صوت ع حسب مكان سكنك أو المكان اللي يناسبك

طبعاً نعتذر للمناطق التانية لكن حالياً ح نحاول نبدا بالمناطق القريبة مني🤍

#سلسلة_فيزياء_واقعية
خلي نطلعوا من المألوف شوية ونتكلموا ع اختراعات واقعية للفيزياء لعل وعسى بعض الناس تبدا تحبها😂

——————————-
طبعاً كلمة فيزياء هيا كلمة إغريقية ومعناها (معرفة الطبيعة).

الفيزياء باختصار شديد هيا دراسة المحيط اللي جنبك والظواهر الطبيعية

وللعلم أساس كل شي تشوف فيه جنبك من تسهيلات الحياة عبارة عن حاجات فيزيائية
————————————
أبسط مثال السيارات داخل فيها علم الفيزياء.
الكهرباء من. علم الفيزياء
الطاقات النووية الضخمة من علم الفيزياء.

انت حتى الكمبيوتر اساس اختراع معالجاته جهاز اسمه الترانزستور ومخترعه عالمين فيزياءيين🧑‍🔬🧑‍🔬.
—————————————-
ببساطة شديدة الفيزياء هيا أساس في كل شي وسهلت ع الناس العديد من الأشياء وطلعت منها العديد من العلوم


المرة الجاية نتكلموا ع تاريخ الفيزياء ومن أمتى طلعت الفيزياء الحديثة اللي نعرفوها توا🫡🤍

شن رايكم في الفقرة هاذي نستمروا عليها ولا لا✍🏻

ننهوا هاذي الفقرة تو نديروها مرة تانية بعون الله🤍

استفدتوا من الفقرة🤍؟

ولو تبو حاجات تانية تقدرو تكتبوا في الكومنتات🤍

ما تنسوش غدوا موعد بثنا نراجعوا قوانين الباب الثاني🤍

ونحلوا أسئلة الكوز اللي صدمتكم😂🤍

اليوم موعدنا لمراجعة الباب الثاني🤍

بث ح يكون نراجعوا فيه الباب الثاني ع السريع وبعدها نبدو في حل أسئلة سنوات 🤍

وقت البث ح يكون الساعة 9 بعون الله

شير مع زملاءك وما تكونش سوس😂🤍

هذا رابط القناة:

https://t.me/Electricalphysics

شوية ونبدو محاضرتنا لشرح أسئلة الكوز الخاص بالباب الثاني🤍

خليكم في القناة🤍

رابط البث الخاص بشروحات الباب الثاني فيزياء كهربائية: https://t.me/Electricalphysics?livestream=6341cafc2d78f8e1bd

ان شاء الله ربي يوفقكم جميعاً🤍

هكي نكونوا سكرنا ع الباب الثاني🤍

ربي يسهل عليكم امتحاناتكم كلكم والأيام الجايه نبدو في الثالث🤍

#سلسة_فيزياء_واقعية
تكلمنا في المرة الماضية ع تعريف بسيط للفيزياء وتفسيراتها
اليوم ح نتكلموا ع العصور متع الفيزياء وأقسامها.
————————————————-
في الحقيقة علماءنا قسموا الفيزياء لعدة أقسام عن طريق تاريخها،ولكن بش ما نطولوش ح نعطيكم الأهم منها:
1-تاريخ علم الفلك:
في الحقيقة لما عرفنا إن الفيزياء قلنا ان هيا العلم المختص بالطبيعة.
هذا العلم يعود لـ3 الاف سنة قبل الميلاد.
وقتها كان فضول العلماء والإنسان متجه للكون وكيفية تركيبه.

ففي بداية علم الفلك طلعت العديد من النظريات اللي كل مره تتصحح مثلاً زي ان الارض مسطحة والشمس لما تطلع ولما تغيب تنزل وتموت وتولد شمس جديدة.

ولكن نفوا هذه النظرية بعد فترة مجموعة من العلماء مستدلين بالبحر
فلو ملاحظ ان مثلاً سفينة ماشية في البحر ح تلقاها تختفي تدريجياً تحت منسوب المياه الى ان تختفي

ولو الأرض مسطحة ح تكون تبتعد تبتعد لين كل مرة تصغر تصغر تصغر يعني شي بعيد قدامك هذا الطبيعي انك تشوفه مش يختفي.

ف اهني استدلوا العلماء ان الأرض دائرية مش مسطحة.

وفعلياً في من ناس جديات تعتقد إن الأرض مسطحة واني مره واحد ناقشني في الموضوع هذا😂
————————————————————-
طبعاً خلي نكملوا في استنتاجات علم الفلك
أول شي شافه الانسان مادام الأرض دائرية فمعناها كيف الشمس والقمر يطلعوا ويختفوا وكيف الدوره هاذي تصير.

وأكيد أول شي خطر في بالك:
إن الشمس والقمر يلفوا حول الأرض بمعنى (إن الأرض هيا المحور والشمس والقمر يلفوا حولها)

ومن هنا بدأ عصر التقويم الشمسي من المصريين
وقسموا السنة لـ365 يوم.

وكان أول تطبيق في علم الفلك.

من غير ما نغوصوا في العديد من التفاصيل
—————————————————————
طبعاً اكيده من أكبر العلماء في العصر القديم هما اليونانيين.
واكيده فلفستهم كانت مهمة في علم الفلك

فدخلوا المعادلات الرياضية والهندسية لحساب كيفية حركة الكواكب والشمس والقمر

وكانوا اول من يفكر في ان الكواكب والشمس والقمر يدورو في مسارات كروية حول الأرض (يعني مصرين ع ان الارض محور الكون😂)

اكيد ان هذا النموذج كانت فيه اخطاء زي حركة المريخ اللي ما توافقتش مع نموذج اليونانيين.

في هذا الزمن كان العصر الذهبي للإسلام كيف بادي وقت سقطت الدولة اليونانية.

كان في العصر العباسي مهم جداً معرفة القياسات الدقيقة لعلم الفلك وتحديد اتجاه القبله في الاسلام.

وتم اختراع الاسطرلاب اللي يعتبر من اهم ادوات تحديد الاتجاه.

ع المهم هذا كله حاجات في علم الفلك بتخلينا نتوجهوا لأهم نظرية وهي النظرية الصحيحة بعد فترة من الزمن:
جاء عالم اسم كيبلر بعد ما تم اكتشاف ان الارض مش هيا محور الكون.

واسس قواعد حركة كواكب مسمية بقوانين كبلر لعند توا معتمدين عليها.
وقال ان الأرض تدور في مسارات بيضاوية مش دائرية وجميع القياسات اتفقت مع هاذي النظرية ونحلت العديد من المشاكل القديمه.
———————————————————
بعد هاذي الحكاية كلها:
ح يجي عصر الفيزياء الكلاسيكية مع واحد من اعظم علماء الفيزياء(إسحاق نيوتن)

من اهم انجازات نيوتن المتعدده ان اسس نظام رياضي لحركة الاجسام الطبيعية.
وأثبت عدم مركزية الارض واسس معادلات تستخدم للوقت الحالي في حركة اي شي في الطبيعة.

وهذا الشي سبب ثورة صناعية كبيرة

طبعاً من اهم علماء هذا العصر هما (اسحاق نيوتن ، البرت اينشتاين)

ح نتكلموا على انجازاتهم ونظرياتهم في يوم بروحهم لان علماء قدموا مواضيع فيزيائية مشوقة.
————————————————-
وفي نهاية قصتنا:
ظهر عصر الفيزياء الحديثة:الذي بدأ من اوائل القرن العشرين ميلادي.

بدأ هذا العصر من ان العلماء اعتقدوا ان في اشياء غير دقيقة جداً في الميكانيكا الكلاسيكية وتم انشاء فرع جديد معروف بميكانيكا الكم.
اللي دمج بين الميكانيكا الكلاسيكية والنظرية النسبية لأينشتاين بعد تطور كبير في اجهزة القياسات.

واهم شي ان كل علم كان مساعد كبير في تحسين نمط حياتنا وكل علم بنفسه ما كانش ح يدير شي

فالقياسات الدقيقة ما كانتش ح تكون دقيقة لولا القوانين الرياضية.
والفيزياء ما كانتش ح تكون دقيقة لولا اهتمام الكيمياء بشكل المواد وتركيباتها.

والاهم من هذا كله اهم عامل في هذا كله هوا فضول الانسان فلولاه ما كناش اكتشفنا هاذي المعلومات كلها
وما كانتش حياتنا بالسهولة اللي نشوفوا فيها حالياً

وطبعاً مش معنى لكلام هذا ان الانسان اصبح متمكن وسيد في زمنه

صح ان في غرور من الانسان لان يشوف في نفسه كل عشرة سنين مطور احسن لكن تذكرو قول الله سبحانه وتعالى(وما أوتيتم من العلم إلا قليلاً).

وابسط مثال ان الكرة الارضية اللي احني ساكنين فيها ومهتمين بيها تخيلوا ان 95% من تكوينها ما نعرفوشي شن هوا وشن الماده اللي مصنعه تحتنا وشن سبب طاقة الجاذبية والعديد من الأشياء.

ف نحمدو ربي ع النعمة اللي وضعنا فيها دائماً وأبداً لأن في لحظة واحدة يقدر يهدم كل اللي بنيناه

وعندنا من الاعتبارات في القرءان الكريم.
✍🏻عبدالمهيمن كشون

اني بعد ما نفتح بث ونشرح ساعتين ويقولولي ما فهمناش😂:

شني واتيين للباب الثالث؟🤓
نبدو فيه؟🤓

للناس اللي تحب تساعد
انضموا لفريقنا المتواضع🤍:

https://www.facebook.com/groups/201343108817353/permalink/661934676091525/?mibextid=S66gvF

نطلعوكم شوية من المألوف ونتكلموا شوية ع مصطلح نشوف فيه عند الناس:

وقت الناس تشوف chat-gpt والمهام اللي يقدر يديرها يقولوا حي زعما مرات يحتلونا الروبوتات واشبح شني😂


تعالو نحكيلكم ونفهمكم كيف يخدم شات gpt:

شات gpt عبارة عن حاجة فكرتها مستوحاة من شي بسيط كانو قبل يصمموا فيه language module

هاذي كيف فكرتها تعطيها كلمة تكملهالك وتقعد انت ادربها زي مثلاً:

القط يأكل الفأر

تقعد ادرب الشي هذا بش ان يكمل جمل بروحه
———————————————-
بعدها العلم اطور خش ع الموضوع شي اسمه الشبكات العصبية

هاذي يبو يحالوا ينسخو بيها خلايا الانسان او العقل تحديداً في كيفية ترتيبها للمعلومات واخراج المعلومات منه.

طبعاً شوفوا سبحان الخالق كيف ابدع في خلق الانسان وترتيب المعلومات فيه وكيف ان الانسان قادر ان يرتب معلوماته وديما يطلع في الكلام اللي يبيه بسهولة.

فالشي اللي دار نقلة نوعية عند شات gpt ان صمم خلية عصبية كانت فكرتها مشابهة بشكل اكبر لفكر الانسان من الشكل القديم

وجابت اكثر من مئة مليون كلمة حطتهم بحيث ان الشات قادر يبني جملة وما إلى ذلك.

طبعاً فكرة الشات معقدة وكيفية بناءه معقده اكثر واكثر لكن هاذا ابسط شرح ممكن ليه😂

✍🏻عبدالمهيمن كشون

الناس اللي مهتمة بعالم البرمجة ليكم الكلام🤓

تبو نزيدكم حاجات هكي مره مره نطلعوا ع المألوف؟

الحق الشي الوحيد اللي نشوف فيه يظلم في الطلبة ان ما يكونش في تطبيقات عملية او مثلاً شن بتستفيد من كل علم

فأقل شي نحاول ان نخلي عندكم شغف في شي معين بحيث ان تعرف وين شغفك وبعدها تبدا ادور وتكتشف

ف شن رايكم نستمروا في فقراتنا هاذو؟🤓

دفعة راقدة 😂
يا حسرة الدفعات اللي قبلكم لين نسكرو عليهم في الشات من الدوة😂

نبذة عن احتياجكم للإنجليزي مستقبلاً

منقوله من شخص قعد مقعمز نص الوقت يحك في راسه بش يفهم شن يتكلم هذا بس😂