4️⃣ ثق في الـ Clinical Judgment بتاعك
الـ Sepsis مش دايماً بيتشخص بالأرقام والـ Scores بس. لو حاسس إن العيان شكله Toxic، شاحب بزيادة، أو أهله بيقولولك "طبيعته مش كده وتصرفاته متغيرة"، خد الكلام ده بجدية جداً. الـ Gut feeling بتاعك كطبيب مبني على خبرتك في ملاحظة التغيرات البسيطة اللي الأجهزة ممكن متلقطهاش في أولها.

5️⃣ الـ Management: مفيش حاجة اسمها Wait and See
الوقت هنا بـ "حياة". لازم تعمل Admission سريع وتبلغ النبطشي اللي هيستلم منك بوضوح (Hand-off) بكل تفاصيل العيان والـ Vitals والأدوية.
• ابدأ فوراً في الـ Workup الأساسي: Blood cultures قبل المضاد الحيوي، Lactate measurement، وابدأ Fluid therapy.
• التدخل السريع بـ Early Antibiotics في حالات الـ Sepsis والـ Septic Shock بيقلل الـ Mortality rate بشكل ملحوظ جداً.

إفتكر_إنى_قلتلك

د. أحمد البندارى

خافض لسان بـ "ربع جنيه".. غلب أشعة رنين بـ "آلاف الجنيهات"!
مريضة (٥٩ سنة) دخلت العيادة والمنظر يخض أي حد.. لسانها تقيل جداً، كلامها غير مفهوم، وعندها سكر وضغط. طبعاً أي حد هيشوف المنظر ده، وأولهم أهل المريضة، هيصرخوا: "دي جلطة في المخ فوراً!"..
بصيت على حركة المريضة، لقيتها بتمشي كويس، مفيش ضعف في أطرافها، السكر والضغط زي الفل. ممكن يكون فيه برضه جلطة، لكن كان لازم أبدأ من أول المشكلة وهو "اللسان". مسكت "خافض اللسان" وبدأت أفحص الفم.. وكانت الصدمة:
فم المريضة عبارة عن "قطعة خشب" حرفياً!
جفاف تام (Severe Xerostomia)، مفيش نقطة لعاب واحدة، اللسان لازق في سقف الحلق ميكانيكياً، وده اللي مخلي كلامها تقيل ومحسسهم إنها جلطة، وهي ميكانيكياً مش عارفة تحرك لسانها من جفاف الفم! والجفاف كان مقتصر على الفم فقط ومفيش أي سبب ليه؛ لا نزلات معوية ولا قيء ولا صيام حتى!
قلت للأهل: "دي مش جلطة، ده غالباً مرض مناعي اسمه (متلازمة شوغرن - Sjögren's Syndrome) نشّف ريق المريضة حرفياً وهجم على الغدد اللعابية" وهنتأكد من التحاليل.
كتبت لها علاج مرطب ومحفز للغدد، وطلبت تحاليل مناعية.
هنا بدأت المأساة..
بدل ما الأهل يشكروا ربنا إنها مش جلطة، بدأت "المرافقة" تجادلني لنص ساعة!
"إزاي مش جلطة؟ دي دايخة ومش عارفة تتكلم.. دي كذا وكذا!".. نص ساعة من استنزاف الطاقة والشك في التشخيص لمجرد إنها حافظة إن الجلطة بتقل اللسان. كتبت العلاج والتحاليل وقطعت النقاش بعدما استنزفت وشعرت إني حتى مش عارف إزاي هكمل كشف على بقية المرضى!
النتيجة؟
أخدوا المريضة ولفوا بيها، وعملوا أشعات رنين ومقطعية على المخ بآلاف الجنيهات.. وفي النهاية؟
أشعة المخ طلعت "سليمة تماماً"! دكتور المخ والأعصاب راعى ضميره وقالهم إنها معندهاش ذرة مشكلة في المخ والأعصاب. أخدت العلاج اللي كتبته، الريق اتحسن، الكلام اتحسن، وعملوا أخيراً تحاليل المناعة، وطلع التحليل إيجابي!!
صرفوا آلاف لكنهم لم يقتنعوا في البداية لأن معاهم مرافقة.. واللي اكتشفت بعدها إنها (جارة) المريضة، يعني لا علاقة قرابة بينهم أصلاً! مجرد "فتوى طبية" بتتفضل بيها في نهار رمضان!
هل تعلم هذه المرافقة للمريضة ان النبي صلوات ربي عليه قال "من تطبب ولم يعلم منه طب فهو ضامن" اي انه مسئول ومحاسب شرعيا وقانونيا وماليا على اي ضرر يقع بالمريض ، فمجرد كلمة لا تلقي لها بالا قد تسقطها سبعين خريفا في النار لان هذه الكلمة قد تضيع حياة انسان ومصير عائلته من ورائه …
في المقابل.. حالة تانية بعدها العكس تماماً، وكأنها جاءت لتخفف عني!
مريض أنا أرسلته لطبيب صدر بعدما رأيت أشعة الصدر تحمل أكثر من تشخيص، وكلهم أصعب وأخطر من بعض. لكن بالسماعة تشخيصي كان ألطف من شكل الأشعة، والعلاج اللي أخده قبل أن أرى الأشعة قال إنه تحسن عليه.. لكني صممت أن يذهب إلى طبيب صدر فوراً للتأكد.
وبعد إقناع ورفض منه، ذهب لطبيب صدر، وعاد بنفس العلاج الذي كتبته! ودخل العيادة يعاتبني إني أرسلته لطبيب آخر، وأقسم أنه لن يتركني مرة أخرى.
أنا أعامل الله في المرضى وليس المرضى..
لا أمنع مريضاً عن علاج ولو كان محتملاً عند غيري بل أدفعه أنا إليه، ولا أرسل مريضاً لفحوصات كثيرة لا يحتاجها حتى وإن رغب هو فيها. هذا مبدأي وهذا ديني. ‏
فأنا لا أرى في نفسي أي شيء إلا طبيب يحاول أن يراعي الله ويراه، وأعلم أنه يراني ويراقب أفعالي ويختبرني ويمتحنني في كل لحظة من حياتي.
كل لحظة وفعل وحركة وسكون هي اختبار من الله وكلٌ محاسب على ما يفعل ويقول او ما لم يفعل وما لم يقول في الوقت الذي كان عليه ان يفعل او عليه ان يقول ، في كل فعل وكل فتنة وكل اختبار نسأل الله ان يهدينا سواء السبيل ، وان يكون معنا ابدا ودائما حتى نخرج من الدنيا غير خاسرين ولا نادمين الندم الابدي الذي لا ينفع ولا يغير من سوء المصير ، فاللهم اهدنا سواء السبيل وصراطك المستقيم واخرجنا من وسط هذه الفتن المظلمة غير مفتونين ولا خاسرين يارب العالمين …

د. إيهاب نايل

في محاضرة باطنة
الدكتور بيقولنا:- «إنت دكتور، يبقى لازم تحترم الحالة اللي قدامك، حتى لو ظاهريًا فيه ما يثبت إنها بتدلع! اتعامل معاها لآخر نفس على إنها محتاجة تدخّلك، وحاول توصل لـ Correct Diagnosis عشان تقدر توصل لـ Correct Treatment».

افتكرت موقف عمري ما هنساه.

من فترة، كنت تعبانة جدًا، وبنزل المستشفى تقريبًا كل يوم. كان التعب والوجع بيزيدوا من قبل الفجر، لدرجة إن أبي كان بيرجع من صلاة الفجر ياخدني الطوارئ.

كانوا بيعملوا اللازم، وآخد علاجي والمحاليل، وبعدها أرجع البيت، لحد ما جه يوم تعبت فعلاً ونزلت زي كل يوم الطوارئ.

الدكتور اللي كان موجود وقتها، وكان لسه صغير، كتبلي في المحلول أمبول B. Com بدل Becozyme، على أساس إن الاتنين واحد، وإن الموضوع هيعدّي عادي.

ما كملش دقيقتين من دخول المحلول وريدي، إلا وأنا حاسة إن نفسي بيضيع مني، وقلبي هيقف.

بحاول أنادي على أبي، على أمي، على أي حد ينجدني، لكني كنت على السرير شبه مشلولة، مش قادرة أنطق، لحد ما بدأت أتحرك حركات لا إرادية لفتت انتباه كل الموجودين.

أهلي جريوا عليّا، والدكاترة بدأوا يحاولوا يسعفوني ويرجعوا لي نفسي، جسمي اتحوّل للون الأزرق، والبقع الحمرا انتشرت فيه، وبدأت أدخل في تشنجات لحد ما فقدت الوعي تقريباً.

في لحظات، كان حواليا أكتر من عشرة دكاترة كبار، كل واحد فيهم بيحاول.

المحلول اتوقف، وبدأوا يدوني مضادات للحساسية، وبعد وقت بدأت أفوق وأرجع لوعيي بالتدريج.

كان فيه دكتور كبير واقف مش فاهم إيه اللي حصل، وإزاي أتعرض للتفاعل العنيف ده من محلول كنت باخده بشكل شبه يومي، ومفيهوش غير مسكنات وفيتامينات، على حد علمه!

أما الدكتور اللي كتبلي الأمبول، فكان بيهزر على اللي حصل، وبيقول كلام معناه إني ببالغ أو بعمل موقف من حاجة بسيطة تقريباً قال "بتقيس غلاوة" مش فاكرة الجملة اوي بصراحة.

أنا في اللحظة دي كنت فعلًا بين الحياة والموت، وهو بيتعامل مع الموقف على إنه هزار!

الممرضة قالت إنها حطتلي B. Com بدل Becozyme وده غير كل يوم.

ساعتها اتضح إن عندي حساسية من البي كوم، بعكس البيكوزيم، وبدأت أفهم أنا ليه وصلت للحالة دي.

لحد النهارده، فاكرة غضب الدكتور الكبير، وصوته العالي وهو متعصب وبيقول: «من قلّ علمه زاد جهله».

الموقف ده علّمني حاجة عمري ما هنساها، والنهارده كلام الدكتور في المحاضرة رجّعني لكل تفاصيله.

لولا فضل ربنا أولًا، ثم إن الحالة اتاخدت بجدية، وإن الدكاترة حاولوا يفهموا إيه اللي بيحصل بدل ما يستهينوا بأعراضي، كان ممكن الموقف ده يتكرر معايا تاني، وأنا أصلًا مش عارفة السبب، وكان ممكن ما أكونش موجودة دلوقتي!

المريض مش مطلوب منه يثبتلك إنه تعبان عشان تصدقه، ومش من حقك تحكم إن ألمه دلع لمجرد إنك مش فاهم سببه.

إنت كدكتور، مش مطلوب منك تعرف تشخّص كل حالة من أول لحظة، لكن مطلوب منك تحترمها، وتبحث، وتسأل، وتحاول توصل للتشخيص الصح؛ لأن ورا كل شكوى، إنسان ممكن يكون فعلًا محتاج تدخّلك، وتأخيرك أو استهانتك ممكن يكلّفوه كتير.

مش كل حالة واضحة من أول نظرة، ومش كل عرض تقدر تفسّره من أول محاولة، لكن طول ما المريض قدامك، فأنت مسؤول إنك تبذل اللي تقدر عليه عشان تفهمه وتساعده.

الاستهانة بألم المريض ممكن تحرمه من التشخيص الصح، وإنك تكون مُحترِم شكواه مش مجاملة، ده جزء من أمانة المهنة.

د. جودى

أنا شخص كلاسيكي جدًا في الأدوية اللي بكتبها…

لما ألاقي دواء بيجيب نتيجة كويسة مع المرضى، وأكون مطمّن لفعاليته وآثاره الجانبية، غالبًا بعتمده وأفضل أكتبه باستمرار.

لدرجة إني لو قعدت أراجع الروشتات بتاعتي، ممكن أكتشف إني بكرر نفس الأصناف بشكل ملحوظ!

والصيدلي اللي بيصرف روشتتي ممكن يفسّر الموضوع بطريقتين:
يا إما الدكتور ده متعاقد مع الشركات دي…
يا إما هو ميعرفش غير الأدوية دي أصلًا! 😅

لكن في حاجة اتغيّرت فعلًا في طريقة تفكيري، وهي ترتيب أولوياتي وأنا باختار العلاج فيما يتعلق بالظروف المادية للمريض.

زمان، كنت بحاول أراعي الفئات السعرية المختلفة من البداية، وأختار لكل مريض علاج يناسب إمكانياته المادية.

وممكن لو المريض ظروفه المادية صعبة، أكتب له أرخص علاج أعرفه مش أكفء علاج (لو غالي)!.

لكن مع الوقت والخبرة، بدأت ألاحظ إن بعض المرضى مش بيتحسنوا بالشكل المطلوب، وأحيانًا حالتهم بتسوء، رغم التزامهم بالعلاج.

وهنا بدأت أفكر في الموضوع من زاوية مختلفة…

في مجتمعنا، مش كل مريض مش بيتحسن بيرجع لنفس الطبيب عشان نعيد تقييم الحالة ونشوف إيه اللي محتاج يتغيّر.

في الغالب، المريض اللي مش بيحس بتحسن كافي، خصوصًا لو كان منتظر نتيجة سريعة، ممكن يروح لدكتور تاني، ويدفع كشف جديد، ويبدأ علاج جديد بتكلفة إضافية.

وهنا ممكن أكون حاولت أوفّر عليه من البداية، لكن من غير ما أقصد، أعرّضه لتكلفة أكبر بعد كده!

عشان كده، بدأت أرتّب أولوياتي بشكل مختلف:
أولًا: التشخيص الصحيح، وتحديد شدة الحالة، واختيار العلاج الأنسب (حتى لو غالي) من حيث الفعالية والأمان.

ثانيًا: البحث عن بديل أقل تكلفة، بشرط إنه يكون مناسب ومكافئ من الناحية العلاجية.

لأن مراعاة الظروف المادية للمريض مش معناها إني أختار الأرخص وخلاص، زي ما إن اختيار العلاج الأنسب مش معناه بالضرورة إني أختار الأغلى.

أحيانًا، محاولة توفير مبلغ بسيط في بداية العلاج ممكن يكلّف المريض أضعافه بعد كده. أو يطول فترة التعب وبالتالي يأثر على شغله ودخله!.

ومعنى كلامي إن الطبيب مش مطلوب منه يتجاهل ظروف المريض المادية، لكن مطلوب منه يوازن بينها وبين احتياجه الطبي، ويختار له (أفضل علاج) ممكن في حدود الإمكانيات المتاحة.

لأن في النهاية، هدفي مش إني أوفّر للمريض في تمن الروشتة وبس…

هدفي إني أساعده يوصل للشفاء بأقل تكلفة إجمالية ممكنة، من غير ما أضحّي بفعالية العلاج أو أمانه.

د. أحمد ناجي

كان رسول الله صلى الله عليه وسلم أكرم الناس بأصحابه، إذا كلمه أحد توجه إليه بوجهه وجسده لا ينظر إليه بطرف عينه، يجالس الناس ويمازحهم، ولا يمد رجليه بينهم، ويوسع لهم إذا ضاق المكان.
وكان ﷺ يتفقد أصحابه ويسأل عنهم، فيعود المريض، ويدعو للغائب، وإذا خاف أن يكون أحدٌ قد وجد في نفسه منه شيئا انطلق إليه حتى يأتيه في بيته،
وكان ﷺ يخرج إلى بساتين أصحابه ويأكل مما يضيّفونه به، ويقبل الهدية ولا يردها تطييبا لنفس مهديها، وكان ﷺ لا يطوي وجهه عن أحد، ولا يجافي أحدا، ويقبل معذرة المعتذِر إليه، ويبادر الناس بالعفو والصفح، ويخرج إليهم سليم الصدر لا يسمع ممن يغتاب عنده.
وكان ﷺ لا يَدَع أحدا يمشي خلفه حتى يسير بجانبه، ولا يدع أحدا يمشي وهو راكب حتى يحمله معه، وكان ﷺ يخدم مَن خدمه، ولا يرتفع عن خدَمِه ولا أصحابه في مأكل ولا ملبس ولا مجلس.

اللهم ارزقنا صحبته في الجنة 🤍

د. خالد المغازى

انا علي يقين أن جرثومه المعده ممكن تكون مسؤله عن اي حاجه وحشه حصلتلك وبتحصل ف حياتك وممكن تكون سبب خناقاتك مع حماتك وسبب المعامله الوحشه اللي بتعاملها ليكي سلفتك، وسبب تأخر الإنجاب، بس صدقيني والله ملهاش علاقه بتساقط شعرك ومش هدور عليها ولا هعالجها حتي لو شعرك كله وقع

د. خالد أحمد

تقريباً بقى ممنوع تنزل شيفت امتياز عادي من غير تصور tiktok وتورينا وانت بتودي الانابيب للمعمل وأكياس الدم
ده غير بقى الtrend الاحلى والاحلى فيديوهات التوعية الخطيرة اللي نص المعلومات فيها غلط او مش دقيقة او سطحية جداً
ياريت واحنا رايحين المستشفى او الاستقبال نقفل الموبايل شوية ونبقى ناس طبيعين وياريت برضه قبل ما نطلع نتكلم عن معلومة نبقى على القدر الكافي من العلم والممارسة اننا نتكلم فيها اساساً
د. كريم

حاجات خليها في بالك:
حكه مزمنة
خلي تحليل مخزون الحديد في بالك علشان نقصه بيعمل كده حتى لو صورة الدم كويسة
.
حمى بتروح وتيجي مع حد من الأرياف أو شغال جزارة أو رعي غنم ومعاه Orchitis أو arthritis أو بيمشي بعرجه
خلي البروسيلا في بالك
.
حمى مجهولة الهوية خاصة لو معاها التهابات في العين
خلي الساركويد في بالك
.
مريض سكر وعنده شكشكه في جسمه ولسعات
خلي التهاب الأعصاب الطرفية في بالك
.
مريض سكر، سكره مره فوق ومرة تحت وعلاجه تمام
خلي في بالك ال diabetic gastroparesis
خلل الجهاز الهضمي بسبب السكر
.
مريض عنده إمساك شديد
خلي بالك أن ممكن يزود معاه دخول حمام البول (بيضغط على المثانة)
بس لو قالك الإمساك جديد يا دكتور ومش متعود عليه
خلي بالك من أورام القولون
.
مريضة عندها مشاكل مزمنة في الجيوب الأنفية وبحة صوت والعلاج تمام بس مفيش تحسن
خلي بالك من ارتجاع المريء (الصامت)
.
مريضة بتاخد حبوب منع الحمل وبدأت تشتكي من صداع مستمر مش بيتحسن على المسكنات ومفيش سبب واضح
خلي بالك من cerebral venous thrombosis
.
مريضة جاية في الطوارئ بضربات القلب سريعة ومفيش حاجة تفسرها
خلي بالك من ال pulmonary embolism
.
بنت جايه في عيادة العيون أو النيورو بازدواجية رؤية
متقولش إجهاد ولا دلع
خلي بالك من ال MS 😔
Multiple sclerosis
.
مريض سكر في غيبوبة بس سكره الصايم عالي يعني مثلا ١٤٠
خلي بالك أحسن يكون hypoglycaemia
(اسأل كويس عن تاريخ انضباط السكر معاه وغالبا هتلاقي سكره دايما عالي ! لما ينزل لرقم طبيعي يدخل في هبوط ودي حاجة اسمها relative hypoglycaemia
مهم جداً تعرفها وابحث عنها ! علشان الحالة دي شوفتها)
.
دي حاجات سريعه افتكرتها قلت يمكن تفيد

د. أحمد العسكرى

بوست للاطباء ...
مش كل ضغط واطي محتاج محلول ويروح.. طاب ليه؟
تعالي ندردش سوا في بعض الاسباب اللي ممكن تجي معاها ضغط واطي وتنخدع فيها

Myocardium infarction 👉🏻
دا علاجه قسطره مش محاليل ...هتقولي دا حاله جلطه في القلب هلقطها بسرعه هقولك فيه حاجه اسمها silent mi في مريض السكر وال automatic neuropathy ...
وفيه stemi equivalent مش كل الجلطات بتجي بالصوره العاديه زي اللي موجود في الصوره دي

. Arrhythmia : tachy or bradycardia 👉🏻
علاجها يتعملها DC مش محلول
( مريض جاي ضغط واطي ونهجان وحااسس بضربات قلبه لو محستش النبض بتاعه هيمسد منك

Pulmonary embolism 👉🏻
دا واحد هتلاقي ضغطه بدأ يوطي شويه او واطي و مش قادر ياخد نفسه وهتلاقيه محطوطله جلسات ومحاليل علي جنب ..دا علاجه مش محاليل دا مذيبات جلطه

. Tension pneumothorax 👉🏻
محتاج decompression مش محاليل

Vasovagal attack 👉🏻
ضغط واطي .علاجه نيمه علي ضهره وارفع رجليه ودا يعادل انك اديته محلول ملح في خمس دقايق

. Septic shock . sepsis 👉🏻
دا علاجها مثلا septic bundle
مش مجرد محلول ملح و برفلجان للحراره

. Hypovolemia 👉🏻
دا محتاج محاليل لو السبب dehydration او دم لو نزيف

. anaphylaxis shock 👉🏻
جاي الاستقبال ضغط واقع ومش قادر ياخد نفسه ووشه مورم بعد ما اخد حقنه مضاد حيوي محتاج ادرينالين
adrenal insufficiency 👉🏻
حاله جايه تقولك ان خدت كورتيزون لفتره طويله عشان تتخن وواقفته فجأه وظهر عليها الاعراض دي

Hypothyroidism 👉🏻
ضغط واطي مع اعراض خمول الغده محتاج علاج للغده مش محلول وروح

مش كل ضغط محلول وروح البيت
دمتم بخير

د. محمود الفخرانى

- الإكتئاب اللي انت حاسس بيه اليومين دول أمر طبيعي جداً ، نتيجه تغير الفصول ، و اسمه الإكتئاب الموسمي ، متقلقش بعد فتره هيروح ، و هيرجع الإكتئاب الطبيعي اللي أنت متعود عليه 💪🏻

شاب عمره ٢٢ سنة ، حصل ليه ظرف طارئ بيحصل لشباب كتير و احتاج فيه الدعم من أهله ، أهله بدل مايدعموه
وقفوا ضده
الولد جاي العيادة في اكتئاب شديد و بيتمنى وفاة والده، حاولت اعرف هل ده مجرد شعور ناحية والده مؤقت ولا دآئم.. لقيت بالفعل إنه شعور دآئم و موجود طول عمره
والده موفرله الأمان المادي اللي يخليه مرتاح طول عمره و هو ماشاء الله ميسور الحال مقارنة بالبيئة المحيطة
لكن كل ده ولا في الحسبان بالنسبة لإبنه
لكل أب وأم عيدوا حساباتكم تاني، الإنسان لما بيموت مفيش غير ابنه اللي بيفضل فاكره و يدعيله
لو مادعمتش ابنك عاطفيا و احتويته كويس، لما تموت هيقول... مستراح منه
عيدوا حساباتكم تاني

د. الحسن يحيى

طفل عنده 5 سنين جه مع والدته، اللي كانت بتتابع معايا السكر (وبفضل الله السكر التراكمي نزل من 16 لـ 6.5 خلال شهور من غير إنسولين).

بعد ما كشفت على والدته، طلبت مني أبص على الطفل لأنه كان عنده كحة وأعراض برد.

وأثناء الكشف وسماع الصدر بالسماعة، لفت نظري وجود انتفاخ شديد وواضح في بطن الطفل.

سألت والدته: الانتفاخ ده موجود من إمتى؟ وهل اتعرف سببه؟

قالت إنه موجود بقاله شهور طويلة، وإن الطفل أخد علاجات كتير، لكن لسه بيشتكي من بطنه.

عملت ليه سونار على البطن، وكانت المفاجأة وجود تمدد وانتفاخ شديد جدًا في القولون.الصورة اللي شوفتها تشبه في ذهني مرض نادر وخطير ..

وبعد ما أخدت التاريخ المرضي بشكل أدق، اتضح إن الطفل بيعاني من إمساك مزمن وشديد، لدرجة إنه أحيانًا ممكن يعدّي أسابيع من غير تبرز!

ورغم كده، الأسرة اتقال لها أكتر من مرة إن الموضوع عادي وإن الإمساك شيء طبيعي عند الأطفال!

لكن الحقيقة إن الإمساك الشديد والمزمن، خصوصًا لما يكون مصحوب بانتفاخ واضح في البطن وعدم استجابة للعلاج، لازم يخلينا نفكر في وجود سبب عضوي، مش مجرد إمساك عادي.

الصورة الإكلينيكية الكاملة خلت عندي اشتباه كبير جدا في مرض اسمه Hirschsprung Disease (مرض هيرشسبرونج)، وده مرض بيكون فيه غياب للخلايا العصبية المسؤولة عن حركة جزء من الأمعاء، وده بيؤدي لصعوبة شديدة في خروج البراز وحدوث تمدد في القولون.

طلبت عمل أشعة Barium Enema بعد تحسن أعراض البرد، والنتيجة كانت داعمة بقوة للاشتباه في التشخيص.

وبناءً عليه، تم تحويل الطفل إلى جراحة الأطفال لاستكمال التقييم، وأخذ عينة من المستقيم لتأكيد التشخيص وتحديد العلاج المناسب.

مش كل إمساك عند الأطفال مجرد مشكلة بسيطة تتحل بملين وخلاص.

الإمساك المزمن والشديد، خصوصًا لو مصحوب بانتفاخ ملحوظ بالبطن، أو قيء، أو ضعف في الشهية والنمو، أو عدم استجابة للعلاج، لازم يتقيم كويس ونبحث عن سببه.

لأن أحيانًا عرض بسيط في ظاهره ممكن يكون علامة على مرض محتاج تدخل مبكر.

والامساك البسيط حتى بيكون وراء ضعف في الشهية وانيميا وقد يسبب تأخر في النمو

ربنا يتم شفاء الطفل على خير، ويحفظ أولادنا جميعًا.

د. إيهاب نايل