▌#TVB 頒獎典禮結果出爐後，唔少港中網民都四出征戰，攻擊唔合佢哋意嘅得獎者，除咗 #林峯堂妹、#狄龍個仔、#秦沛個女 之外，據中共旗下《環球時報🇨🇳》(Global Times)報導，#李佳芯 亦因為取得「最受歡迎電視女角色」而被中国網民「#網絡欺凌」。

▌李佳芯因為立場親近民主派，一直不為中国人所悅，早前喺中国網路流傳嘅《#萬千星輝頒獎典禮2021》某份入圍名單當中，李佳芯嘅名更被「河蟹」，因此，當中国網民得知李佳芯取得「最受歡迎電視女角色」後，紛紛「氣炸」同「暴動」，喺TVB官方微博中留言痛斥李佳芯為2019年「暴動」支持者同分離主義者，並續指TVB畀機會同獎項呢啲人，係踐踏中国人嘅紅線，需要抵制。據報導，呢類惡意及煽動仇恨嘅留言已經被TVB封鎖，有評論認為，此舉突顯TVB對待黃藍確實「一視同仁」。

▌李佳芯得獎感言
「冇諗過今晚有獎攞，對上一次企喺呢個台攞獎係3年前，3年前同依家好大分別，世界及個人都好大分別…呢個係我最想攞嘅一個獎，因為透過攞呢個獎，有一班真係無條件支持及愛我嘅人，包括多謝我家人，身邊好惜我及支持我嘅人，多謝台前幕後，尤其幕後好想趁機會多謝你哋，有時我拍劇爛面，你哋打燈就我啲皮膚，當然可以話係份內事，但拍到朝早收工，做多做少我看在眼裏係感受到，多謝觀眾，呢2年唔容易，大家都過得唔容易，多謝自己，每晚揞住自己個心，同自己講會好嘅、得嘅，每日就係咁樣過，繼續學習，繼續蛻變，會有好嘅Ali。」

▌李佳芯喺反修例期間，亦曾經受過中国網民欺凌，當時佢向傳媒表示：「我覺得我問心無愧，我一直都係咁㗎啦，點解你哋之前唔敢講，而家先嚟講？至於其他嘅嘢我唔評論，我又唔需要特別去解釋啲乜，亦都覺得唔需要。我覺得做藝人的而且確會有一啲尷尬位，如果係咁我唯有少啲喺微博Post嘢囉，但我仍會繼續喺我其他社交平台抒發自己嘅情感，唔會覺得有咩問題。」不過，當時TVB仍然雪藏咗佢一年。

來源：《香港01》、《環球時報》等