السلام عليكم

ح نخليلكم البوست هذا نصيحة مني ليكم

اول شي اي أستاد او مدرس سواء كان في كورس او استادك الخاص انما هو وظيفته تقتصر ع 30% من انك توصل للفهم السليم.

المدرس وظيفته ان يسهل عليك طريقة فهم الكلام اللي مرات تشوفه مبهم بس.

70% عليك انت را

يعني مثلاً لو حضرت محاضرة عندي او عند اي استاد وما جربتش بعدها انك تحل بإيدك وتستمر ع الحل وتبحث ع اسئلة مختلفة

مرات يجيك سؤال يصدمك بعدين

هذا اللي ديما انبه عليه

يا ريت اي شخص يحضر اي محاضرة في اي درس او اي مادة يقعمز يجرب يحل بينه ىبين نفسه

يشوف نفسه هل هوا فاهم او لا
————————————-
اني عن نفسي اسلوب نتبع فيه حتى توا في قرايتي

نفتح فيديوا شرح نشوف سؤال نحاول نحله بروحي

لو علقت وهكي نشوف الفيديو نفهم غلطتي وين

لو انت طبقت هكي شن ح يصيرلك ح تبدا الغلطة هاذي ديما في راسك

ف رجاء خاص منكم جميعاً جربوا تحلوا بإيديكم الفيزياء مساءلها تبي حل بإيدك انت

وتجرب اكبر قدر ممكن من الأسئلة

وموفقين جميعاً🤍

1.9K🔥🤍
~~2K تقترب😂🔥⏳

واحد سعودي يسإل كم اشتراك في مادة الفيزياء شهادة ثانوية🤣

شني نخشوا ع منهج السعودية😂

مرات نديرلكم بث تفاضل في مكان استاد سند وركز ع مرات

لأن قرايتي في الكلية والله ما نندري عليها

ف ان شاء الله خير وربي يسهل

هكي نكونوا كملنا فترة المكثف للفترة الأولى🤍

غدوا بعون الله في اختبار تجريبي في أول أربع أبواب أي شخص يبي يختبر نفسه يجي يجرب🤍

موفقين جميعاً 🤍

وان شاء الله قدرت نفهمكم ونسهل عليكم الفيزياء🤍

جاهزين لامتحانكم🤓🤍؟

كان يزيدونا يومين تانيات🤣

قلت نكتبلكم نصايح ليكم قبل إمتحانكم الأول:

-أول شي حاولوا ما تسهروش هلبا نصيحة لأن غدوا بتنوضوا بكري ودماغك كان يتعب في الإمتحان ح تتعب حتى انت.

-ثاني شي أول ما تنوض الصبح دير مراجعه خفيفة للقوانين والحاجات الأساسية ما تقعدش تقرا هلبا وتجهد راسك

حاول تنوض تصلي الفجر حاضر (من صلى الفجر في جماعة فهو في ذمة الله)🤍

اول ما تجيك الورقة ادعي
(اللهم لا سهل إلا ما جعلته سهلاً وانت تجعل الحزن اذا شئت سهلاً) وسمي الله وتوكل ع ربي.

في الإمتحان السؤال اللي ما تعرفاش فوته خليه في الأخير اكسب وقتك وحاول تركز ع الأسئلة اللي الدرجات فيها هلبا

وموفقين كلكم اكيد ربي ح يعطيكم ع قد مجهودكم🤍

شن جو أول امتحان؟

واخيراً 2K🔥
منورينا كلكم وان شاء الله لقيتوا شن تبوا في القناة🤍

موفقين جميعاً 🤍

معلومة مهمة⚡️:
لما يجيك في سؤال ويقولك مثلاً زي سؤال9 صح وخطأ

قلت معدل تغير الشغل

لما تجي تعرف معدل تغير في شي قانونها ساهل
تغير الشغل/تغير الوقت

في حالة أسئلتنا ديما نفرضو ان الشغل بادي من صفر ف معناها ما يهمناش الشغل الأول✋🏻

توا لو جيت تكتب القانون:
E/t

هذا القانون ما يفكرش فيك بحاجة اللي هيا القدرة الكهربائية صح ولا🔌

وحدة قياس القدرة شني؟
الوات

ف معناها إن الإجابة صحيحه✅