أول الشهر حصل عجز في نواب الباطنه العامه عندنا في المستشفي  العام
قام المدير كلف دكاتره  قسم الأطفال " اللي هو احنا "
إننا نشيل إستقبال قسم الباطنه ، بغض النظر عن قانونيه الموضوع ده من عدمه بس ده اللي حصل
والجدير بالذكر إني منتدب لمستشفي حميات المحافظة لحد مايجيبوا نواب حميات
وبكده أنا نايب أطفال وحديثي الولاده " ده الرسمي بتاعي "
ونايب باطنه لحد مايجيبوا نواب باطنه ونايب حميات لحد ما يجيبوا نواب حميات
إمبارح كنت نوباتجي حميات ،دخلت واحده ب إبنها أول ماشافتني ركبها عفريت
قالتلي هو مافيش غيرك ف المحافظه ولا إيه !!
إبني يتعب أروح بيه أطفال مستشفي العام الآقيك
أمي تتعب أروح بيها باطنه الأميري الأقيك هناك
النهارده قولت والله ما رايحه الأتنين
أجي الحميات الاقيك هنا... إيه عفريت !!

كنت عامل زي زكريا الدرديري كده  : D
دكتور أطفال وباطنه وحميات لحد ما يجيبوا باطنه وحميات 😂
By Beshoy Tamer

40 years old male patient unknown case of any medical illness come with right side chest pain and dyspnea 4 hours ago.
CXR was taken.

✅ Infection in Elderly

مش دايمًا بتيجي بـ Fever… ودي أخطر نقطة.

Elderly عندهم عشان
↓ Immune response
↓ inflammatory reaction

- فـ ممكن يحصل serious infection بدون Fever واضحة.

●  إيه اللي ممكن ييجي بدل الـ typical symptoms؟

1️⃣ Confusion مفاجئ
2️⃣ Sudden functional decline
3️⃣ Falls متكررة
4️⃣ Anorexia
5️⃣ Lethargy
6️⃣ Mild tachycardia بس من غير حرارة

أول عرض أحيانًا بيكون:
“الدكتور… بابا مش طبيعي النهارده”

مثال: Appendicitis في Elderly

👈 الشخص الصغير:
RLQ pain + Fever + rebound tenderness

● لكن في الكبير:
✔️ ألم خفيف أو vague
✔️ مفيش Fever واضحة
✔️ مفيش guarding واضح
✔️ ممكن ييجي late ومعاه perforation

- يعني diagnosis بيتأخر والمضاعفات أعلى.

🚩 Red Flags في Elderly Infection
• Acute confusion بدون سبب واضح
• Hypotension خفيفة
• Tachypnea
• Unexplained deterioration
• WBC طبيعي لكن CRP عالي

- ما تعتمدش على Fever بس.
لو شاكك…
اعمل labs + imaging مبكر.

✅️ في كبار السن:
Absence of fever does NOT exclude serious infection.

د/ أيمن مرسي

وقفَ الحسن البصري عند شفير قبر بعد دفن صاحبه ثم التفت على رجل كان بجانبه فقال:

أتراه لو يرجع للدنيا ماذا تراه يفعل؟!
قال الرجل: يستغفر ويصلي ويتزود من الخير .

فقال الحسن: هو فاتته.. فلا تَفُتك أنت!

وقد أفلح من اتعظ بغيره ، وقد خاب من اتعظ بنفسه..

👶 طفل عمره حوالي 8 سنين
كان بيعاني من تبول لا إرادي ليلي يومي ومستمر.
أخد كورسات علاج كتير ولشهور تقريبًا…
والاستجابة؟ ضعيفة جدًا ❌
الأم جاتلي مستغربة ومتضايقة،
وأكتر حاجة ضايقتها إني سيبت موضوع التبول..
.....
وبدأت أسألها أسئلة شكلها غريبة شوية:

❓ هل الطفل بيشخر وهو نايم؟
❓ هل بينام وفمه مفتوح؟
❓ هل اشتكيتِ قبل كده من اللحمية؟
❓ هل عمل أشعة على اللحمية؟
الأم كانت مستغربة جدًا…
لكن الحقيقة إن الإجابة كانت مكتوبة على وش الطفل.
👦 الطفل وهو داخل العيادة
كان عنده شكل معروف طبيًا باسم
👉 Adenoid Face
فم مفتوح دايمًا .. تنفس من الفم
شفة علوية مرفوعة و الأسنان الأمامية باينة
انسداد أنف مزمن
...
📌 ومن غير أي أشعة
مجرد ما فتحت بقه وحطيت خافض اللسان
لقيت تضخم شديد في اللوزتين
( اللوزتين ايه دول خمسة ستة 😃😃)

الواد ده كان بيتنفس ازاي يا ست الكل
....
يا ماما ..
🧠 المشكلة الحقيقية مش في المثانة…

ابن حضرتك كان بيعاني من
👉 Sleep Apnea Syndrome
(انقطاع النفس أثناء النوم)

بسبب تضخم اللوز واللحمية،
واللي بيؤدي إلى:
اضطراب النوم
نقص الأكسجين أثناء الليل
خلل في التحكم العصبي
وواحدة من أشهر نتائجه عند الأطفال
👉 التبول اللا إرادي الليلي
....
وبفضل الله تعالي ...
✅ بمجرد استئصال اللوزتين واللحمية
📌 التبول اللا إرادي توقف تمامًا
📌 من غير أدوية
📌 من غير كورسات
📌 من غير معاناة نفسية للطفل
🔴 الرسالة المهمة
مش كل تبول لا إرادي يتعالج بدوا
ومش كل مشكلة بولية سببها المثانة
أحيانًا
👉 المشكلة في التنفس أثناء النوم
👉 وفي اللحمية واللوز
📣 اسأل… بص… اربط الأعراض ببعض
الطب مش روشتة
الطب_تفكير_وفحص...
وتشخيص قبل الروشته ....
وكان
هذه بداية النهاية لحياة جديدة لهذا الطفل
دون بلل أو قلق 💐💐💐
...
🛑🛑🛑🛑🛑🛑🛑🛑
➖➖➖➖➖➖➖➖
دكتور أحمد العجمي

#نظام_البسكوتات
عندنا في النيورو - وفي اي تخصص - امراض مؤقتة بتنذر ف الغالب بمصايب اكبر جاية ..
ف مثلا الـ Transient ischemic attack .. او السكتة الدماغية التحذيرية .. هي اعراض جلطة ع المخ عادي .. شلل نصفي أو خذل بناحية من الناحيتين أو دوخة أو غيره .. وف أقل من ٢٤ ساعة ف الغالب .. اول ساعة الأعراض بتتحسن تمامًا ..
بس ف الغالب بنسبة تصل لـ ٤٠٪ او اكتر الإنسان دا هيجيله شلل نصفي فعلا وممكن يموت من جلطة أو يعيش عاجز .
فـ تخصص القلب مثلا فيه حاجة paroxysmal AF .. رفرفة اذينية مؤقتة تقريبا بالعربي .. بتكون فيه عدم انتظام ضربات القلب واللي ممكن يعمل مصايب لكنه مش دائم بيروح ويجي .

عاوز تقول ايه ؟

عاوز اقول ببساطة شديدة جدًا .. أن لو فيه شخص ما زعم أنه بيعالج الجلطة .. او الرفرفة الاذينية بال ينسون / الكركديه او الشاي الاخضر .. هيظهر ناس تحلف انها خفت على أيده .. وهم مقتنعين ١٠٠٪ أنهم خفوا على أيده

يعني في حالات زي ال TIA او السكتة الدماغية التحذيرية العابرة
ببساطة شديدة مش هتقدر تفرقها عن الجلطة اللي هتكمل شلل خالص غير أنه يعدي الوقت .. والعيان ما يتحسنش .. فلو فرضنا اني خرجت بفرضية يا جماعة العقارات المذيبة للجلطة او المنظمة لضربات القلب ملهاش لازمة ..وسبوبة و ايام الرسول مكنش فيه عقارات مذيبة للجلطة ..
واشربوا شاي اخضر .. لو حسيتوا باعراض تنميل او تقل ف نص جسمك أو عدم انتظام أو رفرفة ف ضربات القلب ..
نسبة مش صغيرة هتتحسن على الشاي الاخضر .. مش هيبقوا عارفين انهم حتى لو مخدوش اي حاجة خالص .. كانوا هيتحسنوا .. مؤقتًا ع الأقل .. (يا سلام ع الوهم)

النظرية التانية بتقول .. إن عموما ف الأبحاث العلمية مفيش حاجة ماشية بعلم الـ هيلا هوبا .. في تجربة أي عقار بيبقى فيه جروببين جروب placebo ..
دا جروب حرفيا بيشرب نعناع على أساس أنه ( مصل مثلا الانفلونزا ) ..
و جروب ياخد مصل الانفلونزا بجد .. ويشوفوا النسبة بين " جروب الشوكلاته .. والجروب الحقيقي اللي خد المصل الحقيقي "

لان فيه ناس من اللي شربوا النعناع .. بالإيحاء .. هيحسوا أن صحتهم احسن .. عشان إحساسهم أنهم خدوا المصل بس .. مجرد احساس ..
الأنظمة العلمية .. تبنى على التجربة العلمية
اخيرا اللهم لا تجعلنا من الذين ضل سعيهم في الحياة الدنيا وهم يحسبون أنهم يحسنون صنعا

د. أحمد يحيى

لا حول ولا قوة إلا بالله
"إِنَّا لِلَّهِ وَإِنَّا إِلَيْهِ رَاجِعُونَ" توفي إلى رحمة الله تعالى
صديقنا وزميلنا الدكتور أنس النشرتي
الدفعة 57 طب ازهر القاهرة اللهم ارحمه واغفر له واجعل قبره روضة من رياض الجنة اللهم ألهم قلب اهله الصبر والسلوان

زميلنا د أنس كان من أطيب الناس وأكثرهم خلقًا وتعاونًا بشوش الوجه ونحسبه على خير
ربنا يرحمه ويصبر أهله وينور قبره ويسكنه الفردوس

ايه اللي ممكن يخلي عيان يجيله
exertional TIA ؟
[الTIA اللي هي اعراض ستروك فكت لوحدها]


اولا
cardiac - non cardiac

الكاردياك
-structural :as aortic stenosis ,hocm ,

-functional : arrythmias as AF , VT

نيجي لل non-cardiac
ممكن انيميا او لو hypotensive او polycythemia

كذلك لو
severe carotid artery atherosclerosis

وعندنا حاجه مهمه بقا وهي
*subclavian steal phenomenon*
وهي ان فيه atherosclerosis في subclavian artery المغذي للذراع وبيدي برضه
vertebral artery اللي بيغذي المخ ،
لما نبذل مجهود بدني الدم يروح للدراع اكتر فيسحب الدم من الvertebral artery للدراع فيحصل TIA للمخ بأعراض posterior زي diplopia ,dysphagia ,ataxia

بنشخصه ب دوبلر ع vertebral
و
angiography
وهنلاقي الضغط ف الدراعين فرق اكتر من ١٥ سستول

ن work up
exertional TIA ازاي؟

cbc
holter ecg
echo
carotid,vertebral doppler
lipid profile

د. خالد محمد

" إحنا مش كويسين زي ما إحنا عايزين بس مش وحشين زي ما إحنا فاكرين "

- د/ حسين خيري

مؤخرًا بقينا نلاحظ حاجة غريبة ومتكررة..
لما عميل بيكلمنا يطلب دكتور لكشف منزلي
أول حاجة بيطلبها بعد ما يعرف اسم الدكتور هي:

ممكن لينك الأكونت أو البيدج بتاعته على الفيسبوك؟

والأغرب من كده، إن في حالات كتير بتلغي الزيارة لو ملقتش للدكتور ده أي وجود على السوشيال ميديا!

الناس مبقتش عايزة مجرد "اسم دكتور" وخلاص..

الناس بقت عايزة تشوفه قبل ما يجيلهم.
عايزين يعرفوا بيتكلم إزاي؟ أسلوبه إيه؟ بيقدم محتوى يفيد الناس ولا لأ؟
وإيه آراء الناس اللي كشفت عنده قبل كده؟

الحقيقة اللي لازم كل دكتور يستوعبها إن وجودك أونلاين وصناعتك للمحتوى مبقتش رفاهية، ولا حاجة إضافية تعملها لما تفضى وتخلص عيادتك..

ده بقى جزء أساسي من ثقة الناس فيك، والـ Personal Brand بتاعك.

وعشان كده دايمًا بتيجي في بالي جملة دكتور إيهاب مسلم:
"الأشهر بيبيع أكتر من الأشطر."

وده أكيد مش معناه إن الشطارة والخبرة مش مهمين.. بالعكس!

لكن الفكرة إنك لو دكتور شاطر بس محدش يعرفك، فغالباً الفرص دي كلها هتروح لدكتور تاني ممكن يكون أقل منك خبرة، بس الناس شايفاه طول الوقت

أتمنى كل جامعة تعمل كورس تسويق وصناعة محتوى خاص بالأطباء في نهاية فترة الامتياز عشان يحطهم على أول الطريق

وياريت تكون الريادة والمبادرة لجامعة الأزهر، لو فيه نية لحاجة زي كدا هكون متكفل بتوفير المدربين والمادة العلمية وتنسيق كامل للكورس بإذن الله

شاركوني رأيكم.. تفتكروا فعلًا السوشيال ميديا بقت هي المقياس الأول لاختيار الدكتور دلوقتي؟

د. يوسف النجار

من أكتر اللحظات اللى بتحس فيها إن الأدرينالين ماشى فى العروق على آخره ..
لما تلاقى دكاترة التخصصات كلها قاعدين حوالين حالة واحدة فى الاستقبال…
اللى بيحسب gases، واللى بيقلب فى الأشعات، واللى بيجادل فى البروتوكول، واللى شايف إن الحل تدخل فورى!
أرقام بتطير، وآراء بتتصادم، وأصوات بتعلى
بس رغم كل الجدل والـ“نفش” اللى بيحصل...
فى الآخر لما الحالة تتحسن، بنبص لبعض بنظرة واحدة كأننا بنقول: “اشتغلناها صح ”.
ده هو طعم الطب الحقيقى... ضغط × أدرينالين × teamwork
الاستقبال مش مجرد مكان... دى ساحة معركة بتطلّع منها بحكايات وبطولات محدش يعرفها غيرنا ..
اللهم لك ..
ويارب استخدمنا ولا تستبدلنا ..

د فهمي عيسى

أتفق 😂😂

مهم قوي في ال documentation بتاعتك لل history و ال examination بتاع المريض انك تكتب كلمة No علي الحاجات اللي سألتها للمريض و المريض جاوب ب لأ . او النقاط اللي بصيت عليها بالفحص الطبي و ماليقتهاش .
و افتكر ان كلمة No دي هاتحميك لأنها هاتدل انك سألت و المريض هو اللي أنكر . إنما لو ماكتبتهاش هايتقال إنك ماسألتش أصلا، لو طلع في الاخر ان المشكله المرضيه كان ليها علاقة بالسؤال ده .. دمتم سالمين ..

Dr Nabil mokhtar

في موضوع بيواجهني كتير، ومش عارف آخد فيه موقف.
ليه أول ما أروح زيارة عند أي حد من قرايبي، لازم يطلعلي كل التحاليل والأشعات ويطلب رأيي فيها؟
وليه أي خروجة مع أصحابي لازم تتحول لجلسة استشارات طبية؟
وليه أي حد يعرف إني دكتور، حتى لو مجرد تعامل عابر، لازم يسألني عن أعراضه أو علاج معين؟
حاسس إني محاصر بالطب في كل مكان. بقى صعب أفصل بين شغلي وحياتي الشخصية.
والأصعب إنك لو اعتذرت أو قلت إن الوقت مش مناسب، ممكن يتقال عليك متكبر، أو إنك اتغيرت، أو إنك دكتور فاشل مش عايز يساعد الناس.
أنا فعلًا بحب أساعد، لكن هل طبيعي أبقى مطالب أكون دكتور 24 ساعة في اليوم، وفي كل مكان؟

سؤال وجودي ..
هل إنت وانت بتتعامل مع المرضى .. لو كان ( لا قدر الله ) حد منهم من أهل بيتك هتبقى راضي وحاسس أن دي اكتر حاجة تتعمل و لا هتحس إن فيه اكتر ؟ ..
طالما حاسس ان فيه اكتر تبقى مقصر .. في حق الناس ..

دايمًا ف الوقت الحالي .. في بالي خاطرة مرعبة مرتبطة ب .. " ربنا ولا تجعلنا من الذين ضل سعيهم في الحياة الدنيا وهم يحسبون أنهم يحسنون صنعًا " ..
الله يمسيها بالخير ويبارك لنا فيها والدتي .. لما كنت اشتكيلها عن ال illegal practices .. اللي الإنسان بيشوفها .. وان اللي انت تحققه ف ٥ سنين غيرك بيحققه ف شهور .. والدنيا صعبة و المقاومة صعبة الإنسان لو ساب نفسه لهواها .. يحب الفلوس و يميل أنه ياخد اكبر فلوس بأقل جهد ..

كان رد مقنع خالص .. طيب تعبت وعلمتك ليه ؟ ما كنا طلعنا لصوص وخلاص طالما المشكلة فلوس وخلاص ؟

هل الدوا دا الاكثر فاعلية فعلا ؟ ولا غالي بالكدب وفيه بدايل احسن ؟
هل أصلا هو دا الدوا الأنسب فعلا ؟
طيب هل انت قصرت مع العيان ولا لا ؟
كان فيه حاجة تانية تتعمل له ؟

مش مطلوب منك تكون موسوس .. وانك تبذل جهد ويترمي ف الارض عشان ترضي الوسواس القهري .. لكن مطلوب منك تجاوب السؤال .. علمك .. ومجهودك .. ف وضعهم الحالي .. لو تعب حد من أهل بيتك ووقع مع حد بيعمل زي ما انت بتعمل بالظبط .. هتبقى متطمن ؟ .. طيب لو مش عارف هتسأل وتدور ولا هتتكبر ع السؤال ؟ ..

وهذا ينطبق على باقي المهن .. لو انت مطعم .. تقبل اللحمة دي ومستوى النضافة دا لاهل بيتك .. لو انت مهندس تقبل .. الأساس دا يكون أساس شقتك .. لو انت مدرس .. تقبل ابنك يتشرح له باقي المواد بهذا الشكل و هذا الجهد ؟
عدم السعي للتطوير المهارات في حد ذاته ف وظيفتك .. ظلم
مش لازم تمد ايدك و تسرق عشان تبقى اللقمة مش حلال .. اتقان العمل واجب .

اخيرا " يبسط الرزق لمن يشاء ويقدر "

Dr Ahmed yahia

في مرة دخلت امتحن شفوي و دكتورة سألتني لو حد جايلك بشكوي بألم في المفاصل تفحص ايه في جسمه

قولت نبدأ بالشعر لو في alopecia بيكون مع sle
العين anterior uveitis بيكون مع أمراض serongative
أو dry eye مع sicca syndrome
أو jaundice علشان PBC بتكون associated مع ulcerative colitis وممكن يكون reactive arthritis
الفم painless oral ulcer مع sle
الشفايف pallor مع rheumatoid
الوش malar rash مع sle
الأذن tophy مع gout
الرقبة أشوف lymph node
اسمع الصدر لو في crapitations في lung fibrosis مع Rheumatoid
البطن أشوف spleen في felty syndrome
وننزل لتحت قالتلي كفاية هي مقاولة

أنا ساعتها كنت مبسوط 😍

د.عمرو الدبوري