قلت نكتبلكم نصايح ليكم قبل إمتحانكم الأول:

-أول شي حاولوا ما تسهروش هلبا نصيحة لأن غدوا بتنوضوا بكري ودماغك كان يتعب في الإمتحان ح تتعب حتى انت.

-ثاني شي أول ما تنوض الصبح دير مراجعه خفيفة للقوانين والحاجات الأساسية ما تقعدش تقرا هلبا وتجهد راسك

حاول تنوض تصلي الفجر حاضر (من صلى الفجر في جماعة فهو في ذمة الله)🤍

اول ما تجيك الورقة ادعي
(اللهم لا سهل إلا ما جعلته سهلاً وانت تجعل الحزن اذا شئت سهلاً) وسمي الله وتوكل ع ربي.

في الإمتحان السؤال اللي ما تعرفاش فوته خليه في الأخير اكسب وقتك وحاول تركز ع الأسئلة اللي الدرجات فيها هلبا

وموفقين كلكم اكيد ربي ح يعطيكم ع قد مجهودكم🤍

شن جو أول امتحان؟

واخيراً 2K🔥
منورينا كلكم وان شاء الله لقيتوا شن تبوا في القناة🤍

موفقين جميعاً 🤍

معلومة مهمة⚡️:
لما يجيك في سؤال ويقولك مثلاً زي سؤال9 صح وخطأ

قلت معدل تغير الشغل

لما تجي تعرف معدل تغير في شي قانونها ساهل
تغير الشغل/تغير الوقت

في حالة أسئلتنا ديما نفرضو ان الشغل بادي من صفر ف معناها ما يهمناش الشغل الأول✋🏻

توا لو جيت تكتب القانون:
E/t

هذا القانون ما يفكرش فيك بحاجة اللي هيا القدرة الكهربائية صح ولا🔌

وحدة قياس القدرة شني؟
الوات

ف معناها إن الإجابة صحيحه✅

يعني الملخص
يقولك معدل تغير شغل
قصده الشغل/الزمن

اللي هوا قانون القدرة

يقولك معدل تغير الشحنه
قصده الشحنة/الزمن

اللي هوا قانون التيار

وهكذا في كل شي😵‍💫

الحمد لله الأغلبية راضيين ع إجاباتهم وإن ربي ما ضيعش مجهودهم🤍

والناس اللي ضاعت عليهم اشياء او هكي ما تنسوش ان نتايج الفتره او الاعمال بسيطة جداً مقارنةً بأسئلة نهاية العام

ف صدقوني هذا يعتبر مجرد تجهيز ليكم لأفكار الإمتحانات وضغطه

فوت توا الإمتحان هذا وما اضيعش درجاتك واقرا شن عندك غدوا

وموفقين جميعاً في رحلتكم الطويله🤍

كلام بسيط ومهم✋🏻
العديد منا نشوفوا في بعض الناس اللي فاهمين المنافسة غلط يبدا يتنافس هوا وشخص ويحطله عقابات بش يوصل لمستوى أعلى منه

سامحوني فيها هذا الكلام خاطئ وتحقق من نيتك وصفاءها✋🏻

اي شخص مشابهه ليك ظروفه مش شرط يكون الزوز عندكم نفس التوفيق

التوفيق شي من عند الله عز وجل يختار جزء دون جزء يوفقهم في شي معين، يعني لو في شخص تفوق عليك في شي صدقني ح تتفوق عليه في شي تاني✅

ياريت الكل يصفي نيته ويرضى باللي مكتوبله ويسعى إن يوصل لمستوى أعلى مش إن ينزل مستوى الشخص اللي يحاول ينافسه ويبدا يرسمله في مكايد

وربي يوفق الجميع وصدقوني صفو نيتكم {وعلى نياتكم ترزقون}🤍

صباح الصقع🥶
يا ودي خشي لجنتكم وقولو اللهم لا سهل الا ما جعلته سهلاً وانت تجعل الحزن. اذا شئت سهلاً

وعارفكم سوس وبتجاوبو مليح🤓

شيتات الفيزياء الكهربائية - م.عبدالمهيمن كشون

جماعة اللي عندهم امتحانات قريبه

الفترة. هادي مضغوط كان هذا درنا بث اسئلة سنوات

ديرو دوره ع الشيتات تلقوا فيها أسئلة سنوات تفيدكم

كل باب عندنا فيديو فيه شرح أسئلة سنوات وموفقين جميعاً 🤍

بالله يا جماعة الخير في عندنا فيديوات شرح في القناة من اول باب لرابع باب

وقت لما حد يبعتلي ورقتين اسئلة يبيني نحلهمله ومعلومات وحاجات كلها في كتابك ولو تتفرج ع اي فيديو حل أسئلة تحلهم شن معناها بالله

معناها ان انت تبي كل شي يجيك لعندك بالساهل

سامحوني وربي يشهد عليا اني ما عمريش بخلت ع حد بشي نقدر نفيده فيه

لكن حد يبعتلي ورقتين سامحوني مرات حتى الرد ما نردش عليه

اليوم ما كتبتلكمش جاوبتو ولا هكي🤣

ونعتذر لأي حد ما قدرتش نرد عليه الصبح اليوم عندنا اعتكاف في الكلية من الساعة 8-5 محاضرات بس🤣

الواحد مروح للحوش يشوف في طريق دوائر كهربائية ورقميه😂

شني جاوبتوا اليوم؟

سوس جماعة القناة اللي يقول ما جاوبتش معناها ناقصه سؤال🤓

وجود تقليد واضح لمصطلح (انا مش بني ادم انا مهندس)
ديما يحبوا يقلدونا😂

نبصر عليكم لتنزلوا فيا😂

اني مقتنع ان أي تخصص ليه دوره في الحياة وحاجات ما تكونش قايمة الا عليه

شن مثلاً بتمشي لمهندس تقوله عندي كليتي نبيك تخدمهالي

او المحاسبة اللي يقرو كيف يديرو فلوس الشركات هاذي حاجات كلها تبي اشخاص اديرها

كل تخصص ليه مكانته

غر ديما المهندسين متغطرسين🤣
تلقاه ضروري يعطيك علم ان يقرا هندسة ومتبهدل حقنا لكن من دكاترتنا من الأخير😂