في شغلانتنا دي، في مواقف بتختبر مهاراتك كجراح، ومواقف تانية بتختبر قدرتك على إنك متفقدش النطق!

من أصعب الحالات اللي ممكن تدخل لك أوضة العمليات، لما تكون بتتعامل مع (Single eye).. يعني عين وحيدة هي كل اللي باقي للمريض من نور الدنيا.

الحكاية بتبدأ مع مريض مسن، كان عامل زراعة قرنية كلية (PKP) من فترة وحصلها رفض. الحالة كانت خيرية ومتكفلة بيها سيدة فاضلة. قعدنا ندرس الوضع؛ إعادة الترقيع الكلي معناها إننا هنفتح العين بالكامل (Open Sky)، وفي سنه الكبير ده، الخطوة دي مرعبة وممكن تدخلك في كابوس جراحي اسمه (Expulsive Hemorrhage) أو النزيف الطارد، اللي ممكن يطير العين كلها في ثانية.

عشان كده، القرار كان إننا نلعبها في المضمون ونعمل زراعة بطانة قرنية (DMEK) بس، عشان ننقذ ما يمكن إنقاذه بأقل خطورة ممكنة.

العملية بفضل الله تمت بنجاح ممتاز. وبحكم إن المريض بيشتغل (جنايني)، قعدت معاه وأكدت عليه بتعليمات صارمة: النظافة خط أحمر، الالتزام التام بوضعية النوم الخاصة بالـ DMEK، وإياك تدعك عينك تحت أي ظرف، وأي تغيير تحس بيه تكلمنا فوراً.

بعد 10 أيام من العملية، المريض كلم العيادة وقال: 'نظري ضعف فجأة!'.. بلغناه فوراً وبدون تفكير: 'تعالى العيادة حالاً'.
تفتكروا جه؟ شرفنا بعدها بأسبوعين!
ولما دخل وسألته وأنا مذهول: 'إنت إزاي تتأخر كل ده وإنت بتشتكي من نظرك؟'
رد عليا بمنتهى البرود: 'ما إنت يا دكتور قولتلي الزيارة اللي فاتت أبقى أجي كمان شهر!'
قولتله باستغراب: 'يا حاج إنت متصل بنفسك تشتكي إن نظرك قل، وقولنالك تعالى فوراً، تقوم تستنى أسبوعين؟!'

المهم، قعدته على الجهاز وببص.. لقيت الكابوس: الرقعة (DMEK) مطبقة على نفسها (Folded)!
والمفارقة إن الدكتورة المساعدة معايا في العيادة، دخلت تقولي إنها لسه شايفاه بعينها وهو بيدعك في عينه وقت ما كانت بتفحصه.. ولما واجهته؟ أنكر تماماً وحلف إنه ملمسهاش! (وللعلم، الرقعة مستحيل تطبق على نفسها بالشكل ده بدون دعك أو ضغط خارجي).

دخلته العمليات فوراً في محاولة إني أفردها تاني، بس للأسف كانت لزقت. في اللحظة دي كجراح بتبقى قدام قرار مصيري في ثانية: لو عافرت معاها (Extra manipulation) ممكن أخسر الرقعة كلها في عينه الوحيدة.. فقررت أوقف، وأدي فرصة شهر ونص للجزء المكشوف من القرنية إنه يعوض نفسه (Compensate) مع جرعات كورتيزون، لعل وعسى منضطرش نعمل إعادة للعملية (Redo).

في الزيارة الأخيرة، السيدة المتبرعة (وهي مهندسة وزميلة متفهمة جداً) جات معاه، وكان معاهم كمان حد من قرايبه.
شرحت لهم الموقف بمنتهى الشفافية، وإننا قدامنا أسبوعين، لو مفيش تحسن هنعمل إعادة للعملية (Redo)، وطبعاً هتتعمل بدون أي تكلفة إضافية.
البشمهندسة تفهمت جداً الوضع الطبي وقدرت الموقف.. لكن قريب المريض بصلّي بنظرة فيها تهكم وقال: 'يعني هي من الأول كان مفروض تتعمل ترقيع كلي (PKP)؟'

بصيت له بهدوء وقولتله: 'لو على الأسهل ليا كجراح، الترقيع الكلي أسهل بكتير ومجهوده أقل، لكني ماعملتش الأسهل ليا.. أنا عملت الأصعب عليا والأأمن والأحسن لمريض مسن بعين واحدة، عشان أحميه من كارثة.'.. سكت وماردش.

لحد هنا والقصة مليانة تفاصيل ودراما طبية.. لكن الكوميديا السوداء حصلت فين؟ عند الأسانسير!
المريض وهو نازل، قابل مريضة تانية بتسأل على عنوان العيادة، فقام رادد عليها بمنتهى الثقة: 'إياكي تروحي، أنا عملت عنده عملية وعماني!' وقالها تمشي وماتطلعش.

لما بتعرف تفصيلة زي دي، بتاخد نفس عميق، وتبتسم، وتدرك إنك كطبيب مش بس بتعالج أمراض، إنت بتتعامل مع طبيعة بشرية معقدة.. مريض بيغلط، وبيتجاهل التعليمات، وبينكر غلطه، وقريبه بينظر عليك، وفي النهاية المريض بيرمي النتيجة عليك عشان يهرب من الإحساس بالذنب.. حتى وهو بيتعالج على نفقة غيره، والدكتور بيحاول يحميه من كوارث جراحية وبيعيدله الشغل على حسابه.

دورنا نعمل اللي يمليه علينا ضميرنا ونتعامل بأقصى درجات الرحمة والمهنية ونختار دايماً 'الأحسن للمريض مش الأسهل لينا'.. بس فعلاً، أحياناً بتبذل أقصى مجهود عشان تنقذ مريض، والمكافأة بتكون إنه يطفشلك العيانين اللي على باب العيادة!

Dr Ahmed Alshaarawy

الاماكن اللى بتروحها لوحدك ..
الحاجات اللي بتشتريها لوحدك..
الكورسات او الورش اللى بتاخدها لوحدك ..
و الانشطة اللى بتمارسها لوحدك
و الاوقات اللي بتقضيها لوحدك
و الإنجازات اللي بتعملها لوحدك

هى ف الحقيقة انت ..

نصيحة العمر كله لأى حد ف اول حياته .. اخرج من فقاعة اصحابك و سؤال " لوحدى ؟! "

اه لوحدك ..

Dr Saeed hasan

للتاريخ ...
كنت النائب الإدارى لمستشفى المنصورة الجامعى فى يوم السبت السادس من أكتوبر عام ١٩٧٣ وجهزت الاستقبال وحجرات العمليات لاستقبال مصابى الحرب ...
أذكر أن ا.د. على جرافة مدير المستشفى اتصل بى ليسأل هل المستشفى مستعد لاستقبال مصابى طيارة سقطت بالقرب من المنصورة وأجبته أننا جاهزون لأى عدد من الحالات ...
ثم أرسلت لاستدعاء جميع أعضاء هيئة التدريس للحضور إلى المستشفى انتظارا لوصول الحالات ثم طلبت من تلميذات مدرسة التمريض تجهيز أكبر كمية ممكنة من أربطة الجبس ( أربطة شاش تغمر بالجبس )
ثم أمرت بصرف كميات كبيرة من المحاليل للاستقبال مع جميع أدوية الطوارئ ....
وجهزت ثمانى ترابيزات عمليات ( كان فى كل حجرة عمليات ترابيزتان ) وحضرنا أدوية التخدير والمحاليل لإجراء ثمانى عمليات فى آن واحد ...
وانتظرنا هذا اليوم ولم نستقبل حالات إصابات عسكرية وانتظرنا اليوم التالى ولم يصلنا حالات ثم فوجئنا فى اليوم الثالث بقطار قادم من الاسماعيليه محمل بعدة مئات من المصابين وبدأ التنافس بين الجراحين من جميع التخصصات وبدأت معركة حامية الوطيس فى مستشفى المنصورة الجامعى لإنقاذ أبطالنا المصابين ...الجميع يريد أن يساهم ...البعض يفك الاربطة والبعض يركب أجهزة المحاليل والبعض يجر التروللى حاملا المصاب إلى العمليات أو إلى مكانه ...
واصطف المئات من أهالينا الطيبين للتبرع بالدم وكانت هناك كميات هائلة من الدم جاهزة للاستخدام فى أى لحظة ...
عن أحاسيس الأطباء والصيادلة وهيئة التمريض والعمال ومشاعرهم لا تستطيع الكلمات التعبير...
كانت ملحمة وطنية رائعة لا أعتقد أننا مهما تكلمنا عنها سوف نستطيع أن نصورها للجيل الجديد ...ملحمة مستشفى المنصورة الجامعى التى لا تقارن بملحمة العبور ورفع العلم المصرى فوق أراضى سيناء الحبيبة..

Prof. Mohamed sultan

بوست مهم هيغير مفهومك عن ال status epipliptcus وهيخيلك تتعامل معاها بطريقة systematic بدون خوف👌👌
ناس كتير بتتعامل مع اي convulsions انها status epipliptcus ، طب ايه هي ال status epipliptcus والتعامل معاها ازاي وليه ؟
ال status epipliptcus هي اي convulsions سواء generalized او localised مستمرة لحد ٥ دقايق بدون توقف او حدوث convulsions مرتين ورا بعض بدون عودة للوعي خلالهم .... طب اشمعنا التعريف دة بالذات سميناه status epipliptcus??!
الدراسات وجدت ان لو ال convulsions استمرت اكتر من ٥ دقايق فهي كدة غالبا مش هتقف لوحدها ولازم تدخل وهنا جه اسم status epipliptcus ..
طب ليه لو مرتين convulsions ورا بعض بدون عودة وعي بينهم تعتبر status epipliptcus?!! لأن عدم عودة الوعي معناه ان ال convulsions غالبا لسه شغالة و دة نوع اسمه non convulsive status epipliptcus واكيد لو جمعنا وقت النوبتين والوقت اللي بينهم هيكون اكتر من ٥ دقايق » بالتالي خدت اكتر من ٥ دقايق متواصلة واصبحت status epipliptcus..
حلو اوي ..
في معلومة مهمة كمان لازم نعرفها ، لازم اوقف ال convulsions دي في خلال ٣٠ دقيقة على الاكثر ، لان بعد ٣٠ دقيقة متواصل هيبدأ يحصل irreversible brain injury وهنبدأ ندخل ف مرحلة ال decompensation اللي بتحصل بسبب ال lactic acidosis وال Hyperkalaemia وال respiratory muscle fatigue و hypoxia و depletion of chatecholamines و hypotension و arrythmia ...

طب بتعامل ازاي بقى مع ال convulsions واحدة واحدة كدة ...
طبعا بنبعد عن المريض اي حاجة ممكن تأذيه مبنقربش منه بنحمي ال airway مفتوح عن طريق ال manual techniques زي ال head tilt chin left او jaw thrust لو عرفنا ، مبنحطش oropharyngeal ف بؤه وقت ال attack , ممكن نحط nasopharyngeal airway لو موجود ، بنحط ماسك اكسجين بنتابع العلامات الحيوية والاكسجين ، بنشوف سكره كام ودي حاجة مهمة جدا عشان ممكن يكون ال convulsions بسبب hypoglycemia اساسا ،. مجرد ان عدينا ٥ دقايق هنا لازم نتدخل ونوقف ال attack واول line معانا هو ال Benzodiapines
معانا هنا كذا drugs
Lorazepam iv
Diazepam iv
Midazolam ( dormicum) iv
وهنا بيستخدمو as bolus وطبعا كل واحد له جرعته سهل نجيبها ...
طب لو مفيش iv access ومش عارفين نركب للعيان كانيولا ؟؟!
عندنا ال midazolam ممكن يتاخد im ممكن يتاخد nasal ممكن buccal
وعندنا ال diazepam gel ممكن يتاخد rectal
حلو ... بعد اول لاين بننتظر من ٣ ل ٥ دقايق ونشوف ال convulsions هتقف ولا لا ، لو مواقفتش ممكن ن repeat الجرعة كمان مرة ونشوف ، طب لو ال convulsions موقفتش ؟!! هننتقل لل second line..
ايه ال second line? هي antiepiliptic drugs زي ال phyntoin وال tiratam وال phenobarbital
اشهر الادوية استخداما هي ال phyntoin ( ابانوتين ) وال tiratam
نتكلم عنهم سريعا ، جرعة ال loading بتاعة tiratam ٥٠مجم لكل كيلو يعني حوالي ٣ ونص جرام، بيتاخد ع ٥ دقايق ل ربع ساعة و دي ميزة فيه انه ينفع يتاخد بسرعة ع وقت سريع ...
جرعة ال loading بتاعة ال phyntoin ٢٠ مجم لكل كيلو يعني حوالي جرام ونص وبتتاخد ع حوالي نص ساعة لانه مينفعش يتاخد بسرعة لان له side effects خطيرة زي ال hypotension وال arrythmia..

بعد انتهاء ال loading ب ١٠ دقايق لو ال convulsions موقفتش ف هنا عندنا حاجة اسمها resistant status epipliptcus هنا بنلجأ لل 3rd line وهو ال anesthesia وال intubation سواء بال midazolam او ال propfol او ال thiopental وال phenobarbital بندي boluses لحد اما ال convulsions تقف وبعدين نمشيه ع continuous infusion ...
وممكن نلجأ كمان لل ketamine لو ال drugs دي مش effective وهنقول بعدين اشمعنا ال ketamine ....
حلو اووي ، ال convulsions وقفت والدنيا تمام ، بنخليه ع ال anesthesia لمدة ٢٤ ساعة وبعدين نعمل weaning و ن assess نشوف هيحصل convulsions تاني ولا لا ، لو حصل تاني بنرجعه تاني ع sedation ونبدا نشوف تاني المشكلة فين ونصلح سبب ال resistance وممكن كمان نلجأ لاستخدام ال inhalation anesthesia لو الموضوع مازال refractory وهنا بنسميها super refractory status epipliptcus....

جميل ، في بقى كذا معلومة كدى مهمة
في حالات بيبقي مينفعش استنى ٥ دقايق عشان ابدأ تدخل او امشي بال sequence اللي قلنا عليه دة وهي الحالات ال fatal , يعني مثلا مريض resistance hypoxic ومبيرفعش ، اكيد مش هستنى ٥ دقايق عشان ابدا تدخل ، لا دة هيموت ، هنا ههمل rapid sequence induction و intubation علطول ، طب عيان ضغطه وطي جامد ، عيان دخل ف arrythmia دي كلها حاجات تستعجل التدخل ولازم انيم العيان علطول و intubate ان لزم الامر ...

كمان خد بالك ان لو العيان استجاب ل اول line ف احنا بردو بنمشيه ع ال loading dose بتاعة ال second line (AED) عشان نمنع ال recurrence ... وكذلك لو العيان اتتيب وع anesthesia ف احنا قبل ما نشيله من ع ال anesthesia لازم يكون واخد ال laoding dose بردو بتاعة ال anti epilitic drugs (AED ) عشان نمنع ال recurrence....

بيقولك ان كل اما بنأخر التدخل كل اما الادوية هتبقى ineffective لان طول ما ال convulsions شغالة طول ما بيحصل internalisation لل GABA receptors والأدوية مش هتلاقي حاجة تشتغل عليها وعشان كدة قلتلك ف الاخر ممكن نلجأ لل ketamine لانه الوحيد اللي مش شغال ع ال GABA ف الادوية اللي ذكرناها وبالتالي ممكن يكون لسه له تأثير ... يبقي مينفعش نتأخر اكتر من ٥ دقايق للتدخل...

خد بالك ان في حاجة اسمها non convulsive status epipliptcus وهنا العيان بيبقي disturbed وانت فاكر ان ال convulsions خلصت ولكن هي بالفعل لسه شغالة ولو ركزت ممكن تلاقي subtle convulsive movement زي صوابعه او عينه او رموشه ودي حصلت معانا بالفعل ان بعد اما ادينا ال dormicum ال convulsionsاختفت ولكن لقينا في occular convulsive movements وتدخلنا وانتقلنا لل third lines والحمد لله توقفت ساعتها ، و دي بتحتاج تدخل زيها زي ال convulsive status epipliptcus لانها بتمثل نفس الخطر وممكن يحصل بسببها brain injury و systemic decompensation وبناكدها عن طريق ال EEG ، وعشان كدة او disturbed concious level غير مفسر ، لازم نحط ال non convulsive status epipliptcus ف الاعتبار ...

وطبعا لازم ناخد بالنا من ال complications اللي بتحصل بسبب ال convulsions زي ال lactic acidosis ، hyperkalemia ،rhabdomyolysis and aki ، hypotension ، arrythmia ، hyperthermia ...
ولازم طبعا نعالج سبب ال convulsions ..

د. زياد طارق

إعادة 🔁 مهمة جداً تعرفها
.
الكحة بعد نزلة البرد ممكن تستمر ٣ أسابيع !
.
البلغم وألم الصدر بعد الالتهاب الرئوي ممكن يتحسن في خلال ٤ أسابيع !
.
الكحة وضيق التنفس بعد الالتهاب الرئوي ممكن يتحسن في خلال ٦ أسابيع !
.
صورة الأشعة بعد الالتهاب الرئوي ممكن تتحسن بعده لحد ٦ أسابيع !
.
الإجهاد بعد الالتهاب الرئوي ممكن يتحسن في خلال ٣ شهور !
.
ومريضك بيكون أموره زي الفل ^ _ ^

د. أحمد العسكرى

بلاش نأكل سمك وبيض لو عندنا برد لأنهم بيزودوا البرد ويظهروه
( أي كلاااااااااام )الصح ان السمك والبيض ملهومش تأثير في البرد وعادي ناكلهم مفيدين جدا أثناء البرد لأن البيض والسمك فيهم بروتين والبروتين عبارة عن امينو اسيد مفيد جدا لمقاومة ومناعةالجسم لفيروس الانفلونزا. .. إلا لو عندنا حساسية منهم

د. مروة حسين

دكتور… أنا باخد الحديد بقالي 3 شهور، والهيموجلوبين مش بيتحسن… بس أول ما أخدت حديد في الوريد اتحسنت!
إيه تفسيرك ؟؟.

أول حاجة الـ Poor Compliance
يعني المريض مش بيبلع الدواء أصلاً!! الـ Oral Iron غالباً بيعمل Metallic taste و Constipation و Epigastric pain.. فالمريض بيكبّر دماغه ومش بياخده..فطبيعي مش هيتحسن.. لكن في حالتنا دي المريض بيقولك أنا أخدته فعلاً يبقى ندور على السبب التاني.

تاني حاجة الـ Incorrect Diagnosis
ممكن المريض ده أصلاً ميكونش عنده Iron deficiency anemia ممكن يكون عنده Thalassemia مثلاً فإنت عمال تديله حديد وهو جسمه مش محتاجه أصلاً والـ Hemoglobin مش هيزيد. بس المريض بتاعنا اتحسن على الـ IV يبقى فعلاً كان عنده نقص حديد.

تالت حاجة بقى وده بيت القصيد الـ Malabsorption (فشل في الامتصاص)
الحديد عشان يحصله Absorption لازم يعدي على الـ Stomach ويوصل للـ Duodenum والـ Upper jejunum ..ودول الأماكن الرئيسية اللي الحديد بيدخل منها للجسم. لو الأماكن دي فيها مشكلة.. الحديد اللي المريض بيبعلوا ده هينزل في الـ Stool ولا كأننا عملنا حاجة!

طب ليه بقى الـ Oral Iron بيفشل والـ IV Iron بينجح في حالات الـ Malabsorption؟
ببساطة لأن الـ IV Iron بيعمل "Bypass" للـ GIT كله.. وبيرمي الحديد في الـ Blood مباشرة فبيوصل للـ Bone marrow ويبدأ يصنع RBCs والـ Hemoglobin يرفع.

طب إيه اللي يخلي الـ Iron ميمتصش ؟؟
1. الـ Celiac Disease (ودي أهم واحدة)
ودي عبارة عن Gluten-sensitive enteropathy يعني لما المريض بياكل حاجة فيها Gluten (زي القمح).. بيحصل Immune response بيعمل Destruction للـ Villi (الخملات) اللي في الـ Small intestine، فبيحصل Villous atrophy.. والـ Villi دي هي اللي بتمتص الحديد اصلا فلما تتدمر الـ Absorption بتاع الحديد بيبقى صفر..(خلي بالك إن الـ Celiac ممكن يجي بـ Isolated iron deficiency anemia من غير Diarrhea ولا Malabsorption symptoms تانية واضحة.)

2. الـ Achlorhydria و الـ Hypochlorhydria
الحديد عشان يحصله Absorption لازم الوسط يكون Acidic عشان يحول الـ Ferric (Fe3+) لـ Ferrous (Fe2+). فلو المريض بياخد PPI (زي الـ Omeprazole) لفترات طويلة أو عامل Gastrectomy (شايل المعدة) الـ Acidity بتقل فالـ Absorption بيبوظ.

3. الـ H. pylori Infection
الجرثومة دي حرامية حديد بتنافس الجسم عليه وبتقلل الـ Stomach acidity كمان + Gastritis

4. لـ Inflammatory Bowel Disease (IBD)
زي الـ Crohn's disease لو مأثر على الـ Duodenum والـ Jejunum بيعمل Inflammation بيمنع الـ Absorption.

Dr yahia mohamed

٩٠% من أسباب انخفاض الطاقة والشعور بالإرهاق المزمن والخمول تعود الى القلق والاكتئاب والباقي تتوزع بين:
📌 قلة النوم وتحديدا جوده النوم
📌فقر الدم(الانيميا)
📌خمول الغدة الدرقية
📌بعض الأدوية والتدخين والسهر.

د. محمود هاشم

امبارح جالنا العناية حالة amniotic fluid embolism ودي اول مرة في حياتي اشوفها ودايما بنسمع عن ال complication دا في الكتب ولما بحثت عنها لقيت انها حالة نادرة جدا بتحصل لواحدة كل ٨٠ الف حالة وكمان الارقام دي مش دقيقة لان غالبًا الام بتموت قبل ماتتشخص صح وكمان لقيت انها unpredictable, unpreventable يعني ملهاش تفسير معين وملهاش احتياطات معينة تتعمل علشان تمنعها وللاسف ملهاش علاج معين وغالبا نسبة الوفاة ٨٠٪؜ وبالفعل الحالة اللي كانت جاية مقعدتش حاجة وملحقناش نعملها حاجة وتوفاها الله ويمكن دي كانت من اكتر الحالات اللي اتاثرت بيها … تخيل بنوتة حاجة وعشرين سنة عندها اطفال وداخلة تولد البيبي وبعد ماتولد وخلاص الدنيا كويسة فجأة وبدون أي مقدمات تلاقي نسبة الاكسچين بتنزل تدريجيًا لدرجة مميتة والقلب يتوقف وتشتغل انعاش قلبي رئوي وتعمل كل اللي ربنا يقدرك عليه بس خلاص هي قدرها كده وعمرها انتهى عند هذه اللحظة
احنا في العناية المركزة والطوارئ يمكن اتعودنا على الموت وحالات الوفيات الكتيرة والحالات اللي نسبة الامل فيها انها تقوم تاني بتبقا تحت الصفر بس برده هنظل نقف قدام حالات معينة وقلبنا يحزن حتى لو دا مظهرش على تعبيرات وشنا الجامدة
ربنا يرحم البنوتة اللي توفيت ويرحم امواتنا واموات المسلمين جميعًا يارب
ويصبرنا ويقوينا على شغلنا ويجعلنا سبب في انقاذ حياة الناس ويجعله في ميزان حسناتنا

د. أحمد فتحى

As a reminder:

التردد مقبرة الفُرص .

(للأطباء فقط )

حاجات تاثر علي تحليل زلال البول
مهم انبه علي العيان بيها

١) العينه تكون اول او تاني عينه ف اليوم بالكتير
٢)مينفعش يعملها ف وجود التهابات ف مجري البول
٣) لو سيدة مينفعش تعملها وقت الدورة الشهرية
٤) اليوم اللي يسبق التحليل مينفعش يبقي فيه مجهود عنيف او مشي زيادة
٥) اليوم اللي يسبق العينة مينفعش يبقي فيه اكل بروتينات زيادة عن الطبيعي

د. مارينا آدم

❌ Rejected.
❌ Rejected.
❌ Rejected.
❌ Rejected.
❌ Rejected.
✅ Accepted.
This is just life.
You will win if you don’t quit.
Don't ever give up, Keep going And TRUST YOURSELF!♥️
{وَأَنْ لَيْسَ لِلْإِنْسَانِ إِلَّا مَا سَعَى* وَأَنَّ سَعْيَهُ سَوْفَ يُرَى* ثُمَّ يُجْزَاهُ الْجَزَاءَ الْأَوْفَى}

هل تعلم أن أهم أسباب الفشل الكلوى فى مصر هو المسكنات ؟
صداع بسيط ألم أسنان برد >>> مسكنات>>> فشل كلوى لا قدر الله (سيناريو متكرر كل أطباء الكلى شافوه)

توقف عن المسكنات وحاول تنصح غيرك بالتوقف عنها

د. أحمد خيرى

- امتى أبدأ ب Two drugs مع بعض لمريض
Recently diagnosed type 2 DM
= على حسب ال HbA1c ، لو كان ال HbA1c أكتر من أو يساوي % 1.5 فوق ال Target اللي انت عاوزه للمريض ، ف الحالة دي هتبدأ بدوايين مع بعض
Consider initiating dual therapy in patients with newly diagnosed type 2 DM who have HbA1c > or = 1.5 % above their glycemic target
وطبعاً ما تنساش إن ال
HbA1c must be individualized
كل مريض وانت بتعالجه ، بيكون ليك Target معين عاوز توصله ، وده على حسب حالة المريض اللي قدامك
--------------------------------------------------------------------------
مثال :- مريض سكره التراكمي % 8 ، وانت هدفك معاه إنك توصل لتراكمي أقل من % 6.5 ، يبقى هنا ال HbA1c أكتر
من ال Target ب % 1.5، إذاً ف الحالة هتبدأ ب
Dual therapy
--------------------------------------------------------------------------
-- طيب هختار ازاي Two drugs من ال
Oral anti-diabetic drugs ?
= أولاً لازم Metformin ، مينفعش روشتة مريض T2DM
تخلو من Metformin إلا لو فيه Contraindications ع رأسهم لو معدل فلترة الكلى " eGFR " أقل من 30
Metformin is the king of oral anti-diabetics
-- تمام ، وبالنسبة للدوا التاني ؟
=عندك كذا مجموعة تختار منها ، عندك ال
- DPP4 inhibitors e.g Vildagliptin
- SGLT2 inhibitors e.g Empagliflozin
- GLP1 RA e.g Dualglutide
- Thiazolidinediones e.g Pioglitazone
- Sulphonyelureas e.g Glimipride
- Short acting Sulphonyelureas e.g Repaglinide
هتختار ع حسب حالة المريض اللي قدامك
هل المريض معاه CVD ولا لأ ؟ معاه Renal disease ولا لأ
وزن المريض ، ال Cost ، وما تنساش ال
Risk of hypoglycemia
--------------------------------------------------------------------------
مثال :- مريض 45 سنه شغال نجار متشخص سكر من النوع التاني ، سكره التراكمي 8.2% مش HTN ولا معاه HF ولا
Evidence of CVD
معدل فلترة الكلى ال eGFR طالع 94 ، وال
Albumin / creatinin ratio in urine = 18
يعني مفيش Diabetic nephropathy ، و وزنه كويس ....
والمريض جه صريح معاك وقالك معلهش يا دكتور مش عاوز دوا غالي ، يعني ياريت لو حاجة تكون وسط ، عشان مادياتي مش هتسمح....لغاية هنا عظيم جداً
يا ترى هنا أول حاجة أخليها ف بالي ايه وانا بختار الدوا ؟!
أول حاجة تخلي بالك منها هي فرص حدوث هبوط السكر
Risk of hypoglycemia
لإنه شغال نجار ، والآلآت اللي بيستخدمها حاده ، فلو اتعرض لنوبة هبوط سكر ، هيكون خطر عليه جداً .....
يعني وانا بختار ، لازم اختار دوا يكون ليه
Minimal risk of hypoglycemia
وتاني حاجة تكون تكلفته مش غاليه.......
وفيما سبق شرحنا كل مجموعة وحدها ، وذكرنا مميزات وعيوب كل مجموعة ، ولو رجعنا بالذاكرة شوية ، هنلاقي أنسب مجموعة للحالة دي ، هي مجموعة ال
DPP4 inhibitors e.g Vildagliptin
يعني هتوصفله للسكر Dual therapy عبارة عن
Metformin + DPP4 inhibitor
ع سبيل المثال تجارياً زي :-
Galvus met , Gliptus plus , Vildagluse plus
Sugarlo plus, Icandra plus , Futavilidix ...etc
وف كل مرة - إن شاء الله - نذكر مثال نستخدم فيه مجموعة معينة ، وكما قيل " بالمثال يتضح الحال "
------------------------------------------------------------------------
Dr Ibrahim Mekawy

في أول أيام شغلي في الوحدة الصحية، جاتلي أم شايلة ابنها الصغير، والولد حرفيًا مش قادر ياخد نفسه… بيجاهد علشان يدخل شوية هوا في صدره.
سألتها إيه اللي حصل؟
قالتلي: كان بيلعب في الشارع، وفجأة جالي بالحالة دي.
كشفت عليه بسرعة، ومن أول ما شوفته كان فيه احتمالين في دماغي: يا إما جسم غريب في مجرى التنفس، يا إما لدغة عقرب مسببة تدهور حاد في حالته.
والمشكلة إن الوحدة وقتها كانت إمكانياتها محدودة جدًا، وحتى مصل العقرب ماكانش متوفر فيها.
والولد حالته خطيرة ومحتاج تدخل عاجل في مكان مجهز.
فقلت للأم:
— خدي ابنك واطلعي على المستشفى فورًا، من غير أي تأخير.
عدّى حوالي نص ساعة أو ساعة…
وفجأة لقيت الأم راجعة شايلة نفس الولد!
بس المرة دي حالته كانت أسوأ بكتير، وللأسف كان توقف عن التنفس.
بدأت أعمله إنعاش قلبي رئوي، وطلبنا الإسعاف، واتنقل المستشفى…
لكن للأسف، رغم كل المحاولات، الولد توفاه ربنا.
ربنا يرحمه ويصبر أمه.
وعدّت الأيام…
وبعد حوالي سنة، دخلت عليّا أم تانية شايلة ابنها.
وأول ما بصيت عليه، قلبي اتقبض!
نفس المشهد تقريبًا… نفس صعوبة التنفس… ونفس الطفل اللي بيصارع علشان ياخد نفس.
وفي اللحظة دي افتكرت الولد الأول…
ولحسن الحظ كان الأب وصل ومعاه عربية.
شيلت الولد على إيدي، وقلت للأب:
— دوّر العربية… إحنا طالعين المستشفى حالًا.
ركبنا، والأب سايق وأنا جنبه شايل ابنه.
والراجل من كتر خوفه على الولد، كان سايق بطريقة تخوف!
كل مطب تقريبًا بناخده، وكل شوية أحس إننا داخلين على حادثة.
وأنا مش عارف أركز مع نفس الولد اللي بيطلع بالعافية، ولا مع الطريق اللي ممكن نروح فيه إحنا التلاتة!
والحمد لله ربنا ستر ووصلنا المستشفى.
أول ما دخلنا، الأب كان لسه هيروح ناحية الاستقبال…
أنا نزلت شايل الولد، وجريت بيه على السلم لحد عناية الأطفال.
وهناك قابلنا دكتور أطفال، ربنا يبارك له، كان في منتهى الفهم والاهتمام.
بص على الولد، واستوعب خطورة الحالة فورًا، وبدأ يتعامل معاه.
وهنا اتأكدنا إن الطفل عنده تسمم شديد نتيجة لدغة عقرب!
وفي اللحظة دي رجع قدامي مشهد الطفل الأول بكل تفاصيله…
نفس الأعراض تقريبًا، ونفس التدهور السريع.
المهم بدأ التعامل مع الحالة، وفضلنا حوالي ساعتين لحد ما ربنا كرمه، وبدأت حالته تستقر.
وأخيرًا… الولد بقى بيتنفس كويس.
اتحجز في العناية يومين تلاتة، والحمد لله اتحسن وخرج من المستشفى بالسلامة.
وأنا أول ما اطمنت عليه، سلمت على أبوه ومشيت..
لكن وأنا ماشي، افتكرت الطفل الأول…
والحقيقة إن فرحتي بنجاة الطفل التاني كان جواها حزن قديم على الطفل الأول.
ومع السنين، بدأت أفهم إن الطب مش مجرد معلومات بنذاكرها، ولا تشخيص بنوصل له، ولا علاج بنكتبه.
الطب كمان مواقف بتعلمنا، وذكريات بتفضل جوانا، ووجوه مرضى عمرنا ما بننساها.
وفيه حالات بنقدر ننقذها، وحالات بنعمل كل اللي نقدر عليه وبرضه بنفقدها.
ويمكن أصعب حاجة في مهنتنا إننا ساعات بنضطر نكمل شغلنا عادي، وإحنا من جوانا لسه واقفين عند حالة راحت مننا.
وفي النهاية، إحنا مجرد أسباب، والشفاء والنجاة بإيد ربنا وحده.
بس اللي متأكد منه إن فيه مريض ممكن يخرج من حياتك للأبد… لكنه يفضل حاضر في كل مريض بتحاول تنقذه بعد كده.
ربنا يرحم اللي فقدناهم، ويشفي كل مريض، ويعين كل طبيب على الأمانة اللي شايلها.

د. وليد على

من أكتر من ١٢ سنه جالى مريض يعمل سونار وطلع عنده ورم فى البطن متمدد فى كل حته بشكل عجيب وقالى انه من أسبوع عمل منظار قولون وأخذوا عينات للتحليل لسه مطلعتش.
قفلت الفحص والراجل كان تعبان جدا وباين عليه أنه فى آخر مرحله من المرض ومن الحياه عموما لورم متساب فى جسمه سنتين ل ٥ سنين على الأقل.
........

دخلت أمه وأخته يتطمنوا قالولى إيه الأخبار وشرحتلهم الحاله.
فقامت الأخت سألتني هل إصابته بالإ.يدز ليها علاقه باللى عنده؟

كان رد فعلى إننة بهدلتها وأنه ده مرض معدى وكان لازم تبلغينا قبل إجراء الفحص لزيادة الاحتياطات الوقائيه.
وبعدين سألتها المنظار اللى عمله من أسبوع كنتوا مبلغين قبلها أنه عنده إيد.ز ولا لأه؟ قالتلى لأه يا دكتور - مما يعنى إنهم ماشيين بيه على كل الأماكن الطبيه بينشروا المرض.
.......

بعد شويه دخلت عليه زوجته وسألتني هوه إيه الأخبار يا دكتور؟
قولتلها يا فندم أخته وأمه لسه عارفين منى كل التفاصيل لكن بأكد أنه غلط وعيب وحرام وغير مقبول أنكم تلفوا بالمريض على كل الأماكن الطبيه يعمل إجراءات بدون الإبلاغ أنه مريض إيد.ز لأنه ده هينشر المرض.

زوجته لطمت على وشها وصوتت وقالتلى يانهار أسود - إيد.ز !!!! مين قالك أن عنده إيد.ز.

......

دقيقه ودخلت الأم والأخت يلوموني إزاى أبلغ مراته اللى عايشه معاه من سنين السنين أنه عنده إي.دز.
قالولى إحنا مش معرفينها لأنها ممكن تتطلق منه - لأنه ممكن يصيبها بالمرض ويصيب عيالهم.
......

مخبيين عن المجتمع ومراته وعياله مش أنه *** ؛ لأ مخبيين إنه عنده مرض معدى إسمه الإيد.ز والراجل ماشى يلط كل الناس بما فيهم مراته وعياله.

......

للأسف كنت صغير جدا فى السن وقتها وفضلت أدور سنين على كيفية التعامل القانونى - بعدها بسنيين عرفت أن كان لازم أنا والمكان نعمل إبلاغ فى الطب الوقائى وهمه بيحولوا الحاله للنيابه اللى بتأمر بالتحفظ على المريض وباقى أفراد الجريمه والعقوبه بتصل للسجن ٣ سنوات وديه واحده من أكتر المواقف اللى ندمت أننى كنت معرفش كيفية التعامل فيها قانونيا

Dr Mohammed Hanora

👌 النهارده هنحكي عن ال vomiting كواحد من اشهر الاعراض اللي بتجيب المريض للطوارئ

١- مش اي عيان جايلك الطوارئ بترجيع تديله برمبران او زوفران او دانسيت ، اهم حاجه تحطها ف دماغك ليه العيان اصلا بيرجع و ايه الشكوي التانيه مع الترجيع و هل له علاقه ب GIT و لا له علاقه ب حاجه تانيه خالص ؟!

٢- عيان جاي بيرجع و عنده هيستوري انه مريض قلب و ماشي علي ادويه قلب و لقيت معاه diarrhea and abdominal pain فكر في digitalis toxicity ، ف اول حاجه تشوف علاجه لو لقيت في ديجوكسين توقفه و تعمل ECG urgent و digoxin level و تكلم نايب القلب دا عيان ميروحش البيت

‏٣- عيان جاي بيرجع و معاه chest pain يبقي فورا تعمل ECG و cardiac enz و تكلم نايب القلب

٤- عيان بيرجع و معاه صداع شديد و زغلله اول حاجه تفكر فيها هي ال brain ,, خصوصا لو الترجيع ده projectile vomiting وقتها بنطلب ct brain عشان بنشك ان ده Manifestations of increased intracranial tension as brain tumours or intracranial haemorhage

٥- عيان جاي ب vomiting و احدته هيستوري انه diabetic , تقيس سكر لقيته عالي يبقي تسحب غازات لقيتها acidotic و معاه aceton in urine اذن و انت مغمض دا عيان DKA بيتحجز عنايه مش هنروحه البيت

٦- لو عيان جاي بيرجع و لقيت معاه هرش او اثار هرش و زغطه مستمره او ألم بالبطن ، لازم تسأله اخبار البول بتاعك ايه ؟ لو قالك قليل اول تفكير ليك هيروح ناحيه Acute renal failure فتكلم نايب الكلي و تعمل وظايف كلي فورا و سونار بطن و حوض

٧- لو عيان جاي بترجيع مستمر و زغلله و صداع شديد و عملت مقطعيه مطلعش لا نزيف و لا ورم و لا اي حاجه ف الاشعه تشك طبعا في migraine attack فتكلم نايب العصبيه

‏٨- عيان جاي بترجيع و سخونيه شديده و صداع شديد و مش قادر يستحمل الاضاءه بتاع النور افحص رقبته شوف في neck stiffness و لا لأ لو موجود و انت مغمض تفكر ف meningitis

‏٩- لو عيان جالك بترجيع و سخونيه و الم شديد بالبطن من قدام و خصوصا ناحيه اليمين تفحصه كويس كلينيكال لان غالبا هيطلع acute appendicitis فتكلم الجراحه فورا

١٠- لو عيان جاي بترجيع و سخونيه و الم شديد في الجانب الايمن او الايسر من ورا مش من قدام متنساش تفكر ف acute pyelonephritis فتعمل سونار و تحليل بول و تتاكد اذا كانت stones or inflammation

١١- لو ست جايه بترجع اسألها هل انتي خامل و لا لا ؟ خصوصا لو في بدايه الحمل و بيحصل الصبحيه بدري يبقي morning sickness

١٢- لو حد جاي بيرجع و معاه عدم اتزان بيقولك يا دكتور انا حاسس كأني راكب مرجيحه او حد بيطوحني ففكر ع طول في inner ear problemes as menier’s disand labyrinthitis ف اكلم نايب الانف و الاذن

١٣- عيان جاي بيرجع و عنده اضطراب في درجه الوعي و معاه سخونيه او مفيش و معاه تشنجات افكر اما ف meningitis or brain tumor cause seizures

١٤- عيان جايلك بيرجع و دورت علي كل الاسباب مش لاقي يبقي من فضلك اسحبله صوديوم و بوتاسيوم و كالسيوم هتلاقي المشكله ف واحد فيهم

١٥- عيان جايلك بيرجع و مش لاقي اي سبب خالص من اللي فاتو حتي بعد ما عملت رقم ١٤ يبقي ع طول تقوله هات العلاجات اللي انت ماشي عليها هتلاقيه ادويه نفسيه بتعمل كده او pain killer as opioid or

١٦- عيان جاي بترجيع معندهوش اي اعراض و لا تاريخ مرضي و لا اي حاجه ف جسمه غير ترجيع فقط و الم بالبطن و مع الهيستوري قالك انه اكل من الشارع او اكل مش كويس يبقي دي GI بلدي بس مهم الفحص و التاريخ المرضي و الهيستوري

- د أحمد صفوت ( ICU )

الواحد كل شتاء بيرتب لرحلة الاقصر وأسوان من أيام ما كانت المعابد لسه على المحاره

مهما كان عدد الأيام اللي ناقص على امتحانك اشتغل .
مهما حصل ما تيأسش ومهما حسيت انك قصّرت لازم تبذل مجهود مضاعف عشان تعوّض.
ما لا يدرك كلُّه لا يترك جُلُّه.
تصور إن الامتحان جالك من الجزء اللي انتا مذاكره كويس ممكن تجيب درجة عالية ويبقى كرم ربنا شملك.
دعوة للأمل لآخر لحظة.
د حازم عبدالتواب