▌#網民報料，尋晚《#東張西望》再次發佈不實資訊，誤導市民由2月10號起，進入商場需要嘟安心出行，但警方喺同日較早時份已經澄清該法例喺2月24號至生效。

▌尋晚(12/2)《東張西望》節目尾聲時，主持 #吳幸美 表示網上流傳有人喺葵涌廣場因為無嘟安心出行而被票控，之後另一主持 #阮嘉敏 就引述警方聲明指，該等人士被票控係因為除罩食煙，而唔係無嘟安心出行，仲提醒市民「入商場要嘟安心出行呢個措施其實喺2月10號已經開始實行緊㗎喇」，吳幸美亦隨之附和道「係呀，所以大家記得留意返喇」。

▌不過，《東張》Quote嘅同一份警方聲明開宗名義就講明「進入商場需要使用『安心出行』的599F規例將於2月24日生效」，點解兩位東張西望主持會話相關措施喺10號已經生效？警方喺文末亦「呼籲市民不要誤信失實信息，更不應借機造謠生事，打擊全港同心抗疫的努力」，唔知 #TVB 又睇唔睇到？

警方聲明節錄（12/2/2022）：
//鑑於疫情嚴峻，警方在不同地點加強巡查及執法，以確保公共衛生安全和市民健康。過去一星期，警方在葵涌區票控在公眾地方除下口罩吸煙或沒有合適配戴口罩的違規人士，其間沒有市民因未有使用「安心出行」應用程式進入商場被票控。然而，相關規例，即《預防及控制疾病(規定及指示)(業務及處所)規例》（599F章），將於本月24日生效，敬請市民留意。//

▌相信好多讀者睇完都會成頭問號，政府公告唔係話599F章規例修訂喺2月10日生效嘅咩？我哋嘗試引用《香港01》嚟解釋，「生效」意思係商場已經喺2月10號被納入規管範圍，但強制嘟安心出行呢個動作就係24號先實行。不過政府如果推行新法會令公眾混亂同誤解，咁似乎代表佢喺法例講解方面做得幾差，話之你份法例包到天羅地網，寫到天衣無縫，普羅大眾睇唔明都係無用。

《01觀點：商場的安心出行要求為什麼引起誤解？》
//新聞稿交代四項規例修訂後，表示「上述規例將於二月十日生效」。坊間或許因而誤以為商場在2月10日起已經要使用「安心出行」，惟此語中的「生效」乃指「規例」生效，即商場在2月10日起已被包括在「599F」的表列處所，要使用「安心出行」的要求乃「日後」的事，按政府目前計劃亦即2月24日。//

▌《東張西望》標榜自己係資訊娛樂節目，社會對你嘅要求自然比普羅大眾高，你哋平時咁鍾意訪問專家，下次可以做吓功課先，再唔係可以報返娛樂新聞就算。