Malpractice In Hypertensive Urgency :
أما يجيلك عيان ضغطه أقل من 110 /180 او حتى أعلى بس مفيش TOD متعملش الآتي :
*ممنوع تعطي أي حاجه IV عشان تنزل الضغط بسرعه ! انت مش محتاج تعمل ده احنا محتاجين ننزل gradually over 24 h تخيل ! ده انت ممكن تمشي العيان اصلا وتقوله تعالى العياده الصبح او تظبطله جرعاته بس بس!
*Never give Lasix !! Lasix is duiretic مش دوا ضغط فبالتالي هينزل الضغط عن طريق زيادة كمية البول فينزل الضغط سريعا
لمدة ٦ ساعات ويرجع تاني !  يستخدم بس لو العيان معاه Pulmonary Edema
*Never Give Sublingual Capoten !! و دي شائعه موت وخطأ برضو
*Don't put Nitrodermal patch !! 
الباتش دي لل Ischemia مش للضغط و مش موجوده في الtext books بتاع دكاترة الكارديو انها للضغط !
حتى لو الرقم عالي المهم مفيش اي TOD وممكن تعمل ECG لو خايف من الSilent MI.... لكن طالما العيان كويس قدامك خلاص لو مصمم تدي حاجه والعيان مش مقتنع يبقى ممكن تدي Oral Capoten 25 وفيه ناس ممكن تحجزه Ward to Follow Up

احنا مش عاوزين ننزل الضغط بسرعه ده ممكن يعمل hypoperfusion وممكن يدخل العيان في جلطات !
دي بالفعل أخطاء انا شوفتها بعيني بحكم انها ممارسات مقدسه و ان جيت تناقش حد فيها غالبا مبيقتنعش بكلامك !
ربنا يعلّمنا ويرزقنا الحكمه في القول والعمل ..

Dr Shimaa Shaban

رايح احجز اشعه للعيان ويادوب حافظ اسمه بالعافيه.
دكتور الاشعه:

صعبان عليه قوي جيل الاطباء في سن الثلاثينات والاربعينات
اكيد مش الكل
بس المعظم
الواحد يحصل معاه و قدامه كذا موقف يفاجأ فيه انكم غلابة قوي
فاكرين ان احترام الناس لكم اوبشنال
وانه امتنان من اللي قصادكم
وراضيين بده

ربنا سبحانه تعالى كرمك كإنسان
ثم من عليكم بنعمة العلم وهي من اسباب رفع الدرجات
ليه ترضوا بقليله
عارفه ان الامتحانات والسينورتي ونظام الطب علمت البعض الانكسار
وخلتكم دايما حاسين انكم فايتكم ومقصرين
فحتى لما حد يتجاوز معاكم بتلوموا نفسكم الاول
بدل ما تلوموا اللي ما اتربوش

ثبت عمليا ان اللي سمح انه يتهان بيفضل في الزون ده
لحد امتى؟
لحد ما يموت
او ينفجر وساعتها بيطلع اسوأ ما فيه
وترجعوا تلوموا نفسكم برده
القوة مطلب شرعي
قوة بدنية وعلمية واي قوة زي قوة الحجة والبصيرة والحكمة والكلام
لانها عز للدين
وحتى العفو هو عفو المقدرة مش عفو الضعف
الاصل ان ما حدش يتجاوز او يتجرأ معاكم
طويل اللسان يتكنسل من تعاملاتكم خالص
وتكون الردود واضحة وصريحة

انت متجاوز في الكلام وده مش مناسب معايا ده
بس
مش محتاجه فنون رد
ما حدش هيجيب لكم حقكم
كله بيدور على مصلحته
فما تستنوش اللي يجيب لكم حقكم
يقول الرسول صلى الله عليه وسلم
المؤمن القوي خير واحب إلى الله من المؤمن الضعيف وفي كلا خير
صدق الحبيب المصطفى صلى الله عليه وسلم

د. نهى عزت

شُوفت فيديو عن راجِل بيتريق على الاسئلة اللي بتسألهالُه مراته زي "انت بتاكل؟" "انت نازل؟" وعامل فيديو كوميدي وبيرُد على الاسئلة دي اللي هو "إيه الاسئلة دي؟!" ، نفس فكرة البوست دا لسه شايفه من قريب

فسُبحان اللّٰه افتكرت آية في غاية الجمال والإبداع والحكمة ربنا بيقول في كتابه:

«وَمَا تِلْكَ بِيَمِينِكَ يَا مُوسَىٰ»
هل ربنا (خالق السماوات والأرض) لم يعلم اللي في إيد مُوسىٰ؟
فيه خواطر سمعتها في الآية دي إن ربنا قاله كدا على سبيل الإيناس له.!

- شوفوا بقى رد سيدنَا مُوسى!
«قَالَ هِيَ عَصَايَ أَتَوَكَّأُ عَلَيْهَا وَأَهُشُّ بِهَا عَلَىٰ غَنَمِي وَلِيَ فِيهَا مَآرِبُ أُخْرَىٰ»
يعني مكتفاش بإنه يقوله "هى عصاي" دَا فضل يُوصف

المشكلة عندنا في الوقت دا إنُه مبقاش عندنا "ثقافة الإيناس" ولا إننَا نتونِس باللي بنحبهُم ونسمعهُم في حاجة حتىٰ ولو للمرة الألف علىٰ سبيل إني أتكلم معاه !

فَ بلاش لما والدتك مثلًا تسألك أو زوجتك أو أَخُوك ترُد بسخافة لما مُمكن تاخُد وتدي معاهُم يمكن بيتونسُوا بيك! حقيقي أوّل مرّة أقف مع الآية واتعلم منهَا لحياتي بالشكل دا !

هاجر يسري

Approach to persistent vomiting
الأول هنشوف الحالة acute ولا chronic
*لو acute:
1_لازم نستبعد الأسباب الsurgical الأول بال examination زي ال appendicitis, cholecystitis, pancreatitis, IO, intussussecption, volvulos

2_لابد أستبعد ال CNS causes زي ال head trauma بالهيستوري وزي الmeningitis وال encephalitis بالفحص
والmigraine وال cluster headache خاصة إنه بيكون معاه autonomic symptoms

3_ ممكن يكون side effectمن دوا بياخده فناخد منه history كويس

4_ممكن يكون food poisoning خاصة لو معاه diarrhea.

5_أشوف السكر ممكن يكون DKA حتى لو مش مريض سكر متشخص ممكن يكون مريض سنه صغير عنده type 1 DM

*لو chronic:
عندنا local GIT causes وعندنا CNS causes وعندنا endocrinal causes و psychological causes

1_الGIT causes: لابد آخد هيستوري وأشوف الcharacter بتاع الvomitus لو non-bilious غالبا السبب gastric ولو bilious غالبا السبب في الduodenum ولو fecal material هيكون IO. وفي كل الأحوال لابد نعمل upper endoscopy.

_ في سبب نادر شوية وهو ال superior mesentric artery syndrome ودا بيكون في ال thin persons بيكون الدهون عندهم قليلة وال angle مابين الSMA والaorta قليلة فالSMA بيضغط عال 3rd part of duodenum.

2_كانت الأمور تمام بنعمل brain CT عشان نستبعد ال brain tumors وأي سبب يزود الICP.

3_لو الحالة married female بنعمل اختبار حمل ونشوف الB-HCG ونعمل برده pelviabdominal CT عشان الovarian tumors.

4_لو الحالة female برده😅
نعملها psychological evaluation عشان نستبعد ال anorexia nervousa و الbulimia و munchausen syndrome.

Dr abdellah mosad

لا ي دكتورة مش هعمل تحاليل الكلي
أنا الكلي بتاعتي بحس بيها و بقولك هي كويسة

من "عيادة السكر -القصر العيني"
٢١/ ١٠ /٢٠٢٦


د. مارينا آدم

صباح الخير ياصديقي ..
متأجلش اي حاجه لبكره .. متأجلش حب، متأجلش اعتذار، متأجلش اهتمام، متأجلش انبساط، متأجلش شغل ، متأجلش نجاح ، متأجلش توبه، متأجلش كلمه حلوه، متأجلش سؤال، متأجلش إهتمام، متأجلش عتاب، متأجلش تسد دينك..

متأجلش اي حاجه لأنها في مرة هتصادف وتبقى دي المرة الأخيرة .. أو يمكن دي المرة اللي تفرق في كل حياتك للاحسن ..!!

متأجلش .. وعيشها لأخر لحظة بأمل وبحب..❤️

مصطفى عادل

في المرضى اللي أصيبوا بجلطة قلبية تحت عمر 50 سنة الإقلاع عن التدخين يقلل الوفيات القلبية بأكثر من 50% (الدراسات أظهرت انخفاضًا يصل إلى 70-80%).

هذا التأثير قوي جدًا، وغالبًا أقوى من أي دواء واحد يتناوله المريض بعد الجلطة.

لكن الإقلاع ما يغني عن الأدوية والأدوية ما تغني عن الإقلاع.

الأفضل الجمع بينهما عشان يحصل المريض على أفضل نتيجة.

د. محمود هشام

عايز اقلك كلمتين خُفاف بسرعة..
الأولى : البرايفت رزق المجاني..
كنت سمعت د. علي حسيب ربنا يكرمه بيقول " مريض البرايفت هو اللي بيدفع، ومريض المجاني ربنا اللي بيدفع" مصداقًا لقول حبيبنا النبي صلى الله عليه وسلم ".. والله في عون العبد ما كان العبد في عون أخيه"
.
التانية : تهون مشقة الطريق إن أحببت الوجهة..
ودي قريتها ك status لحد يعز عليا..
ويصدق ذلك في كل أمرك..
فمتخليش طريقك لربنا بس انك تخطط هتقرا اد ايه اوراد وهتصلي كم من الركعات.. بل اجعل لك وردًا من التعرف على جماله وجلاله.. ولذة العبادة ومعانيها..
وكذلك في اختيارك للتخصص.. حاول متجبرش نفسك على حاجة مبتحبهاش.. ولو اجبرتها وبقيت في الامر الواقع خاول تحبها عشان تعرف تدي فيها..
والخلاصة يا جميل..
- فضل المريض عليك انه خلاك تساعده - وأنت العبد الضعيف العاجز لولا فضل ربنا أصلًا-.. لانه مد ليك سبب بينك وبين ربنا.. وإن أعانك المعين.. الحديد بيدك يلين..
- اجعل نصيبًا من وقتك في حب الوجهة.. حببها الى قلبك.. خاصة تلك الوجهات التي تنقضي فيها الأعمار
والسلام_الختام

د. محمد كريم

م الحاجات المحزنة اليومين دول حالة ماشية ع كوتيزون بجرعه كبيرة لاكتر م سنة م غير ما تتابع مع حد أو تقلل أو تسحب الجرعه
حاله جاية تورينا رنين عاملاه مكتوب فيه
Bilateral avascular necrosis of the femoral head
محتاجة تغيير مفصل ف الجانبين

مرضي المناعه للاسف اللى معظهم ماشي ع كوتيزون وف منهم بيمشي ع جرعات كبيرة وبيكمل مع نفسه م غير ما يتابع تاني ولا كل ما يتعب اكتر يزود الجرعه من نفسه
ولا الحقن المنتشرة في دور البرد اللى بيجي كل اسبوع ويحطوا ديكسا مع كل حاجة
ولا اللى كل ما واحده تهبط تعلق محلوله وعليها ديكسا فاكرها بنبوني
ولا مرض الحساسيه المزمنه ديكسا وأفيل ف الاسبوع أكتر من مرة ولا اللى بيروحوا لدكاتره يكتبولهم ايبكبوريد عشرين ويكملوا عليه ع طول ولا اللى بيلبع فينادون
ولا اللى عايزة تتخن وتتبلبع برشام وفينادون وتقولك دا وشي مدور كدا اصل انا بقيت اكل حلو وتختت يعنى دا مش تأثيرها اللى بتلبعيه؟

وغيرهم كتييير الناس اللى لو تشوف المصائب اللى بتحصل هتخاف تقربله ربنا يعافينا

د. دليا سمير

واقف الصبح في استقبال الجراحة.. واحدة بتقولي انت دكتور ايه.... قولتلها دكتور امتياز

قالتلي اه يعني ايه بقى ؟
ومن ساعتها مش لاقي إجابة لسؤالها

د. أحمد عبدالناصر

الشباب اللي عايز ياخد تخدير هتعرف ان التخدير هو السبب في كل الكوارث!
1. المريض نزف؟ التخدير السبب!
2.الضغط عالي؟ التخدير السبب!
٣. الضغط واطي؟ برضه التخدير السبب!
٤. الجراح مش عارف يفتح البطن؟ «المريض مش نايم كويس!»
٥. الجراح مش عارف يقفل؟ المريض شادد يا دكتور.
٦. العملية طولت ٨ ساعات؟ «التخدير مأخّرنا!»
9. المريض صحي متأخر؟ «إنتوا مدّيينه إيه؟»
10. المريض صحي بدري؟ «إنتوا مش مدّيينه حاجة؟
١١. مفيش مكان تركن فيه العربية؟ التخدير السبب!
١٢. الدولار بيغلي: التخدير السبب
١٣. الزمالك ما اخدش الدوري :دكتور التخدير كان فين؟
١٤. حتى الانبعاث الحراري بسبب غازات التخدير.

د. أحمد مختار

ولا تشترط على الله أن يُريك كل الحكمة في أفعاله!

د. أحمد عبد المنعم كان له تعقيب جميل في النقطة دي بيقول: هو أنت عايز عند كل إبتلاء تنزلك صحيفة من السماء تقولك خد بالك الموقف ده حصل عشان كذا؟

إذًا أين التصديق؟
أين اليقين؟

”يجب أن تعلمَ أن الله حكيم في أفعاله حتى ولو لم تظهر لك الحكمة"‏
من أصعب العبادات بالنسبالي .. عبادة " وكيف تصبر علي ما لم تحط به خبراً "

يا رب لُطفك بنا ♡

كتير من الزملا ف امتياز بيشتكي إنه مبيستفدش من نزول الطوارئ وأما بينزل يومه بيروح ف الفاضي مبيحصلش حاجة رغم إنه عنده الشغف وبيبذل مجهود جامد أما بينزل وده بيحصل فعلا للأسف بس هنا هقول نصيحة من زميل ممكن تخلي نزلتك لو ساعتين مفيدة ومجزية أكتر من إنك تنزل يوم كامل وهي حط تارجت خد خلفية ومترقعش نفسر يعني أنت نازل النهارده فرضا مستهدف حالات جلطات القلب أقرأ عنها ف أي مصدر مبسط ف السريع وانزل الزق للقلب جت حالة شوف الهستوري اتاخد ازاي والفحص اللي اتعمل والفحوصات اللي اتطلبت وبعدها العلاج اللي اتاخد ومفيش مانع تتبع الحالة وتروح وراها العناية تشوف تذكرتها ايه والحالة اللي بعدها تجرب أنت أو تقف تراجع ف دماغك الخطوات ورا النايب وعادي تتناقش معاه وبعدها تروح تفرغ الكلام اللي ف دماغك وتراجع عليه تاني وتقفل عليها واليوم اللي بعده مثلا حالة DKA اللي بعده storke فرضا بنفس السيستم حاطط تارجت لنزلتك DKA، خدت خلفية قريت عنها ف السريع قبل ما أنزل، مرقعتش نزلت لزقت للباطنة فقط جت الحالة شوفت الهستوري اتاخد ازاي الفحص اللي اتعمل الفحوصات اللي اتعملت العلاج اللي اتاخد تتبعت الحالة ف العناية ناقشت النايب ف اللي مش فاهمه روحت فرغت اللي ف دماغي وراجعت عليه وقفلت ع الحالة مش نازل بالبركة ومش قاري وعمال أبص شويه مع ده وشويه مع ده والحالة مش أكملها لآخرها، ومفيش مانع تحط أكتر من تارجت ليومك كل واحد وقدراته واستيعابه وربنا يوفق الجميع.

د. أسامه حفناوى